Éxodo 24:12 - Bible in Tzotzil de Chamula

¹² Va'i un, ti Moisese xi albat yu'un ti Diose: —Muyan batel ta vits ti bu oyune. Tey xamalaun, yu'un ta xcac'bot jpech cha'pechuc ton, ti bu laj jts'iba ti oy c'usi tsots sc'oplal albile, xchi'uc ti jmantaltaque yo' jech ta xachanubtas ti israeletique.

Bible in Tzotzil de Chenalhó with Deuterocanon

¹² Li Muc'ul Diose jech laj yalbe li Moisese: —Muyan batel ta vits te yo' bu ono'ox oyune. Te xamalaun, yu'un chacac'bot li pech'ajtic ton yo' bu ts'ibabil li mantaletic cu'une, yu'un ac'o achanubtas o li achi'iltaque —x'utat.

Éxodo 24:12 Iomraidhean Croise

1 Reyes 19:11

Xi albat yu'un ti Diose: “Loc'an talel ti bu oyote. La' va'lan ta jts'el ti li' ta vitse” Ta jech to yepal, ech' ti Diose, ti tsots ta j'ech'el xjumet liquel ti iq'ue, ti jav ti vitse, ti laj ch'acuc ti tonetic ta sba ta sat ti Diose. Mi ja'uc volibil ta ic' ti Diose. C'alal ech' ti tsots iq'ue, tal tsots niquel. Mi ja'uc tey oy ta niquel ti Diose.

Esdras 7:10

Ti Esdrase c'otem ta yo'nton ta snopel, ta yabtelanel ti c'u s'elan ta xal ti oy c'usi jbel albil yu'un ti Diose, xchi'uc ti yac'oj yo'nton ta xchanubtasel ti israeletic ta sventa ti c'usi oy jbel tsots albile, xchi'uc ti c'usitic nopbil yu'une.

Nehemías 9:13

“Ta ts'acal to un, layal talel ta vits Sinaí, ta toyol to ta vinajel lac'opoj talel ta stojolic ti laj avac'be sna' ti c'usitic nopbil avu'un ti oy stuq'uile, ti chanubtasel ti ja' melele, xchi'uc ti oy c'usi jbel tsots albile, xchi'uc ti lequil mantaletique.

Nehemías 9:14

Laj achanubtas c'u s'elan ich'bil ta muc' ta xac'ot ta sc'ac'alil ti cuxob o'ntonal ti t'ujbil avu'une. Laj avac'be ti mantaletique, ti chanubtaseletic ti ja' melele, ti c'usi jbel tsots albile, xchi'uc ti chanubtaseletic ti laj avac' comel ta sventa ti avajtunel Moisese.

Salmos 19:12

¿Mi oy la buch'u ta xil stuc ti bu chopol ta xbat yu'une? Ch'ayo jpimil jtoyobbail, Cajval, mu xquil bu chopol ta xbat cu'un.

Éxodo 19:3

Ti bu taj une, muy batel ti Moisese yo' ta snup sbaic ta be xchi'uc ti Diose. Va'i un, ti Diose ta jol vits to ti xi laj yalbe talele: —Ti c'u s'elan jaybel c'opetic li'e, ja' no'ox jech xi xcholet xavet'es jelavel ta stojol ti israeletic ti ja' snitilultac ti Jacobe:

Éxodo 24:15

C'alal jech laj yal ti Moisese, muy batel ta vits ti ja' volibil ta toque.

Éxodo 24:18

Ti Moisese och batel ti bu ti toque, yu'un muy batel ta vits. Joc'tsaj cha'vinic (40) c'ac'al xchi'uc cha'vinic (40) ac'ubal.

Éxodo 24:2

Yu'un ja' no'ox vo'ot xu' xanopaj talel ta jtojol. Ja'uc ti yane tsots sc'oplal ti mu me xnopajic talele. Mi ja'uc xtoc ti oy yan achi'iltac xachi'in muyel talele.

Éxodo 31:18

C'alal laj yo'nton ti Dios ta sc'oponel ti Moisés ta vits Sinaie, laj yac'be talel ti pech-pech tonetic ti bu ts'ibabil talel ti oy c'usi tsots albil sc'oplale, ti ts'ibabil ta sc'ob stuc ti Diose.

Éxodo 32:1

C'alal laj yilic ti israeletic ti jalij tey ta vitse, ti mu xyal talel ti Moisese, laj stsob sbaic ta stojol ti Aarone, ti xi laj yalbeique: —Mu teyuc no'ox xach'ayet, meltsanbun diosetic cu'uncutic yo' jech ta xistojobtasuncutic batel. Yu'un mu jna'cutic c'usi laj spas ti Moisés ti ja' laj sloq'uesuncutic talel ta Egiptoe.

Éxodo 34:1

Ti Diose xi laj yalbe ti Moisese: —Ano chibuc pech-pech ton co'ol s'elan jech c'u cha'al ta ba'yele, yo' jech co'ol s'elan ta jts'iba ti c'u s'elan ts'ibabil to ox ta ba'yel ti lilij ta voq'uel avu'une.

Jeremías 31:33

C'alal mi sta yoraile, xi s'elan ti jtrate ta jpas ta stojolic ti Israele: Ta jbejanbe ta yo'nton, xchi'uc ti jts'ibabe ta sjol ti c'usi jbel tsots albil cu'une. Ta xic'ot ta Dios yu'unic. Calab jnich'nab ta xc'otic ti stuquique. Ti vu'un Diosune, mu lo'iluc no'ox ta xcal.

San Mateo 5:19

Jech o xal buch'uuc no'ox ti mu xac' ta venta ti oy c'usi jbel albil ta sventa ti mantale, ac'o mi mu tsotsuc yuni c'oplal, mi jech ta xchanubtasvan taje, peq'uel sc'oplal ta xc'ot ti bu ta xventainvan ti Diose. Buch'uuc no'ox ti ta xac' ta venta ti mantale xchi'uc ti ta xchanubtas ti yane, cajal sc'oplal ta xc'ot ti bu ta xventainvan ti Diose.

2 Corintios 3:3

Ja' jvunoxuc ti laj sts'iba ti Cristo stuque. Ma'uc ts'ibabil ta tinta, ja' ts'ibabil yu'un ti Xch'ul Espíritu ti cuxul Diose. Ja' jvunoxuc ti ma'uc ts'ibabil ta pech-pech tone, yu'un ts'ibabil c'ot ta avo'ntonic ta sventa ti laj calcutic ava'iic ti lequil ach' c'op ta atojolique.

2 Corintios 3:7

Ti oy c'usi tsots albil sc'oplal ti naca ts'ibabil ta pech-pech tone, xojobin yutsil Dios ti c'alal c'ot ta stojolic ti israeletic ti mu xa stac' sq'uelbeic sat ti Moisés ti xojobin no'ox ti sate. Ja' no'ox un, naca sta itub xa batel ti xojobal taje. Mi ja' jech yutsil xojobin tal ti oy c'usi tsots albil sc'oplal ti naca lajel xal ti bu sq'ueloj batele,

Deuteronomio 4:14

Jech xtoc ti Diose laj yalbun ca'i ti ac'o xajchanubtasoxuc ta sventa ti jbel c'usitic tsots albile, xchi'uc ti c'usitic nopbil yu'une, ti tsots sc'oplal c'otuc ta pasel avu'unic ta banomil ti bu ta xacomic ta nacleje.

Deuteronomio 5:22

“C'alal tsoboloxuc acotolic ta yoc ti vitse, ja' jech s'elan tsots lic c'opojuc ti Dios ti vinaj talel ta o'lol leb c'oq'ue xchi'uc ti volibil ta jun lumal ic'al toque. Ts'acal un, mi ja'uc oy xa c'usi laj yal, c'ajomal laj sts'iba talel ti c'opetic ta chib pech-pech tone. Laj yac'bun talel.

Deuteronomio 5:31

Ja'uc ti vo'ote, coman to li' ta jtojole. Yu'un ta xcalbot ava'i scotol ti mantaletique, ti jbel c'usitic tsots sc'oplal albile, xchi'uc ti c'usitic nopbil ti ta xachanubtase, yo' jech ta xchanic ta yabtelanel ti lum ti bu ta xcac'beic ta xrextoique.’

Hebreos 9:4

Ti bu taje, oy jun altar meltsanbil ta oro sventa xchic'obil ti pome, xchi'uc xcaxail ti trate bonbil ta oro sbejele. Ta yut ti caxae, oy jun jarru meltsanbil ta oro ti bu tiq'uil ti manae. Tey tiq'uil xtoc ta yut caxa snabte' ti Aarón ti q'uelomaje, xchi'uc ti cha'pech ton ti bu ts'ibabil ti tratee.