Éxodo 24:3 - Bible in Tzotzil de Chamula

³ Jech ti Moisese loc' batel, bat yalbe ya'i ti israeletic scotol ti c'u s'elan pasatic ta mantal yu'un ti Diose. Scotolic, jun sc'opic xi laj yalique: —Ta jpascutic scotol ti c'u s'elan laj yal mantal ti Diose.

Bible in Tzotzil de Chenalhó with Deuterocanon

³ Li Moisese ivul yalbe xchi'iltac scotol li mantaletic xchi'uc li c'usitic yan laj yal Muc'ul Diose. Scotolic jech itac'ovic: —Ta jpascutic scotol li c'usitic laj yal Muc'ul Diose —xiic.

Éxodo 24:3 Iomraidhean Croise

2 Crónicas 15:14

C'alal xnic no'ox ti oq'uesetic xulub chijetique, laj sjambeic snuq'uilal ta avlajetel ta muyubajel ti laj sva'an sbaic ta yaq'uel yeic ta stojol ti Diose.

2 Crónicas 15:15

Scotol jnaclejetic yu'un ti Judae xmuyubajic xa xchi'uquic ti va'i s'elan laj sva'an sbaic ta yalele, yu'un sjunul yo'ntonic laj sva'an sbaic ta yalel ti j'ech'el loc' ayan ta yo'ntonic ta sa'el ti Diose. Ti stuc une smaloj ono'ox ti sa'ele. Laj staic yu'un un ti lamaj c'op yu'unic xchi'uc scotol ti buch'utic nopol xil sbaic xchi'uque.

Salmos 50:5

“Volic talel ta jtojol ti buch'u jun yo'ntonique, ti buch'utic laj spasic strateic ta jtojol c'alal laj yac'beicun ti milbil matanale.”

Éxodo 19:8

Va'i un, ti israeletique co'ol sc'op scotolic ti xi laj staq'uique: —Ta jpascutic scotol jech c'u cha'al laj yal ti Diose. Jech ti Moisese laj yich' batel yo' ta xet'es ta stojol Dios ti c'u s'elan tac'bat yu'un ti israeletique.

Éxodo 24:2

Yu'un ja' no'ox vo'ot xu' xanopaj talel ta jtojol. Ja'uc ti yane tsots sc'oplal ti mu me xnopajic talele. Mi ja'uc xtoc ti oy yan achi'iltac xachi'in muyel talele.

Éxodo 24:7

Ts'acal to un, laj stsac svunal ti tratee. Tey laj yavtabe ya'i ti israeletique. Ti stuquique xi laj yalique: —Ta jts'etan lec jchiquincutic ta ya'yiel ta spasel ti c'u s'elan ta xal mantal ti Diose.

Jeremías 11:4

Ja' ono'ox ti jtrate laj jpas ta stojol ti atot ame'ic ta vo'nee, ti c'alal laj jloq'uesic talel ta Egiptoe, ta jun muc' ta lum ti bu co'ol s'elan yunijesobil taq'uin jorno ti c'ot ta stojolique, ti xichi laj calbeique: Aq'uic ta venta ti c'usi ta xcale. Pasic scotol jech c'u cha'al ti c'usi ta jc'ane. Jech ta xac'otic ta jteclumal, ta xic'ot ta Dios avu'unic ec.

Jeremías 34:13

“Ti vu'un Ajvalilune, Diosun yu'un ti Israele, laj jpas jtrate xchi'uc ti atot ame'ic ta vo'ne c'alal laj jloq'uesic talel ta Egipto ti bu ochemic ta mosovile.

Hageo 2:5

Mu jel ti c'u s'elan laj cal c'alal laloq'uic talel ta Egiptoe. Staoj yav chi'inbiloxuc cu'un. Mu xaxi'ic.

Malaquías 2:10

¿Mi mu junuc no'ox ti Dios ti ja' Jtotic ta jcotoltic ti Buch'u laj yac' ti jch'ulel canimatique? ¿C'u cha'al ya'yel un cha'e ti ta jlo'laan jbatic ta jujun tale, ti ta ju'tic comel ta teq'uel ti trate ti laj spas ti Dios ta stojol ti jmolmuc'totic ti laj ech'icuque?

Deuteronomio 11:1

“C'uxuc xava'iic ti Ajvalil Dios avu'unique. C'otuc ta pasel avu'unic ti c'usitic jbel tsots albil yu'une, ti c'usitic nopbil yu'une, xchi'uc ti smantaltaque.

Deuteronomio 4:1

“Avi tana li'e, israeletic, a'yio ava'iic, ts'etano ani' achiquinic yu'un ti oy c'usitic jbel tsots albile, xchi'uc ti c'usitic nopbil ti laj xa jchanubtasoxuque. C'otuc ta spasel avu'unic yo' jech ta xach'i xac'opojic ta yu'ninel ti lum ta xac'boxuc ti Ajvalil Dios yu'unic ti amolmuc'totic ti laj ech'icuc ta vo'nee.

Deuteronomio 4:45

Sc'oplal ti mantaletique, ti jbel ti c'usitic tsots albile, xchi'uc ti c'usitic nopbil ti albatic ti c'alal iloq'uic talel ta Egiptoe,

Deuteronomio 4:5

Ta sventa ti oy c'usitic jbel tsots albile, xchi'uc ti c'usitic nopbil yu'un ti Dios cu'une, yu'un laj xa jchanubtasoxuc yu'un ti mantaletique, yo' jech ta xavabtelanic ta spasel ta jteclum ti bu ta xavu'ninique.

Deuteronomio 5:1

Ti Moisese xi laj yal ti c'alal laj stsob talel scotol ti lum israeletique: “A'yio ava'iic, israeletic, ti jbel ti c'usitic albile, ti c'usitic nopbil ta xcalboxuc ava'iic li'e. Tojobanic ta snopel ta yabtelanel.

Deuteronomio 5:31

Ja'uc ti vo'ote, coman to li' ta jtojole. Yu'un ta xcalbot ava'i scotol ti mantaletique, ti jbel c'usitic tsots sc'oplal albile, xchi'uc ti c'usitic nopbil ti ta xachanubtase, yo' jech ta xchanic ta yabtelanel ti lum ti bu ta xcac'beic ta xrextoique.’

Deuteronomio 6:1

“Ta sc'an ti ta xavabtelanic ta spasel ti mantaletic ta banomil ti bu ta xavu'ninique, ja' ti c'usitic oy jbel ti tsots albil sc'oplale, ti c'usi nopbil yu'un ti Ajvalil Dios avu'unic ti laj yalbun ti ac'o xajchanubtasoxuque.

Josué 24:21

Xi tac'bat yu'un ti jteclume: —Mi ja'uc jech ta xc'ot ta pasel taj une, yu'un ta j'ech'el ta xcac' jbacutic ta tunel yu'un ti Diose.

Josué 24:22

Va'i un, xi tac'batic yu'un ti Josuee: —Rexticoxuc atuquic ti jech laj at'ujic ti ta xavac' abaic ta tunel yu'un ti Diose. —Rexticouncutic —xi laj stac' ti stuquique.

Josué 24:24

Xi tac'bat yu'un ti jteclume: —Ta jbel sc'oplal ta xcac' jbacutic ta tunel yu'un ti Ajvalil Dios cu'untique. Ta jch'uncutic ta spasel scotol ti c'usi ta xiyalbuncutique.