Yoona 9:16 - A̠lyiat A̠gwaza na di̠n Tyap: A̠li̠ka̠uli A̠fai

¹⁶ Huhwa A̱fa̱risawa á̱ghyang si̱ nyia̱, “A̱tyu wuni neet da̱ a̱vwuo A̱gwaza bah. Mat a̱ nyia̱ ta̱m a̱ si̱ tyat doka a̱tuk Mam Fwung ji!” Á̱ghyang á̱niet mameang, ba̱ si̱ nyia̱, “Á̱ na nyia̱ ni wa a̱tyu a̱ka̱tuk nyia̱ gu nnyia̱ ntangka̱i a̱cha̱chet nkyang a̱ga̱de nani?” Huhwa ba̱ si̱ ta̱bat ya fwuang ma̱ng á̱ghyang mba.

Yoona 9:16 Iomraidhean Croise

Matyu 12:10

A̱ si̱ kin di a̱tyok a̱ghyang a̱ja nang bwak nggu hu khwu a̱ni. A̱fa̱risawa ba si̱ lyip Yesu nyia̱, “Doka ji shim á̱ nyia̱ ta̱m choot a̱yin a̱tuk Mam Fwung kaa?” (Ba̱ ku fa nyia̱ Yesu na shim, da̱nian ba̱ ka shya̱ ta̱fwat nang ba̱ na mbat gu a̱hyiak a̱ni).

Matyu 12:2

Nang A̱fa̱risawa á̱ghyang ndi a̱nia a̱ni, ba̱ si̱ nyia̱, “Di! Mman ta̱m ang na tyat doka ji, di̱ nyia̱ ta̱m chak swaat a̱tuk Mam Fwung ka!”

Luka 13:14

A̱wot a̱kwak a̱son tutu a̱tung A̱yahudawa wu si̱ ka̱n mwai lyen di̱ si̱sak ji Yesu nchoot a̱byii̱k wu A̱tuk Mam Fwung ka a̱ni. Huhwa gu si̱ nyia̱ ma̱ng á̱kpa á̱niet ka, “Mam a̱taa nia nshya̱ na̱ myim nyi nnyia̱ nta̱m a̱ni! Nyi ni̱ mbai mi̱ mam a̱nia, á̱ choot nyin; kang ma̱ng A̱tuk Mam Fwung ka!”

Yoona 10:19

A̱wot a̱lyiat nani si̱ tyia̱ a̱cha̱chet A̱yahudawa ba si̱ ta̱bat ya fwuang tsi̱tsak mba.

Yoona 14:11

Nyi nwuak a̱chuchuk nang n shya̱ mami A̱tyia̱ nung ka; a̱tyia̱ nung wu mameang, si̱ shya̱ mami nung. Kalak ka̱ nyi na nyia̱ a̱nia bah, nyi nwuak a̱chuchuk di̱ nta̱m a̱ga̱de na nang n nyian a̱ni.

Yoona 15:24

“N ku nyia̱ nkyang a̱ga̱de ma̱ a̱di̱di̱t a̱zaghyi mba. Mami mba, á̱ mbyia̱ a̱tyu a̱ ka̱ mak nyia̱ na a̱ni bah. Ka̱ á̱ wa nyia̱, di̱ n wa nyia̱ nkyang a̱ga̱de a̱nia a̱zaghyi mba bah; si̱ ba̱ byia̱ a̱bun bah. A̱wot ma̱ninika, ba̱ li kyang hu nang n nyia̱ a̱ni. A̱mgba̱m ma̱ng a̱nia, ba̱ si̱ lak li nung, á̱ tsa bu ndak li A̱tyia̱ nung wu.

Yoona 2:11

Si̱ huni hwa yet a̱son kyang a̱ga̱de nang Yesu ku nyia̱ a̱ni. A̱ ku nyia̱ hu ma̱ a̱keang Kana ka̱ shya̱ ma̱ a̱byin Ga̱lili a̱ni. A̱ja wa nang gu nnyia̱ a̱lama wuni a̱ tyai a̱kyenkyai shi nggu wu. Mman ta̱m nggu na mameang, ba̱ si̱ nwuak a̱chuchuk da̱ nggu ba̱t.

Yoona 3:2

Nggu wa ku bai da̱ a̱vwuo Yesu a̱tyetuk, a̱ si̱ ba̱ nyia̱, “A̱tyu tyiet, zi̱ lyen nang a ngyet a̱tyu tyiet wa nang A̱gwaza ta̱m ndyo a̱ni. Mat á̱ mbyia̱ a̱tyu a̱ na nyia̱ ntangka̱i a̱cha̱chet nkyang a̱ga̱de nani nang a nyia̱ a̱ni; ka̱nang A̱gwaza shya̱ dundung ma̱ng a̱nggu bah.”

Yoona 5:10

Huhwa ku mbyia̱ a̱cha̱chet A̱yahudawa ba, si̱ nyia̱ ma̱ng a̱tyu nzwan wu nang á̱ choot a̱ni, “Mam huni yet a̱tuk Mam Fwung kya; hu myim di̱ khwi doka nzi̱t ji a kyiak a̱kpang ang wu a̱fwun bah!”

Yoona 5:36

“A̱mgba̱m ma̱ng a̱nia, n byia̱ nkyang na̱ shei a̱chuchuk wu kpa̱sai tazwa nung, na̱ lan si̱ Yoona hu ma̱ng shi a̱ni. Huhwa yet nta̱m na nang n nyia̱ a̱ni; nta̱m na nang A̱tyia̱ nung wu ku nwuak nung n nyia̱ a̱ni. Nta̱m ni̱nia lyiat da̱ a̱kwonu nung. A̱wot na̱ si̱ tak nyin nang A̱tyia̱ nung wu wa ku nta̱m nung.

Yoona 6:52

A̱lyiat nani ku tyia̱ A̱yahudawa ma̱ a̱di̱di̱t si̱ fa̱k a̱lyia̱ ya. Ba̱ si̱ ta̱bat ya fwuang ma̱ng á̱ghyang mba nyia̱, “A̱tyu wuni na nyia̱ ni wa, a̱ nnwuak nzi̱t nam vam gu hu, zi̱ ya?”

Yoona 7:12

A̱wot mami á̱kpa á̱niet ba̱ ku shya̱ ma̱ a̱yet wu a̱ni, ba̱ si̱ chyuang tazwa Yesu nyia̱, “A̱tyu a̱wa yet a̱tan a̱yin!” A̱wot á̱ghyang á̱niet si̱ nyia̱, “Kaai, a̱tyu a̱wa laai á̱niet bibya!”

Yoona 7:23

Ka̱ á̱ ni̱ sak nggwon a̱sam mi̱ chen a̱tuk Mam Fwung ka kalak á̱ du tyat doka Musa ji; ka̱ doot nyi mwai lyen ma̱ng a̱nung da̱ziya nang n choot a̱yin a̱tuk Mam Fwung ka a?

Yoona 7:43

A̱nia wa á̱kpa á̱niet ka ku ngya fwuang ji. Ba̱ si̱ ghai kankang da̱nian guu.

Yoona 9:24

A̱cha̱chet a̱yaakwak a̱son A̱yahudawa ba si̱ bu yorong a̱tyu a̱ ku byia̱ a̱fi̱fan ba a̱ni, ba̱ si̱ nyia̱, “Fa̱k a̱wun A̱gwaza, a hyia̱ a̱tsatsak a̱lyiat! Nzi̱t, zi̱ lyen nang a̱tyu wuni a̱ choot ang a̱ni; ngyet a̱tyu a̱ka̱tuk nyia̱ wa.”

Nta̱m A̱yaata̱m 14:4

A̱wot á̱niet a̱keang ba si̱ ghai di̱ susot sweang ma̱ a̱di̱dam mba wu tazwa Bulut ma̱ng Ba̱nabat. Sot jhyung si̱ shya̱ dundung ma̱ng A̱yahudawa ba. A̱wot sot jhyung ji meang si̱ shya̱ ndung ma̱ng Bulut ma̱ng Ba̱nabat.