Yoona 5:19 - A̠lyiat A̠gwaza na di̠n Tyap: A̠li̠ka̠uli A̠fai

¹⁹ A̱jawa Yesu si̱ wa̱i a̱lyiat nyia̱, “N na hyia̱ ma̱ng a̱nyin a̱chuchuk; Nggwon A̱gwaza ka nyian kuzang kyang ma̱nyin ka bah; a̱ ni̱ nyia̱ kuzang nkyang nang gu li nang A̱tyia̱ wu nyia̱ wa a̱ni. Mat kuzang kyang nang A̱tyia̱ wu nyia̱ a̱ni; huhwa nang Nggwon ka nyia̱ mameang.

Yoona 5:19 Iomraidhean Croise

Matyu 26:39

A̱ si̱ doot mba a̱ ghwon. A̱ si̱ laai neap ti̱taa, a̱ si̱ kpaat a̱khwukhwut a̱ta̱gurup a̱ghyi ba a̱byin, a̱ si̱ naai A̱gwaza nyia̱, “A̱tyia̱ nung wu! Ka̱ ku myim ang, ti̱n nung a̱kashyi swuo a̱bung wuni! A̱mgba̱m ma̱ng a̱nia, yok nyia̱ kyang hu nang n chat wa a̱ni bah. Nyia̱ kyang hu ku myim ang wa a̱ni!”

Luka 21:15

Mat nung gwa ma̱ a̱pyia̱ nung na nwuak nyin swáng á̱lyiat ji cha̱chaat ma̱ng tangka̱i mumwang nang á̱niet lak li nyin ba si̱ mi̱n fwuo, a̱wot ba̱ swuo chet hu a̱ni bah.

Yoona 10:18

Á̱ mbyia̱ a̱tyu a̱ na san swuan nung ji a̱ ghwon nung a̱ni bah. Nung gwa shim, n na neap swuan nung ji, a̱wot n doot n bu mbwuok ma̱ng a̱nji. Si̱ huni hwa yet kyang hu nang A̱tyia̱ nung wu ta̱m nung n nyia̱ a̱ni.”

Yoona 12:49

“Nkyang nang n tyiet a̱ni, na̱ neet da̱ a̱vwuo nung kya bah. A̱tyia̱ nung wu wa a̱ ta̱m nung a̱ni; nggu wa tak nung a̱lyiat nang n dyiat a̱ni.

Yoona 12:50

A̱wot n bu ndyen, a̱lyiat nggu na nwuat swuan sang sangba̱p. Mat a̱nia, a̱mgba̱m kyang nang n hyia̱ a̱ni, n hyia̱ nhu ma̱ cha̱chaat ma̱ng kyang hu nang A̱tyia̱ nung tak ma̱ng a̱nung n dyiat a̱ni.”

Yoona 14:10

A nwuak a̱chuchuk nyia̱ n shya̱ mami A̱tyia̱ nung wu, A̱tyia̱ nung wu mameang, si̱ shya̱ mami nung baa? A̱lyiat nang n ndyiat ma̱ng a̱nyin a̱ni, n ndyiat naa mi̱ tyok a̱pyia̱ nung hwa bah. A̱tyia̱ nung wa a̱ swan mami nung ka a̱ni; nggu wa ma̱ a̱pyia̱ nggu nyia̱ nta̱m gu.

Yoona 2:19

Yesu si̱ nwuak ba shim nyia̱, “Nyi bi̱ri̱m A̱li Nwuat Za̱nang A̱gwaza kani. Nung mameang, mami mam ntat, n bu na nok ka.”

Yoona 3:3

Yesu si̱ nyia̱ ma̱ng a̱nggu, “Yok n tak ma̱ng a̱nwan a̱tsatsak a̱lyiat, ka̱ a byin ang a̱ka̱feang bah, a si̱ mi̱n di Tyok A̱gwaza hu lili bah za̱m.”

Yoona 5:21

“Ma̱nang A̱tyia̱ wu ni̱ nta̱ngam á̱niet ba̱ ka̱n kwi, a̱wot a̱ bu nwuat ba swuan a̱ni; ma a̱nia wa nang Nggwon ka nnwuat swuan da̱ a̱tyu nang ka̱ shim nwuak a̱ni.

Yoona 6:38

N chyok neet Ma A̱gwaza tswazwa, n ka nyia̱ ta̱m a̱pyia̱ nung hwa bah. Ta̱m a̱tyu a̱ ta̱m nung wa a̱ni; huhwa nang n nyia̱.

Yoona 8:28

Yesu si̱ nyia̱ ma̱ng a̱mba a̱ni, “Jen nang nyi bye nta̱ngam Nggwon A̱tyubishyi tswazwa a̱ni; jen a̱ja ja nang nyi bye ndyen nang nung gwa ngyet a̱tyu nang n tak ngyet a̱ni. N nyia̱ kyang ma̱nyin nung bah. N nyia̱ di̱ si̱sak ji nang A̱tyia̱ nung wu ntyiet nung a̱ni; a̱nia wa nang n dyiat.

Yoona 9:4

“Ku yet ta hwa zi̱ nyia̱ ta̱m a̱tyu a̱ ta̱m nung a̱ni, neet nang mam ni̱ sai. A̱tyetuk na khwat, da̱nang a̱yin si̱ mi̱n nyia̱ ta̱m a̱ni bah.

Nta̱m A̱yaata̱m 2:24

A̱mgba̱m ma̱ng a̱nia, A̱gwaza si̱ ti̱n nggu mi̱ swuo a̱bung a̱khwu. A̱ si̱ ta̱ngam gu ma̱ng swuan ma̱ á̱niet ba̱ ka̱n kwi a̱ni. Mat a̱khwu ka byia̱ chet ku maai ba̱ng nggu a̱ni bah!

A̱romawa 6:4

A̱wot ku li a ngyei zi̱ ku khwu, á̱ si̱ niat nzi̱t ndung ma̱ng Kristi mi̱ Ba̱ptisman ji. A̱wot ma̱nang á̱ ku nta̱ngam Kristi ma̱ng swuan ma̱ á̱niet ba̱ ka̱n kwi a̱ni, mat chet A̱gwaza a̱ yet A̱tyia̱ a̱ byia̱ a̱kyenkyai shi a̱ni, ma a̱nia wa ma̱ninika nzi̱t meang, zi̱ na swan swat swuan swai.

A̱romawa 8:11

A̱wot A̱za̱za̱rak Ntswa A̱gwaza wu a̱ ku ta̱ngam Yesu ma̱ng swuan ma̱ á̱niet ba̱ ka̱n kwi a̱ni, nggu wa shya̱ mi̱ nfwuo nyin na. A̱wot ma̱nang A̱gwaza nta̱ngam Kristi Yesu ma̱ng swuan ma̱ á̱niet ba̱ ka̱n kwi a̱ni; ma a̱nia wa a̱ na nwuak nvam nyin na na̱ kwi a̱ni swuan sang sangba̱p, mat ma̱ nggu A̱za̱za̱rak Ntswa wuni a̱ shya̱ mi̱ fwuo nyin na a̱ni.

1 A̱korontiyawa 15:12

Ma̱ninika, ki̱ zi̱ shei a̱lyiat A̱gwaza na nyia̱ Kristi ku khwu, a̱ si̱ doot ma̱ng swuan ma̱ á̱niet ba̱ ka̱n kwi a̱ni; yihwa mbyia̱ nang á̱ghyang ma̱ nyin nnyia̱ di̱ á̱niet ba̱ ka̱n kwi a̱ni, na doot ma̱ng swuan bah?

2 A̱korontiyawa 4:14

Zi̱ lyen A̱gwaza wu a̱ ta̱ngam Yesu ma̱ng swuan ma̱ á̱niet ba̱ ka̱n kwi a̱ni. Nggu wa bu na ta̱ngam nzi̱t ma̱ng swuan dundung ma̱ng Yesu. A̱wot a̱ na neap zi̱t dundung ma̱ng a̱nyin a̱zaghyi nggu.

2 A̱korontiyawa 5:10

Mat a̱mgba̱m nzi̱t, ku yet ta hwa zi̱ yong a̱zaghyi a̱gba̱ndang chuk tyok Kristi wu, da̱nian gu ka nyia̱ nzi̱t shi̱ri̱ya. Konyan ma̱ nzi̱t, na san zang cha̱chaat ma̱ng kyang hu nang gu nyia̱ mi̱ vam swanta huni a̱ni, ku hu yet a̱tan, ku hu yet a̱ka̱tuk.

A̱fisawa 2:5

ku nang zi̱ ku ndi nang nkwom a̱ni da̱ a̱vwuo nggu mat a̱ka̱tuk nyia̱ nzi̱t wu a̱ni. A̱ si̱ tyia̱ zi̱ swan swat fai ma̱ A̱za̱za̱rak Ntswa, di̱n jen nang gu ku nta̱ngam Kristi ma̱ng swuan ma̱ á̱niet ba̱ ka̱n kwi a̱ni. (Mat shok A̱gwaza ja ma̱nyin ji, mbyia̱ nang nyi nshya̱ san!)

A̱fisawa 3:16

N naai A̱gwaza gu nang nyin a̱li̱ba̱rka mami zwá a̱kyenkyai shi nggu ji, ji̱ nwai tyiai a̱ni; gu shim nyi shya̱ chet mi̱ nfwuo nyin na ku neet da̱ a̱vwuo A̱za̱za̱rak Ntswa a̱ni.

A̱filibiyawa 3:21

Kristi na shyak á̱bobwot nvam nzi̱t nani na̱ tyiai a̱ni, a̱ tyia̱ na na̱ tai vam a̱kyenkyai shi nggu hu. A̱ na nyia̱ si̱ huni mat chet nang gu byia̱ a̱ nnyia̱ tyok tazwa a̱mgba̱m kuzang kyang a̱ni.

A̱filibiyawa 4:13

Ki̱ n doot n swan nswat huni mi̱ kuzang tangka̱i njen nang n shya̱ a̱pyia̱ nung a̱ni, mat chet hu nang Kristi nang nung a̱ni.

A̱kolosiyawa 1:11

Zi̱ bu naai A̱gwaza gu ka nang nyin chet gba̱mgbam ku neet mi̱ a̱gba̱ndang chet nggu wu a̱ni; da̱nian nyi ka gbang a̱lyia̱ mami swuo a̱bung, nyi ni̱ nyeap nfwuo nyin na ma̱ng a̱lyia̱ a̱sai gba̱mgbam.

A̱kolosiyawa 1:16

Mat nggu wa yet vak hu nang A̱gwaza mmat kuzang kyang ku shya̱ tswazwa ma̱ng a̱byin a̱ni. Nggu wa nyia̱ nkyang nang zi̱ nwuan a̱ni, ma̱ng si̱ nang zi̱ nwai nwuan a̱ni; kidee: a̱cha̱chet chuchuk tyok, lyulyoot ntyok, a̱yaakwak a̱son, ma̱ng ntyok; bibya yet a̱yaata̱m tswá nang á̱ nwai nwuan a̱ni. A̱mgba̱m nkyang nang á̱ mat mi̱ swanta hu a̱ni, A̱gwaza wa tyia̱ Kristi si̱ nyia̱ na; a̱wot kuzang kyang nshya̱, da̱nian ku ka nwuak gu shi.

1 A̱ta̱solonikawa 4:14

Mat ki̱ zi̱ nwuak a̱chuchuk nang Yesu khwu, a̱wot á̱ si̱ ta̱ngam gu ma̱ng swuan ma̱ á̱niet ba̱ ka̱n kwi a̱ni; ma a̱nia wa zi̱ nwuak a̱chuchuk nang A̱gwaza na nta̱ngam á̱niet khwi ba̱ ka̱n kwi a̱ni ma̱ng swuan. A̱wot A̱gwaza na bwuok ma̱ng a̱mba dundung ma̱ng Yesu a̱ bai ndyo.

1 Bitut 3:18

A̱tsak a̱lyiat, Yesu ma̱ a̱pyia̱ nggu ku swuo a̱bung da̱ a̱ka̱nyiung mat a̱ka̱tuk nyia̱ nzi̱t wu. A̱wot a̱ bu na swuo a̱bung bah. A̱ ku yet a̱tsotswat wa. A̱wot a̱ si̱ khwu da̱nian á̱niet a̱ka̱tuk nyia̱, gu ka neap zi̱t a̱za̱za̱rak a̱zaghyi A̱gwaza. Á̱ ku hyat gu mi̱ vam hwa. A̱wot á̱ si̱ ta̱ngam gu ma̱ng swuan mami A̱za̱za̱rak Ntswa.

Tyai Á̱zanson 2:23

N na hyaai á̱niet ba̱ khwi tyiet gu hu a̱ni. A̱wot a̱mgba̱m á̱niet khwi ba na lyen, nang nung gwa ngyet a̱tyu a̱ zop fwuo ma̱ng a̱di̱dam konyan a̱ni! Mat a̱nia, n na ntan konyan zang ma̱ cha̱chaat ma̱ng ta̱m hu nang gu nyia̱ a̱ni.