Éxodo 2:23 - Bible in Tzotzil de Chamula

²³ Ech' batel ti c'ac'ale, cham ti ajvalil yu'un jteclum Egiptoe. Ac'o mi jech un, ja' no'ox un, ti israeletique staoj yav x'ijetic to ta jic' o'nton yu'un ti oyic ta mosovile. Ja' yu'un un, ti Diose laj yil ti x'ijetic yu'un ti vocole.

Bible in Tzotzil de Chenalhó with Deuterocanon

²³ C'alal i'ech' xa'ox jayibuc c'ac'ale, icham li ajvalil ta Egiptoe. Li israeletique te ono'ox x'oc' x'avanic o ta scoj li tsots mozoinele, xchi'uc te tsc'anilanbeic o vocol li Diose. Ja' yu'un i'aybatic yoq'uel yavanelic yu'un li Diose.

Éxodo 2:23 Iomraidhean Croise

Génesis 16:11

Achi'uc xa avol, ta xavilbe sat jun aquerem, Ismael ta xavac'be sbi, yu'un ti Diose c'ot ta sni' ta xchiquin ti mu ech'baj avocole.

Génesis 4:10

Xi albat yu'un ti Diose: —¿C'u cha'al jech laj apas le'e? Ti xch'ich'el avits'in ti laj xa amalbe ta banomile, x'avet xa ta xisc'anbun ti ac'o jchapanote.

Nehemías 9:9

Laj avil c'u s'elan oyic ta vocol ta Egipto ti jtot jme'cutic laj ech'uc ta vo'nee. Laj ava'ibe ti xvochetic ta oq'uel c'alal oyic ta sti'il ti Tsajal Nabe.

Job 35:9

Ti net'bilic xa yu'un vocol ti viniquetique, x'avanic xa ta sa'el buch'u tsotsic yo' jech ta xcoltaatic yu'un.

Salmos 102:1

A'yibun ti jc'opojel jti'inele, Cajval, ac'o ave ati' ti c'otuc ta atojol ti xi'oc' xi'avan une.

Salmos 102:2

Mu xajoybin asat ta jtojol c'alal oyun ta ilbajinele; ch'ul abolajan, ts'etano achiquin cu'un, ta jech yepaluc, tac'bun no'ox talel c'alal xivocolet une.

Salmos 12:5

Xi s'elan laj yal ma' ti Dios une: “Ti me'un mu'natetique, xchi'uc ti buch'utic mu'yuc xa yipique, ilbajinbilic, ac'bil svocolic. Jech o xal avi tana li' une, ta xlic jva'an jba ta scoltaelic ti juteb ta yo'ntonic c'otuc ta pasel une.”

Salmos 18:6

Ti oyun xa ta vocole, laj jta ta c'oponel ti Diose, laj jc'anbe ti scoltaucun ma' ti Dios cu'une. Ta xch'ulna to, laj ya'i ti jc'opojel jti'inel; c'ot ta sni' ta xchiquin ti xi'avete.

Éxodo 1:14

Mu'yuc ta alel mi xcham o xchi'uquic ti jech tsitsbilic ta tsots abtel ta sjuybel yach'elal ti xamite, xchi'uc ta sbainel scotol ti yan abteletic ta osile. Ac'o mi jech ta spasic scotol ti va'i s'elan taje, staoj o yav oy sc'oplalic ja' to c'uxi xc'otic ta tsutsel ti israeletique.

Éxodo 4:19

C'alal oy to ox ta yosilal Madián ti Moisese, xi albat yu'un ti Diose: —Sutan batel ta Egipto, yu'un ti buch'u sc'an ta smilot ya'iique, cham xa scotolic.

Éxodo 6:5

Avi tana une, quiloj xa ti oyic ta vocol ti israeletique. Yu'un tsots ta sujatic ta abtel yu'un ti egipcioetique. Ja' yu'un un, t'ab ta co'nton ti jtratee.

Éxodo 6:9

Ti Moisese bat xcha'albe ya'i ti israeletique. Ja' no'ox un, mu'yuc xa laj yich'beic ta muc'. Yu'un mu xa stac' a'yeluc ta xa'iic yu'un ti tsots mosovinbilique.

Éxodo 7:7

Ti Moisese yich'oj xa chanvinic (80) jabil. Yan ti Aarone yich'oj xa oxib yo'vinic (83) jabil ti c'alal ay sc'oponic ti faraone.

Isaías 19:20

Ta xc'ot ta senyail tey ta Egipto yo' jech ta svulesat ta o'ntonal ti Dios ti scotol xu' yu'une. C'alal x'avetic ta stojol Dios ta sc'anel pojel colel ti oy buch'u ta x'ilbajinvane, ta xtacbatic talel jun jpojvanej jcoltavanej yo' jech ta xpojatic, ta xcoltaatic.

Isaías 5:7

Ti lequil ts'unubal uva yu'un ti Dios ti scotol xu' yu'une, ti mu tuch'baj ta yo'nton ta xa'i ti sts'unube, ja' sc'oplal ti lum Israele xchi'uc ti lum Judae. Ti Diose snopoj ti ta xch'unbat ti oy c'usi jbel tsots albil yu'une, le' une, c'ajomal no'ox laj yil ti naca milbaile. Laj snop ti oyuc lequil chapanel yu'unique, le' une, c'ajomal no'ox laj yil ti oy buch'u x'avlajet ta oq'uel yu'un ti vocole.

Números 20:16

Va'i un, laj jc'anbecutic coltael yu'un ti Diose. Laj ya'i ti jc'opojel jti'inelcutique. Yu'un laj stac talel yaj'ánjel ti laj sloq'uesuncutic talel ta Egiptoe. Avi tana li' une, li' xa oyuncutic ta sbanomil Cades ti sts'aquinoj sbaic xchi'uc ti avosilale.

Hechos 7:30

“Cha'vinic (40) jabil yech'el xa ox, laj yac' sba iluc jun ánjel ta xocol banomil ti nopol vits Sinaí, ta jpets ch'ix te' volol ta c'oc' ti yacal ta xc'ac' yilele.

Deuteronomio 24:15

Tojic no'ox ta sc'ac'alil ti jun c'ac'al yabtel ti c'alal mu'yuc to ta x'ic'ub ti osile. Yu'un ja' jun me'un mu'nat ti ta xtun yu'un ti taq'uine, yu'un c'ajomal no'ox jech tsacal xchi'uc. Yan ti mi mu jechuque, ta acojic vo'oxuc ta x'oc' ta x'avanic ta stojol ti Diose, laj xa ata amul un.

Santiago 5:4

Ti j'abteletic ti buch'utic mu'yuc laj avac'beic stojol c'alal laj stsobic ti ats'unubalique, ta sc'anic parte. Ja' yu'un un, ti Dios ti scotol xu' yu'une, laj xa yil ti x'oc'lajetic ti j'abteletique.

Jueces 4:3

Ti Jabin taje, oy yu'un baluneb ciento (900) ta cot carreta ti meltsanbil ta taq'uine. Jtob (20) jabil sjalil tsots laj yilbajin ti israeletique, ja' to ti c'alal xvocoletic liquel ta stojol ti Dios ti ac'o coltaaticuque.

1 Samuel 12:8

C'alal batic ta Egipto ti Jacob xchi'uc ti snitilultaque, laj yich'ic tsots ilbajinel yu'un ti egipcioetique. Lic sc'anic parte ta stojol Dios ti amolmuc'totic ta vo'nee. Laj stac batel ti Moisese xchi'uc ti Aarone. Laj sloq'uesic talel ta Egipto ti amolmuc'totic ta vo'nee, ti vulic ta naclej yu'unic ta banomil li'e.

1 Samuel 9:16

“Jech ora oc'om li'e, ta jtacbot talel jun vinic ta atojol ti liquem talel ta yosilal ti Benjamine, ti ta xava'an ta yac'bel yich' yabtel ta ajvalil ta sventa ti calab jnich'nabe. Yu'un ja' ta stic' sba ta spoj loq'uel ti ilbajinbilic yu'un ti filisteoetique, ti c'uxubaj xa co'nton yu'un ti calab jnich'nab ti c'ot xa ta jtojol ti sc'opique.”