Yoona 1:33 - A̠lyiat A̠gwaza na di̠n Tyap: A̠li̠ka̠uli A̠fai

³³ Bi̱ri̱ng ma̱ng a̱nia, n si̱ nfi̱k gu bah. A̱wot A̱gwaza a̱ ku ta̱m nung n nyia̱ ba̱ptisman ji ma̱ng a̱sa̱khwot na a̱ni, si̱ nyia̱ ma̱ng a̱nung a̱ni, ‘A̱tyu nang a li A̱za̱za̱rak Ntswa wu chorop a̱ chobai a̱ ba̱ swan da̱ nggu a̱ni; nggu wa yet a̱tyu a̱ na nyia̱ á̱niet ba ba̱ptisman ji ma̱ng A̱za̱za̱rak Ntswa A̱gwaza wu a̱ni.’

Yoona 1:33 Iomraidhean Croise

Matyu 3:11

“Nung, n nyia̱ nyin ba̱ptisman ma̱ng a̱sa̱khwot nia, jija tak nang nyi nghwon a̱ka̱tuk nyia̱ nyin wu. A̱wot a̱yin chobai, a̱tyu a̱ swak nung mi̱ chet a̱ni, n maai mi̱ maai n ti̱n á̱kwatak nggu ba bah. Nggu, a̱ na nyia̱ nyin ba̱ptisman ji ma̱ng A̱za̱za̱rak Ntswa wa ma̱ng long.

Luka 3:16

Huhwa Yoona si̱ tak ma̱ng a̱mba nyia̱, “Nung, n nyia̱ nyin ba̱ptisman ji ma̱ng a̱sa̱khwot nia. A̱wot a̱tyu a̱ swak nung ma̱ za̱nzan a̱ni chobai. Nung, n maai mi̱ maai n gyet a̱khwo nggu wu, n ta̱bwak mbyii̱k ywan á̱kwatak nggu hu bah. Nggu, a̱ na nyia̱ nyin ba̱ptisman ji ma̱ng A̱za̱za̱rak Ntswa wa ma̱ng long.

Yoona 1:31

“N mi̱ nfi̱k a̱tyu nang gu yet a̱ni bah. Ma̱ng a̱nia, n bai n nyia̱ á̱niet ba̱ptisman ma̱ng a̱sa̱khwot, da̱nian á̱ ka tyai nggu shansham da̱ a̱vwuo á̱niet Isi̱rela ba.”

Yoona 14:26

A̱wot A̱tyu Beang wu, nggu wa yet A̱za̱za̱rak Ntswa nang A̱tyia̱ wu na ta̱m ndyo da̱ a̱kwonu nung a̱ni; nggu wa na tyiet nyin kuzang kyang. A̱wot a̱ bu jhyung nyin a̱mgba̱m kuzang kyang nang n ka̱n hyia̱ ma̱ng a̱nyin a̱ni.

Yoona 3:34

Mat a̱tyu nang A̱gwaza ku ta̱m a̱ni, a̱ shei a̱lyiat A̱gwaza nia, mat nang A̱gwaza nnwuak gu A̱za̱za̱rak Ntswa nggu wu ma̱ gba̱mgbam a̱mgbam a̱ni.

Yoona 3:5

Yesu si̱ nwuak gu shim nyia̱, “Yok, n tak ma̱ng a̱nwan a̱tsatsak a̱lyiat; ka̱ á̱ byin a̱yin ma̱ng a̱sa̱khwot ma̱ng A̱za̱za̱rak Ntswa bah, a̱ si̱ mi̱n nwuo Tyok A̱gwaza hu bah.

Yoona 7:39

(Yesu lyiat á̱lyiat nani tazwa A̱za̱za̱rak Ntswa wu nang á̱niet ba̱ nwuak fwuo da̱ nggu na san a̱ni. Mat ba̱ng ba̱ tat jen jini á̱ ka̱n ta̱m ma̱ng A̱za̱za̱rak Ntswa wu bah. Mat á̱ ka̱n ta̱ngam Yesu ma̱ng swuan ma̱ á̱niet ba̱ ka̱n kwi a̱ni, a̱ si̱ shya̱ a̱kyenkyai shi tyok nggu wu bah.)

Nta̱m A̱yaata̱m 1:5

A̱tsak a̱lyiat, Yoona ku nyia̱ nyin ba̱ptisman ji ma̱ng a̱sa̱khwot nia. A̱wot á̱ na bwuo mam ma̱ chunchwiit, á̱ na nyia̱ nyin ba̱ptisman ji ma̱ng A̱za̱za̱rak Ntswa wa!”

Nta̱m A̱yaata̱m 2:4

A̱za̱za̱rak Ntswa wu si̱ kin tyia̱ kuzang a̱yin ma̱ mba chet, ba̱ si̱ kin ta̱bat lyiat di̱ lilyem ghyáng da̱nang ba̱ mi̱ mmyiam a̱ni bah; ma̱ cha̱chaat ma̱nang A̱za̱za̱rak Ntswa wu nnang konyan za̱nang chet ji a̱ni!

1 A̱korontiyawa 12:13

Á̱niet khwi á̱ghyang ma̱ nzi̱t yet A̱yahudawa bya. Á̱ghyang á̱niet si̱ yet Nnwap na̱ nwai yet A̱yahudawa a̱ni. Á̱ghyang si̱ yet á̱khwo bya. Á̱ghyang si̱ yet mman a̱li nia. A̱wot A̱za̱za̱rak Ntswa wu wa nyia̱ a̱mgba̱m nzi̱t ba̱ptisman ji, zi̱ si̱ yet vam nyiung. A̱wot a̱mgba̱m nzi̱t, zi̱ byia̱ A̱za̱za̱rak Ntswa a̱nyiung wa.