Apocalipsis 2:17 - Bible in Tzotzil de Chenalhó with Deuterocanon

¹⁷ Li boch'o oy xchiquine, ac'o ya'ibe smelol c'usi ch-albat yu'un Ch'ul Espíritu li jujutsob jch'unolajeletique. Li boch'o tstsal yu'un scotole ja' chcac'be sve'ic li manavaj ti mu'yuc boch'o sna' c'u x'elane, xchi'uc ta xcac'beic jbej unin saquil ton yo' bu ts'ibabil ach' sbi stuc ti mu'yuc boch'o yan xotquine. Ja' no'ox stuc xotquin li boch'otic chich'e, xayutoxuc li Cajvaltique’, uto”, xiyutun.

Tzotzil Zinacantan

¹⁷ Ti muchꞌutic chaꞌiic ti cꞌalal chichꞌ qꞌuelel li vun liꞌi yoꞌ bu chatsob abaique, acꞌu xchꞌunic mi oy cꞌusi ch-albatic yuꞌun li Chꞌul Espíritue. Ti muchꞌutic mu xicta o sbaic li ilbajinele, jaꞌ chcacꞌbe sveꞌic li mana tey nacꞌbile, mu xa cꞌusi yan tscꞌanic o ta sbatel osil. Ta xcacꞌbeic noxtoc jpꞌej saquil ton. Li ton ta xcacꞌbeique jaꞌ tey tsꞌibabil yachꞌbiic ti muc muchꞌu yan xojtiquine. Stuc noꞌox xojtiquinic ti muchꞌutic chcacꞌbee yoꞌ snaꞌic o ti jaꞌ jchꞌamaltac ta sbatel osile, xayutic ti Cajvaltic Jesucristoe”, xi xatsꞌiba echꞌel ―xiyut.

Bible in Tzotzil de Chamula

¹⁷ Ti buch'u oy xchiquine, ac'o ya'i lec ti va'i s'elan ta x'albat yu'un Ch'ul Espíritu ti jch'unolajeletique. Ti buch'u ta stsal yu'un scotole, ta xcac'be sve' ti maná nac'bil leque, xchi'uc ta xcac'be jbej saquil ton ti bu tsacbil jun ach' biil ti mu'yuc buch'u xojtiquine, ti ja' no'ox ta xojtiquin ti buch'u ta xich'e.”

Tzotzil San Andres

¹⁷ Li Chꞌul Espíritue jaꞌ jech ch‐acꞌbat snaꞌic scotol li buchꞌutic yichꞌojicun ta mucꞌ li butic oyique, acꞌo snopic mi jech tspasic eꞌuc. Li buchꞌutic ta spas ta canal scotole jaꞌ chcacꞌbe sveꞌic li manavaj li te ta vinajel ti muc buchꞌu xojtaquine, jech mu cꞌusi yan ta scꞌanic o sbatel osil. Ta xcacꞌbeic nojtoc jupꞌej saquil ton. Li ton ta xcacꞌbeique te tsꞌibabil yachꞌbiic muc buchꞌu yan xojtaquin. Jaꞌ noꞌox stuc xojtaquin li buchꞌutic chcacꞌbee yoꞌ jech ta snaꞌic ti jaꞌ jnichꞌnabic o sbatel osile, xayutic li Cajvaltique”, xi xatsꞌibabe echꞌel ―xiyut.

Tzotzil de Huixtán

¹⁷ Ti much'u stsal yu'un scotole, ja' chcac'be sve' ti manavaje ti ja' ti jtac yal tal ti vinajel ti mu'yuc much'u chile, hech mu'yuc palta cha'i sbatel osil. Chcac'be uc jun saquil ton yo' bu ts'ibabil ach' sbi ti stuc tsna' ti much'u chich'e, yu'un hech tsna' ti cu'un sbatel osil. Ho'oxuc ti ach'unojbucun ti jc'ope, a'yo me ava'yic ti c'alal hech chayac'boxuc ana'ic ti Ch'ul Espíritu cu'une, xayutoxuc”, xavut me, hech me chats'ibabun ―xiyutun ti Cajvaltique.

Apocalipsis 2:17 Iomraidhean Croise

Salmos 25:14

Li boch'o mero xchi'il sbaic xchi'uc Muc'ul Diose ja' li boch'o yich'oj ta muq'ue. Le'e ja' ch-ac'bat yotquin lec li c'usi chapanbil yu'un Diose.

Salmos 36:8

Lec noj xch'utic o ta sventa li ve'liletic te ta anae; ja' chavac'be yuch'ic li uc'um toj c'upil sbae.

Éxodo 16:33

Li Moisese jech laj yalbe li Aarone: —Tsaco tal junuc moch; te xavac' chanibuc boch li manavaje. Bat ac'o ta stojol li Muc'ul Diose, nac'o lec; Ja' sventa chavac'beic yil li amomnich'nabique —xut.

Proverbios 14:10

Li co'ntontique sna'oj stuc li c'usi svocole, xchi'uc ti c'alal xcuxet no'ox cha'ye, mu xac' ta yan.

Proverbios 3:32

Yu'un li Muc'ul Diose toj chopol chil li boch'otic chopolique; yan li boch'otic tuc' yo'ntonique lec co'ol yo'ntonic xchi'uc.

Isaías 56:4

Yu'un li Muc'ul Diose jech chal: “Li eunucoetic ti chchabiic li sc'ac'alil chacux avo'ntonique, ti ja' no'ox tsa'ic li c'usi ta jc'ane, ti ja' no'ox oy ta yo'ntonic o li c'usi jchapanoje,

Isaías 56:5

vu'un ta xcac'be lec yavilic te ta jch'ulna, xchi'uc te ta yut coraltonetic cu'un. Ja' x'ech' to slequil sbi chcac'beic jech chac c'u cha'al nich'naletic; ta xcac'be lec sbiic sventa sbatel osil ti mu xtu'p oe.

Isaías 62:2

Jech chilic scotol cristianoetic ta jujun banamil li coltael chavich'e; chilic scotol ajvaliletic li alequilal avutsilale, jech chlic avich' ach' abi; ja' stuc Muc'ul Dios chayac'bot.

Isaías 65:13

Ja' yu'un jech chayalboxuc li Cajvaltic Diose: “Li cajtuneltaque ta sta lec sve'elic; yan li vo'oxuque chavich' avocolic ta vi'nal. Li stuquique oy c'usi lec chuch'ic; yan li vo'oxuque chtaquij avo'ntonic. Li stuquique xcuxet no'ox yo'ntonic; yan li vo'oxuque chayalic o ta q'uexlal.

Isaías 65:15

Ta xcac' ti chopol chcom abiic ta stojol li boch'otic t'ujbilic cu'une, vu'un jtuc ta xlic culesoxuc. Yan li cajtuneltaque ta xcac'be ach' sbiic.

San Mateo 13:11

Itac'ov li Jesuse: —Yu'un li vo'oxuque ac'biloxuc xa ana'ic c'u x'elan chventainvan li Diose, ja' ti mu'yuc to'ox boch'o sna'e, pero li yantique mu x'ac'bat sna'ic.

San Juan 4:32

Itac'ov li Jesuse: —Oy lec jve'el, pero li vo'oxuque mu xana'ic c'u x'elan —xut.

1 Corintios 2:14

Yan li boch'o tojol cristianoetic no'oxe mu xc'ot ta yo'ntonic c'alal chcalbecutic li c'usitic ja' sventa Espíritu yu'un Diose. Bol lo'il no'ox cha'yic, yu'un mu xa'ibeic o smelol, yu'un tsc'an lec nopel ta sventa Ch'ul Espíritu.

Colosenses 3:3

Yu'un chamenoxuc xa ya'yel. Ja' xa cuxuloxuc ta sventa li Cristo ti junic xchi'uc Diose. Ja' te nac'al ta stojol li acuxlejalique.

Apocalipsis 14:3

Tsq'uejintaic jun ach' q'ueoj te yo' bu chotol li Diose, xchi'uc ta stojol li chanibique, xchi'uc ta stojol li chanib xcha'vinic (24) banquilaletique. Mu'yuc boch'o yan xu' chchan li q'ueoje. Ja' no'ox stuc xchanojic li chanib xvaxacvinic ta mil (144,000) icolic loq'uel ta stojol cristianoetic li' ta banamile.

Apocalipsis 19:16

Ts'ibabil sbi ta snatil c'u' xchi'uc ta yo', jech chal: “Ja' muc'ta Ajvalil yu'un scotol muc'tic ajvaliletic; ja' Jpasmantal yu'un scotol jpasmantaletic”, xi ts'ibabil.

Apocalipsis 2:11

Li boch'o oy xchiquine ac'o ya'ibe smelol c'usi ch-albat yu'un Ch'ul Espíritu li jujutsob jch'unolajeletique. Li boch'o tstsal yu'un scotole mu xbat yich' vocol ta xchibal velta lajel, xayutoxuc li Cajvaltique’, uto”, xiyutun.

Apocalipsis 2:7

Li boch'o oy xchiquine, ac'o ya'ibe smelol c'usi ch-albat yu'un Ch'ul Espíritu li jujutsob jch'unolajeletique. Li boch'o tstsal yu'un scotole ta xcac'be slo'ic li sat te' sventa cuxlejal sbatel osile, ja' ti te oy ta o'lol ts'unubaltic yu'un Diose, xayutoxuc li Cajvaltique’, uto”, xiyutun.

Apocalipsis 3:22

Li boch'o oy xchiquine, ac'o ya'ibe smelol c'usi chal Ch'ul Espíritu ta stojol li jujutsob jch'unolajeletique, xayutoxuc li Cajvaltique’, uto”, xiyutun.

Apocalipsis 3:6

Li boch'o oy xchiquine, ac'o ya'ibe smelol c'usi chal Ch'ul Espíritu ta stojol li jujutsob jch'unolajeletique, xayutoxuc li Cajvaltique’, uto”, xiyutun.