Jeremías 2:7 - Bible in Tzotzil de Chamula

⁷ Laj quiq'uic talel ta ve'ebal banomil li'e, yo' ta stun ta slajesic ti sat te'etic yu'une, xchi'uc ti c'usitic lec ta xloc' x'ayane. Latalic ec un, c'ajomal no'ox laj asoquesic ti jlum jbanomile. Ta acojic, lic ibuc co'nton ta stojol ti muc' ta lum li'e, ti c'otem ta cu'une.

Bible in Tzotzil de Chenalhó with Deuterocanon

⁷ Vu'un laj quic'oxuc tal li' ta yaxal banamil, yu'un ac'o ave'ic li c'usitic chloq'ue, li c'usitic toj lequic chac' sate; pero vo'oxuc tal asoquesic li cosile, laj abolibtasic o li jbanamile.

Jeremías 2:7 Iomraidhean Croise

Nehemías 9:25

Laj yu'ninic xtoc jteclumetic ti lec bajal ta moque, ti ve'ebal banomile, xchi'uc naetic ti nojic lec sbeel ta c'usiuc no'oxe, ti joq'uetique, ti yavil ts'unubal uvae, ti yavil ts'unubal olivo te'e, xchi'uc ti yan lo'bolal te'etique, ti ve'ic uch'ubajic ti bu xa c'alal xal ti yo'ntonique, ti jubic ta j'ech'el ta sc'upinel ti spajeb yutsilal slequilal avo'ntone.

Nehemías 9:26

“Ja'uc le' une, toyobba batic. Lic scontrainicot. Laj sbajic ti oy c'usi jbel tsots albil avu'une. Laj smilic ti avaj'alc'optac xtoque, ti c'alal jamal albatic ti oy c'usi chopol ta spasique, xchi'uc ti albatic ti suticuc talel ta atojole. Soc ajol yu'unic ta j'ech'el.

Isaías 19:25

Yu'un xi ta xal ti Dios ti scotol xu' yu'une: “Ta jva'an jba ta yac'bel ti yutsilal slequilale. Ta jva'an jba ta stojol ti Egipto ti c'ot ta jlumale, ta stojol ti Asiria ti laj cac'be xch'ulel yanimae, xchi'uc ta stojol ti Israel ti ja' cu'untaque.”

Jeremías 16:18

Yu'un ba'yel ta xcac' atojic lec ti c'usi chopol laj xa apasique, xchi'uc ti amulique. Laj asoquesic ti cosil jbanomil yu'un ti j'ac'-ib-o'nton chamem loc'obbailetique. Ta scotol ti banomil laj cac'boxuc ti c'ot ta arextoic cu'une, laj apasic ti c'usi mu jc'an jq'uelbe sate.”

Jeremías 3:1

Ti Diose xi ta xale: “Mi oy jun vinic ta sutes ti yajnile, mi malij ta yan ti ants laj sbaje, ti sba vinique mu xu' ta xcha'ic'. Ti jech taje, mu ts'icbaj lec ta xa'iic ti jteclume. Ja'uc ti vo'ot une, Israel, xloc' x'och ti avajval yu'unic ta c'upinele. Tana une, ta to xasut ava'i talel ta jtojol un. Ti vu'un Diosune, mu lo'iluc no'ox ma' taje.

Jeremías 3:2

Q'uelo batel avil ti c'an t'ajan stselejtique, xi xatuc'ulan quic leque: ¿Mi oy to xana' ti mu'yuc c'otemot ta spasel abolil teye? Xachotet ta be ta xamala ti buch'u ta xavac' aba ta c'upinel xchi'uque, co'ol s'elan jech c'u cha'al jun árabe vinic ti chotol ta sbajtical banomil ta xpa'ivane. Laj xa ats'ile ti jteclum ti laj avac' aba ta c'upinele, xchi'uc ti yan ti c'usi chopol ta xapase.

Jeremías 3:9

Mu ta vocoluc c'ot ta pasel ti lic socuc yu'un ti muc' ta lume. Yu'un yanij ta j'ech'el ti sjol yo'ntone. Lic snijan xchiman sba ta yich'el ta muc' ti loc'tabil tonetique, xchi'uc ti buyuc no'ox tec'ajtic ti te'etique.

Jeremías 32:23

C'alal ochic talel ta jteclum li' une, laj yu'ninic un. Mu'yuc laj yaq'uicot ta venta. Mi ja'uc laj xch'unic ta spasel ti c'u s'elan laj atojobtase, mi ja'uc ti c'u s'elan laj avalbe ya'iique. Jech o xal un, laj atacbe talel ta stojol ti cuxul j'ilbajinvanej vocole.

Jeremías 32:30

Ta sliquebal ono'ox ti lum Israele, xchi'uc ti Judae, yac'ojbeic yipal ta spasel ti c'usi mu lecuc ta xquil. Mu'yuc yictaoj sbaic ti israeletic ta soquesel co'nton yu'un ti loc'obbailetic ti laj smeltsanic ta sc'obique. Jech xcal ma' ti vu'un Diosun une.

Ezequiel 20:24

Yu'un mu'yuc xc'ot ta pasel yu'unic ti jmantaltaque. Laj svalopatinic comel ti oy c'usi jbel tsots albil sc'oplal cu'une, xchi'uc laj soquesbeicun sc'oplal sc'ac'alil ti cuxob o'ntonale. T'ojol o satic ta stojol ti loc'obbail diosetic yu'un ti stot sme'ique.

Ezequiel 20:28

C'alal ochic batel ta banomil cu'un ti jbel sc'oplal ta xcac'beique, naca to no'ox laj staic ta ilel toyol stselej mi jun limlim te'. Lic yaq'uic ta anil milbil matanal ti bu taje. Yepal no'ox laj soquesbeicun co'nton yu'un ti matanale, naca yac'bel no'ox yu'unic ti muil momoletique, ti matanal vinoe.

Ezequiel 20:6

Ti jech c'ac'al taje, laj jva'an jba ta yalbel ya'iic ti ta jloq'uesic balel ta Egiptoe, ta yiq'uelic ech'el ta jun muc' ta lum ti laj jsa'ilan bu co'ol s'elan vo' ta xbein ti chu' vacaxe, ti ajapome, ¡ti stuc xa no'ox muc' ta lum c'upil sba ta scotole!

Ezequiel 23:35

“Jech o xal xi ta xcal ti vu'un Diosune: Ti laj atenun ta avo'ntone, ti laj avalopatinun comele, ta xavich' avocol ta tsitsel yu'un ti laj abolomalin abae.”

Ezequiel 36:17

“C'alal lic naquiicuc ta yosilal stuquique, ti israeletique laj soquesic ta scoj ti mu'yuc stuq'uil c'usi laj spasique. Ib o'nton xac' ta xquil ti c'u s'elan oyique.

Oseas 9:3

Ti Efraine ta sut batel ta jteclum Egipto. Ti ta jteclum Asiriae, ta xlic slajes ti c'usi mu stac' lajesele. Ti israeletique mu'yuc tey xcom naquijicuc o ti ta muc' ta jteclum yu'un ti Diose.

Miqueas 2:10

Lican, va'lanic, yalel muyanic ta xanobal, yu'un ma'uc yavil xcuxubil avo'nton li'e ta scoj ti mu albajuc ti chopol oy ta stojole. Jech o xal soquem ta j'ech'el.

Números 13:27

Xi laj yalbeic ti Moisese: —Li'aycutic ta banomil ti bu laj atacuncutic batele. Ta melel, ja' jun banomil ti bu co'ol s'elan vo' ta xbein ti chu' vacaxe, ti ajapome. Q'uelo avil ti sat te'etic ti ta xac' ti banomil li'e.

Deuteronomio 21:23

ma'uc sjunul ac'ubal ti joc'ol ta xcom ta te'e. Yu'un ta xich' muquel ta sc'ac'alil no'ox. Yu'un ta x'albat ti bisbil xa ta cotol chaval yu'un ti Dios ti buch'u joc'ol ta xcham ta te'e. Ja' yu'un un cha'e, ti vo'oxuque ta j'ech'eluc mu xa soquesbeic sc'oplal ti banomil ti bu ta xa'ac'batic ti arextoic yu'un ti Ajvalil Dios avu'unique.

Deuteronomio 32:9

Yu'un xrextotac ta xa'i ti Diose, ja' ti steclumaltaque, snitilultac ti Jacobe.

Deuteronomio 6:18

Ja' pasic ti c'usi lec tuq'ue, xchi'uc ti c'usi lec ta xil ta sba ta sat ti Diose, yo' jech lec ta xbat ac'oplalic. Jech ta xavu'ninic ti lequil banomil ti yaloj ono'ox ti Dios ti ta xac'be ti amolmuc'totic ti laj ech'icuc ta vo'nee.