Yoona 15:2 - A̠lyiat A̠gwaza na di̠n Tyap: A̠li̠ka̠uli A̠fai

² Kuzang bwak a̱kwon ku shya̱ da̱ nung a̱ni, ka̱ ku tyia̱ sum bah, á̱ na tyap hu á̱ ji̱p. Kuzang bwak a̱kwon ku tyei sum a̱ni, á̱ ni̱ shyok hu da̱nian hu ka mbeang sum hu.

Yoona 15:2 Iomraidhean Croise

Matyu 13:12

Á̱niet ba̱ fwuong tyiet nung hu shansham a̱ni, á̱ na mbeang mba lyen hu, a̱wot ba̱ bu lyen gba̱mgbam. A̱wot á̱niet ba̱ lak fwuong tyiet nung hu a̱ni, ku a̱bankyang nang ba̱ fa ba̱ lyen a̱ni, á̱ na san nka á̱ ghwon mbaa.

Matyu 13:33

Yesu si̱ bu lyiat ma̱ng a̱mba di̱ kidee jhyang nyia̱, “Tyok Ma A̱gwaza tswazwa hu laai á̱ mban nang yit wa nang a̱byii̱k kyiak, a̱ si̱si̱ nyia̱ burodi a̱ni. Ku nang gu nkyiai nkyuo yit na ma̱ a̱da̱dei ma̱ng a̱lka̱ma mundu tat a̱ni, nkyuo yit na si̱ teak á̱ kai a̱mgba̱m nkyuo a̱lka̱ma nang gu nuu a̱ni.”

Matyu 15:13

Yesu si̱ nwuak ba shim nyia̱, “Kuzang a̱kwon da̱nang A̱tyia̱ nung wu a̱ shya̱ tswazwa kya a̱ni ti̱p ka bah, á̱ na ngat kaa.

Matyu 21:19

A̱jawa gu si̱ li a̱kwon a̱bwabwap da̱ a̱beam nvak. A̱ si̱ teap a̱ nat kpa̱mkpaan, a̱ ka li ke a̱kwon a̱bwabwap ka byia̱ sum. A̱wot a̱ si̱ shya̱ nang ka̱ yet ma̱ a̱kikyo bya. Yesu si̱ shyi a̱kwon a̱bwabwap ka, nyia̱, “A̱yin bu si̱ mi̱n mak ya sum ang bah, si̱ nat sang sangba̱p!” Mi̱ di̱ yong a̱hwa, a̱kwon a̱bwabwap ka si̱ kin shyuk kiki.

Matyu 25:29

Mat, á̱niet ba̱ ba̱ng nkyang nang á̱ jong ba shansham a̱ni, á̱ na mbeang mba ndyo. A̱wot á̱ na mbeang mba ndyo gba̱mgbam! Da̱ a̱kwonu a̱kya, á̱niet ba̱ ba̱ng nkyang nang á̱ jong ba shansham a̱ni bah, ku a̱bankyang nang ba̱ byia̱ a̱ni, á̱ na ta̱wap ka, á̱ ghwon baa.

Matyu 3:10

A̱wot ku ma̱ninika, á̱ ka̱n sak a̱khwon ka da̱ á̱ni̱nan a̱ka̱kwon ba á̱ nfwuong á̱ tyam a̱ka̱kwon na. Huhwa kuzang a̱kwon ka, ka̱ lak tyia̱ a̱tsatsak nsum a̱ni, á̱ na tyam á̱ni̱nan ba ka̱ kwa a̱byin, a̱wot á̱ ta nka mi̱ ndong!

Matyu 3:12

“A̱ shya̱ ma̱ng bibyia̱ nggu hu mbwak, nang gu na nchyok yak hu a̱ni, gu lyang a̱vwuo tsot yak ka. A̱ na ti̱n tswá yak ji, a̱ tyia̱ ma̱ a̱gban. A̱wot a̱sunsong wu, a̱ na fwui nggu ma̱ a̱nga̱ngak ndong sang sangba̱p, nang á̱ si̱ mi̱n nyiip a̱ni bah.”

Matyu 7:19

Kuzang a̱kwon di̱ ka̱ tyei a̱tan sum a̱ni bah, á̱ ni̱ tyap kaa á̱ tyia̱ nka mi̱ ndong.

Ma̱rkut 4:20

A̱wot a̱tsatsak a̱byin wu a̱ byia̱ bwum hu nang á̱ nnai zwá yak ji a̱ni, kikya yet kidee nfwuo á̱niet ba̱ fa̱k A̱lyiat A̱gwaza na; ba̱ si̱ san naa, ba̱ si̱ nnyia̱ nta̱m, na̱ si̱ tyia̱ tswá ba̱t. Jhyáng si̱ yet nswak ti̱ntat, jhyáng nswak a̱tataa, jhyáng si̱ yet chyi chyi.”

Luka 8:13

“Kukwak hu nang zwá yak ji nkwa̱i a̱ni, huhwa yet kidee nfwuo á̱niet ba̱ fa̱k A̱lyiat A̱gwaza na a̱ni; ba̱ si̱ kin san naa ma̱ng a̱gwai. A̱wot nang A̱lyiat A̱gwaza na mbyia̱ á̱ni̱nan ba̱ nwuo á̱ nat gbang mi̱ nfwuo mba na a̱ni bah; huhwa ki̱ swuo a̱bung ba̱ bai, ku á̱ ya̱shuk baa, ba̱ na bwuok lilyim ma a̱nggang.

Yoona 15:1

“Nung gwa ngyet a̱tsatsak a̱kwon a̱na̱p wu. A̱wot A̱tyia̱ nung wa si̱ yet a̱tyu khap wu.

Yoona 15:16

“Nyin bya ku khai nung bah. Nung gwa ku khai nyin. N si̱ ntyia̱ nyin, nyi nat nyi tyei sum ma̱ a̱di̱di̱t. Sum hu ku na labeang a̱ni. Huhwa na mbyia̱, A̱tyia̱ wu a̱ nang nyin a̱mgba̱m nkyang nang nyi naai mami a̱lyoot nung ka a̱ni.

Yoona 15:3

Nyin ma̱ninika, nyi yet á̱za̱za̱rak á̱niet bya. Mat a̱lyiat na nang n hyia̱ ma̱ng a̱nyin a̱ni.

Yoona 15:6

Konyan wa da̱ a̱ ta̱meet da̱ nung a̱ni bah, a̱ tai bwak a̱kwon nang á̱ ni̱ tyap á̱ ji̱p ku khwot a̱ni. Á̱nietbishyi ni̱ tung ntangka̱i a̱khwot mbwak a̱kwon a̱nia á̱ ntyia̱ long. Long hu ku ya na a̱mgba̱m.

Yoona 15:8

Ka̱ nyi tyei sum ma̱ a̱di̱di̱t nang A̱gwaza chat a̱ni, nyi na tak nang nyi ngyet a̱tsatsak mman ta̱m nung nia. Nyi tsa bu nshei shi A̱tyia̱ nung hu kpa̱sai.

Yoona 17:12

Nang n ku nshya̱ dundung ma̱ng a̱mba a̱ni, n ku nchok ba mi̱ chet a̱lyoot ang hu; a̱lyoot ka nang a ku tyia̱ nung a̱ni. N si̱ nkeang mba ntyia̱, á̱ si̱ byia̱ a̱tyu a̱ bwuk a̱ni bah; a̱tyo nyiung wa ma̱nyin nggu ku bwuk. A̱ ku bwuk wa ma̱nang á̱ ku ndyuut mami A̱lyiat A̱gwaza na a̱ni, ku si̱ bai ma̱ cha̱chaat da̱ a̱nu ka.

A̱romawa 11:17

Á̱ ku tyap bwak ghyang da̱ a̱tsatsak a̱kwon za̱itun nang á̱ chyui a̱ni. A̱wot nyin Nnwap na̱ nwai yet A̱yahudawa a̱ni, nyin bya yet kidee mbwak a̱kwon za̱itun a̱yit na, nang á̱ fwuop di̱ mbwak nkwon a̱tsatsak a̱kwon za̱itun wu a̱ni. Mat a̱nia, ma̱ninika, nyi na shya̱ a̱li̱ba̱rka Ibrahim wu ma̱nang mbwak a̱kwon nang á̱ fwuop da̱ a̱tsatsak za̱itun a̱ni, ni̱ nshya̱ a̱nwai neet da̱ á̱ni̱nan a̱tsatsak a̱kwon ba a̱ni.

A̱romawa 11:22

A̱ji, zi̱ li si̱sak ji nang A̱gwaza wu ngyet a̱tyu fwuong kunak, a̱ si̱ bu yet a̱tyu a̱ ni̱ ba̱ng á̱niet mi̱ chet a̱ni: A̱ ni̱ ba̱ng á̱niet ba̱ lak khwi nggu a̱ni mi̱ chet. A̱wot a̱ ni̱ fwuong kunak nyin ka̱nang nyi ya a̱son di̱ nwuak fwuo di̱n shok nggu ji. Ka̱ nyi ma ngya a̱son bah, nyin mameang á̱ na tyam nyin á̱ weam.

A̱romawa 8:28

A̱wot zi̱ lyen nang A̱gwaza nnyia̱ ta̱m kuzang jen, da̱nian a̱ ka nyia̱ a̱tan nta̱m a̱ mbeang á̱niet ba̱ chat gu a̱ni. Bibya yet á̱niet nang gu khai cha̱chaat ma̱nang gu nda̱p a̱ sak a̱ni.

1 A̱korontiyawa 13:1

Ki̱ n si̱ mi̱n dyiat a̱mgba̱m lilyem swanta hu, mbeang lilyem a̱yaata̱m tswá A̱gwaza hu, a̱wot nang n chat a̱yin bah; n di nang li̱lak ji̱ shyui a̱fufwuo, ku byin ji̱ byia̱ a̱gba̱ndang a̱nwuat a̱ni.

Titut 2:14

Nggu wa yet a̱tyu a̱ neap a̱pyia̱ nggu nang za̱nang a̱ni, da̱nian a̱ ka ti̱n zi̱t mami tyok a̱ka̱tuk nyia̱ hu. A̱ si̱ ja̱u zi̱t da̱nian zi̱ ka yet á̱niet guu nang gu nyia̱ tyok a̱ni; á̱niet ba̱ byia̱ a̱gba̱ndang di̱dang nyia̱ a̱tan nta̱m a̱ni.

Ibriniyawa 12:15

Nyi cham á̱pyia̱ nyin. Nyi yong mi̱ chet. Nyi li nang a̱yin ma̱ nyin bwuok lilyim, a̱ si̱ lyin shok A̱gwaza ji bah. Nyi ta̱bam, kalak a̱yin ma̱ nyin a̱ li nang a̱ni̱nan a̱tyin a̱gba̱za̱zai a̱kwon ka̱ laai a̱ ghwut. Ka̱ si̱ tyia̱ á̱niet khwi ma̱ a̱di̱di̱t swuo a̱bung a̱ni, a̱wot ka̱ byian a̱tan swat á̱niet khwi á̱ghyang ma̱ng lyen nka hu.

1 Yoona 2:19

Á̱niet lak li Kristi bani ghwut mi̱ susot á̱niet khwi nzi̱t ji ja. A̱wot ba̱ ku shya̱ ndung ma̱ng a̱nzi̱t bah. Ka̱ á̱ wa nyia̱ ba̱ ku shya̱ ndung ma̱ng a̱nzi̱t, si̱ ba̱ na ya a̱son dundung ma̱ng a̱nzi̱t. Nang ba̱ nghwut, ba̱ si̱ ghwon nzi̱t a̱ni, si̱ huni tak kpa̱sai da̱nang ba̱ za ku nshya̱ ndung ma̱ng a̱nzi̱t bah.

Tyai Á̱zanson 3:19

N ni̱ ntyiet, n bu gba á̱niet ba nang n chat wa a̱ni. Mat a̱nia, nyi kwan ba̱t nyi ghwon a̱ka̱tuk nyia̱ nyin wu, nyi khwi A̱gwaza!