Yoona 5:39 - A̠lyiat A̠gwaza na di̠n Tyap: A̠li̠ka̠uli A̠fai

³⁹ “Nyi zop A̱lyiat A̱gwaza na, mat nyi fa nyi na shya̱ swuan sang sangba̱p ja. A̱wot A̱lyiat A̱gwaza na; ni̱nia tyai nyin a̱tyu nang ngyet a̱ni!

Yoona 5:39 Iomraidhean Croise

Matyu 22:29

Yesu si̱ nwuak ba shim nyia̱, “Lyip huni tak nang nyi ka̱n ghyuap wa. Mat nyi ka̱n dyen A̱lyiat A̱gwaza na ma̱ng chet nggu hu bah.

Ma̱rkut 10:3

Yesu si̱ nwuak mba shim ma̱ng lyip nyia̱, “Yihwa nang Musa lyuut mi̱ doka ji tazwa tyat nyeang hu?”

Ma̱rkut 12:10

Nyi ka̱n fang ma̱ A̱lyiat A̱gwaza na nang á̱ ndyuut a̱ni baa? Nyia̱, ‘A̱fang ka nang á̱niet nok ba lak a̱ni; kikya nang á̱ kpaat da̱ a̱ta̱m kuntyin nok ka.

Luka 16:29

“A̱wot Ibrahim si̱ nwuak gu shim nyia̱, ‘Kaai, ka̱ ba̱ doot ba̱ fang doka Musa ma̱ng a̱lyiat nang a̱yaata̱m a̱kwonu A̱gwaza ba ku lyuut, ba̱ si̱ ngba mba a̱ni. Yok, ba̱ nyia̱ nta̱m ma̱ng a̱lyiat a̱nia.’

Luka 16:31

“Ibrahim si̱ nyia̱, ‘Kaai, ka̱ ba̱ lak myiai a̱fufwuo, ba̱ si̱ nyia̱ ta̱m ma̱ng doka Musa ji ma̱ng a̱lyiat a̱yaata̱m a̱kwonu A̱gwaza a̱nia; ku nang a̱yin doot ma̱ng swuan ma̱ á̱niet ba̱ ka̱n kwi a̱ni, a̱ si̱ nat da̱ a̱vwuo mba; ba̱ na myiai a̱fufwuo ba̱ nyia̱ ta̱m ma̱ng a̱lyiat nggu na bah!’ ”

Luka 24:25

A̱jawa Yesu si̱ nyia̱ ma̱ng a̱mba, “Kwot, nyin á̱niet sang mumwang! Nyi si̱ bu byia̱ á̱kpa̱p nfwuo di̱ nwai nwuak a̱chuchuk da̱ a̱lyiat nang a̱yaata̱m a̱kwonu A̱gwaza ba ku lyuut ma̱ A̱lyiat A̱gwaza na a̱ni!

Luka 24:27

A̱wot Yesu si̱ wa̱i mba a̱mgba̱m A̱lyiat A̱gwaza na, kyiak neet di̱ doka Musa ji, ba̱ng ba̱ tat shei á̱zanson nang a̱mgba̱m a̱yaata̱m a̱kwonu A̱gwaza á̱ghyang ku lyuut a̱ni.

Luka 24:44

A̱jawa Yesu si̱ nyia̱, “Jen nang n ku nshya̱ ndung ma̱ng a̱nyin a̱ni, n ku ntak ma̱ng a̱nyin á̱zanson nang kuzang a̱lyiat nang á̱ lyuut tazwa nung mi̱ doka Musa ji ma̱ng a̱yaata̱m a̱kwonu A̱gwaza ba, mbeang Za̱bura a̱ni; ku yet ta hwa na̱ bai da̱ a̱nu ka.”

Yoona 1:45

Filibut mameang si̱ nat a̱ si̱ shya̱ Nataniyel. A̱ si̱ nyia̱ ma̱ng a̱nggu a̱ni, “Zi̱ shya̱ a̱tyu nang Musa ku lyuut nkhang nggu na mami ta̱ka̱da doka ji a̱ni! A̱yaata̱m a̱kwonu A̱gwaza si̱ bu lyuut nkhang nggu na! Nggu wa yet Yesu A̱tyu Na̱za̱ra̱t, nggwon Isuu!”

Yoona 5:32

A̱wot, a̱tyu a̱ shei kpa̱sai a̱lyiat a̱kwonu nung a̱ni, nshya̱. A̱wot n dyen kyang nang gu tak kpa̱sai tazwa nung a̱ni, a̱tsatsak a̱lyiat wa za̱m.

Yoona 5:36

“A̱mgba̱m ma̱ng a̱nia, n byia̱ nkyang na̱ shei a̱chuchuk wu kpa̱sai tazwa nung, na̱ lan si̱ Yoona hu ma̱ng shi a̱ni. Huhwa yet nta̱m na nang n nyia̱ a̱ni; nta̱m na nang A̱tyia̱ nung wu ku nwuak nung n nyia̱ a̱ni. Nta̱m ni̱nia lyiat da̱ a̱kwonu nung. A̱wot na̱ si̱ tak nyin nang A̱tyia̱ nung wu wa ku nta̱m nung.

Yoona 5:40

A̱mgba̱m ma̱ng a̱nia, nyi lak bai da̱ a̱vwuo nung, nyi ka shya̱ swuan ji.

Yoona 5:46

Ka̱ nyi wa nwuak a̱chuchuk di̱ Musa za̱m, si̱ nyi nwuak a̱chuchuk da̱ nung. Mat Musa ku lyuut nkhang nung nia!

Yoona 7:52

Ba̱ si̱ nyia̱, “Nwan meang, a yet a̱tyu Ga̱lili wa a? Zop A̱lyiat A̱gwaza na shansham a lii; á̱ byia̱ a̱ta̱m a̱kwonu A̱gwaza a̱ na ghwut ma̱ a̱byin Ga̱lili a̱ni bah!”

Nta̱m A̱yaata̱m 13:27

Á̱niet Urusha̱lima ba, mbeang a̱yaakwak a̱son mba ba, ku fi̱k nang Yesu wa ngyet a̱tyu nang a̱yaata̱m a̱kwonu A̱gwaza ba ku lyiat tazwa nggu a̱ni bah. Da̱ a̱kwonu a̱kya, ba̱ si̱ faat gu shi̱ri̱ya a̱khwu. A̱wot ku si̱ bai cha̱chaat da̱ a̱nu ka, ma̱nang A̱lyiat A̱gwaza na nang a̱yaata̱m a̱kwonu nggu ba ku tak á̱zanson ba̱ si̱ lyuut a̱ni. A̱wot á̱ fang Á̱lyiat nani á̱ nchi̱ri̱ng kuzang a̱tuk Mam Fwung A̱yahudawa ka.

Nta̱m A̱yaata̱m 17:11

Á̱niet Bi̱riya ba ku lan á̱niet Ta̱solonika ba ma̱ng yet a̱tan á̱niet. A̱wot ba̱ si̱ myiai a̱fufwuo ma̱ng di̱dang á̱ fwuong á̱lyiat A̱gwaza nang Bulut shei mba a̱ni. A̱wot ba̱ si̱ zop A̱lyiat A̱gwaza na kuzang a̱tuk, ba̱ ka li kee a̱lyiat nang Bulut ma̱ng Sila tyiet a̱ni, yet a̱tsak a̱lyiat wa.

Nta̱m A̱yaata̱m 26:27

“A̱gwam A̱ga̱riba, a nwuak a̱chuchuk da̱ a̱yaata̱m a̱kwonu A̱gwaza baa? N dyen, a nwuak a̱chuchuk da̱ mba za̱m.”

A̱romawa 1:2

A̱sham Nkhang kani kya nang A̱gwaza ku nyia̱ a̱li̱ka̱uli wu neet gbangbang a̱bwonu a̱yaata̱m a̱kwonu nggu ba, ma̱nang á̱ ndyuut mami A̱za̱za̱rak A̱lyiat A̱gwaza wu a̱ni.

A̱romawa 3:2

A̱tsak a̱lyiat, A̱yahudawa ba byia̱ kpangti̱n gba̱mgbam di̱ kuzang vak! Di̱ ntsa hu, A̱yahudawa bya nang A̱gwaza ma̱ a̱pyia̱ nggu ku tyai mba a̱mgba̱m a̱lyiat nggu na. A̱wot a̱ si̱ tyia̱ mba ndyo mbwak.

A̱kolosiyawa 3:16

Nyi ni̱ nyia̱ a̱di̱dam tazwa A̱sham Nkhang Kristi ka mi̱ nfwuo nyin na kuzang jen. Nyi ni̱ ntyiet tsa bu ngba á̱ghyang nyin ma̱ng a̱mgba̱m mumwang nang A̱gwaza ka̱u nyin a̱ni. Nyi ni̱ ngwai A̱gwaza mi̱ nfwuo nyin na. Nyi bwom bubwom Za̱bura, bubwom dyep A̱gwaza, ma̱ng bubwom A̱za̱za̱rak Ntswa ghyang.

Ibriniyawa 11:16

Da̱ a̱kwonu a̱kya, ba̱ ku tyia̱ fwuo da̱ a̱byin ka̱ swak mi̱ yet a̱ni. Kikya yet a̱byin Ma A̱gwaza tswazwa ka. Huhwa mbyia̱, A̱gwaza fa̱k nsum bah, a̱ yei mba á̱niet ngguu. A̱tsak a̱lyiat, a̱ wa ka̱n jhyi mba a̱keang swat.

Ibriniyawa 11:35

Mat nang á̱nyiuk á̱ghyang ku nnwuak fwuo da̱ A̱gwaza a̱ni, ba̱ si̱ san á̱niet nang ba̱ chat a̱ni ma̱ng swuan ma̱ á̱niet ba̱ ka̱n kwi a̱ni. A̱wot á̱ghyang á̱niet nang á̱ ku nyiak a̱ni, ba̱ si̱ lak ghwon khwi A̱gwaza hu, da̱nian á̱ ka kai mba á̱ ghwon, ba̱ shot. Ba̱ ku tyia̱ fwuo di̱ swuan ji yet a̱ swak a̱ni, di̱n jen nang ba̱ bye ndoot ma̱ng swuan ma̱ á̱niet ba̱ ka̱n kwi a̱ni.

Tyai Á̱zanson 19:10

A̱jawa n si̱ nta̱bwak a̱zaghyi nggu n si̱ nkyuak gu ntong. A̱wot a̱ta̱m tswa A̱gwaza wu si̱ nyia̱ ma̱ng a̱nung, “Kaai, yok kyuak nung ntong bah! N gyet a̱khwo A̱gwaza wa, ma̱nang nwan ma̱ng á̱na̱nyiuk ang ba ntak kpa̱sai nwuak fwuo nyin hu di̱ Yesu a̱ni. A̱gwaza wa ma̱nyin nggu á̱ kwok gu ntong! Mat a̱chuchuk tak kpa̱sai wu tazwa Yesu; nggu wa yet kyang nang A̱za̱za̱rak Ntswa A̱gwaza wu ni̱ nfuut á̱niet ba ba̱ shei A̱lyiat A̱gwaza na á̱zanson.”