Apocalipsis 13:10 - Bible in Tzotzil de Chenalhó with Deuterocanon

¹⁰ “Li boch'o ja' sc'oplal chtic'at ta chuquel avu'unique ta ono'ox x'och. Li boch'o ja' sc'oplal chmilat ta espadae ta ono'ox xmilat”. Ta sventa li'i, tsc'an oy stsatsal yo'ntonic, tsc'an oy lec xch'unojel yo'ntonic li boch'o voc'bilic yu'un Diose.

Tzotzil Zinacantan

¹⁰ Ti cꞌalal xlaj cꞌotuc yeche, mi oy muchꞌu chtiqꞌue ta chuquele, acꞌu ochuc. Mi oy muchꞌu ta xmile ta espadae, acꞌu milatuc. Ti muchꞌutic xchꞌunojic li scꞌop Rioxe ti liꞌic to ta sba balamile jaꞌ tscꞌan ti chcuch yuꞌunic scotole. Jaꞌ tscꞌan ti jaꞌ noꞌox ta xchꞌunic ti chcuxiic ta sbatel osile.

Bible in Tzotzil de Chamula

¹⁰ “Ti buch'utic oy sc'oplal chuquel ta xbate, chuquel ono'ox ta xbat. Ti buch'utic oy sc'oplal espada ya'i xcham xlaje, espada ono'ox ta xve' yu'un.” Ti buch'utic ja' yu'untac ti Diose, sc'anuc xa no'ox yip yo'ntonic, junuc yo'ntonic xchi'uquic ti c'u s'elan c'otem ta ch'unel yu'unique.

Tzotzil San Andres

¹⁰ Mi oy buchꞌu avuꞌunic ti ta xtiqꞌue ta chuquele, acꞌo ochuc. Mi oy buchꞌu avuꞌunic ti ta xmile ta machitae acꞌo mileuc, te acꞌo lajuc. Jaꞌ yuꞌun scꞌan ti oy stsatsal avoꞌonic, joꞌoxuc ti avichꞌojic ta mucꞌ li Dios ti liꞌ to oyoxuc ta balumile, yoꞌ jech ta xcuch avuꞌunic mi ista scꞌacꞌalil ti chtal li vocole. Scꞌan ti chachꞌunic ti ta onoꞌox xacolic o sbatel osile.

Tzotzil de Huixtán

¹⁰ Ti much'u chchucvane ta ono'ox yich' chuquel stuc. Ti much'u chmilvane ta ono'ox xmilat stuc. Hech yu'un ti much'utic tspasic ti muc' ti Diose ti li'oyic ti balumile ti c'alal ti yorail ti hech vocole, tsc'an ti oy stsatsal yo'ntonic, tsc'an ti chch'unic ti ta ono'ox xcolic sbatel osile.

Apocalipsis 13:10 Iomraidhean Croise

Isaías 14:2

Ep cristianoetic ta yantic banamil ic'bil chbatic yu'un li israeletique; ta xchi'inic batel c'alal to ta slumalic; ta xiq'uic batel jech chac c'u cha'al smozoic te ta yosil li Muc'ul Diose. Chucbil chbat yu'unic ec li boch'otic ichucvanic to'ox batele; ta xlic spasic ta mantal ec li boch'otic i'uts'intavanic to'oxe.

Isaías 26:21

Yu'un li Muc'ul Diose ta stots tal ta spasubmantal; chtal yac'be stoj smulic li cristianoetic ta banamile. Li banamile chac' ta ilel scotol li ch'ich' malbile; mu'yuc tsnac' c'u yepal li boch'o milbilique.

Isaías 33:1

Toj abul aba, vo'ot li j'elec'ot ti mu'yuc c'usi elc'anbilot eq'ue, vo'ot ti ep c'usi apojoj batel ti mu'yuc c'usi pojbilot eq'ue. C'alal me ilaj avo'nton ta spojel batel scotol li c'usitic oye, ja'o chavich'be spacol ec.

Jeremías 15:2

Me jech chavich' jac'bele: ¿Bu chibatcutic u?, me xayutoxuque, jech xavalbe: jech chal li Muc'ul Diose: ‘Li boch'o sc'oplal chcham ta chamele, chcham o ta chamel; li boch'o sc'oplal chcham ta espadae, chcham o ta espada; li boch'o sc'oplal chcham ta vi'nale, chcham o ta vi'nal; li boch'o sc'oplal chucbil chbat ta yan banamile, jech chucbil chbat o’, uto.

Jeremías 43:11

Ja' ta xtal syavnaijesic li Egiptoe. Li boch'o sc'oplal ono'ox ta xchame ta xcham; li boch'o sc'oplal ono'ox chucbil chbat ta yan banamile chich' chuquel batel; li boch'o sc'oplal ono'ox milbil chchame chich' milel.

Lamentaciones 3:26

Ja' lec ti ac'o no'ox jmala ca'itic chiscoltautic stuc li Muc'ul Diose.

Habacuc 2:3

Ac'o me chjalij to li c'usi laj cac'bot avile, pero ta ono'ox xc'ot ta pasel, mu xa xjalij. Muc epalc'opuc. Ac'o me jal ta malael, malo me; yu'un mu alticuc no'ox, ta xc'ot ono'ox ta pasel.

San Mateo 26:52

Li Jesuse jech laj yalbe: —Tic'o ochel ta sna li avespadae. Li boch'o ta xac' espadae ja' jech ta espada ta xcham ec.

San Mateo 7:2

Yu'un ti c'u x'elan chatic'be smul achi'ilique, ja' jech chavich' tic'bel amulic ec. Ti c'u yepal chabisbe achi'ilique, ja' jech chabisbatic ec.

San Lucas 21:19

Me jun avo'nton chcuch avu'unique, chacolic.

Colosenses 1:11

Xchi'uc jech chatsatsubic ta sventa li svu'el ti toj ech'em slequile, jech ch-ayin lec smuc'ul avo'ntonic, jech chcuch avu'unic scotol li vocole.

Hebreos 6:12

Ja' mu jc'ancutic ti chach'ajubic ta spasel li c'usitic leque. Ja' tsc'an chachanbeic yo'nton li boch'otic ta sventa xch'unojel yo'ntonic, ta sventa smuc'ul yo'ntonic chich'ic li c'usi sc'oplal ono'ox ch-ac'batique.

Apocalipsis 1:9

Vu'un Juanun, jchi'il jbatic, co'ol chquich'tic vocol ta sventa li Jesucristoe, xchi'uc co'ol oy ta jventatic ta jchi'intic ta pasmantal, xchi'uc co'ol chcuch cu'untic li vocole. Li vu'une li' ay yaq'uicun ta jun biq'uit banamil cacal ta nab, Patmos sbi. Li' chuculun ta scoj li sc'op Diose, xchi'uc ta scoj ti laj calbe sc'oplal li Jesucristoe.

Apocalipsis 11:18

Liquem sc'ac'al yo'ntonic li cristianoetic ta jujun banamile, pero ic'ot xa sc'ac'alil chavac'be stojic ta sc'ac'al avo'nton. Laj xa sta yorail chachapan li boch'otic chamenique, xchi'uc laj xa sta yorail chavac'be smoton li avajtuneltac, ja' li j'alc'opetique, xchi'uc li boch'otic voc'bilic avu'un ti yich'ojicot ta muq'ue. Chavac'be smotonic c'alal ta muc' ta biq'uit, xchi'uc laj xa sta yorail chavules o li boch'otic la socbeic yo'nton li cristianoetic li' ta banamile”, xiic ta stojol.

Apocalipsis 14:12

Li'i tsc'an oy lec stsatsal yo'ntonic li boch'o voc'bilic yu'un Diose, ja' li boch'otic scotol yo'nton xch'unojbeic o li smantaltac Diose xchi'uc ti jun yo'nton xch'unojic o li Jesuse”, xi li j'almantale.

Apocalipsis 16:6

Yu'un li boch'otic la smalbeic xch'ich'al avu'untaque xchi'uc li avaj'alc'optaque laj xa avac'beic ch'ich' yuch'ic ec. Ja' jech stojol tsc'anic”, xi.

Apocalipsis 17:11

Li jti'vanej bolom ti ja' to'ox, ti ts'acal mu xa ja'uque, ja' senyail xvaxquibal ajvalil. Ja' xchi'il sbaic xchi'uc li vucubique; le'e oy ta sventa lajel.

Apocalipsis 17:8

Li jti'vanej bolom laj avile ja' to'ox, pero tana mu xa ja'uc. Ta xa xloc' tal ta natil xab sventa chbat ta lajel. Li jnaclumetic ta banamil ti mu'yuc ono'ox ts'ibabil sbiic ta vun sventa cuxlejal c'alal ilic li banamile chch'ay yo'ntonic, yu'un sna'ic ti ja' to'oxe, ts'acal mu xa ja'uc, pero ts'acal chloc' tal yan velta noxtoc.

Apocalipsis 2:19

Vu'une xcotquin li avabtelique xchi'uc ti ac'anojicune. Xcotquin noxtoc ti oy xch'unojel avo'ntonique, ti lec cha'abtejic cu'une, xchi'uc ti lec tsts'ic avu'unic scotole. Jna'oj ti ech'em to cha'abtejic cu'un jech chac c'u cha'al la'abtejic ta sliquebe.

Apocalipsis 2:2

Vu'une xcotquin li avabtelique; jna'oj ti tsots cha'abtejic ta jtojole, xchi'uc ti tsts'ic avu'unic vocole, xchi'uc ti mu xac'an xachi'inic li boch'otic chopolique. Jech noxtoc laj xa aq'uelbeic lec yabtelic li boch'otic jcholc'opetic scuyoj sbaique; laj avilic ti ja' no'ox ch-epalc'opojique.

Apocalipsis 3:10

Ta sventa ti laj achabi ta avo'ntonic ti laj calboxuc tsc'an chcuch avu'unic vocole, ja' no'ox jech ec li vu'une chajchabioxuc ti c'alal tsta yorail chcac'be svocol scotol li cristianoetic ta sbejel banamile ti c'alal chich' q'uelbel c'u x'elan yo'ntonique.

Apocalipsis 3:3

Vuleso me ta ajolic li c'usi laj ava'yic, xchi'uc ti c'u x'elan lachanubtasatic ta sliquebe. Ja' me ch'unic o. Suteso me avo'ntonic. Me mu xaq'uel abaique, ta xital ta atojolic jech chac c'u cha'al j'elec'; mu xana'ic c'usi ora chital.