Yoona 14:26 - A̠lyiat A̠gwaza na di̠n Tyap: A̠li̠ka̠uli A̠fai

²⁶ A̱wot A̱tyu Beang wu, nggu wa yet A̱za̱za̱rak Ntswa nang A̱tyia̱ wu na ta̱m ndyo da̱ a̱kwonu nung a̱ni; nggu wa na tyiet nyin kuzang kyang. A̱wot a̱ bu jhyung nyin a̱mgba̱m kuzang kyang nang n ka̱n hyia̱ ma̱ng a̱nyin a̱ni.

Yoona 14:26 Iomraidhean Croise

Matyu 1:18

A̱ni wa nang byin Yesu a̱ yet Kristi, a̱tyu nang A̱gwaza kup gu tyok a̱ni, ndi. Di̱n jen nang Isuu ma̱ng Ma̱ryamu, a̱yang Yesu wu, ku nda̱p si̱sak ba̱ na nnyia̱ nyeang a̱ni, neet nang ba̱ ka̱n nyia̱ nyeang hu bah, á̱ si̱ li nang gu shya̱ ma̱ng shya̱ neet di̱n chet A̱za̱za̱rak Ntswa.

Matyu 1:20

Di̱n jen ji nang gu nshya̱ ma̱ a̱di̱dam wu a̱ni, a̱ta̱m tswa A̱gwaza a̱ghyang si̱ bai da̱ a̱vwuo gu ma̱ laat, a̱ si̱ nyia̱, “Isuu nggwon Da̱wuda, yok fa̱k a̱wun di̱ bwuo Ma̱ryamu a̱ yet a̱kyuo ang bah! Mat shya̱ gu shya̱ ndyo a̱ni, ku neet di̱n chet A̱za̱za̱rak Ntswa hwa.

Matyu 28:19

Mat a̱nia, nyi nat nyi si̱ tyia̱ a̱mgba̱m á̱niet kuzang nwap mi̱ swanta hu ba̱ yet mman ta̱m ba̱ khwi nung. Nyi nyia̱ mba ba̱ptisman mami a̱lyoot A̱tyia̱, ma̱ng Nggwon, ma̱ng A̱za̱za̱rak Ntswa wu.

Matyu 3:11

“Nung, n nyia̱ nyin ba̱ptisman ma̱ng a̱sa̱khwot nia, jija tak nang nyi nghwon a̱ka̱tuk nyia̱ nyin wu. A̱wot a̱yin chobai, a̱tyu a̱ swak nung mi̱ chet a̱ni, n maai mi̱ maai n ti̱n á̱kwatak nggu ba bah. Nggu, a̱ na nyia̱ nyin ba̱ptisman ji ma̱ng A̱za̱za̱rak Ntswa wa ma̱ng long.

Ma̱rkut 12:36

Mat Da̱wuda ma̱ a̱pyia̱ nggu, ku lyuut mami chet A̱za̱za̱rak Ntswa hu nyia̱, ‘A̱gwaza nyia̱ ma̱ng Kristi A̱tyoli nung wu, “A̱tyoli, swan a̱ji a̱zayak nung; si̱ nat jen nang n na ntyia̱ á̱niet lak li ang mba a̱tafa á̱tai a̱ti̱tak ang mba a̱ni.” ’

Ma̱rkut 13:11

“Jen nang á̱ na nya̱baat nyin á̱ bai ma̱ng a̱nyin a̱zaghyi á̱niet nyia̱ shi̱ri̱ya a̱ni; nyi yok nwuo a̱di̱dam tazwa kyang nang nyi na hyia̱ a̱ni bah. A̱wot ki̱ jen ji nyia̱ á̱ na nwuak nyin kyang hu nang nyi na hyia̱ a̱ni; mat nyin bya lyiat bah. A̱za̱za̱rak Ntswa A̱gwaza wu wa na lyiat nyin ndyo.

Luka 1:15

Mat a̱ na byia̱ shi a̱zaghyi A̱gwaza. Á̱ na shim gu niaat ku a̱ swuo a̱sa̱khwot a̱na̱p, ku nkyang nhyeng njhyang bah. A̱za̱za̱rak Ntswa na tyia̱ gu chet, neet nang gu ni̱ shya̱ ma̱ a̱fa a̱yang nggu ka.

Luka 1:35

A̱ta̱m tswa wu si̱ nwuak gu shim nyia̱, “A̱za̱za̱rak Ntswa wa na chyok da̱ nwan. A̱wot chet A̱gwaza a̱ Swak ma̱ng A̱kyenkyai Shi a̱ni, na kup ang. Mat a̱nia, nggwon ka a na byin a̱ni, ka̱ na yet a̱za̱za̱rak wa. A̱wot á̱ na ngyei nka Nggwon A̱gwaza.

Luka 1:41

Mi̱ di̱ fa̱k byat Ma̱ryamu hu, nggwon ka ka̱ shya̱ ma̱ a̱fa A̱li̱sa̱ba̱tu ka a̱ni, si̱ kin tyia̱ a̱guguut! A̱wot A̱za̱za̱rak Ntswa wu si̱ kin tyia̱ A̱li̱sa̱ba̱tu chet.

Luka 1:67

A̱wot Za̱ka̱riya a̱tyia̱ nggwon wu, A̱za̱za̱rak Ntswa A̱gwaza si̱ tyia̱ gu chet, a̱ si̱ tyai ta̱m A̱gwaza ji kpa̱sai nyia̱,

Luka 11:13

Mat a̱nia, ki̱ nyin á̱niet á̱ka̱tuk nyia̱ lyen si̱sak ji nang nyi na nka̱u mman nyin na a̱tsatsak za̱náng a̱ni, ku fa A̱tyia̱ nyin wu a̱ shya̱ tswazwa ka a̱ni; a̱ na nang á̱niet ba ba̱ lyip gu a̱ni A̱za̱za̱rak Ntswa wu a̱ swaak.”

Luka 2:25

A̱ghyang a̱niet ku nshya̱ mi̱ Urusha̱lima di̱n jen a̱ja. Á̱ si̱ ngyei nggu Simiyon. A̱ ku nyia̱ tsotswat. A̱ si̱ bu yet a̱tyu fwuong a̱wun A̱gwaza ba̱t. A̱ si̱ fwuong jen ji nang Kristi na nsan á̱niet Isi̱rela ba a̱ni. A̱wot A̱za̱za̱rak Ntswa wu si̱ shya̱ da̱ nggu.

Luka 24:49

“A̱wot á̱ na labeang bah, n na nta̱m ma̱ng a̱nyin A̱za̱za̱rak Ntswa wu; ma̱nang A̱tyia̱ nung wu ku nnyia̱ a̱li̱ka̱uli a̱ na ta̱m ma̱ng a̱nyin dyo a̱ni. A̱wot nyi ya ndabeang mi̱ Urusha̱lima. Nyi fwuong jen nang A̱za̱za̱rak Ntswa wu na mbai, a̱ tyia̱ nyin chet gba̱mgbam ku neet Ma A̱gwaza tswazwa a̱ni.”

Luka 3:22

A̱za̱za̱rak Ntswa wu si̱ chorop a̱ chobai nang a̱bwa a̱ni neet Ma A̱gwaza tswazwa, a̱ ba̱ swan da̱ nggu! A̱wot á̱ si̱ fa̱k a̱nwuat ka̱ neet Ma A̱gwaza tswazwa nyia̱, “Nwan wa yet nggwon nung ka nang n chat a̱ni ba̱t! A̱wot a bai ma̱ng a̱nung a̱gba̱ndang a̱lyia̱ sai!”

Yoona 1:33

Bi̱ri̱ng ma̱ng a̱nia, n si̱ nfi̱k gu bah. A̱wot A̱gwaza a̱ ku ta̱m nung n nyia̱ ba̱ptisman ji ma̱ng a̱sa̱khwot na a̱ni, si̱ nyia̱ ma̱ng a̱nung a̱ni, ‘A̱tyu nang a li A̱za̱za̱rak Ntswa wu chorop a̱ chobai a̱ ba̱ swan da̱ nggu a̱ni; nggu wa yet a̱tyu a̱ na nyia̱ á̱niet ba ba̱ptisman ji ma̱ng A̱za̱za̱rak Ntswa A̱gwaza wu a̱ni.’

Yoona 12:16

Da̱ a̱chak a̱kya mman ta̱m Yesu na ku fi̱k kyang hu ku bai a̱ni bah. Jen nang Yesu ku ba̱ ndoot á̱ si̱ nwuak gu a̱kyenkyai shi a̱ni; jija mman ta̱m na ku njhyung nang á̱ ndyuut nkyang nani tazwa nggu. A̱wot nkyang na si̱ bai ma̱ cha̱chaat da̱ a̱nu ka nang á̱ ndyuut na a̱ni.

Yoona 14:16

Nung mameang, n na naai da̱ a̱vwuo A̱tyia̱. Nggu meang, a̱ na ta̱m ma̱ng nyin a̱tyu a̱ na beang nyin a̱ni; gu shya̱ dundung ma̱ng a̱nyin ba̱ng si̱ nat sang sangba̱p.

Yoona 14:25

“A̱mgba̱m á̱lyiat nani, n dyiat na neet nang n ni̱ shya̱ dundung ma̱ng a̱nyin.

Yoona 15:26

“A̱wot n na ntyia̱ A̱tyu Beang gu bai da̱ a̱vwuo nyin. A̱ na neet da̱ a̱vwuo A̱tyia̱. Nggu wa yet A̱za̱za̱rak Ntswa a̱ shei a̱chuchuk wu a̱ni. Nggu, a̱ na neet da̱ a̱vwuo A̱tyia̱ kya. Nggu wa na tak nyin kpa̱sai tazwa nung.

Yoona 16:7

A̱wot, n shei nyin a̱chuchuk; ka̱ n ghwon nyin, ku na yet nyin a̱sham za̱m. Mat, ki̱ n nkat n si̱ ghwon nyin bah, A̱tyu Beang wu na bai da̱ a̱vwuo nyin bah. Huhwa mbyia̱, ka̱ n nkat, n na nta̱m ma̱ng a̱nyin guu.

Yoona 2:22

A̱wot nang á̱ ku nta̱ngam gu ma̱ng swuan ma̱ á̱niet ba̱ ka̱n kwi a̱ni, mman ta̱m nggu na si̱ jhyung nang gu ku nhyia̱ a̱nia. A̱wot ba̱ si̱ nwuak a̱chuchuk da̱ A̱lyiat A̱gwaza nang á̱ lyuut a̱ni, ma̱ng kyang hu nang Yesu ku hyia̱ a̱ni.

Yoona 20:22

Nang gu nhyia̱ a̱nia a̱ni, a̱ si̱ hyiap mba swuan. A̱ si̱ nyia̱, “Nyi san A̱za̱za̱rak Ntswa wu!

Yoona 6:45

“A̱ta̱m a̱kwonu A̱gwaza ma̱ a̱di̱di̱t ku lyuut nyia̱, ‘A̱mgba̱m á̱niet ba, A̱gwaza wa na tyiet mbaa.’ Konyan wa fa̱k, a̱wot a̱ si̱ myiam da̱ a̱vwuo A̱tyia̱ nung ka; a̱tyu a̱wa na bai da̱ a̱vwuo nung.

Yoona 7:39

(Yesu lyiat á̱lyiat nani tazwa A̱za̱za̱rak Ntswa wu nang á̱niet ba̱ nwuak fwuo da̱ nggu na san a̱ni. Mat ba̱ng ba̱ tat jen jini á̱ ka̱n ta̱m ma̱ng A̱za̱za̱rak Ntswa wu bah. Mat á̱ ka̱n ta̱ngam Yesu ma̱ng swuan ma̱ á̱niet ba̱ ka̱n kwi a̱ni, a̱ si̱ shya̱ a̱kyenkyai shi tyok nggu wu bah.)

Nta̱m A̱yaata̱m 1:2

ba̱ng si̱ nat a̱tuk ka nang á̱ ku nkyiak gu á̱ nat ndyo Ma A̱gwaza tswazwa a̱ni. Mat chet A̱za̱za̱rak Ntswa, Yesu ku mi̱ ngba a̱yaata̱m nggu ba nang gu khai a̱ni, á̱ sii du kyiak gu, á̱ nat ndyo Ma A̱gwaza tswazwa ka.

Nta̱m A̱yaata̱m 1:4

Di̱n jen jhyang, nang gu ku nshya̱ di̱ ya kyayak dundung ma̱ng a̱mba a̱ni, a̱ si̱ gba mba mi̱ chet nyia̱, “Nyi yok doot, nyi ghwon Urusha̱lima hu a̱nfaan bah. Da̱ a̱kwonu a̱kya, nyi swan fwuong za̱nang nang A̱tyia̱ nung wu nyia̱ a̱li̱ka̱uli a̱ na ta̱m ma̱ng a̱nyin dyo a̱ni; ma̱nang n ku nhyia̱ ma̱ng a̱nyin a̱ni.

Nta̱m A̱yaata̱m 1:8

A̱wot nyi na shya̱ chet di̱n jen nang A̱za̱za̱rak Ntswa wu na ntyei nyin chet a̱ni. A̱wot nyi na yet á̱niet shei nkhang nung bya mi̱ Urusha̱lima, ma̱ng a̱mgba̱m á̱kum fam a̱byin Yahudiya ka, ma̱ng fam a̱byin Sa̱mariya, ba̱ng si̱ nat kuzang a̱byin mi̱ swanta hu!”

Nta̱m A̱yaata̱m 11:16

A̱jawa n si̱ kin jhyung á̱lyiat A̱tyoli Yesu na nang gu ku nnyia̱, ‘Yoona ku nyia̱ ba̱ptisman ji ma̱ng a̱sa̱khwot. A̱wot nyin, á̱ na nyia̱ nyin ndyo ma̱ng A̱za̱za̱rak Ntswa wa.’

Nta̱m A̱yaata̱m 13:2

A̱ghyang a̱tuk, nang á̱niet khwi bani shya̱ di̱ dyep á̱ tsa á̱ naai A̱gwaza a̱fa a̱khwot; a̱jawa A̱za̱za̱rak Ntswa wu si̱ nyia̱ ma̱ng a̱mba, “Nyi khap Ba̱nabat ma̱ng Sha̱wulu sak nung ndyo zan. Da̱nian ntangka̱i a̱tsatsak nta̱m nang n khai mba ba̱ nyia̱ nung ndyo a̱ni!”

Nta̱m A̱yaata̱m 13:4

Mat a̱nia, A̱za̱za̱rak Ntswa wu si̱ ta̱m Ba̱nabat ma̱ng Sha̱wulu, ba̱ nat ta̱m shei A̱sham Nkhang. Ba̱ si̱ kpa̱k á̱ chyok á̱ nat a̱tak Sa̱lukiya a̱keang a̱beam kyai a̱sa̱khwot. Ba̱ si̱si̱ nwuo kukwon a̱wak. Ba̱ si̱ wak á̱ nat a̱byin a̱ka̱wa̱tyia̱ a̱sa̱khwot, nang á̱ ngyei Kuburut a̱ni.

Nta̱m A̱yaata̱m 15:28

Ku myim A̱za̱za̱rak Ntswa ma̱ng a̱nzi̱t, zi̱ yok kpa̱t nyin a̱kpi̱di̱dyi̱k nkpa̱t a̱ swak nkyang nani nang zi̱ lyuut nyin dyo a̱ni bah.

Nta̱m A̱yaata̱m 15:8

“A̱gwaza wu a̱ lyen nfwuo á̱nietbishyi na a̱ni, a̱ si̱ shim nang gu na nsan Nnwap na̱ nwai yet A̱yahudawa a̱ni, mat si̱sak nang gu nnang mba A̱za̱za̱rak Ntswa wu; ma̱nang gu ku nnang nzi̱t a̱ni.

Nta̱m A̱yaata̱m 16:6

Bulut ma̱ng á̱niet a̱chyet nggu ba si̱ chong mi̱ nfam bibyin Fi̱ri̱jiya ma̱ng Ga̱la̱tiya. Mat A̱za̱za̱rak Ntswa wu ku shim ba̱ shei A̱sham Nkhang Yesu ka mi̱ fam a̱byin A̱siya hu di̱n jen a̱ja bah.

Nta̱m A̱yaata̱m 2:33

Ma̱ninika, á̱ nwuak Yesu shi. Á̱ si̱ sak gu da̱ a̱vwuo a̱gba̱ndang shi a̱zayak A̱gwaza, a̱ nyia̱ tyok dundung ma̱ng a̱nggu tswazwa. A̱wot A̱tyia̱ wu si̱ bu nang Yesu A̱za̱za̱rak Ntswa wu nang gu nyia̱ a̱li̱ka̱uli a̱ na ta̱m a̱ni. A̱wot Yesu meang, si̱ nang nzi̱t A̱za̱za̱rak ntswa gba̱mgbam; ma̱nang nyi ndi, nyi si̱ bu nfa̱k a̱fwun a̱ni.

Nta̱m A̱yaata̱m 2:4

A̱za̱za̱rak Ntswa wu si̱ kin tyia̱ kuzang a̱yin ma̱ mba chet, ba̱ si̱ kin ta̱bat lyiat di̱ lilyem ghyáng da̱nang ba̱ mi̱ mmyiam a̱ni bah; ma̱ cha̱chaat ma̱nang A̱za̱za̱rak Ntswa wu nnang konyan za̱nang chet ji a̱ni!

Nta̱m A̱yaata̱m 20:28

“Nyi cham pyipyia̱ nyin, ma̱ng a̱mgba̱m á̱niet khwi A̱gwaza ba. Nyi chok sot á̱niet khwi A̱gwaza ji, nang gu san ma̱ng a̱za̱za̱rak a̱sok Yesu a̱ yet Nggwon nggu ka a̱ni. Á̱niet khwi bibya nang A̱za̱za̱rak Ntswa wu tyia̱ nyin ndyo mbwak. Nyi yet ba a̱yaakwak a̱son.

Nta̱m A̱yaata̱m 20:35

A̱wot mami kuzang kyang, n si̱ ngyet kidee di̱ si̱sak ji nyi na nnyia̱ ta̱m ma̱ng chet, da̱nian nyi ka mbeang á̱niet ba̱ sang kyang a̱ni. Nyi bu jhyung a̱lyiat A̱tyoli Yesu na nyia̱, ‘Nang a̱yin kyang byia̱ kpangti̱n a̱ lan si̱sak nang a na nsan kyang ma̱ng a̱yin a̱ni.’ ”

Nta̱m A̱yaata̱m 28:25

A̱wot nang A̱yahudawa ba ngya fwuang tsi̱tsak mba á̱ tyak a̱ni, jen nang ba̱ na nkam ba̱ ghwon Bulut a̱ni; a̱ si̱ gba mba ngaan nyia̱, “A̱za̱za̱rak Ntswa wu ku tak a̱tsak a̱lyiat, jen nang gu ku ntak ma̱ng a̱yaatyia̱ khwop nyin ba a̱bwonu Ishaya a̱ta̱m a̱kwonu A̱gwaza wu a̱ni, nyia̱,

Nta̱m A̱yaata̱m 5:3

A̱jawa Bitut si̱ nyia̱ ma̱ng a̱nggu, “Ananiya, yihwa mbyia̱ nang a ghwon A̱ta̱nyeang ka si̱ swuo chet fwuo ang hu? A bwuo A̱za̱za̱rak Ntswa wu la! A si̱ bu niat á̱kum kurum nang a ndyap a̱byin ka a̱ni da̱nian a̱pyia̱ ang.

Nta̱m A̱yaata̱m 7:51

“Nyin á̱niet byia̱ gba̱p a̱pyia̱! Nyi yet á̱niet chyi A̱gwaza bya mi̱ nfwuo nyin na! A̱wot a̱fufwuo nyin ba si̱ lak fa̱k a̱tsatsak a̱lyiat wu! Ku yet ta hwa nyi ya a̱son di̱ lak khwi A̱za̱za̱rak Ntswa wu si̱ nat sang sangba̱p a?! A̱nia wa nang a̱yaatyia̱ a̱khwop nyin ba ku nnyia̱. A̱wot nyin meang, a̱nia wa nyi nyia̱!

Nta̱m A̱yaata̱m 7:55

A̱wot nang Itifanut nang A̱za̱za̱rak Ntswa wu tyia̱ gu chet a̱ni, a̱ si̱ gba̱t á̱ghyi ba, a̱ si̱ nwuan Ma A̱gwaza tswazwa. A̱ si̱ li Yesu nang gu yong da̱ a̱vwuo shi a̱zayak A̱gwaza ka ma̱ng a̱kyenkyai shi nggu wu!

A̱romawa 14:17

Mat Tyok A̱gwaza hu yet a̱lyiat tazwa kyayak nang á̱ na ya ma̱ng swuo hwa a̱ni bah. Da̱ a̱kwonu a̱kya, ku yet tsotswat nswat, swat nyinyang ma̱ng á̱ghyang, ma̱ng a̱lyia̱ sai mami A̱za̱za̱rak Ntswa.

A̱romawa 15:13

N naai A̱gwaza, a̱ yet a̱tyin tyia̱ fwuo a̱ni, gu nang nyin a̱lyia̱ sai ma̱ng swat nyinyang gba̱mgbam, mat nang nyi nnwuak fwuo da̱ nggu a̱ni. A̱jawa nyi na mbeang gbang a̱lyia̱ ma̱ng tyia̱ fwuo nyin hu gba̱mgbam da̱ nggu, mat nang A̱za̱za̱rak Ntswa wu ntyia̱ nyin chet a̱ni.

A̱romawa 15:16

Shok jini tyia̱ n si̱ ngyet a̱ta̱m nang Kristi Yesu ta̱m nggu da̱ a̱vwuo nyin, nyi yet Nnwap na̱ nwai yet A̱yahudawa a̱ni. N shei nyin A̱sham Nkhang ka, da̱nian n ka neap nyin nang za̱nang a̱ni da̱ a̱vwuo A̱gwaza; nang A̱za̱za̱rak Ntswa wu njaat nyin nyi si̱ tyia̱ za̱za̱rak a̱ni.

A̱romawa 5:5

A̱wot ki̱ zi̱ ntyia̱ fwuo hu a̱ni, zi̱ si̱ mi̱n swuo nsum bah, ku ma̱ chunchwiit. Zi̱ fi̱k si̱sak nang A̱gwaza nchat zi̱t a̱ni ba̱t, mat a̱ ka̱n nang nzi̱t A̱za̱za̱rak Ntswa wu, da̱nian gu ka swan mi̱ nfwuo nzi̱t na gba̱mgbam.

1 A̱korontiyawa 12:3

Mat a̱nia, n chat nyi lyen nang á̱ mbyia̱ a̱tyu nang A̱za̱za̱rak Ntswa A̱gwaza na tyia̱ gu gu shyi Yesu a̱ni bah. A̱tyu a̱ na hyia̱ nang Yesu wa ngyet A̱tyoli wu a̱ni; nggu wa ma̱ nyin gu yet a̱tyu nang A̱za̱za̱rak Ntswa A̱gwaza wu shya̱ ndung ma̱ng a̱nggu a̱ni.

1 A̱korontiyawa 6:19

Nyi ka̱n fi̱k nang nvam nyin na ngyet a̱li A̱za̱za̱rak Ntswa kya baa? A̱za̱za̱rak Ntswa wu swan mami nyin, a̱wot A̱gwaza wa nang nyin nggu baa? A̱wot nyin bya, byia̱ á̱pyia̱ nyin bah,

2 A̱korontiyawa 13:14

Yok shok A̱tyoli Yesu Kristi ji, ma̱ng chat A̱gwaza hu, ma̱ng mun á̱pyia̱ A̱za̱za̱rak Ntswa hu, ba̱ shya̱ dundung ma̱ng a̱nyin a̱mgba̱m.

2 A̱korontiyawa 6:6

Zi̱ ni̱ tak á̱pyia̱ nzi̱t kpa̱sai nang zi̱ mmaai yet á̱tsatsak a̱yaata̱m A̱gwaza a̱ni: di̱ swan á̱za̱za̱rak swát, di̱ fi̱k kuzang kyang, di̱ nyap fwuo, di̱ nyia̱ á̱niet shok, di̱ shya̱ A̱za̱za̱rak Ntswa ma̱ a̱nzi̱t, di̱ chat nyin ma̱ng a̱tsatsak chat

A̱fisawa 1:13

A̱wot ma̱ninika, nyin Nnwap na̱ nwai yet A̱yahudawa a̱ni meang, nyi ka̱n fa̱k a̱tsatsak a̱lyiat wu, a̱ yet A̱sham Nkhang ka̱ tak si̱sak nang A̱gwaza nsan nyin a̱ni. A̱wot di̱n jen nang nyi nwuak fwuo da̱ Kristi a̱ni, a̱ si̱ tyia̱ nyin a̱timi nyi yet á̱si̱ nggu, a̱ si̱ nang nyin A̱za̱za̱rak Ntswa nang gu nyia̱ a̱li̱ka̱uli a̱ na nang nyin neet gbangbang a̱ni.

A̱fisawa 1:17

N ni̱ ngya a̱son mi̱ naai A̱gwaza, a̱ yet A̱tyia̱ a̱ byia̱ a̱kyenkyai shi, a̱ si̱ bu yet A̱tyia̱ A̱tyoli nzi̱t wu Yesu Kristi a̱ni; n naai gu nang nyin A̱za̱za̱rak Ntswa. A̱za̱za̱rak Ntswa wu wa na nang nyin mumwang, a̱ bu tyai nyin A̱gwaza wu, da̱nian nyi ka mbeang lyen nggu hu, a̱wot nyi ka fi̱k gu shansham.

A̱fisawa 4:30

Nyi ta̱bam kalak nyi du byian A̱za̱za̱rak Ntswa wu fwuo, mat swat nyin hu. Mat A̱za̱za̱rak Ntswa wu a̱ shya̱ ma̱ nyin a̱ni, nggu wa yet a̱timi a̱ tak nang nyi ngyet á̱niet A̱gwaza bya a̱ni. Nggu wa bu na tak nang nyi na nshya̱ san nyi yet á̱sa̱t á̱niet a̱tuk mam shi̱ri̱ya A̱gwaza ka.

1 A̱ta̱solonikawa 4:8

Mat a̱nia, a̱tyu a̱ lak tyiet huni a̱ni, a̱ lak khwi tyiet a̱tyubishyi hwa bah. A̱gwaza a̱ nang nyin A̱za̱za̱rak Ntswa nggu wu a̱ni, nggu wa nang gu lak.

2 Timoti 1:14

Chok A̱sham Nkhang ka nang á̱ tyia̱ ang ndyo mbwak a̱ni, mat chet A̱za̱za̱rak Ntswa hu a̱ shya̱ ma̱ng nzi̱t a̱ni.

Titut 3:5

a̱ si̱ san zi̱t, mat a̱tsotswat ta̱m nang zi̱ nnyia̱ wa a̱ni bah. Da̱ a̱kwonu a̱kya, mat fa̱k kunak gu hwa nang gu nsan zi̱t. A̱ si̱ san nzi̱t ma̱ng jaat nang gu jaat nzi̱t ma̱ng A̱za̱za̱rak Ntswa a̱ni. Da̱ a̱nia wa, á̱ si̱ mbyin zi̱t a̱ka̱feang á̱ si̱ nang zi̱t swuan swai.

Ibriniyawa 10:15

A̱wot A̱za̱za̱rak Ntswa wu meang si̱ tak nang a̱nia wa ku ndi, nyia̱,

Ibriniyawa 2:4

A̱wot A̱gwaza ku tak nang ta̱m ji ngyet a̱tsatsak wa mat nkyang a̱ri̱bi̱di, nkyang a̱ga̱de, ma̱ng a̱lama a̱ tak a̱chuchuk A̱gwaza wu, ma̱ng ka̱u za̱náng chet A̱za̱za̱rak Ntswa da̱ á̱niet kuzang jen nang gu khai a̱ni.

Ibriniyawa 3:7

Mat a̱nia, ma̱nang A̱za̱za̱rak Ntswa wu nhyia̱ a̱ni, “A̱fwun, ka̱ nyi fa̱k a̱nwuat A̱gwaza ka,

Ibriniyawa 9:8

Di̱ nta̱m a̱yaapris nani, A̱za̱za̱rak Ntswa A̱gwaza wu tak kpa̱sai, nang a̱wat nwuai ma̱ A̱swang ka̱ Swak ma̱ng yet A̱za̱za̱rak a̱ni ka̱n khwuk bah, ka̱nang á̱ ni̱ nyia̱ ta̱m pris mami a̱khwukhwop A̱za̱za̱rak Suswak wu.

1 Bitut 1:12

A̱gwaza si̱ tak ma̱ng a̱yaata̱m a̱kwonu nggu ba da̱nang a̱lyiat na mbai da̱nian mba kya bah. A̱wot na̱ bai da̱nian nyin kya. Ma̱ninika, á̱ ka̱n tak nyin A̱sham Nkhang kani neet da̱ a̱vwuo a̱yaata̱m nggu ba. Ba̱ shei nka mami chet A̱za̱za̱rak Ntswa nang á̱ ta̱m ndyo neet Ma A̱gwaza tswazwa a̱ni. Shei a̱lyiat A̱gwaza hu yet kyang a̱ga̱de hwa nang a̱yaata̱m tswá A̱gwaza ba nswan á̱ cham ma̱ng di̱dang, a̱lyiat a̱nia na̱ bai da̱ a̱nu ka.

2 Bitut 1:21

Ku na̱ neet da̱ a̱vwuo a̱di̱dam á̱nietbishyi wa bah. Kaai, da̱ a̱kwonu a̱kya, a̱yaata̱m a̱kwonu A̱gwaza a̱bya ku lyiat mat A̱za̱za̱rak Ntswa wa ku nwuo mi̱ nfwuo mba na. A̱wot ba̱ si̱ lyiat á̱ lyuut nkyang nang A̱gwaza tak ma̱ng a̱mba a̱ni.

1 Yoona 2:20

A̱wot nyin, Kristi wa ka̱n nang nyin A̱za̱za̱rak Ntswa nggu wu. Mat a̱nia, a̱mgba̱m nyin nyi lyen a̱chuchuk wu.

1 Yoona 2:27

A̱wot Kristi nang nyin A̱za̱za̱rak Ntswa wu. Mat a̱nia, nyi bu chat á̱ghyang á̱niet ba̱ tyiet nyin bah. Da̱ a̱kwonu a̱kya, A̱za̱za̱rak Ntswa nggu wu wa ni̱ tyiet nyin kuzang kyang. A̱wot kyang hu nang gu tyiet nyin a̱ni yet a̱chuchuk wa. Ku yet a̱ka̱laa nia bah. Mat a̱nia, si̱ nyi ya a̱son ma̱ng byia̱ a̱meang di̱ mun á̱pyia̱ nyin hu ndung ma̱ng Kristi, ma̱nang A̱za̱za̱rak Ntswa wu ntyiet nyin a̱ni.

1 Yoona 5:7

Huhwa nang zi̱ ndi a̱lama a̱tat a̱ tak nang Yesu ngyet Nggwon A̱gwaza kya a̱ni:

Yahuda 1:20

A̱wot nyin, á̱kpa̱ndang nung ba nang n chat a̱ni, ku yet ta hwa nyi ni̱ mbeang á̱ghyang nyin chet mami a̱tsatsak a̱za̱za̱rak nwuak fwuo nyin hu di̱ Kristi. Nyi bu ni̱ nnaai A̱gwaza mami chet A̱za̱za̱rak Ntswa.

Tyai Á̱zanson 2:11

Konyan wa chat lyen a̱ni, ku yet ta hwa gu myiai a̱fufwuo gu fa̱a̱k, a̱ bu fi̱k a̱lyiat nang A̱za̱za̱rak Ntswa A̱gwaza wu shei susot á̱niet khwi ji a̱ni! A̱tyu a̱ swuo chet swanta hu a̱ni, a̱khwu a̱ka̱feang ma̱ a̱nga̱ngak tswa ndong sang sangba̱p na shya̱ nggu bah; ku ma̱ chunchwiit!