Yoona 8:32 - A̠lyiat A̠gwaza na di̠n Tyap: A̠li̠ka̠uli A̠fai

³² Nyi na lyen a̱chuchuk wu, a̱wot a̱chuchuk wu na tyia̱ nyi yet á̱sa̱t á̱niet.”

Yoona 8:32 Iomraidhean Croise

Matyu 11:29

Nyi kyiak a̱byi̱ri̱m khwi nung wu dundung ma̱ng a̱nung, a̱wot nyi myiam da̱ a̱vwuo nung. Mat n gyet shonshyon mi̱ fwuo. N si̱ ngyet a̱tyu ghyuai a̱pyia̱. A̱wot nyi na shya̱ fwung mi̱ nfwuo nyin na.

Yoona 1:14

Swang A̱lyiat ji ku tyia̱ a̱tyubishyi. A̱ si̱ swan dundung ma̱ng a̱nzi̱t. Zi̱ si̱ li a̱kyenkyai shi nggu wu. A̱ si̱ byia̱ shok ma̱ng a̱chuchuk gba̱mgbam. A̱kyenkyai shi wuni wa ku tak nang gu ma̱nyin gu neet da̱ a̱vwuo A̱gwaza.

Yoona 1:17

Mat A̱gwaza ku nwuak Musa wa doka nggu ji. A̱wot shok ji ma̱ng gba̱mgbam tsotswat wu si̱ bai mat Yesu Kristi wa.

Yoona 14:6

Yesu si̱ nyia̱ ma̱ng Toma a̱ni, “Nung gwa ngyet vak hu. Nung gwa si̱ ngyet a̱chuchuk wu. Nung gwa si̱ bu ngyet swuan ji. Á̱ mbyia̱ a̱tyu a̱ na nat da̱ a̱vwuo A̱tyia̱ ka, ka̱nang a̱nyuu khwi nung a̱ni bah.

Yoona 16:13

Mat a̱nia, ka̱ A̱za̱za̱rak Ntswa a̱ yet a̱chuchuk a̱ni bai, a̱ na kwak nyin a̱son di̱ kuzang a̱chuchuk. A̱lyiat a̱pyia̱ nggu nia gu na lyiat bah. A̱ na lyiat kyang nang gu fwuong wa a̱ni. A̱wot a̱ bu na tak ma̱ng a̱nyin nkyang na̱ na bai á̱zanson a̱ni.

Yoona 17:17

“Ja̱u mba ma̱ng a̱chuchuk wu, a̱wot a bu tyiet mba á̱lyiat ang na; ni̱nia yet a̱chuchuk wu.

Yoona 6:45

“A̱ta̱m a̱kwonu A̱gwaza ma̱ a̱di̱di̱t ku lyuut nyia̱, ‘A̱mgba̱m á̱niet ba, A̱gwaza wa na tyiet mbaa.’ Konyan wa fa̱k, a̱wot a̱ si̱ myiam da̱ a̱vwuo A̱tyia̱ nung ka; a̱tyu a̱wa na bai da̱ a̱vwuo nung.

Yoona 7:17

Konyan wa chat nyia̱ kyang nang A̱gwaza chat a̱ni, a̱ na fi̱k tyiet huni; ka̱ ku yet si̱ A̱gwaza hwa, kee n ma ndyiat a̱kwonu a̱pyia̱ nung kya.

Yoona 8:36

Ka̱ Nggwon A̱gwaza ka kya ti̱n nyin mi̱ khwo hu, a̱tsatsak a̱lyiat wa; nyi na yet á̱sa̱t á̱niet bya za̱m!

A̱romawa 6:22

A̱wot ma̱ninika, nang á̱ nti̱n nyin mbwak tyok a̱ka̱tuk nyia̱, nyi si̱ shya̱ shot, nyi yet á̱sa̱t á̱niet a̱ni. Nyi bu yet á̱khwo A̱gwaza bya. Ma̱ninika, nyi nyia̱ nkyang na̱ na tyei nyin yet a̱za̱za̱rak á̱niet, a̱wot na̱ nwuak nyin swuan sang sangba̱p a̱ni.

A̱romawa 8:15

A̱wot A̱za̱za̱rak Ntswa wu nang nyi san a̱ni, a̱ yet a̱si̱ a̱ tyei nyin nyi yet á̱khwo ba̱ fwuong a̱wun a̱ni bah. Da̱ a̱kwonu a̱kya, nyi san A̱za̱za̱rak Ntswa A̱gwaza wu wa di̱n jen nang A̱gwaza nsan nyin, a̱ si̱ kyiak nyin nyi yet mman nggu a̱ni. Ma̱ninika, zi̱ yei nggu, “Abba, A̱tyia̱!”

A̱romawa 8:2

A̱wot mat nang nyi mmun á̱pyia̱ ma̱ng Yesu Kristi a̱ni, chet A̱za̱za̱rak Ntswa hu ku si̱ tyia̱ nyi si̱ shot chet za̱kwa a̱ka̱tuk nyia̱ ku tyei a̱khwu a̱ni.

1 A̱korontiyawa 7:22

Nyi yok bwung bah; ka̱ nyi ku yet á̱khwo bya, di̱n jen nang A̱gwaza ku ngyorong nyin a̱ni, ma̱ninika, mami a̱lyoot Yesu, nyi yet á̱khwo bya bah. Ma a̱nia wa, ka̱ nyi ku swan di̱ mi̱n khwo nang A̱gwaza ku ngyorong nyin a̱ni, ma̱ninika, nyi yet á̱khwo Kristi bya.

A̱ga̱la̱tiyawa 5:1

A̱tsak a̱lyiat, Kristi tyia̱ zi̱ yet á̱sa̱t á̱niet bya za̱m. Mat a̱nia, ma̱ninika, nyi yong mi̱ chet nang á̱sa̱t á̱niet a̱ni. Nyi yok shim nyi bu yet á̱khwo doka bah.

A̱ga̱la̱tiyawa 5:13

Nyin á̱niet khwi Yesu ba nang n chat a̱ni, á̱ yorong nyin nyi swan swat sa̱t. A̱mgba̱m ma̱ng a̱nia, nyi yok shim swat sa̱t nyin hu ma̱ng khwi doká ji, ku yet nyin jat fa̱k nyinyang za̱kwa nyia̱ a̱ka̱tuk nyia̱ bah. Da̱ a̱kwonu a̱kya, nyi yok sa̱t nyin hu ku tyia̱ nyi chat á̱ghyang, nyi nyia̱ á̱ghyang nyin nta̱m.

2 Timoti 3:7

(Á̱nyiuk bani kuzang jen ba̱ ni̱ shya̱ di̱ myiam. A̱mgba̱m ma̱ng a̱nia, ba̱ tat tyan lyen a̱chuchuk wu bah.)

Yakubu 1:25

A̱wot a̱tyu a̱ tyia̱ fwuo hu di̱ zop a̱tsatsak a̱lyiat A̱gwaza na na̱ chong ma̱ng sa̱t a̱ni; a̱wot ka̱ a̱ ya a̱son ma̱ng nyia̱ a̱di̱dam da̱ A̱lyiat A̱gwaza na, a̱ si̱ nyia̱ ta̱m ma̱ng á̱na, a̱ si̱ bwung kyang hu nang gu fa̱k a̱ni bah, A̱gwaza na tyia̱ nggu a̱li̱ba̱rka mi̱ kuzang kyang nang gu nyia̱ a̱ni.

Yakubu 2:12

Mat a̱nia, nyi yok bwung bah, kuzang kyang nang nyi lyiat, ku nyi nyia̱ a̱ni, á̱ na nyia̱ nyin shi̱ri̱ya ma̱ng doka ji, ji̱ nwuat nyin sa̱t hu a̱ni.

1 Bitut 2:16

Nyi yet á̱sa̱t á̱niet bya. A̱mgba̱m ma̱ng a̱nia, nyi yet á̱khwo A̱gwaza bya. Mat a̱nia, nyi yok ghwon sa̱t nyin hu, ku yet ta̱fwat nang nyi na nyia̱ a̱ka̱kpa̱t a̱ni bah.

2 Yoona 1:1

Nung Yoona, n gyet a̱niet khwop a̱niet a̱ni, nung gwa n dyuut nyin wusika jini, n ta̱m ndyo da̱ a̱vwuo nyin, a̱yang a̱li ma̱ng mman nggu na nang A̱gwaza khai a̱ni. Mami a̱chuchuk n chat nyin ba̱t; nung gwa ma̱nyin nung bah, a̱wot ma̱ng a̱mgba̱m á̱niet ba ba̱ lyen a̱chuchuk A̱gwaza wu a̱ni.