Números 18:1 - Bible in Tzotzil de Chamula

¹ Ti Diose xi laj yalbe ti Aarone: “Ti vo'ot xchi'uc ti anich'nabe, jmoj xchi'uc ti jvoc' nitilulil yu'un ti Levi ti ja' ats'unubaltaque, mi oy c'usi mu lecuc ta xc'ot ta ch'ulnae, cajal me ta xc'ot ta abaic. Yu'un ja' no'ox vo'ot xchi'uc ti anich'nabe, cajal ta xc'ot ta aba mi oy c'usi mu lecuc ta xc'ot ta pasel yu'un ti avabtelic ti jech ochemoxuc ta paleale.

Bible in Tzotzil de Chenalhó with Deuterocanon

¹ Li Muc'ul Diose jech laj yalbe li Aarone: “Li vo'ot xchi'uc anich'nabtaque, xchi'uc li yantic achi'iltac ti co'ol smomnich'naboxuc Levie, vo'oxuc chcom ta aventaic me oy c'usi mu lecuc chc'ot ta pasel avu'unic te ta ch'ulna pasbil ta nucule. Me oy chopol chc'ot ta pasel avu'unic li avabtelic ta paleal xchi'uc anich'nabtaque, vo'oxuc no'ox chcom ta aventaic achi'uc anich'nab.

Números 18:1 Iomraidhean Croise

Éxodo 28:38

Va'i un, tey chucul o ta sti'ba ti Aarone. Jech ti Aarone, cajal ta xc'ot ta sba smulic ti israeletic ti c'alal oy bu mu lecuc ta xbat yu'unic ti c'alal ta xaq'uic ti ch'ul matanale. Ta sventa ti jech chucul ta sti'ba ti pech-pech oroe, ja' to jech ta stsac smoton ti Diose.

Isaías 53:11

C'alal mi ech' xa ox ta stojol ti mu albajuc vocolajele, ja' to ta xlic sac jamtajuc ti osil banomil ta xa'ie, laj yil ta sq'uelel ti mu'yuc c'usi sna' ta j'ech'ele. Ti lequil yajtunel Diose, ep buch'u ta sta scolel yu'un, ja' ti laj sbainbe ta xcuchbel ti smul scolo'ique.

Isaías 53:6

Yu'un jcotoltic lijch'ayotic ta be jech c'u cha'al junuc chij. Laj jtamtic batel ta jujun ti jbetic ti c'u s'elan xal ti co'ntontique. Ja'uc ti Dios une laj scajanbe ta sba scotol ti jmul jcolo'tique.

Ezequiel 4:4

“Ta xapuch'an aba ta stuq'uil ats'et c'ob un. Ta xalaman ta aba smul scolo' ti jteclum Israele. Jech puch'ul ta xacom lamal ta aba ti smul scolo'ique.

Levítico 10:17

—¿C'u cha'al mu teyuc no'ox laj ati'ic ti c'usi laj yich' svocol ta scoj mulil ti bu tuc'ulanbil leque? Yu'un ja' jun matanal ti tsots sc'oplal ta j'ech'ele ti laj yac'boxuc ti Diose yo' jech ta xatabeic ti ch'aybil ta xc'ot smul scotolic ti israeletic ta stojol ti Diose.

Levítico 22:16

Mi ja'uc ta scoj smulic ti cajal ta xcom ta sbaic ti xchopolalic ta stunel slajesel ti c'usi ts'uiltasbile. Ti vu'un Ajvalilune laj xa jt'ujic loq'uel yo' ta xac' sba ta jtunel.”

Levítico 22:9

“Albo ya'iic ti c'otuc ta pasel yu'unic ti jc'optaque, ti mu jutebuc cajaluc ta xcom ta sba ti smulic ti mu xc'ot ta pasel yu'unique. Ti jech taj une, mu xchamic. Yu'un vu'un Ajvalilune ti laj jt'ujic loq'uel yo' ta xac' sba ta jtunele.

Números 14:34

Yu'un ti cha'vinic c'ac'al sjalil laj amucul chajic ta q'uelel ti lume, xi s'elan ta xc'ot ta atojolic ti tsitsel cu'une. Yu'un ti cha'vinic c'ac'ale, ta spas jujun jabil, ja' jech xana'ic ti mu lecuc ti ja' no'ox ta xacontrainicune.

Números 16:10

Ti Diose loc' ayan ta yo'nton ti ta sc'an ti nopol oyot ta stojole xchi'uc ti jvoc' achi'iltac levitaetique. ¿C'u cha'al ya'yel avi tana le' une ti juteb ta avo'nton ta xa'och ava'i ta paleale?

Números 17:13

Yu'un scotolic ti buch'u ta xnopajic ech'el ta xch'ulna ti Diose, ta xchamic. ¿Mi yu'un ta xc'ot ta pasel ti ta xijchamotic jcotoltique?”

Números 17:3

Ja'uc ti namte'il ti ta xc'ot yu'unic ti jvoc' snitilultac ti Levie, ja' xatsacbe sbi ti Aarone. Yu'un tsots sc'oplal ti oyuc namte'il yu'unic ti jujun banquilaletic yu'un ti jujuvoq'ue.

Números 17:7

Jech ti Moisese laj yac' ti namte'iletic ta stojol ti Dios ta Axibalna yu'un ti tratee.

Números 18:11

“Ja' jech xtoc ti matanaletic ti jelavem stunel ta j'ech'el ti laj yac'beicun ti israeletique, ta xcac'bot avich' xchi'uc ti avalab anich'nab ti oy ta atojole. Taje, bejel ta xcom o ta jbel ti c'usi tsots albile. Buch'uuc no'ox ti avuts' avalal ti mu'yuc soquesoj sbaic xchi'uc jtosuc ti albil sc'oplal ti mu staq'ue, xu' ta sti'ic ec.

Números 3:6

“Ic'o talel ti jvoc' snitilultac ti Levie, ti ac'o taluc sva'an sbaic ta stojol ti pale Aarone yo' jech ta xac' sbaic ta tunel yu'un.

Deuteronomio 10:8

Ja' o me c'ot ta pasel un c'alal ti Dios lic st'uj snitilultac ti Levie, ti ja'icuc ta xich'ic batel xcaxail ti trate yu'un ti Diose, ti oyicuc ta stojol yo' jech ta xtunic ta sva'anel sbaic ta yaq'uel ti lequilal ta sventae, ti jech to syaquil ta spasic tana li'e.

Hebreos 13:17

Ch'unic pasel ta mantal yu'un ti buch'u ta sbijubtasoxuque, ti buch'u ta xchanubtasoxuque. Yu'un ti stuquique sbainojic ta xchabiel ti ach'ulel avanimaique, ja' ti sna'ic lec ta x'ich'bat ye sti'ic yu'un ti Diose. Mu yauc c'uxuc xava'i ta spasel ti lequil abtele. Yan mi mu jechuque, mu'yuc c'usi ta xataic unbi.

Hebreos 4:15

Yu'un ti Banquilal Pale cu'untique ta xc'uxubaj yo'nton yu'un ti jvocoltic ta scoj ch'abal ti yipal cu'untique. Yu'un ti stuque laj ya'i c'u s'elan ti vocol jech c'u cha'al ta xca'itique. Ja' no'ox un, ti stuque mu'yuc x'ech' xjelav ta stael ti smule.

1 Pedro 2:24

Ti Cristoe laj sbain ta sbec'tal stuc ti jmultic c'alal cham laj ta curuse, yo' jech ta xlaj x'ech' sc'oplal ti mulil oy ta jtojoltique, yo' jech ta jtamtic ta spasel ti c'usi oy smelol stuq'uile. Yu'un ta sventa ti yayij ti Cristoe, laj ata acolelic yu'un.

Jueces 17:12

Jech ti Micaíae laj stic' ta yajpale, com nacluc ti bu taje.