Yoona 12:26 - A̠lyiat A̠gwaza na di̠n Tyap: A̠li̠ka̠uli A̠fai

²⁶ Konyan wa nyia̱ nung ta̱m a̱ni, ku yet ta hwa gu khwi nung. Mat a̱mgba̱m a̱vwuo ka nang n shya̱ a̱ni, a̱ja wa nang a̱khwo nung wu na nshya̱ dundung ma̱ng a̱nung. A̱tyia̱ nung wu mameang, na nwuak a̱tyu a̱ nyia̱ nung ta̱m a̱ni shi.”

Yoona 12:26 Iomraidhean Croise

Matyu 16:24

Yesu si̱ nyia̱ ma̱ng a̱mgba̱m mman ta̱m nggu na nyia̱, “Ka̱ a̱yin byia̱ a̱di̱dam a̱ khwi nung, ku yet ta hwa gu yok a̱di̱dam chat a̱pyia̱ gu, gu ni̱ nkyiak a̱team a̱khwu nggu wu a̱ faat a̱ khwi nung.

Matyu 25:21

“A̱tyoli wu si̱ nyia̱ ma̱ng a̱nggu, ‘A yet a̱tan ma̱ng a̱tsotswat a̱khwo, a nyia̱ shansham! A nyia̱ tsotswat di̱ nkyang ma̱ chunchwiit. Mat a̱nia, n na ntyia̱ ang nkyang ma̱ a̱di̱di̱t mbwak. Bai, a gwai dundung ma̱ng a̱nung!’

Ma̱rkut 8:34

A̱jawa Yesu si̱ yorong á̱kpa á̱niet ka ba̱ bai ndung ma̱ng mman ta̱m nggu na, a̱ si̱ nyia̱ ma̱ng a̱mba, “Ka̱ a̱yin byia̱ di̱dang a̱ khwi nung, ku yet ta hwa gu lak a̱di̱dam chat a̱pyia̱ nggu, a̱ faat a̱team a̱khwu nggu wu, a̱ khwi nung.

Luka 12:37

Á̱khwo ba ba̱ shya̱ di̱ swan fwuong bwuok a̱tyoli mba hu a̱ni, á̱ na nang ba zang. N tak nyin a̱tsak a̱lyiat; a̱tyoli wu ma̱ a̱pyia̱ nggu, na tyia̱ ba̱ swan, a̱wot gu kup a̱yaatoot nta̱m nggu ba, a̱ bai a̱ ka̱u mba nkyayak na, ba̱ ya!

Luka 6:46

“Yihwa mbyia̱ nang nyi ni̱ mmyiai a̱nu nyi ngyei nung, ‘A̱tyoli, A̱tyoli!’ A̱wot da̱ nyin nyi khwi tyiet nung hu bah?

Luka 9:23

A̱wot Yesu si̱ bu nyia̱ ma̱ng á̱kpa á̱niet ka, “Ka̱ a̱yin ma̱nyin chat khwi nung, ku yet gu ta hwa, gu yok chat a̱pyia̱ nggu bah; gu kyiak a̱team a̱khwu nggu wu a̱ faat kuzang a̱tuk, a̱ khwi nung.

Yoona 10:27

Zón seap nung ji ni̱ myiai a̱fufwuo ji̱ fa̱k a̱nwuat nung ka. N dyen mba. A̱wot ba̱ si̱ khwi nung.

Yoona 13:16

A̱tsak a̱lyiat, n tak nyin; a̱khwo si̱ mi̱n shya̱ shi a̱ swak a̱tyoli nggu bah. Ma a̱nia wa, nggwon nta̱m si̱ mi̱n swak a̱tyu a̱ ta̱m ka a̱ni bah.

Yoona 14:15

“Ka̱nang nyi chat nung, ku myim nyi khwi doká nung ji.

Yoona 14:3

Ka̱ n nat n si̱si̱ njhyi nyin a̱vwuo nswat ka, n na mbwuok mbai n ba̱ kyiak nyin nat ndyo da̱ a̱vwuo nung ka. Da̱nian nyin mameang, nyi ka swan dundung ma̱ng a̱nung da̱ a̱vwuo nang n shya̱ a̱ni.

Yoona 15:20

Nyi jhyung nkyang na nang n ku hyia̱ ma̱ng a̱nyin a̱ni; nyi yok bwung bah. N ku nyia̱, ‘A̱khwo si̱ mi̱n shya̱ shi a̱ swak a̱tyoli nggu bah.’ Ka̱ ba̱ lak li nung, ba̱ si̱ ya̱shuk nung; nyin mameang, ba̱ na lak li nyin, ba̱ ya̱shuk nyin. Ka̱ ba̱ wa ku khwi á̱lyiat nung na, si̱ ba̱ na khwi á̱lyiat nyin na mameang.

Yoona 17:24

“A̱tyia̱ nung, n chat á̱niet bani nang a nwuak nung a̱ni, ba̱ swan dundung ma̱ng a̱nung di̱n tyan nang a nshya̱ a̱ni, da̱nian ba̱ ka li a̱kyenkyai shi ang wu, nang a ku nwuak nung a̱ni. A ku chat nung neet nang a ka mat swanta hu bah.

Yoona 21:22

Yesu si̱ nwuak gu shim, nyia̱, “Ka̱ n shim gu ndyo nyia̱ a̱ na swuan si̱ nat jen n na mbwuok a̱ni; yihwa ngyet si̱ nwan hu? Nwan, khwi ma̱ nung!”

A̱romawa 1:1

Nung Bulut, a̱khwo Kristi Yesu, nang A̱gwaza khai n gyet a̱ta̱m, a̱wot a̱ si̱ ta̱m nung n shei A̱sham Nkhang ka a̱ni, nung gwa dyuut nyin wusika jini.

A̱romawa 14:18

Ki̱ a nyia̱ Kristi ta̱m ma̱ng tangka̱i za̱kwa huni, a na tyia̱ A̱gwaza a̱ fa̱k nyinyang ang. A̱wot á̱ghyang á̱niet na shim kyang nang a nyia̱ a̱ni.

2 A̱korontiyawa 4:5

Nyi fa̱k, zi̱ chong kat shei nyin a̱lyiat tazwa á̱pyia̱ nzi̱t bah. Zi̱ shei nang Yesu Kristi wa ngyet A̱tyoli wu, a̱wot nzi̱t ma̱ á̱pyia̱ nzi̱t zi̱ yet á̱khwo nyin bya da̱nian Yesu.

2 A̱korontiyawa 5:8

A̱tsak a̱lyiat, zi̱ byia̱ gbang a̱lyia̱ ba̱t. A̱wot zi̱ bu na chat zi̱ shya̱ zan ma̱ng nvam swanta nani, da̱nian zi̱ ka swan a̱mali dundung ma̱ng A̱tyoli nzi̱t wu Yesu.

A̱ga̱la̱tiyawa 1:10

A̱tsak a̱lyiat, n chat á̱nietbishyi bya ba̱ chyin nung bah. N chat A̱gwaza wa a̱ fa̱k nyinyang gu chyin nung! Ki̱ n wa chat á̱nietbishyi bya ba̱ chyin nung, si̱ n gyet a̱tsak a̱khwo Kristi bah.

A̱filibiyawa 1:23

Ku vwuo nung a̱khwu n khai mi̱ nkyang nfeang nang n byia̱ di̱dang a̱ni: Nyiung hu, huhwa yet; n chat nat da̱ a̱vwuo Kristi. Huhwa lan nung ma̱ za̱nzan.

A̱kolosiyawa 3:24

Nyi yok bwung bah; A̱gwaza na nang nyin gado ku yet zang nyin ji a̱ni, mat A̱tyoli nang nyi nyia̱ nggu ta̱m hu a̱ni, nggu wa yet Kristi.

A̱kolosiyawa 4:12

A̱bafa̱rat yet a̱tyo nyiung wa mi̱ sot á̱niet khwi nyin ji, a̱wot a̱ bu yet a̱khwo Kristi Yesu a̱ni, byat nyin. A̱ ni̱ ntyia̱ a̱lyia̱ di̱ naai A̱gwaza kuzang jen da̱nian nyin, gu ka tyia̱ nyin nyi yet á̱niet tat á̱ghyi, nyi bu yet á̱tsatsak á̱niet. A̱bafa̱rat bu nwuak a̱chuchuk nang nyi nkhwi a̱mgba̱m kyang nang A̱gwaza chat a̱ni.

2 Bitut 1:1

Nung, Siman Bitut, a̱khwo ma̱ng a̱ta̱m Yesu Kristi, n dyuut nyin wusika jini, nyin á̱niet ba nyi san a̱tsatsak nwuak a̱chuchuk cha̱chaat ma̱ng a̱nzi̱t a̱ni. Á̱ ku nang nyin nwuak a̱chuchuk huni, mat a̱chuchuk ma̱ng tsotswat Yesu Kristi a̱ yet A̱gwaza ma̱ng A̱tyusan nzi̱t wu a̱ni.

1 Yoona 5:3

Ki̱ zi̱ chat A̱gwaza, ku fa nang zi̱ na nkhwi doka nggu ji. A̱wot doka nggu ji vwuo a̱khwu bah.

Yahuda 1:1

Nung Yahuda, a̱khwo Yesu Kristi, n gyet a̱na̱nyiuk Yakubu. Nung gwa n dyuut nyin wusika jini. N dyuut nyin, a̱mgba̱m á̱niet ba nang A̱gwaza a̱ yet A̱tyia̱ yei a̱ni; á̱si̱ ba ba̱ bu mun á̱pyia̱ ma̱ng a̱nggu A̱gwaza, a̱ yet A̱tyia̱ wu a̱ chat ba ba̱t, a̱ si̱ bu tyia̱ mba mbwak Yesu Kristi gu ka chok ba a̱ni.

Tyai Á̱zanson 14:4

Á̱niet bani yet á̱za̱za̱rak bya, nang a̱tyok ku a̱byii̱k a̱ ka̱ nwai lyen a̱byii̱k ku a̱tyok a̱ni bah. Bibya khwi Fi̱ng A̱nfwuk hu a̱mgba̱m a̱vwuo ka gu naat a̱ni. Bibya nang á̱ san mami á̱niet swanta ba, nang á̱tsatsak za̱náng á̱ neap A̱gwaza ma̱ng Fi̱ng A̱nfwuk hu a̱ni.