Yakubu 1:3 - A̠lyiat A̠gwaza na di̠n Tyap: A̠li̠ka̠uli A̠fai

³ Mat nyi lyen jen nang á̱ mmak nwuak fwuo nyin hu da̱ A̱gwaza a̱ni, nyi na shya̱ a̱wat nyi gbang a̱lyia̱, nyi mbeang nyap fwuo hu.

Yakubu 1:3 Iomraidhean Croise

Luka 21:19

Nyi gbang a̱lyia̱, nyi bu yong mi̱ chet. A̱nia wa nyi na nshya̱ swuan sang sangba̱p ji.

A̱romawa 15:4

Kuzang kyang nang á̱ ku lyuut gbangbang ma̱ A̱lyiat A̱gwaza na a̱ni, á̱ ku lyuut wa da̱nian á̱ ka tyiet zi̱t, zi̱ mban si̱sak ji nang zi̱ na ntyia̱ fwuo a̱ni. A̱lyiat A̱gwaza na si̱ bu tyei nzi̱t gba̱gbak nang zi̱ nswan ma̱ng nyap fwuo fwuong a̱li̱ka̱uli A̱gwaza a̱ na bai da̱ a̱nu ka a̱ni.

A̱romawa 2:7

Á̱niet ba ba̱ ni̱ gbang a̱lyia̱ ba̱ nyia̱ a̱tan nta̱m, ba̱ ni̱ chat A̱gwaza a̱ chyin mba za̱m, a̱wot ba̱ ni̱ chat á̱ nang mba zang ji̱ yet swuan ji̱ nwai tyiai a̱ni; A̱gwaza na nang ntangka̱i á̱niet nani swuan sang sangba̱p.

A̱romawa 8:25

A̱wot ka̱ zi̱ tyia̱ fwuo di̱ kyang á̱zanson nang zi̱ ka̱n shya̱ a̱ni bah, ku yet ta hwa, zi̱ gbang a̱lyia̱ zi̱ nyap fwuo zi̱ fwuong.)

A̱romawa 8:28

A̱wot zi̱ lyen nang A̱gwaza nnyia̱ ta̱m kuzang jen, da̱nian a̱ ka nyia̱ a̱tan nta̱m a̱ mbeang á̱niet ba̱ chat gu a̱ni. Bibya yet á̱niet nang gu khai cha̱chaat ma̱nang gu nda̱p a̱ sak a̱ni.

2 A̱korontiyawa 4:17

Mat, a̱bung ka nang zi̱ swuo ma̱nini a̱ni, shii bah. A̱wot ka̱ na labeang bah, ka̱ na̱ tyak. A̱mgba̱m ma̱ng a̱nia, a̱bung kani ka̱ tyei nzi̱t a̱kyenkyai shi wu a̱ni, na swak swuo a̱bung nang zi̱ swuo ma̱nini a̱ni ma̱ za̱nzan. A̱wot a̱kyenkyai shi wu na ba̱ng si̱ nat sang sangba̱p!

A̱kolosiyawa 1:11

Zi̱ bu naai A̱gwaza gu ka nang nyin chet gba̱mgbam ku neet mi̱ a̱gba̱ndang chet nggu wu a̱ni; da̱nian nyi ka gbang a̱lyia̱ mami swuo a̱bung, nyi ni̱ nyeap nfwuo nyin na ma̱ng a̱lyia̱ a̱sai gba̱mgbam.

2 A̱ta̱solonikawa 1:4

Huhwa mbyia̱ nang nzi̱t ma̱ á̱pyia̱ nzi̱t ntam da̱ nyin mami susot á̱niet khwi A̱gwaza ji kuzang jen. Mat nyi gbang a̱lyia̱ nyi si̱ nyia̱ tsotswat, a̱mgba̱m ma̱ng a̱di̱di̱t ya̱fa̱k nang á̱ ya̱fa̱k nyin, ma̱ng a̱bung ka nang nyi swuo a̱ni.

2 A̱ta̱solonikawa 3:5

Yok A̱tyoli Yesu, gu tyai nyin kpa̱sai, di̱ si̱sak ji nang A̱gwaza nchat nyin a̱ni; a̱ bu beang nyin nyi gbang a̱lyia̱, nyi nyap nfwuo nyi yong mi̱ chet ma̱nang nggu Yesu Kristi ku nnyia̱ a̱ni.

Ibriniyawa 10:36

Ku yet ta hwa, nyi gbang a̱lyia̱, mat nyi ka ya a̱son ma̱ng nyia̱ kyang hu A̱gwaza chat a̱ni. Huhwa na tyia̱ nyi nsan a̱tsatsak nkyang nang A̱gwaza nyia̱ a̱li̱ka̱uli a̱ na nang nyin a̱ni.

Ibriniyawa 12:1

Mat a̱nia, nang á̱kpa á̱niet ba̱ tak nwuak fwuo mba hu da̱ A̱gwaza nswan, á̱ tyong nzi̱t á̱ keang á̱ nwuan nzi̱t a̱ni, nzi̱t meang ku myim zi̱ ji̱p a̱mgba̱m kuzang kyang ku swan kpa̱p ku na tyia̱ nzi̱t ndyem a̱ni; huhwa yet a̱ka̱tuk nyia̱ nang zi̱ chat nyia̱ ba̱t a̱ni. Yok zi̱ gbang a̱lyia̱, zi̱ tyong chung a̱khwom nang A̱gwaza tyia̱ nzi̱t ndyo a̱zaghyi a̱ni.

Ibriniyawa 6:12

A̱jawa nyi na ngyet a̱gba̱pdok ma̱ng á̱niet sang a̱ka̱ta di̱ nyia̱ nta̱m A̱za̱za̱rak Ntswa na bah. Da̱ a̱kwonu a̱kya, nyi na khwi kidee á̱niet ba̱ san gado nang A̱gwaza nyia̱ a̱li̱ka̱uli a̱ na nang mba, mat nwuak fwuo mba ma̱ng gbang a̱lyia̱ mba hu da̱ nggu a̱ni.

1 Bitut 1:7

Ya̱shuk huni hwa na tak nang nwuak a̱chuchuk nyin hu ngyet a̱tsatsak wa. Á̱ mai nwuak a̱chuchuk nyin hu ma̱nang á̱ ni̱ nfwui zi̱nariya ma̱ng long, ku jaat zi̱nariya wu a̱ni. Nwuak a̱chuchuk nyin hu swak zi̱nariya a̱ tyiak a̱ni ma̱ za̱nzan ma̱ng yet a̱tsatsak. Mat a̱nia, ka̱ nyi yong mi̱ chet di̱n jen ma̱ a̱di̱di̱t nang á̱ nya̱shuk nyin a̱ni, ku na bai ma̱ng a̱nyin dyep, shi, ma̱ng chyin a̱tuk nang A̱gwaza na ntyai bwuok Yesu Kristi hu kpa̱sai mi̱ swanta hu a̱ni.

2 Bitut 1:6

Nyi lyen A̱gwaza ma̱nyin nggu bah, nyi mbeang ya̱baat á̱pyia̱ mameang. Nyi ya̱baat á̱pyia̱ ma̱nyin hu bah, nyi mbeang gbang a̱lyia̱ mameang. Nyi gbang a̱lyia̱ ma̱nyin hu bah, nyi mbeang khwi A̱gwaza di̱n vak hu myim gu a̱ni.