Yakubu 4:11 - A̠lyiat A̠gwaza na di̠n Tyap: A̠li̠ka̠uli A̠fai

¹¹ Nyin á̱niet khwi Yesu ba nang n chat a̱ni, nyi yok tyam á̱ghyang nyin bah. Ka̱ nyi bat á̱ghyang nyin a̱hyiak, ku nyi nyia̱ á̱ghyang nyin shi̱ri̱ya, ku fa nyi bat doka A̱gwaza ji a̱hyiak, nyi si̱ nyia̱ nji shi̱ri̱ya meang. A̱wot ta̱m nyin hu hwa yet, nyi khwi doka A̱gwaza ji, nyi yok bat ji a̱hyiak bah. Kalak, nyi kyiak á̱pyia̱ nyin á ngyei nyi yet á̱niet nyia̱ shi̱ri̱ya bya tazwa doka ji.

Yakubu 4:11 Iomraidhean Croise

Luka 6:37

Nyi ni̱ ngyok nwuan a̱bun á̱ghyang nyin bah. A̱wot nyin meang, á̱ ma na nwuan a̱bun nyin wu bah. Nyi ni̱ ngyok tyei á̱ghyang nyin a̱bun bah. A̱wot nyin meang, á̱ ma na tyei nyin a̱bun bah. Nyi ni̱ nchi á̱ghyang nyin a̱ka̱tuk nyia̱. A̱wot nyin meang, á̱ ma na chi a̱ka̱tuk nyia̱ nyin wu.

A̱romawa 2:1

Ma a̱nia wa, nwan a̱tyu a dam a na bat á̱ghyang á̱niet a̱bun a̱ni, a mun nyia̱ a̱ka̱tuk nyia̱ wu nang ba̱ nyia̱ a̱ni. Mat a̱nia, a byia̱ ta̱fwat bah! A̱wot jen nang a mbat ntangka̱i á̱niet a̱nia a̱bun, nyia̱ ku myim á̱ nyiak mba a̱ni, a nyia̱ a̱pyia̱ ang kya shi̱ri̱ya ji. Mat nwan a̱tyu a bat á̱ghyang ang a̱bun a̱ni, nwan meang, a mun nyia̱ a̱ka̱tuk nyia̱ a̱wa.

A̱romawa 2:13

Mat fwuong doka ma̱ng a̱fufwuo bya ma̱nyin hu, na tyia̱ nzi̱t zi̱ ngyet á̱tsotswat á̱niet sang a̱bun a̱zaghyi A̱gwaza bah. A̱wot khwi a̱mgba̱m doka huhwa na tyia̱ zi̱ ngyet á̱tsotswat a̱zaghyi A̱gwaza.

A̱romawa 7:7

Ka̱ a̱nia wa, yihwa n bu byia̱ na hyia̱, doka A̱gwaza ji yet a̱ka̱tuk nyia̱ waa? Kaai, ku ma̱ chunchwiit! A̱tsak a̱lyiat, doka jija ku tyai nung a̱ka̱tuk nyia̱ nung wu. Ki̱ doka ji wa yok tak nyia̱, “Yok kwi swam di̱ kyang a̱yin bah.” Si̱ n fi̱k nang kwi swam hu ngyet a̱ka̱tuk nyia̱ da̱ a̱vwuo A̱gwaza bah.

1 A̱korontiyawa 4:5

Mat a̱nia, nyi yok mak nyi nyia̱ shi̱ri̱ya di̱ nta̱m a̱yin a̱nggang neet nang Kristi A̱tyoli nzi̱t wu ka̱n bwuok bah. Mat nggu wa na tyai kpa̱sai nkyang nang zi̱ nyia̱ na̱ shya̱ mi̱ dyin a̱ni, a̱wot gu bu tyai a̱di̱dam mi̱ nfwuo nzi̱t wu kpa̱sai. A̱wot A̱gwaza na dyep konyan ma̱ cha̱chaat ma̱ng ta̱m hu nang gu nyia̱ a̱ni.

2 A̱korontiyawa 12:20

Mat n fwuong a̱wun, shimba ki̱ n bu mbai, n na nchat nkyang na nyi nyia̱ a̱ni bah. A̱wot nyin, nyi na fa̱k nyinyang nung di̱ si̱sak ji nang n na nnwuak nyin shim a̱ni bah. N fwuong a̱wun, ki̱ n mbai, n na shya̱ nang nyi fwuon zook ma̱ng á̱ghyang nyin, kwi swam, mwuat ndyen, chat a̱pyia̱, tyam á̱ghyang, a̱chyuang, gba̱p a̱pyia̱, mbeang nwai swat nyinyang.

A̱fisawa 4:31

Nyi yok ba̱ng á̱ghyang mi̱ nfwuo, vwuot lyen, mwai lyen, a̱ngai, tyam á̱ghyang, ma̱ng kuzang tangka̱i a̱ka̱tuk nyia̱.

1 Timoti 3:11

Ma a̱nia wa, á̱nyiuk mba ba meang, ku yet ta hwa ba̱ yet: á̱nyiuk nang á̱ nwuat ba shi a̱ni, á̱nyiuk nwai tyam á̱ghyang á̱niet, á̱nyiuk ta̱bat a̱pyia̱, ma̱ng á̱nyiuk ba̱ nyia̱ tsotswat di̱ kuzang kyang a̱ni.

2 Timoti 3:3

Á̱niet lak chat á̱ghyang, á̱niet ba̱ng á̱ghyang mi̱ fwuo, á̱niet tyam á̱ghyang, á̱niet nwai ta̱bat á̱pyia̱ mba, á̱niet a̱ka̱kpa̱t, á̱niet nyia̱ na̱nvan ma̱ng a̱mgba̱m kyang ku yet a̱tan a̱ni.

Yakubu 1:16

Nyin á̱niet khwi Yesu ba nang n chat a̱ni, nyi yok shim á̱ laai nyin bah.

Yakubu 1:19

Nyin á̱niet khwi Yesu ba nang n chat a̱ni, nyi sak a̱lyiat nani mi̱ nfwuo nyin na. Nyi yet á̱niet fwuong ma a̱nggang ma̱ng a̱fufwuo. A̱wot nyi yok ya̱baat a̱lyiat va̱vat, ku nyi vwuot ndyen ma a̱nggang bah.

Yakubu 1:25

A̱wot a̱tyu a̱ tyia̱ fwuo hu di̱ zop a̱tsatsak a̱lyiat A̱gwaza na na̱ chong ma̱ng sa̱t a̱ni; a̱wot ka̱ a̱ ya a̱son ma̱ng nyia̱ a̱di̱dam da̱ A̱lyiat A̱gwaza na, a̱ si̱ nyia̱ ta̱m ma̱ng á̱na, a̱ si̱ bwung kyang hu nang gu fa̱k a̱ni bah, A̱gwaza na tyia̱ nggu a̱li̱ba̱rka mi̱ kuzang kyang nang gu nyia̱ a̱ni.

Yakubu 2:8

A̱tsak a̱lyiat, ka̱ nyi khwi doka Tyok A̱gwaza ji, nang á̱ lyuut ma̱ A̱lyiat A̱gwaza na a̱ni, nyia̱, “Chat a̱kpa̱ndang swat ang wu, ma̱nang a nchat a̱pyia̱ ang a̱ni.” Si̱ a̱hwa myim a̱nia.

Yakubu 5:10

Nyin á̱niet khwi Yesu ba, nyi khwi kidee nyap fwuo ma̱ng swuo a̱bung a̱yaata̱m a̱kwonu A̱gwaza ba, ba̱ ku shei A̱lyiat A̱gwaza na a̱ni.

Yakubu 5:7

Nyin á̱niet khwi Yesu ba nang n chat a̱ni, nyi nyap nfwuo, nyi fwuong a̱tuk mam bwuok bai A̱tyoli Yesu ka. Nyi nwuan á̱niet khap ba. Nyi li si̱sak nang ba̱ ni̱ nnyap fwuo ba̱ fwuong za a̱vwuo shyim ji ma̱ng si̱ seam ji a̱ni. Ba̱ ni̱ swan ma̱ng di̱dang á̱ fwuong yak hu ku byang, ba̱ chak ba̱ ka shya̱ kpangti̱n.

Yakubu 5:9

Nyin á̱niet khwi Yesu ba, nyi yok kwop a̱dyii̱ng tazwa á̱ghyang nyin bah, kalak á̱ na nyia̱ nyin shi̱ri̱ya. Mat, di a̱tyu shi̱ri̱ya wu wa yong a̱zanunyuo!

1 Bitut 2:1

Mat a̱nia, nyi yok kuzang tangka̱i a̱ka̱kpa̱t. Nyi yok laai á̱ghyang nyin bah. Nyi yok yet á̱bubuk á̱niet. Nyi yok kwi swam. Nyi bu yok tyam á̱ghyang nyin bah.