Yoona 16:13 - A̠lyiat A̠gwaza na di̠n Tyap: A̠li̠ka̠uli A̠fai

¹³ Mat a̱nia, ka̱ A̱za̱za̱rak Ntswa a̱ yet a̱chuchuk a̱ni bai, a̱ na kwak nyin a̱son di̱ kuzang a̱chuchuk. A̱lyiat a̱pyia̱ nggu nia gu na lyiat bah. A̱ na lyiat kyang nang gu fwuong wa a̱ni. A̱wot a̱ bu na tak ma̱ng a̱nyin nkyang na̱ na bai á̱zanson a̱ni.

Yoona 16:13 Iomraidhean Croise

Yoona 12:49

“Nkyang nang n tyiet a̱ni, na̱ neet da̱ a̱vwuo nung kya bah. A̱tyia̱ nung wu wa a̱ ta̱m nung a̱ni; nggu wa tak nung a̱lyiat nang n dyiat a̱ni.

Yoona 14:17

Nggu wa yet a̱chuchuk A̱za̱za̱rak Ntswa wu, nang á̱niet mi̱ swanta ba lak san hu a̱ni. Mat ba̱ si̱ mi̱n ndi nggu bah. Da̱ mba, ba̱ si̱ mi̱n dyen gu bah. A̱wot nyin, nyi lyen nggu, mat a̱ swan dundung ma̱ng a̱nyin, a̱ si̱ bu shya̱ mi̱ nfwuo nyin na.

Yoona 14:26

A̱wot A̱tyu Beang wu, nggu wa yet A̱za̱za̱rak Ntswa nang A̱tyia̱ wu na ta̱m ndyo da̱ a̱kwonu nung a̱ni; nggu wa na tyiet nyin kuzang kyang. A̱wot a̱ bu jhyung nyin a̱mgba̱m kuzang kyang nang n ka̱n hyia̱ ma̱ng a̱nyin a̱ni.

Yoona 14:6

Yesu si̱ nyia̱ ma̱ng Toma a̱ni, “Nung gwa ngyet vak hu. Nung gwa si̱ ngyet a̱chuchuk wu. Nung gwa si̱ bu ngyet swuan ji. Á̱ mbyia̱ a̱tyu a̱ na nat da̱ a̱vwuo A̱tyia̱ ka, ka̱nang a̱nyuu khwi nung a̱ni bah.

Yoona 15:26

“A̱wot n na ntyia̱ A̱tyu Beang gu bai da̱ a̱vwuo nyin. A̱ na neet da̱ a̱vwuo A̱tyia̱. Nggu wa yet A̱za̱za̱rak Ntswa a̱ shei a̱chuchuk wu a̱ni. Nggu, a̱ na neet da̱ a̱vwuo A̱tyia̱ kya. Nggu wa na tak nyin kpa̱sai tazwa nung.

Yoona 16:12

“N byia̱ nkyang ma̱ a̱di̱di̱t nang n na hyia̱ ma̱ng a̱nyin a̱ni. A̱wot ma̱ninika nyi si̱ mi̱n ba̱ng na bah.

Yoona 3:32

“A̱ shei kyang hu kpa̱sai nang gu ka̱n di, a̱ si̱ fa̱k a̱ni. A̱mgba̱m ma̱ng a̱nia, á̱ mbyia̱ a̱tyu a̱ san a̱lyiat nggu na a̱ni bah.

Yoona 8:38

Nung, n dyiat kyang hu nang n di da̱ a̱vwuo A̱tyia̱ nung ka a̱ni. A̱wot nyin mameang, nyi ni̱ nyia̱ kyang hu nang a̱tyia̱ nyin wu hyia̱ ma̱ng a̱nyin, nyi si̱ fa̱k a̱ni.”

Nta̱m A̱yaata̱m 11:28

A̱tyo nyiung ma̱ mba, á̱ ku ngyei nggu A̱gabut, a̱ si̱ doot a̱ yong nang ba̱ shya̱ ma̱ a̱tung. A̱wot a̱ si̱ tak á̱zanson mat A̱za̱za̱rak Ntswa wu, nang á̱ na nnyia̱ a̱gba̱ndang zong mi̱ swanta nang A̱romawa ba nnyia̱ tyok a̱ni. (Zong jini ku kwa nang a̱gwam shan Ka̱la̱udiyat wa nyia̱ tyok hu.)

Nta̱m A̱yaata̱m 20:23

Mi̱ kyang nyiung hwa nang n dyen. A̱za̱za̱rak Ntswa wu shei ma̱ng a̱nung nyia̱; mi̱ kuzang a̱keang nang n nwuo a̱ni, á̱ na tyia̱ nung mi̱ jaru, a̱wot n bu nswuo a̱bung ba̱t.

Nta̱m A̱yaata̱m 27:24

“A̱ si̱ nyia̱, ‘Bulut, yok fa̱k a̱wun bah! Ku yet ta hwa a yong a̱zaghyi Kaisar a̱gwam shan, a̱ nyia̱ ang shi̱ri̱ya! A̱wot A̱gwaza, mat shok nggu ji, wa ka̱n tyia̱ a̱mgba̱m swuán a̱niet nang nyi wak dundung ma̱ng a̱mba a̱ni, si̱ shot.’

2 A̱ta̱solonikawa 2:12

A̱wot a̱ ka faat shi̱ri̱ya da̱ á̱niet ba̱ fwuong nyinyang nyia̱ a̱ka̱tuk, da̱ a̱kwonu ba̱ na nnwuak a̱chuchuk da̱ a̱tsak a̱lyiat wu a̱ni.

2 A̱ta̱solonikawa 2:3

Nyi yok shim a̱yin a̱ laai nyin di̱ kuzang vak bah. Mat mam a̱hwa na bai bah, si̱ nang jen a̱chi̱nchi̱ri̱ng á̱niet swanta ji bai, a̱gwam tyei zat a̱wa a̱ swan a̱ni, á̱ sii tyai gu kpa̱sai. A̱gwam wuni wa ni̱ chong ma̱ng a̱khwu ka.

Ibriniyawa 1:1

Gbangbang, A̱gwaza ku lyiat ma̱ng a̱yaatyia̱ a̱khwop nzi̱t ba a̱bwonu a̱yaata̱m a̱kwonu nggu ba di̱n jen ma̱ng nvak ma̱ a̱di̱di̱t.

1 Yoona 2:20

A̱wot nyin, Kristi wa ka̱n nang nyin A̱za̱za̱rak Ntswa nggu wu. Mat a̱nia, a̱mgba̱m nyin nyi lyen a̱chuchuk wu.

1 Yoona 2:27

A̱wot Kristi nang nyin A̱za̱za̱rak Ntswa wu. Mat a̱nia, nyi bu chat á̱ghyang á̱niet ba̱ tyiet nyin bah. Da̱ a̱kwonu a̱kya, A̱za̱za̱rak Ntswa nggu wu wa ni̱ tyiet nyin kuzang kyang. A̱wot kyang hu nang gu tyiet nyin a̱ni yet a̱chuchuk wa. Ku yet a̱ka̱laa nia bah. Mat a̱nia, si̱ nyi ya a̱son ma̱ng byia̱ a̱meang di̱ mun á̱pyia̱ nyin hu ndung ma̱ng Kristi, ma̱nang A̱za̱za̱rak Ntswa wu ntyiet nyin a̱ni.

1 Yoona 4:6

A̱wot nzi̱t, zi̱ yet á̱niet A̱gwaza bya. Á̱niet ba̱ lyen A̱gwaza a̱ni, ni̱ myiai a̱fufwuo ba̱ fa̱k kyang nang zi̱ lyiat a̱ni. Ma a̱nia wa, á̱niet da̱ ba̱ lyen A̱gwaza a̱ni bah, ba̱ ni̱ fa̱k kyang nang zi̱ lyiat a̱ni bah. A̱nia wa nang zi̱ na ndyen ka̱ a̱yin ni̱ lyiat a̱ si̱ tyiet cha̱chaat da̱ a̱kwonu A̱za̱za̱rak Ntswa a̱ tyai a̱chuchuk a̱ni, ma̱ng si̱ ji ji̱ yet si̱ laai á̱niet a̱ni.

1 Yoona 5:6

Yesu Kristi bai mi̱ swanta hu, a̱wot á̱ si̱ nyia̱ nggu ba̱ptisman ma̱ng a̱sa̱khwot. A̱wot a̱ si̱ nwuak a̱sok nggu na da̱ a̱team a̱khwu wu. A̱ ku bai ma̱ng a̱sa̱khwot nia ma̱nyin na bah. A̱ ku bai ma̱ng a̱sa̱khwot nia ma̱ng a̱sok. A̱wot A̱za̱za̱rak Ntswa wu wa tak ma̱ng a̱nzi̱t nang nkyang nani ngyet a̱chuchuk, mat nang nggu wa ntak á̱niet ba a̱chuchuk wu a̱ni.

Tyai Á̱zanson 1:1

Ta̱m jini ja nang A̱gwaza nwuak Yesu Kristi, gu ka tyai á̱khwo nggu ba nkyang na̱ na bai di̱ mi̱n byian jen a̱ni. Yesu Kristi meang si̱ ta̱m a̱ta̱m tswa A̱gwaza gu tyai nung Yoona, a̱khwo nggu wu ndyo, ma̱ a̱ma̱bwoi.

Tyai Á̱zanson 1:19

“Mat a̱nia, ma̱ninika, lyuut nkyang nang a ka̱n di a̱ni, mbeang a̱mgba̱m nkyang na̱ shya̱ ma̱nini a̱ni, ma̱ng á̱si̱ na̱ na bai á̱zanson a̱ni.