Apocalipsis 12:9 - Bible in Tzotzil de Chenalhó with Deuterocanon

⁹ Jech ijipat o yalel tal li dragone, ja' li chon ta vo'onee, ja' li banquilal pucuje, ja' li Satanase. Ja' li boch'o tslo'la scotol cristianoetic ta sbejel banamile. J'ech'el ijipatic o yalel tal ta banamil xchi'uc li j'almantaletic yu'une.

Tzotzil Zinacantan

⁹ Ijipatic yalel tal ta jmoj liꞌ ta sba balamile. Voꞌne onox tey li chone, jaꞌ ti totil pucuje, ti Satanás sbie. Jaꞌ ti tsloꞌlo crixchanoetic ta sba balamile.

Bible in Tzotzil de Chamula

⁹ Laj yich' jipel loq'uel ta vinajel ti muc' ta tsajal jti'oval chon ta vo'nee, ja' ti banquilal pucuje, ti Satanás sbie, ti buch'u naca slo'la no'ox scotol ti jnaclejetic ti oy ta sjoylej banomile. Ti stuque xchi'uc ti xchi'iltaque, jipatic yalel talel ta banomil.

Tzotzil San Andres

⁹ Li tsajal chon schiꞌuc li schiꞌiltaque ijipeic o yalel talel liꞌ ta balumile. Li tsajal chone jaꞌ onoꞌox li chon ta voꞌonee, jaꞌ li banquilal pucuje, jaꞌ li Satanás sbie. Jaꞌ li ta sloꞌlo scotol li crixchanoetic liꞌ ta balumile.

Tzotzil de Huixtán

⁹ Hech yu'un j'ech'el itenatic loq'uel yal tal ti vinajel ti dragone laj quil. Mu xa xu' ch-ochic o. Ja' ti chon ono'oxe ti yac'oj sba tslo'la scotol crixchanoetic ti balumile, ja' ti totil pucuje, ja' ti Satanás sbie. Hech j'ech'el itenatic yal tal ti balumil xchi'uc ti abatetic yu'une.

Apocalipsis 12:9 Iomraidhean Croise

Génesis 3:1

Li quiletel chon ta vo'onee ja' no'ox stuc toj manya c'usi tspas xchi'uc sbijil ta scotol yantic chonbolometic ti pasbil yu'un Muc'ul Diose. Ja' yu'un jech la sjac'be li antse: —¿Me ta melel laj yalboxuc Muc'ul Dios mu xu' chalo'beic sat jpetsuc li te'etic li' ta ts'unubaltique? —xi.

Génesis 3:13

Li Muc'ul Diose jech la sjac'be ec li antse: —¿C'u yu'un ti jech laj apase? —xut. Itac'ov li antse: —Ja' la slo'laun li chone jech la jlo' —xi.

1 Crónicas 21:1

Pero li Satanase lic scontrain li israeletique, lic yac'be sna' David ti ac'o spas tsactsacvun ta stojol li xchi'iltaque.

2 Crónicas 18:21

Itac'ov: “Chiloc' batel; vu'un ta xbat cac'be epalc'op ta yeic li j'alc'opetic yu'un ajvalil Acabe”, xi. Li Muc'ul Diose jech laj yal: “Lec oy, bat paso cha'e; lec xu' avu'un”, xut.

Salmos 109:6

Ac'o ta chapanel ta stojol li boch'o chopol yo'ntone; ja' ac'o tic'batuc smul yu'un li jpojvanej yu'une.

Isaías 14:12

“Muc'ta c'anal, vo'ot ti xaxojoban no'ox ta sacubbale, ¿c'uxi labaj yalel tal ta vinajel? ¿C'uxi laj avich' jipel yalel ta banamil vo'ot ti alajesojbe to'ox stsatsal li jujun banamile?

Isaías 27:1

Li Muc'ul Diose ja'o yorail chac'be svocol li Leviatane,, ja' li chon ti xquilet chanov ta anile, ti xotoj sba ta banamile. Ja' ta smil o ta yespada ti toj xi'bal sbae, ti toj muq'ue, xchi'uc ti toj tsotse. Ta smil noxtoc li dragón te oy ta nabe.

Isaías 65:25

Li oq'uil xchi'uc ch'ium chijetique jmoj chve'ic batel; li leone chlic slo' jobel jech chac c'u cha'al vacax; li quiletel chonetique mu'yuc xa xi'bal sbaic. Me jutuc mu'yuc vocol, mu'yuc c'usi chopol te yo' bu li ch'ul vits cu'une”, xi li Muc'ul Diose.

Ezequiel 28:16

Ta sventa ti toj ep lamanulaj, lachonolaje, jech lic apas aba ta simaron, jech laj ata o amul. Ja' yu'un ta jipot loq'uel ta jtojol, vo'ot ti xaco'laj achi'uc querubín te yo' bu oy li lequil tonetic ti xleblajet jech chac c'u cha'al c'oq'ue.

San Mateo 13:39

Li cajcontra ti la sts'un li chopol jobele, ja' li pucuje. Li yorail tuch' trigoe ja' li slajebal c'ac'ale. Li jtuch'trigoetique ja' li j'almantaletique.

San Mateo 24:24

Yu'un ta to xtal li boch'otic ta scuy sbaic ta Cristoe, xchi'uc li boch'o tscuy sbaic ta j'alc'opetique. Ta spasic muc'tic sq'uelubiltac, yu'un jech ta slo'laic o li cristianoetique. Ti xu'uc yu'unique, tsc'an tslo'laic ec li boch'otic t'ujbilic yu'un Diose.

San Mateo 25:41

“Jech chcalbeic noxtoc li boch'otic te oyic ta jts'ete: ‘Voc'o abaic ta jtojol, yu'un toj chopoloxuc. Batanic ta c'oc' sbatel osil. Ja' li c'oc' ti chapanbil cu'un sventa li banquilal pucuje xchi'uc li its'inal pucujetique.

San Mateo 4:1

Li Jesuse ja'o i'ic'at batel yu'un Espíritu ta xocol banamil yu'un ac'o q'uelbatuc yo'nton yu'un li banquilal pucuje.

San Mateo 4:10

Ja' yu'un li Jesuse jech laj yalbe: —Batan, Satanás. Yu'un jech ts'ibabil ta sc'op Dios: ‘Ja' no'ox xavich'ic ta muc' stuc li Cajvaltique, ja' li Dios avu'une, ja' no'ox xaquejan aba ta stojol’, xi ts'ibabil —xut.

San Mateo 4:5

Li pucuje laj yic' batel ta ch'ul lum li Jesuse; te c'ot sva'an ta mero sjol ch'ulna.

San Mateo 4:8

Li pucuje laj yic' batel ta jun bats'i toyol vits noxtoc li Jesuse. Te laj yac'be yil scotol svu'elic li ajvaliletic li' ta banamile xchi'uc li slequilal yutsilalique.

San Lucas 10:18

Li Jesuse jech laj yal: —Ta melel laj quil sjislej yalel tal ta banamil jech chac c'u cha'al sacsevul li banquilal pucuje.

San Lucas 13:16

Li ants li'i ti ja' smomnich'on Abrahame, xvaxaclajunebal (18) xa jabil tsacbil ta chamel yu'un li pucuje, ¿me mu stac' ta jcolta ta sc'ac'alil ta jcux co'ntontic? —x'utatic yu'un li Jesuse.

San Lucas 22:3

Li banquilal pucuje i'och ta yo'nton li Judase, ja' li Iscariote yan sbie. Ja' jun li lajchab yajchanc'op Jesuse.

San Lucas 22:31

Li Cajvaltique jech laj yalbe li Simone: —Simón, Simón, a'yo ava'ay. Li pucuje ay xa sc'an tal ta stojol Dios ti ac'o cuchatanic batel ta ic' jech chac c'u cha'al solil trigoe.

San Lucas 8:12

Li bec' trigo ic'ot ta bee, ja' li boch'otic ta xa'yic sc'op Diose. Pero ta ora ta xtal li pucuje, ta sloq'uesbe ta yo'ntonic li sc'op Dios laj ya'yique, yu'un jech mu xch'unic, jech mu xcolic.

San Juan 12:31

Li' ta orae ta xa xich' chapanel li cristianoetic li' ta banamile. Li' ta orae ta xa xich' jipel loq'uel li banquilal jpasmantal li' ta banamile.

San Juan 14:30

“Mu xa xu' jal ta jc'opanoxuc, yu'un ta xa xtal li banquilal jpasmantal li' ta banamile, pero mu'yuc c'usi xu' yu'un chispasbun.

San Juan 16:11

Ta xac'be sna'ic ti oy chapanel yu'un li smulique, yu'un li banquilal jpasmantal li' ta banamile chapanbil xa smul sventa sbatel osil.

San Juan 8:44

Li vo'oxuque ja' atotic li pucuje, ja' yu'un ja' chac'an chapasic li c'usi oy ta yo'nton stuque. Yu'un li stuque jmilvanej ono'ox ta sliquebal. Mu ono'ox sc'an o li c'usi melele; mu'yuc c'usi melel oy ta yo'nton. C'alal me chal c'usi mu meleluque, yu'un ja' tspas li c'usi stalele, yu'un ja' j'epalc'op o, ja' mero sme' j'epalc'op.

Hechos 26:18

Vo'ot chc'ot avic'be satic, yu'un jech xu' chtalic ta sac osil, jech xu' tscomtsanic li ic' osile. Jech xu' ta xloq'uic ta sc'ob li Banquilal Pucuje; ja' chlic ochicuc ta sc'ob li Diose. Jech xu' ta xlic xch'unicun, jech ta spasbatic perdón yu'un smulic. Jech xu' chich'ic ec li c'usi sc'oplal chich'ic li boch'otic voc'bilic xa cu'une’, xiyutun li Cajvaltique.

Hechos 5:3

Li Pedroe jech laj yalbe li Ananiase: —Ananías, ¿c'u yu'un laj avac' ochuc ta avo'nton li Satanase, yu'un la'epalc'opoj ta stojol li Ch'ul Espiritue? Yu'un muc ts'acaluc laj avac' li stojol avosile.

Romanos 16:18

Yu'un li boch'otic jech tspasique ma'uc yabtel Cajvaltic Jesucristo tspasbeic. Ja' no'ox tspasic c'usi tsc'an yo'nton stuquic. Jech tslo'laic ta sventa sc'opic li boch'otic mu'yuc to stsatsal yo'ntonique, yu'un toj lec ya'yel li c'usitic chalique.

Romanos 16:20

Li Dios ti chac' jun co'ntontique ja' ta xpech'boxuc ta teq'uel li banquilal pucuje, chayac'boxuc ta yolon avacanic. Ac'o xc'uxubinoxuc o acotolic li Cajvaltic Jesucristoe.

2 Corintios 11:14

Mu me xch'ay avo'ntonic yu'un. Yu'un li banquilal pucuje toj lec sna' sc'atajes sba ec; xco'laj xa xchi'uc yaj'almantal Dios tscuy sba.

2 Corintios 11:3

Ja' chixi' me chalo'laatic jech chac c'u cha'al ilo'laat yu'un chon li Evae, yu'un toj bij c'u x'elan ilo'lavan li chone. Jech chlic yanijuc avo'ntonic, mu xa junuc avo'ntonic ta stojol li Cristoe.

2 Corintios 12:7

Pero ti c'u cha'al muc toj muc'uc chcac' jba ta sventa li c'usi toj jun yutsil li'ac'bat quile, jech li'ac'bat tsots vocol ta jbec'tal. Ja' yabtejeb li banquilal pucuje; ja' laj yilbajinun. Ti jech ic'ot ta pasele, yu'un jech mu ech'emuc muc' chic'ot.

2 Corintios 2:11

Yu'un jech mu xcac'betic spas canal ta jtojoltic li banquilal pucuje, yu'un jna'ojtic xa li c'usi oy ta yo'nton tspase.

2 Corintios 4:4

Ti jech mu xch'unique, yu'un ja' macbil yo'ntonic yu'un li yajval banamile. Yu'un jech mu x'och xojobal ta stojolic li Lequil A'yej ta sventa li Jesucristo ti jun oyic xchi'uc Diose.

Efesios 4:14

Jech muc xa co'oluticuc jech chac c'u cha'al ololetic ti talbat no'ox yo'ntonique, ti c'usiuc no'ox svontolch'unic jech chac c'u cha'al c'usi cuchbil no'ox ta iq'ue. Jech mu xcac' jbatic ta lo'lael yu'un li boch'otic lec sna'ic c'u x'elan chlo'lavanique, ti ch'ayemic ta bee.

2 Tesalonicenses 2:3

Me jutuc mu me boch'o xlaj ta lo'lael avu'unic. Yu'un ba'yuc tsta yorail oy boch'o chchibaj yo'ntonic, xchi'uc ta xlic jun ven chopol vinic ti ja' sve'el ch'ayele.

1 Timoteo 2:14

Xchi'uc mu ja'uc ilaj ta lo'lael li Adane; ja' ants ti ilaj ta lo'laele. Ta sventa ti ilaj ta lo'laele, jech te la sta o smul.

2 Timoteo 3:13

Yan li boch'otic toj chopolique xchi'uc li jlo'lavanejetique, yo'to ech'em ta soquic o batel. Ta xlo'lavanic, pero jech lo'labil stuquic ec.

Hebreos 2:14

Jech chac c'u cha'al oy xch'ich'al, oy sbec'tal li xnich'nabtaque, ja' no'ox jech ic'ot ec li stuque. Ja' yu'un c'alal ichame, la slajesbe o stsatsal li boch'o sventainoj lajele, ja' li pucuje.

1 Pedro 5:8

Bijanic me, viq'uiluc me asatic yu'un li avajcontraique, ja' li pucuje, yu'un xjoyet no'ox jech chac c'u cha'al león ti x'avet no'ox ta sa'el li boch'o tsc'an tsti'e.

1 Juan 5:19

Ta jna'tic ti xnich'nabutic xa li Diose, xchi'uc ti oyic ta sc'ob pucuj scotol li yan cristianoetic li' ta banamile.

Judas 1:9

Mu ja'uc jech la spas li banquilal j'almantal Miguel c'alal la stsac sbaic ta c'op xchi'uc pucuj ta sventa boch'o chu'uninbe sbec'tal li Moisese. Li Miguele mu'yuc c'usi chopol laj yal; ja' no'ox jech laj yalbe: “Ac'o xchapanot stuc li Cajvaltique”, xut.

Apocalipsis 12:12

Ja' yu'un cuxetuc no'ox avo'nton, vinajel, xchi'uc vo'oxuc ti te oyoxuque. Ja' toj abul abaic vo'oxuc ti te to nacaloxuc ta banamil xchi'uc ta nabe, yu'un iyal o tal ta atojolic li banquilal pucuje. Ilinem ta ora, yu'un sna' ti mu xa jaluc ch-abteje”, xi.

Apocalipsis 12:3

Ta ora ivinaj yan senyail noxtoc ta vinajel. Laj quil te cotol jcot tsajal chon, dragón sbi; oy vucbej sjol, lajuneb xulub. Oy scoronail svucubal li sjole.

Apocalipsis 12:7

Ts'acal laj quil muc'ta pleito ta vinajel. Li banquilal j'almantal Miguele xchi'uc li j'almantaletic yu'une la spasic pleito xchi'uquic li dragone. Li dragone tsots la spasic xchi'uc li j'almantaletic yu'une.

Apocalipsis 12:8

Pero muc xu' yu'unic, muc xa x'aq'ue comicuc te ta vinajel.

Apocalipsis 13:14

Ta sventa li muc'tic sq'uelubiltac stsatsal i'ac'bat spas ta svu'el li ba'yuc jti'vanej bolome, jech la slo'la o li jnaclumetic ta banamile. Jech lic spas ta mantal scotol cristianoetic ta banamil ti ac'o spasbeic sloc'obal li ba'yuc jti'vanej bolom ti i'ac'bat espada ta jbej sjole, ti icha'cuxie.

Apocalipsis 16:14

Li pucujetic iloc'an ta yeique xu' yu'un tspasic sq'uelubil stsatsalic. Ja' chbat stsobic tal scotol ajvaliletic ta sbejel banamil sventa ac'o spasic muc'ta pleito ta sc'ac'alil yu'un li Dios ti ech'em svu'ele.

Apocalipsis 18:2

Tsots i'avan, jech laj yal: “Ivuc' xa, ivuc' xa li muc'ta lum Babiloniae. Ic'ataj xa ta sna pucujetic li slumale. Ja' xa te tstsob sbaic batel li pucujetic ti toj chopolique; ja' yavilic chc'ot li pucujil mutetic chalique.

Apocalipsis 18:23

Mu'yuc xa bu xojoban candiletic te ta atojol, xchi'uc mu'yuc bu chich' pasel q'uin nupinel noxtoc, ac'o me ech'em to'ox xu' yu'unic li' ta banamil li jmanulajeletic, li jchonolajeletic avu'une. Yu'un ep laj alo'la cristianoetic ta jujun banamil ta scoj ti ep c'usi achanoj spasele”, xi li j'almantale.

Apocalipsis 19:20

Li jti'vanej bolome co'ol itsacatic xchi'uc li jlo'lavanej j'alc'op yu'un ti la spas ep sq'uelubil stsatsal te ta stojole, ti la slo'la o scotol li boch'otic yich'ojbeic smarcail li ba'yuc jti'vanej bolome, xchi'uc ti laj yich'beic ta muc' sloc'obale. Xchibalic cuxul ijipatic ochel ta muc'ta c'oc' tsanbil ta azufre.

Apocalipsis 2:13

Vu'une xcotquin ti bu nacaloxuque; jna'oj ti te nacaloxuc yo' bu yac'oj xchotleb li banquilal pucuje. Pero te to acuchojbicun o li jbie; mu'yuc bu xamuc ta avo'ntonic ti ach'unojique. Muc xaxi'ic o c'alal imilat te yo' bu oyoxuc li cajtunel Antipas ti jun yo'nton itun te yo' bu yac'oj xchotleb li banquilal pucuje.

Apocalipsis 2:24

Vo'oxuc ti te oyoxuc ta Tiatira ti mu'yuc ach'unojic li chopol chanubtasel le'e, xchi'uc ti mu'yuc ach'unojic noxtoc ti chalic tsc'an ta jna'betic c'u x'elan yo'nton li Satanase, mu'yuc yan icatsil chacac'boxuc.

Apocalipsis 2:9

Vu'une xcotquin li avocolique xchi'uc li ame'onalic ta scoj vocole, pero jc'ulejoxuc chquil. Xchi'uc jna'oj noxtoc ti chchopolc'opoj ta atojolic li mero judioetic scuyoj sbaique. Pero ta melel mu ja'icuc. Ja' sna banquilal pucuj c'otemic.

Apocalipsis 20:10

Ja' no'ox jech ec li banquilal pucuj ti la slo'la scotol cristianoetique, ijipat ochel ta muc'ta c'oc' tsanbil ta azufre, ja' te yo' bu jipbilic ochel li ba'yuc jti'vanej bolome xchi'uc li jlo'lavanej j'alc'op yu'une. Jech ta c'ac'al ta ac'ubal te chich'ic o vocol sbatel osil.

Apocalipsis 20:8

Jech bat slo'la scotol cristianoetic ta xchanjotal xchiquin banamil, ja' li Gog xchi'uc Magogue. La stsobic tal scotol sventa chtal spasic pleito. Bats'i ep italic jech chac c'u cha'al yi' ta ti'nab.

Apocalipsis 3:9

Ja' yu'un a'yo ava'yic, ta xcac'boxuc ta ac'obic li nail tsobobbail yu'un banquilal pucuje, ja' li boch'otic chalic ti ja' judioetique pero ma'uc; ja' no'ox ch-epalc'opojic. Ta xcac' ti ac'o tal squejan sbaic ta atojolique, yu'un jech ac'o sna'ic ti ta melel c'anbiloxuc cu'une.

Apocalipsis 9:1

C'alal la sjupan yoq'ues li yo'bal j'almantale, laj quil bajem tal ta banamil jbej c'anal. Ja' i'ac'bat sllavial li natil xabe.

Apocalipsis 9:20

Pero li cristianoetic ti c'u yepal cuxul icomic ta scoj li vocol le'e, me jutuc muc sutes yo'ntonic. Muc scomtsanic o yich'el ta muc' li c'usitic pasbil ta sc'obique. Muc scomtsanic yich'el ta muc' li pucujetique xchi'uc li sloc'obal sdiosic pasbilic ta c'anal taq'uin, ta saquil taq'uin, ta cobre, ta ton, ta te', ti mu xilic osile, ti mu xa'yic c'ope, ti mu xanovique.