Yoona 17:19 - A̠lyiat A̠gwaza na di̠n Tyap: A̠li̠ka̠uli A̠fai

¹⁹ Mat bibya mbyia̱ n ja̱u a̱pyia̱ nung di̱ nyia̱ ta̱m, da̱nian mba mameang á̱ ka ja̱u mbaa ba̱ nyia̱ ta̱m shansham mami a̱chuchuk.

Yoona 17:19 Iomraidhean Croise

Yoona 10:36

to, ka̱ nung nang A̱tyia̱ wu ja̱u, a̱wot a̱ si̱ bu ta̱m ndyo mi̱ swanta hu a̱ni, lihyat hwa nang n dyiat A̱gwaza wu ndyo nang n nyia̱, ‘N gyet Nggwon A̱gwaza kya’ a̱ni a?

Yoona 15:13

A̱gba̱ndang chat nang a̱tyubishyi na tak a̱kpa̱ndang nggu ba a̱ni, huhwa yet; gu nwuak swuan nggu ji da̱nian mbaa.

Yoona 15:3

Nyin ma̱ninika, nyi yet á̱za̱za̱rak á̱niet bya. Mat a̱lyiat na nang n hyia̱ ma̱ng a̱nyin a̱ni.

Yoona 17:17

“Ja̱u mba ma̱ng a̱chuchuk wu, a̱wot a bu tyiet mba á̱lyiat ang na; ni̱nia yet a̱chuchuk wu.

Yoona 17:20

“Á̱niet bani bya ma̱nyin mba nang n naai ba ndyo bah. N naai tazwa a̱mgba̱m á̱niet ba̱ na nwuak fwuo da̱ nung, mat A̱lyiat A̱gwaza nang á̱niet bani na shei ma̱ng a̱mba a̱ni.

1 A̱korontiyawa 1:2

N dyuut sot á̱niet khwi A̱gwaza ba̱ shya̱ Korinti a̱ni wusika jini; nyin bya yet á̱niet ba nang A̱gwaza yorong ba̱ yet á̱za̱za̱rak á̱niet nggu a̱ni. A̱gwaza tyia̱ nyin nyi si̱ yet á̱za̱za̱rak á̱niet di̱ mun á̱pyia̱ nyin ma̱ng Kristi Yesu; ma̱nang gu ku nnyia̱ ma̱ng a̱mgba̱m á̱niet ba̱ shya̱ koji á̱ dyep a̱lyoot Yesu Kristi, a̱ yet A̱tyoli nzi̱t wu, ma̱ng á̱si̱ mba wu a̱ni.

2 A̱korontiyawa 4:15

A̱mgba̱m swuo a̱bung huni yet da̱nian kpangti̱n nyin ja. A̱wot ma̱nang A̱gwaza nfa̱k shok á̱niet ma̱ a̱di̱di̱t a̱di̱t a̱ni, ma a̱nia wa, á̱ na ngwai gba̱mgbam. A̱wot á̱ na mbeang nwuak A̱gwaza a̱gba̱ndang kyenkyai shi.

2 A̱korontiyawa 7:14

A̱tsak a̱lyiat, n ku hyia̱ ma̱ng Titut, nang n tam da̱ nyin ba̱t. A̱wot nyi ku tyia̱ n si̱ nfa̱k nsum bah. Kuzang jen, n ni̱ hyia̱ ma̱ng a̱nyin a̱tsatsak a̱lyiat. A̱wot ma̱ninika, nkyang nang n tam da̱ a̱vwuo Titut tazwa nyin a̱ni meang, na̱ bai da̱ a̱nu ka.

2 A̱korontiyawa 8:9

Nyi lyen nang A̱tyoli Yesu Kristi nzi̱t wu mbyia̱ shok gba̱mgbam, a̱ ni̱ nwuat mi̱ fwuo nyiung. Ku nang gu ngyet a̱tyu nzwa a̱ni, a̱mgba̱m ma̱ng a̱nia, a̱ si̱ ghwon zwá nggu ji da̱nian nyin, mami kunak nggu hu. A̱ si̱ tyia̱ nyin nyi ka yet á̱niet nzwá.

A̱kolosiyawa 1:6

A̱sham Nkhang kani nang á̱ shei nyin a̱ni, á̱niet ma̱ a̱di̱di̱t mi̱ swanta hu ka̱n fa̱k, ba̱ si̱ nwuak a̱chuchuk da̱ nka. A̱sham Nkhang kani laai á̱ mban mi̱ nfwuo á̱niet na koji. Ka̱ ni̱ shai swat mba hu nang a̱kwon ni̱ ntyei sum ka̱ laai á̱ mban, mat chet nang ka̱ byia̱ a̱ni. Ma a̱nia wa, nang ka̱ ku nshai a̱ka̱tuk nswat nyin wu di̱n jen nang nyi ku ntsa fa̱k, nyi si̱ fi̱k a̱tsatsak a̱lyiat tazwa a̱gba̱ndang shok A̱gwaza wu a̱ni.

1 A̱ta̱solonikawa 4:7

A̱gwaza ku yei nzi̱t, zi̱ swan a̱shi̱shi̱k nswat bah. A̱wot a̱ yei nzi̱t, zi̱ jaat á̱pyia̱ nzi̱t zi̱ swan a̱za̱za̱rak nswat wa.

2 Timoti 2:10

Huhwa mbyia̱, n gbang a̱lyia̱ ma̱ng kuzang kyang da̱nian á̱niet khwi nang A̱gwaza khai a̱ni, nang mba meang na shya̱ swuan sang sangba̱p nang á̱ shyat neet da̱ a̱vwuo Yesu Kristi a̱ni, ba̱ bu shya̱ a̱kyenkyai shi nggu wu a̱ nwai tyiai a̱ni.

Titut 2:14

Nggu wa yet a̱tyu a̱ neap a̱pyia̱ nggu nang za̱nang a̱ni, da̱nian a̱ ka ti̱n zi̱t mami tyok a̱ka̱tuk nyia̱ hu. A̱ si̱ ja̱u zi̱t da̱nian zi̱ ka yet á̱niet guu nang gu nyia̱ tyok a̱ni; á̱niet ba̱ byia̱ a̱gba̱ndang di̱dang nyia̱ a̱tan nta̱m a̱ni.

Ibriniyawa 10:29

Ka̱ a̱nia wa, swuo a̱bung hu na yet a̱ka̱tuk a̱ swak di̱ tangka̱i á̱niet ba̱ jhyuai Nggwon A̱gwaza ka a̱ni. A̱wot á̱si̱ ba ba̱ bwuak a̱sok nggu na, na̱ kpaat la̱p a̱li̱ka̱uli a̱fai nang A̱gwaza njaat nzi̱t zi̱ si̱ tyia̱ za̱za̱rak a̱ni; á ngyei a̱sok nggu na yet a̱buk kyang na̱ si̱ bu yet a̱za̱za̱rak bah. A̱wot ma̱ng tangka̱i á̱niet ba̱ fwoi ba̱ si̱ nyia̱ A̱za̱za̱rak Ntswa A̱gwaza wu lihyat, a̱tyu a̱ fa̱k shok zi̱t a̱ni, ba̱ na mun á̱ swuo a̱bung!

Ibriniyawa 2:11

Mat a̱nia, ma̱ninika, Yesu ma̱ng á̱niet nang gu chi a̱ka̱tuk nyia̱ mba wu, a̱ si̱ tyia̱ ba̱ yet á̱za̱za̱rak a̱ni; ba̱ byia̱ A̱gwaza a̱nyiung wa, a̱ yet A̱tyia̱ a̱ni. Huhwa mbyia̱ Yesu si̱ ngyorong mba á̱na̱nyiuk nggu, di̱ mi̱n fa̱k nsum.

Ibriniyawa 9:13

Ma̱ a̱khwukhwop ta̱m pris wu, a̱sok nzón á̱ta̱m, ma̱ng á̱si̱ a̱yaaka̱la̱di, ma̱ng ntong sha̱p nyak nang á̱ fwui a̱ni, nang á̱ ni̱ sat da̱ á̱niet na̱ kwi a̱na̱ndyung mi̱ nvam á̱niet ba̱ nwai yet a̱za̱za̱rak a̱ni, ba̱ tyia̱ za̱za̱rak.

Ibriniyawa 9:18

Huhwa mbyia̱, ku a̱khwukhwop la̱p a̱li̱ka̱uli wu nwuo nyia̱ ta̱m ma̱ng a̱sok nzón, ku á̱si̱ nyák.

Ibriniyawa 9:26

Ki̱ Kristi wa nyia̱ a̱nia, si̱ a̱ kwi á̱ nchi̱ri̱ng neet di̱n tsa swanta hu. Da̱ a̱kwonu a̱kya, ma̱ninika a̱ tyai a̱pyia̱ nggu a̱ka̱nyiung kya za̱m di̱ nche ngaan jini. Da̱nian gu ka chi a̱ ti̱n a̱ka̱tuk nyia̱, mat nang gu nkhwu, a̱ si̱ neap a̱pyia̱ nggu gu yet za̱nang a̱ni.

1 Yoona 3:18

Da̱ a̱kwonu a̱kya, nyin mman nung, nyi yok shei chat á̱ghyang nyin hu ma̱ng a̱nu kya bah. Nyi tak chat á̱ghyang nyin hu di̱ nyia̱ á̱tsatsak nta̱m wa ma̱ng a̱chuchuk.

1 Yoona 3:3

A̱wot konyan wa tyia̱ fwuo di̱ Kristi, a̱ ni̱ ja̱u a̱pyia̱ nggu, ma̱nang Kristi nja̱u a̱pyia̱ nggu a̱ni.