Yoona 14:6 - A̠lyiat A̠gwaza na di̠n Tyap: A̠li̠ka̠uli A̠fai

⁶ Yesu si̱ nyia̱ ma̱ng Toma a̱ni, “Nung gwa ngyet vak hu. Nung gwa si̱ ngyet a̱chuchuk wu. Nung gwa si̱ bu ngyet swuan ji. Á̱ mbyia̱ a̱tyu a̱ na nat da̱ a̱vwuo A̱tyia̱ ka, ka̱nang a̱nyuu khwi nung a̱ni bah.

Yoona 14:6 Iomraidhean Croise

Matyu 11:27

“A̱tyia̱ nung wu, tyia̱ nung kuzang kyang mbwak. Á̱ mbyia̱ a̱tyu a̱ lyen Nggwon ka a̱tsatsak lyen a̱ni bah, si̱ ma̱ A̱tyia̱ wu. A̱wot á̱ bu mbyia̱ a̱tyu a̱ lyen A̱tyia̱ wu a̱tsatsak lyen a̱ni bah, si̱ ma̱ Nggwon ka. Ma a̱nia wa, á̱niet nang Nggwon ka khai a̱ni, bibya ka̱ na tyai mba A̱tyia̱ wu kpa̱sai, ba̱ lyen gu.”

Yoona 1:14

Swang A̱lyiat ji ku tyia̱ a̱tyubishyi. A̱ si̱ swan dundung ma̱ng a̱nzi̱t. Zi̱ si̱ li a̱kyenkyai shi nggu wu. A̱ si̱ byia̱ shok ma̱ng a̱chuchuk gba̱mgbam. A̱kyenkyai shi wuni wa ku tak nang gu ma̱nyin gu neet da̱ a̱vwuo A̱gwaza.

Yoona 1:17

Mat A̱gwaza ku nwuak Musa wa doka nggu ji. A̱wot shok ji ma̱ng gba̱mgbam tsotswat wu si̱ bai mat Yesu Kristi wa.

Yoona 1:4

Swang A̱lyiat ji ku yet a̱tyin nswuan. A̱wot swuan jini si̱ bai ma̱ng á̱nietbishyi sai.

Yoona 10:28

N na nwuak mba swuan sang sangba̱p, a̱wot ba̱ na kwi bah. A̱yin si̱ mi̱n ta̱wap mba bwak nung bah.

Yoona 10:7

Yesu si̱ bu nyia̱, “Yok, n tak nyin a̱chuchuk; nung gwa ngyet a̱na̱nyuo zón seap ka.

Yoona 10:9

Nung gwa ngyet a̱na̱nyuo ka. Konyan wa nwuo da̱ a̱na̱nyuo ka, a̱ na shya̱ san. A̱ na nwuai a̱ ghwut, a̱ shyat nkyang nang gu chat a̱ni.

Yoona 14:19

N bwat a̱banjen ma̱ chunchwiit á̱niet mi̱ swanta ba bu na li nung bah. A̱wot nyin, nyi na li nung. Mat nang nung nshya̱ ma̱ng swuan a̱ni; ma a̱nia wa, nyin mameang nyi na nswuan.

Yoona 15:1

“Nung gwa ngyet a̱tsatsak a̱kwon a̱na̱p wu. A̱wot A̱tyia̱ nung wa si̱ yet a̱tyu khap wu.

Yoona 18:37

Huhwa gwomna Bilatut si̱ nyia̱, “A yet a̱gwam wa a?” Yesu si̱ ma nwuak gu shim nyia̱, “A hyia̱ cha̱chaat nang ngyet a̱gwam wa. Á̱ ku byin nung, á̱ si̱ ta̱m ma̱ng a̱nung mi̱ swanta hu, mat kyang nyiung hwa, huhwa yet; n tak ma̱ng á̱niet ba a̱chuchuk wu kpa̱sai. A̱wot konyan wa khwi a̱chuchuk wu, a̱ ni̱ myiai a̱fufwuo a̱ fa̱k nung.”

Yoona 5:21

“Ma̱nang A̱tyia̱ wu ni̱ nta̱ngam á̱niet ba̱ ka̱n kwi, a̱wot a̱ bu nwuat ba swuan a̱ni; ma a̱nia wa nang Nggwon ka nnwuat swuan da̱ a̱tyu nang ka̱ shim nwuak a̱ni.

Yoona 6:33

Mat kyayak A̱gwaza hu ku neet tswazwa kya a̱ni; huhwa nwuat á̱niet mi̱ swanta ba swuan ji.”

Yoona 6:51

Nung gwa ngyet kyayak swuan ku chyok neet Ma A̱gwaza tswazwa ka a̱ni. Konyan wa ya kyayak a̱hwa a̱ na shya̱ swuan sang sangba̱p. Kyayak a̱hwa nang n na nwuak a̱nyuu a̱ni; ku na yet nam vam nung hu hwa, nang n na neap da̱nian a̱mgba̱m á̱niet mi̱ swanta ba, ba̱ ka shya̱ swuan ji.”

Yoona 6:57

Ma̱nang A̱tyia̱ wu a̱ yet a̱tyu nswuan wu nta̱m nung a̱ni; ma a̱nia wa nang n swuan da̱nian A̱tyia̱ wu. A̱wot ma a̱nia wa, konyan wa kyiak nung nang kyayak gu a̱ni, a̱ na swuan da̱nian nung.

Yoona 6:68

Bitut si̱ nwuak gu shim nyia̱, “A̱tyoli, da̱ a̱vwuo a̱nyan kya zi̱ na nnat? Nwan wa byia̱ á̱lyiat na̱ nwuat swuan sang sangba̱p a̱ni.

Yoona 8:32

Nyi na lyen a̱chuchuk wu, a̱wot a̱chuchuk wu na tyia̱ nyi yet á̱sa̱t á̱niet.”

Yoona 8:51

N na tak ma̱ng a̱nyin a̱chuchuk za̱m; konyan a̱ khwi a̱lyiat nung na a̱ni, a̱ si̱ mi̱n khwu bah, ba̱ng si̱ nat sang sangba̱p!”

Nta̱m A̱yaata̱m 3:15

Nyi si̱ hyat Yesu, a̱tyu a̱ yet a̱tyin nswuan ka a̱ni. A̱wot A̱gwaza si̱ ta̱ngam gu ma̱ng swuan ma̱ á̱niet ba̱ ka̱n kwi a̱ni. A̱wot nzi̱t ma̱ á̱pyia̱ nzi̱t, zi̱ si̱ li nkyang na̱ shya̱ Yesu a̱ni ma̱ng á̱ghyi nzi̱t!

Nta̱m A̱yaata̱m 4:12

“Yesu wa ma̱nyin gu maai a̱ san á̱niet swanta ba! Ma a̱nia wa, á̱ bu byia̱ a̱lyoot á̱ghyang nang A̱gwaza nwuak mi̱ swanta hu nang á̱niet ba na yorong ba̱ ka nshya̱ san a̱ni bah!”

Nta̱m A̱yaata̱m 9:2

A̱ si̱si̱ naai gu á̱ lyuut wusiká á̱ ta̱m ndyo ma̱ á̱tutu a̱tung A̱yahudawa ba̱ shya̱ ma̱ a̱keang Da̱maskut a̱ni. A̱ ku nyia̱ a̱nia, mat a̱ ka shya̱ mun a̱pyia̱ mba, a̱ ka ya̱baat á̱niet ba̱ shya̱ mami susot á̱niet khwi Yesu (nang á̱ bu ngyei ji “Vak hu” a̱ni.) A̱ si̱ chat a̱ bai ma̱ng a̱mba di̱ la̱p, á̱tyok ma̱ng á̱nyiuk, mi̱ Urusha̱lima.

A̱romawa 15:16

Shok jini tyia̱ n si̱ ngyet a̱ta̱m nang Kristi Yesu ta̱m nggu da̱ a̱vwuo nyin, nyi yet Nnwap na̱ nwai yet A̱yahudawa a̱ni. N shei nyin A̱sham Nkhang ka, da̱nian n ka neap nyin nang za̱nang a̱ni da̱ a̱vwuo A̱gwaza; nang A̱za̱za̱rak Ntswa wu njaat nyin nyi si̱ tyia̱ za̱za̱rak a̱ni.

A̱romawa 5:2

Mat nang zi̱ nnwuak fwuo da̱ A̱gwaza a̱ni, Kristi si̱ nyia̱ nzi̱t shok. A̱ si̱ nang nzi̱t a̱wat zi̱ shya̱ a̱vwuo yong a̱zaghyi nggu. A̱ja wa nang zi̱ nshya̱ ma̱nini. A̱wot zi̱ ntyia̱ fwuo ma̱ng a̱gwai. Zi̱ nwuan á̱zanson nang zi̱ na nshya̱ shi A̱gwaza hu a̱ni.

A̱romawa 5:21

Ma a̱nia wa, ma̱ninika, ma̱nang a̱ka̱tuk nyia̱ wu nnyia̱ tyok tazwa a̱mgba̱m á̱niet ba a̱ni, a̱wot a̱ si̱ tyia̱ mba a̱khwu ka a̱ni; ma a̱nia wa, a̱gba̱ndang shok A̱gwaza wu nnyia̱ tyok tazwa nzi̱t da̱ a̱kwonu a̱ka̱tuk nyia̱. A̱wot shok A̱gwaza ji si̱ tyia̱ nang A̱gwaza ntak kpa̱sai nang gu nkyiak zi̱t zi̱ yet á̱tsotswat á̱niet ma̱ng sang a̱bun bya a̱zaghyi nggu. Shok jini bu tyia̱ nang zi̱ nshya̱ swuan sang sangba̱p di̱ mun á̱pyia̱ ma̱ng Yesu Kristi a̱ yet A̱tyoli nzi̱t wu a̱ni.

1 A̱korontiyawa 15:45

Ma̱nang á̱ ndyuut ma̱ A̱lyiat A̱gwaza na a̱ni, nyia̱, “A̱da̱mu wa nang á̱ ku tsa mat mi̱ swanta hu. A̱ ku yet a̱tyu swuan nang á̱ ku nyia̱ ma̱ng mbyin a̱ni.” A̱wot A̱da̱mu a̱ngaan wu meang, nggu wa yet Yesu Kristi, a̱ si̱ yet tswa ja, ji̱ nwuat swuan a̱ni.

A̱fisawa 2:18

Mat kyang hu nang Kristi nyia̱ wa a̱ni, huhwa tyia̱ a̱mgba̱m nzi̱t A̱yahudawa ma̱ng Nnwap na̱ nwai yet A̱yahudawa a̱ni, ka̱ doot zi̱ shya̱ a̱wat zi̱ bai da̱ a̱vwuo A̱gwaza a̱ yet A̱tyia̱ wu a̱ni, mat A̱za̱za̱rak Ntswa wu nang a̱mgba̱m nzi̱t zi̱ mun byia̱ a̱ni.

A̱kolosiyawa 2:17

Mat a̱mgba̱m ntangka̱i taada nani yet nghwughwu nkyang na̱ chobai wa a̱ni. A̱wot Kristi wa ma̱ a̱pyia̱ nggu nang taada jini yet kidee nggu ji.

A̱kolosiyawa 2:9

Mat mi̱ Kristi wa ma̱nyin nggu nang á̱ ndi a̱jhyem za̱kwa A̱gwaza wu mi̱ vam a̱tyubishyi.

A̱kolosiyawa 3:4

A̱wot jen nang Kristi a̱ yet a̱tyin nwuat nyin swuan na mbwuok a̱ bai kpa̱sai mi̱ swanta hu a̱ni; ma a̱nia wa nyin meang, á̱ na tyai nyin kpa̱sai nyi shya̱ dundung ma̱ng a̱nggu ma̱ a̱kyenkyai shi wu.

Ibriniyawa 7:25

Mat a̱nia, kuzang jen Yesu byia̱ chet a̱ maai a̱ san á̱niet ba, ba̱ bai da̱ a̱vwuo A̱gwaza mami a̱lyoot nggu ka a̱ni. Mat a̱ ni̱ swuan si̱ nat sang sangba̱p. A̱wot a̱ ni̱ naai A̱gwaza da̱nian mbaa.

Ibriniyawa 9:8

Di̱ nta̱m a̱yaapris nani, A̱za̱za̱rak Ntswa A̱gwaza wu tak kpa̱sai, nang a̱wat nwuai ma̱ A̱swang ka̱ Swak ma̱ng yet A̱za̱za̱rak a̱ni ka̱n khwuk bah, ka̱nang á̱ ni̱ nyia̱ ta̱m pris mami a̱khwukhwop A̱za̱za̱rak Suswak wu.

1 Bitut 1:21

Mami Kristi kya nang nyi nnwuak fwuo da̱ A̱gwaza. A̱wot nyi si̱ nwuak a̱chuchuk ma̱ng tyia̱ fwuo da̱ A̱gwaza, mat a̱ ku ta̱ngam Kristi ma̱ á̱niet ba̱ ka̱n kwi a̱ni, a̱wot a̱ si̱ nwuak gu a̱gba̱ndang shi.

1 Bitut 2:4

Nyi bai da̱ a̱vwuo Kristi, a̱ yet a̱fang nswuan a̱ta̱m kuntyin nok a̱li A̱gwaza ka a̱ni. Á̱nietbishyi si̱ lak gu. A̱wot A̱gwaza si̱ khai ngguu, á̱ ka chyin ngguu gba̱mgbam.

1 Bitut 3:18

A̱tsak a̱lyiat, Yesu ma̱ a̱pyia̱ nggu ku swuo a̱bung da̱ a̱ka̱nyiung mat a̱ka̱tuk nyia̱ nzi̱t wu. A̱wot a̱ bu na swuo a̱bung bah. A̱ ku yet a̱tsotswat wa. A̱wot a̱ si̱ khwu da̱nian á̱niet a̱ka̱tuk nyia̱, gu ka neap zi̱t a̱za̱za̱rak a̱zaghyi A̱gwaza. Á̱ ku hyat gu mi̱ vam hwa. A̱wot á̱ si̱ ta̱ngam gu ma̱ng swuan mami A̱za̱za̱rak Ntswa.

1 Yoona 1:8

Ki̱ zi̱ tak nyia̱ zi̱ nyia̱ a̱ka̱tuk nyia̱ bah, zi̱ laai pyipyia̱ nzi̱t hwa. A̱wot zi̱ byia̱ a̱chuchuk bah.

1 Yoona 2:23

Konyan wa fwuo Nggwon ka, a̱ fwuo A̱tyia̱ wu wa. A̱wot konyan wa san Nggwon ka, a̱ mun a̱ san A̱tyia̱ wu wa a̱wa.

1 Yoona 5:20

A̱wot zi̱ lyen nang Nggwon A̱gwaza ka mbai mi̱ swanta hu, ka̱ si̱ tat zi̱t a̱ghyi ba, da̱nian zi̱ ka lyen A̱gwaza a̱ yet a̱chuchuk wu a̱ni. A̱wot ma̱ninika zi̱ byia̱ a̱meang di̱ mun á̱pyia̱ ma̱ng A̱gwaza, a̱ yet a̱chuchuk wu a̱ni, mat nang zi̱ mbyia̱ a̱meang di̱ mun á̱pyia̱ ma̱ng Yesu Kristi a̱ yet Nggwon nggu ka a̱ni. Nggu wa ma̱nyin nggu yet a̱chuchuk A̱gwaza wu. A̱wot a̱ si̱ yet swuan sang sangba̱p ji.

1 Yoona 5:6

Yesu Kristi bai mi̱ swanta hu, a̱wot á̱ si̱ nyia̱ nggu ba̱ptisman ma̱ng a̱sa̱khwot. A̱wot a̱ si̱ nwuak a̱sok nggu na da̱ a̱team a̱khwu wu. A̱ ku bai ma̱ng a̱sa̱khwot nia ma̱nyin na bah. A̱ ku bai ma̱ng a̱sa̱khwot nia ma̱ng a̱sok. A̱wot A̱za̱za̱rak Ntswa wu wa tak ma̱ng a̱nzi̱t nang nkyang nani ngyet a̱chuchuk, mat nang nggu wa ntak á̱niet ba a̱chuchuk wu a̱ni.

2 Yoona 1:9

Konyan wa mbeang a̱ si̱ shyak tyiet Kristi hu, a̱wot a̱ si̱ bwuok lilyim di̱ khwi tyiet a̱hwa, a̱tyu a̱wa byia̱ a̱meang ma̱ng A̱gwaza bah. A̱wot a̱tyu a̱ ya a̱son di̱ khwi tyiet Kristi hu a̱ni, a̱ byia̱ a̱meang ma̱ng A̱tyia̱ wu bi̱ri̱ng ma̱ng Nggwon nggu ka.

Tyai Á̱zanson 1:5

Byat hu si̱ bu neet da̱ a̱vwuo Yesu Kristi. Nggu wa yet a̱tsotswat a̱tyu a̱ nwuak sheda tazwa nkyang nani a̱ni. Nggu wa si̱ bu yet a̱tyu nang A̱gwaza tsa ta̱ngam ma̱ng swuan ma̱ á̱niet ba̱ ka̱n kwi a̱ni. Nggu wa bu nyia̱ tyok tazwa a̱mgba̱m á̱gwam swanta ba. Yok a̱mgba̱m a̱kyenkyai shi a̱ yet si̱ ngguu. Mat a̱ chat zi̱t, a̱ si̱ ti̱n zi̱t ma̱ a̱ka̱tuk nyia̱ nzi̱t wu, di̱ nwuak a̱sok nggu na da̱nian zi̱t.

Tyai Á̱zanson 19:11

A̱jawa n si̱ ndi Ma A̱gwaza tswazwa ka khwuk, n si̱ kin di a̱sai ntsaai gu yong a̱ja! A̱tyu a̱ nyeak tsaai ji a̱ni, á̱ ngyei nggu “A̱tsotswat” ma̱ng “A̱chuchuk;” mat da̱ a̱chuchuk nvak wa nang gu nnyia̱ shi̱ri̱ya, a̱ si̱ bu ngya zwang a̱tsotswat.

Tyai Á̱zanson 20:15

Konyan wa da̱nang á̱ lyuut a̱lyoot nggu ka mami Ta̱ka̱da Nswuan hu a̱ni bah; á̱ na ta gu mami a̱gba̱ndang tswa a̱nga̱ngak ndong sang sangba̱p.

Tyai Á̱zanson 22:1

A̱jawa a̱ta̱m tswa A̱gwaza wu si̱ tak ma̱ng a̱nung a̱ghyui ka̱ byia̱ a̱sa̱khwot nswuan a̱ni. A̱sa̱khwot na li ma̱ wowot nang ma̱dubi a̱ni, na̱ tyong á̱ neet da̱ a̱gba̱ndang chuk Tyok A̱gwaza ma̱ng a̱si̱ Fi̱ng A̱nfwuk hu!

Tyai Á̱zanson 22:17

A̱za̱za̱rak Ntswa wu ma̱ng Nggwon neam naat nyeang ka si̱ nyia̱, “Yesu bai!” Konyan wa fa̱k a̱ni, yok gu nyia̱, “Yesu bai!” Yok a̱mgba̱m á̱niet ba̱ fwuong mashyi a̱sa̱khwot a̱ni, ba̱ bai! Yok á̱niet ba̱ chat swuo a̱sa̱khwot nswuan a̱ni, ba̱ bai ba̱ swuo di̱ mi̱n tan zang!

Tyai Á̱zanson 3:14

“Lyuut a̱ta̱m tswa A̱gwaza wusika jini, gu nwuak sot á̱niet khwi ji shya̱ La̱wudikiya a̱ni: Ta̱m jini ja neet da̱ a̱vwuo a̱tyu a̱ yet ‘Samba̱rka A̱gwaza’ a̱ni, a̱ bu yet a̱tsotswat ma̱ng a̱tsatsak a̱tyu a̱ nwuat sheda a̱lyiat A̱gwaza a̱ni! Nggu wa yet a̱tyin nang A̱gwaza mmat kuzang kyang mi̱ swanta hu a̱ni!

Tyai Á̱zanson 3:7

“Lyuut a̱ta̱m tswa A̱gwaza wusika jini, gu nwuak sot á̱niet khwi ji shya̱ Fila̱defiya a̱ni: Ta̱m jini neet da̱ a̱vwuo a̱tyu a̱ yet a̱za̱za̱rak ma̱ng a̱chuchuk a̱ni. Nggu wa ba̱ng yaya tyok a̱gwam Da̱wuda wu. Ka̱ a̱ khwuk nyinyiit hu, a̱yin si̱ mi̱n nyim bah. A̱wot ka̱ a̱ ma nyim huu, a̱yin si̱ mi̱n khwuk bah.