Yoona 9:22 - A̠lyiat A̠gwaza na di̠n Tyap: A̠li̠ka̠uli A̠fai

²² Á̱niet mbyin a̱tyu a̱ ku byia̱ a̱fi̱fan ba a̱ni si̱ hyia̱ a̱lyiat nani, mat ba̱ ku fa̱k a̱wun a̱cha̱chet a̱yaakwak a̱son A̱yahudawa ba. Mat ba̱ ku la̱p á̱ sak nyia̱ ka̱ ba̱ shya̱ a̱yin a̱ si̱ shim nyia̱ Yesu wa yet Kristi, a̱tyu nang A̱gwaza kup gu tyok a̱ni; nang ba̱ fwuong a̱ni, á̱ na ti̱n nggu á̱ ghwut ndyo mami tutu a̱tung A̱yahudawa ka.

Yoona 9:22 Iomraidhean Croise

Luka 6:22

A̱gwaza tyei nyin a̱li̱ba̱rka, nyin á̱niet nang á̱ lak li; á̱ si̱ bu khap nyin zan mami á̱niet; á̱ si̱ bu nyia̱ nyin lihyat; á̱ si̱ tyam nyin nang á̱ka̱tuk á̱niet a̱ni; mat nyi khwi nung, Nggwon A̱tyubishyi.

Yoona 1:19

Á̱lyiat nani nia yet á̱si̱ nang Yoona ku tak kpa̱sai di̱n jen nang a̱cha̱chet A̱yahudawa Urusha̱lima ba ku nta̱m a̱yaapris ba mbeang A̱li̱viyawa ba, nyia̱ ba̱ lyip Yoona, “Nwan wa yet a̱nyan?”

Yoona 16:2

Ba̱ na ti̱n nyin, á̱ ghwut ndyo mami á̱tutu a̱tung A̱yahudawa ba. A̱wot jen bye bai, nang á̱ghyang á̱niet na nhyaai nyin. Ba̱ nyia̱, ba̱ nyia̱ A̱gwaza wa ta̱m!

Yoona 19:38

Nang á̱ nyia̱ a̱nia a̱ni, huhwa a̱ghyang a̱niet nang á̱ ngyei nggu Isuu, a̱tyu A̱ri̱matiya (nggu a̱ ku yet nggwon ta̱m Yesu kya da̱ bang mat nang gu fwuong a̱wun A̱yahudawa a̱ni,) a̱ si̱ naai gwomna Bilatut a̱ nwuak nggu shim nang gu na nkyiak kwom Yesu hu, gu niat a̱ni. Gwomna Bilatut meang si̱ shim gu ndyo. A̱ si̱ nat, a̱ si̱ kyiak kwom Yesu hu.

Yoona 20:19

Jenshyung a̱tuk Ladi ka, a̱wot mman ta̱m na si̱ tung dundung nang nyinyiit hu shya̱ di̱ nyim, mat ba̱ fwuong a̱wun a̱cha̱chet A̱yahudawa ba. A̱wot Yesu si̱ bai a̱ ba̱ yong ma̱ng a̱mba! A̱ si̱ nyia̱ “Swat nyinyang ku shya̱ dundung ma̱ng a̱nyin!”

Yoona 7:13

A̱mgba̱m ma̱ng a̱nia, á̱ byia̱ a̱tyu á̱ ku lyiat tazwa Yesu kpa̱sai a̱ni bah, mat ba̱ ku fwuong a̱wun a̱cha̱chet A̱yahudawa ba ba̱t.

Yoona 9:18

A̱cha̱chet a̱yaakwak a̱son A̱yahudawa ba, ba̱ ku lak ba̱ nwuak a̱chuchuk nyia̱ a̱tyu wuni ku yet a̱tyu a̱fi̱fan wa gbangbang, a̱wot di̱ yong huni á̱ khwuk gu á̱ghyi, a̱ si̱ shya̱ nwuan a̱vwuo bah. Mat a̱nia, ba̱ si̱ yorong á̱niet mbyin a̱tyu a̱fi̱fan ba.

Yoona 9:21

A̱mgba̱m ma̱ng a̱nia, zi̱ lyen si̱sak nang gu nnyia̱ á̱ghyi gu ba si̱ nkhwuk a̱ni bah. Da̱ nzi̱t, zi̱ lyen a̱tyu a̱ khwuk gu á̱ghyi ba a̱ni bah. Nyi lyip gu, a̱ yet nggwon bah. A̱ maai a̱yin, a̱ na nwuak shim hu ma̱ a̱pyia̱ nggu!”

Yoona 9:34

A̱cha̱chet A̱yahudawa ba si̱ nyia̱, “Nwan a̱tyu nang á̱ byin mami a̱ka̱tuk nyia̱, a̱wot a si̱ shi mami a̱ka̱tuk a̱ni; nwan wa chat tyiet zi̱t a?!” Huhwa ba̱ si̱ vwuong nggu, á̱ ghwut ndyo mi̱ tutu a̱tung A̱yahudawa hu.

Yoona 9:35

Nang Yesu ku nfa̱k nkhang nyia̱ á̱ ka̱n vwuong a̱tyu a̱ ku byia̱ a̱fi̱fan ba, á̱ ghwut ndyo mi̱ tutu a̱tung A̱yahudawa hu a̱ni; a̱ si̱ chat gu a̱ shya̱. Huhwa gu nyia̱ ma̱ng a̱nggu a̱ni, “A nwuak fwuo di̱ Nggwon A̱gwaza kaa?”

Nta̱m A̱yaata̱m 4:18

A̱jawa ba̱ si̱ bu ngyorong a̱yaata̱m ba. Ba̱ si̱ tak ma̱ng a̱mba nyia̱, ba̱ yok mak mi̱ mak ba̱ lyiat ku ba̱ tyiet á̱niet da̱ a̱lyoot Yesu ka bah.

Nta̱m A̱yaata̱m 5:13

A̱wot á̱ ku mbyia̱ á̱niet nwai khwi Yesu ba̱ mun á̱pyia̱ ma̱ng a̱mba a̱ni bah. Mat ba̱ ku fwuong a̱wun, ku nang a̱mgba̱m á̱niet ba ku nchyin mba a̱ni.

Nta̱m A̱yaata̱m 5:40

Ba̱ si̱ shim a̱lyiat Ga̱maliyal na, ba̱ si̱ yorong a̱yaata̱m Yesu ba. Ba̱ si̱ tsot ba ma̱ng a̱ya̱u a̱ byia̱ pyipyia̱ ntswam a̱ni. Ba̱ si̱ khwat ba a̱fufwuo; nyia̱ da̱ ba̱ yok mak tyiet da̱ a̱lyoot Yesu ka bah. Ba̱ sii kai mba á̱ ghwon, ba̱ si̱ nkat.

Tyai Á̱zanson 21:8

“A̱wot á̱niet a̱wun, á̱niet nwai khwi Yesu, á̱niet nyia̱ nkyang nsum, á̱niet hyaai á̱niet, á̱niet a̱shi̱shi̱k nyia̱, á̱niet nkut, á̱niet khwi nghwughwu a̱yaagwaza sang swuan, ma̱ng á̱niet bwoi kuzang tangka̱i a̱ka̱laa; záng mba ji na yet a̱gba̱ndang tswa ndong ji̱ ya long sa̱lfa a̱ni. A̱khwu kani kya á̱ ngyei a̱khwu a̱ka̱feang ka.”