Yoona 5:36 - A̠lyiat A̠gwaza na di̠n Tyap: A̠li̠ka̠uli A̠fai

³⁶ “A̱mgba̱m ma̱ng a̱nia, n byia̱ nkyang na̱ shei a̱chuchuk wu kpa̱sai tazwa nung, na̱ lan si̱ Yoona hu ma̱ng shi a̱ni. Huhwa yet nta̱m na nang n nyia̱ a̱ni; nta̱m na nang A̱tyia̱ nung wu ku nwuak nung n nyia̱ a̱ni. Nta̱m ni̱nia lyiat da̱ a̱kwonu nung. A̱wot na̱ si̱ tak nyin nang A̱tyia̱ nung wu wa ku nta̱m nung.

Yoona 5:36 Iomraidhean Croise

Matyu 11:4

Yesu si̱ nwuak ba shim nyia̱, “Nyi nat nyi hyia̱ ma̱ng Yoona nkhang nta̱m nang nyi fa̱k, nyi si̱ bu li a̱ni:

Luka 2:49

Yesu si̱ myiai a̱nu, a̱ si̱ lyip ba nyia̱, “Yihwa mbyia̱ nyi nchat nung? Nyi lyen nang ku ngyet ta hwa n nyia̱ ta̱m A̱tyia̱ nung hu baa?”

Yoona 10:25

Yesu si̱ nwuak ba shim nyia̱, “N wa ka̱n tak ma̱ng a̱nyin. A̱mgba̱m ma̱ng a̱nia, nyi si̱ lak nwuak fwuo hu da̱ nung. Nkyang a̱ga̱de na nang n nyia̱ da̱ a̱lyoot A̱tyia̱ nung ka a̱ni, ni̱nia lyiat a̱kwonu nung ka, na̱ si̱ bu shei kyang hu nang n gyet a̱ni.

Yoona 11:37

Bi̱ri̱ng ma̱ng a̱nia, A̱yahudawa á̱ghyang si̱ nyia̱ ma̱ng á̱ghyang mba a̱ni, “A̱tyu a̱ ku teak a̱tyu a̱fi̱fan wu á̱ghyi ba a̱ni, ka̱ doot a̱ vwuong a̱tyu wuni a̱khwu ka baa?”

Yoona 15:24

“N ku nyia̱ nkyang a̱ga̱de ma̱ a̱di̱di̱t a̱zaghyi mba. Mami mba, á̱ mbyia̱ a̱tyu a̱ ka̱ mak nyia̱ na a̱ni bah. Ka̱ á̱ wa nyia̱, di̱ n wa nyia̱ nkyang a̱ga̱de a̱nia a̱zaghyi mba bah; si̱ ba̱ byia̱ a̱bun bah. A̱wot ma̱ninika, ba̱ li kyang hu nang n nyia̱ a̱ni. A̱mgba̱m ma̱ng a̱nia, ba̱ si̱ lak li nung, á̱ tsa bu ndak li A̱tyia̱ nung wu.

Yoona 17:4

“N wa ka̱n nwuak ang shi mi̱ swanta hu, mat si̱sak ji nang n ku ntyak ta̱m hu nang á̱ ku nwuak nung n nyia̱ a̱ni.

Yoona 2:23

Nang Yesu ku nshya̱ ma̱ a̱keang Urusha̱lima di̱n jen A̱yet Ghwut Mman Isi̱rela mi̱ Khwo hu a̱ni, á̱niet ma̱ a̱di̱di̱t ku nwuak fwuo da̱ nggu, mat nkyang a̱ga̱de nang gu nyia̱ a̱ni.

Yoona 3:17

“A̱gwaza ku ta̱m ma̱ng nggwon nggu ka mi̱ swanta hu, da̱nian ka̱ ka yet a̱tyu nyia̱ shi̱ri̱ya wa bah. A̱ ku ta̱m ma̱ng a̱nka da̱nian ka̱ ka yet A̱tyusan á̱niet mi̱ swanta bya, ba̱ shya̱ swuan da̱ a̱vwuo nka kya.

Yoona 3:2

Nggu wa ku bai da̱ a̱vwuo Yesu a̱tyetuk, a̱ si̱ ba̱ nyia̱, “A̱tyu tyiet, zi̱ lyen nang a ngyet a̱tyu tyiet wa nang A̱gwaza ta̱m ndyo a̱ni. Mat á̱ mbyia̱ a̱tyu a̱ na nyia̱ ntangka̱i a̱cha̱chet nkyang a̱ga̱de nani nang a nyia̱ a̱ni; ka̱nang A̱gwaza shya̱ dundung ma̱ng a̱nggu bah.”

Yoona 4:34

Yesu si̱ nyia̱ ma̱ng a̱mba a̱ni, “Kyayak nung huhwa yet; n khwi kyang nang a̱tyu a̱ ta̱m nung chat a̱ni, a̱wot n bu nyia̱ ta̱m nang gu nwuak nung a̱ni, n tyak hu.

Yoona 5:32

A̱wot, a̱tyu a̱ shei kpa̱sai a̱lyiat a̱kwonu nung a̱ni, nshya̱. A̱wot n dyen kyang nang gu tak kpa̱sai tazwa nung a̱ni, a̱tsatsak a̱lyiat wa za̱m.

Nta̱m A̱yaata̱m 2:22

“Nyin á̱niet Isi̱rela, nyi myiai a̱fufwuo, nyi fa̱a̱k! Yesu a̱tyu Na̱za̱ra̱t wa nang A̱gwaza tak nyin kpa̱sai, a̱ si̱ ta̱m ma̱ng a̱nggu. A̱gwaza tak si̱ huni, di̱ tyia̱ Yesu a̱ nyia̱ kuzang tangka̱i a̱ri̱bi̱di, nkyang a̱ga̱de, ma̱ng a̱lama; ma̱nang nyin ma̱ á̱pyia̱ nyin ndyen a̱ni.

1 Yoona 5:9

Mat nang zi̱ nwuak a̱chuchuk di̱ sheda nang a̱tyubishyi tak zi̱t a̱ni, a̱tsak a̱lyiat zi̱ na nwuak a̱chuchuk di̱ a̱gba̱ndang sheda nang A̱gwaza tak zi̱t a̱ni a̱ swaak. A̱wot A̱gwaza nwuak sheda tazwa Nggwon nggu ka.