Éxodo 24:7 - Bible in Tzotzil de Chamula

⁷ Ts'acal to un, laj stsac svunal ti tratee. Tey laj yavtabe ya'i ti israeletique. Ti stuquique xi laj yalique: —Ta jts'etan lec jchiquincutic ta ya'yiel ta spasel ti c'u s'elan ta xal mantal ti Diose.

Bible in Tzotzil de Chenalhó with Deuterocanon

⁷ Ts'acal la stsac li svunal c'usi chapanbile, laj yapta ta stojol scotol li israeletique. C'alal laj ya'yique, jech laj yalic: —Ta jch'uncutic, ta jpascutic scotol li c'usitic laj yal Muc'ul Diose —xiic.

Éxodo 24:7 Iomraidhean Croise

1 Reyes 8:9

Ti ta caxae mu'yuc yan ti c'usi tiq'uil ta yute, c'ajomal no'ox cha'pech ton ti laj stic' ochel ti Moisés ta vits Horebe, ja' ti cha'pech ton c'alal laj spas strate ti Dios xchi'uc ti Israel ti c'alal loq'uic talel ta Egiptoe.

2 Crónicas 15:14

C'alal xnic no'ox ti oq'uesetic xulub chijetique, laj sjambeic snuq'uilal ta avlajetel ta muyubajel ti laj sva'an sbaic ta yaq'uel yeic ta stojol ti Diose.

Salmos 50:5

“Volic talel ta jtojol ti buch'u jun yo'ntonique, ti buch'utic laj spasic strateic ta jtojol c'alal laj yac'beicun ti milbil matanale.”

Salmos 78:36

Le' une, naca jutbil c'usitic jun yutsiquil xbet'bun no'ox yeic ta yalel.

Éxodo 19:8

Va'i un, ti israeletique co'ol sc'op scotolic ti xi laj staq'uique: —Ta jpascutic scotol jech c'u cha'al laj yal ti Diose. Jech ti Moisese laj yich' batel yo' ta xet'es ta stojol Dios ti c'u s'elan tac'bat yu'un ti israeletique.

Jeremías 34:13

“Ti vu'un Ajvalilune, Diosun yu'un ti Israele, laj jpas jtrate xchi'uc ti atot ame'ic ta vo'ne c'alal laj jloq'uesic talel ta Egipto ti bu ochemic ta mosovile.

Jeremías 42:6

Mu'yuc ta alel mi lec, mi mu lecuc ta xca'icutic ti c'u s'elan ta xatabuncutic talel ti stac'obile, yu'un laj jva'anotcutic ta sjaq'uel jbacutic ta stojol ti Ajvalil Dios cu'untique yo' lec ta xc'ot ta jtojolcutic, j'ech'el ich'bil o ta muc' ta xc'ot cu'uncutic.”

Ezequiel 16:8

“ ‘Ts'acal to un, li'ech' ta ats'el, yorail xu' xa xamalij laj quil un. Laj jmacot ta jc'u'. Pixil lac'ot cu'un ti jech t'analote. Laj cac' que, laj jpas jtrate ta atojol, lac'ot ta cu'un. Ti vu'un Ajvalilune, mu lo'iluc no'ox ta xcal.

Malaquías 2:10

¿Mi mu junuc no'ox ti Dios ti ja' Jtotic ta jcotoltic ti Buch'u laj yac' ti jch'ulel canimatique? ¿C'u cha'al ya'yel un cha'e ti ta jlo'laan jbatic ta jujun tale, ti ta ju'tic comel ta teq'uel ti trate ti laj spas ti Dios ta stojol ti jmolmuc'totic ti laj ech'icuque?

Hechos 13:15

Ti jpas-mantaletic yu'un ti ch'ul nae, c'alal laj yo'ntonic ta yavtael ti oy c'usi tsots albil sc'oplale, xchi'uc svun ti j'alc'opetique, xi laj yalique: —Jchi'iltac, mi oy c'usi ta xavalic ta jtojolcutic ta yaq'uel yip ti o'ntonale, xu' xaval avi tana li'e.

Colosenses 4:16

C'alal mi laj aq'uelic ti jvun li'e, ts'acal to un, taquic batel ta Laodicea yo' jech ta sq'uelic ti jch'unolajeletic teye. Ja' jech xtoc, q'uelic ec ti jvun ta xlic talel ta Laodiceae.

1 Tesalonicenses 5:27

Ti jech ac'bil cabtel yu'un ti Cajvaltique, ta jc'anboxuc vocol ta sventa ti Cajvaltique, avtaic ti jvun li'e ta stojolic scotol ti jch'unolajeletique.

Josué 24:24

Xi tac'bat yu'un ti jteclume: —Ta jbel sc'oplal ta xcac' jbacutic ta tunel yu'un ti Ajvalil Dios cu'untique. Ta jch'uncutic ta spasel scotol ti c'usi ta xiyalbuncutique.