Yoona 5:22 - A̠lyiat A̠gwaza na di̠n Tyap: A̠li̠ka̠uli A̠fai

²² A̱tyia̱ wu ma̱ a̱pyia̱ nggu na nyia̱ a̱yin shi̱ri̱ya bah. A̱ wa ka̱n nwuak Nggwon nggu ka tyok ka̱ nyia̱ konyan shi̱ri̱ya.

Yoona 5:22 Iomraidhean Croise

Matyu 11:27

“A̱tyia̱ nung wu, tyia̱ nung kuzang kyang mbwak. Á̱ mbyia̱ a̱tyu a̱ lyen Nggwon ka a̱tsatsak lyen a̱ni bah, si̱ ma̱ A̱tyia̱ wu. A̱wot á̱ bu mbyia̱ a̱tyu a̱ lyen A̱tyia̱ wu a̱tsatsak lyen a̱ni bah, si̱ ma̱ Nggwon ka. Ma a̱nia wa, á̱niet nang Nggwon ka khai a̱ni, bibya ka̱ na tyai mba A̱tyia̱ wu kpa̱sai, ba̱ lyen gu.”

Matyu 16:27

“Mat Nggwon A̱tyubishyi na bai mami a̱kyenkyai shi A̱tyia̱ nggu wu ma̱ng a̱yaata̱m tswá nggu ba. A̱wot a̱ na nwuak kuzang a̱yin zang ji, ji̱ maai cha̱chaat ma̱ng ta̱m nang gu nyia̱ a̱ni.

Matyu 28:18

Yesu si̱ bai, a̱ si̱ tyia̱ mman ta̱m nggu na ta̱m nyia̱, “Á̱ nwuak nung a̱mgba̱m Tyok Ma A̱gwaza tswazwa ma̱ng swanta.

Yoona 17:2

A nwuak Nggwon ang ka tyok tazwa a̱mgba̱m á̱niet ba. Da̱nian ka̱ ka nnwuak á̱niet ba nang a nwuak nka a̱ni swuan sang sangba̱p.

Yoona 3:35

A̱tyia̱ wu fa̱k da̱ Nggwon ka ba̱t. Huhwa mbyia̱ a̱ si̱ tyia̱ kuzang kyang mbwak nka.

Yoona 5:27

Ma a̱nia wa, a̱tyia̱ wu si̱ bu nwuak Nggwon ka tyok ka̱ nyia̱ shi̱ri̱ya, mat ka̱ yet Nggwon A̱tyubishyi kya.

Yoona 9:39

Yesu si̱ nyia̱, “N bai mi̱ swanta hu, da̱nian n ka nghai á̱niet. M bai da̱nian á̱niet di̱ ba̱ nwuan a̱vwuo a̱ni bah, ba̱ ka shya̱ nwuan hu; a̱wot á̱niet ba̱ dam nyia̱ ba̱ nwuan a̱ni, ba̱ ka tyia̱ á̱niet a̱fi̱fan.”

Nta̱m A̱yaata̱m 10:42

“A̱ si̱ tyia̱ nzi̱t ta̱m shei A̱sham Nkhang hu mi̱ kuzang a̱vwuo. A̱wot zi̱ tak kpa̱sai nang Yesu wa nang A̱gwaza nkup gu tyok, gu ka nyia̱ a̱mgba̱m á̱niet mi̱ swanta ba shi̱ri̱ya; á̱niet ba̱ swuan a̱ni, ma̱ng á̱si̱ ba̱ ka̱n kwi a̱ni.

Nta̱m A̱yaata̱m 17:31

Mat A̱gwaza ka̱n sak mam nang gu bye nnyia̱ a̱mgba̱m á̱niet mi̱ swanta ba a̱tsotswat shi̱ri̱ya, mat a̱tyu nang gu khai a̱ni. A̱wot a̱ si̱ tak konyan kpa̱sai a̱tyu a̱ na nyia̱ shi̱ri̱ya ji a̱ni. Nggu wa nang gu ta̱ngam ma̱ng swuan ma̱ á̱niet ba̱ ka̱n kwi a̱ni.”

A̱romawa 2:16

A̱wot A̱sham Nkhang nang n shei nyin a̱ni, kikya ka; mam chobai nang A̱gwaza na nnyia̱ á̱niet ba shi̱ri̱ya tazwa a̱di̱dam nang ba̱ nyia̱ di̱ niat mi̱ swat mba hu a̱ni. A̱wot Kristi Yesu wa nang A̱gwaza nwuak gu tyok nang gu na nnyia̱ konyan shi̱ri̱ya ji a̱ni.

2 A̱korontiyawa 5:10

Mat a̱mgba̱m nzi̱t, ku yet ta hwa zi̱ yong a̱zaghyi a̱gba̱ndang chuk tyok Kristi wu, da̱nian gu ka nyia̱ nzi̱t shi̱ri̱ya. Konyan ma̱ nzi̱t, na san zang cha̱chaat ma̱ng kyang hu nang gu nyia̱ mi̱ vam swanta huni a̱ni, ku hu yet a̱tan, ku hu yet a̱ka̱tuk.

2 Timoti 4:1

N kam ang a̱zaghyi A̱gwaza ma̱ng Kristi Yesu, a̱tyu a̱ na faat shi̱ri̱ya tazwa á̱niet nswuan ma̱ng á̱si̱ ba̱ ka nkwi a̱ni, di̱n jen nang gu na mbwuok a̱ ba̱ kpaat tyok nggu hu a̱ni.

1 Bitut 4:5

A̱wot nyi yok bwung bah, ku yet ta hwa á̱kpa̱ndang a̱bya, ba̱ yong a̱zaghyi A̱gwaza. Nggu wa na faat ba shi̱ri̱ya ji. Konyan a̱ hyia̱ kyang hu nang gu nyia̱ a̱ni, a̱mgba̱m á̱niet swuan ma̱ng á̱si̱ ba̱ ka̱n kwi a̱ni.