Yahuda 1:4 - A̠lyiat A̠gwaza na di̠n Tyap: A̠li̠ka̠uli A̠fai

⁴ N tak nyin a̱lyiat nani, mat á̱ka̱tuk á̱niet nshya̱ ba̱ bang á̱ nwuai mi̱ susot á̱niet khwi nyin ji. Ba̱ shyak tyiet shok hu nyia̱ mat nang A̱gwaza nfa̱k shok zi̱t gba̱mgbam, ku fa nang zi̱ byia̱ a̱wat zi̱ nyia̱ a̱shi̱shi̱k nyia̱ nang a̱ka̱la̱m a̱ni. Á̱ wa ka̱n dyuut shi̱ri̱ya tangka̱i á̱niet a̱ja, neet gbangbang, mat ba̱ fwuo Yesu Kristi, a̱tyu a̱ yet A̱gwaza ma̱ng A̱tyoli nzi̱t wu ma̱ nyin nggu a̱ni.

Yahuda 1:4 Iomraidhean Croise

Matyu 13:25

A̱wot a̱tyetuk a̱tuk a̱kya, nang á̱niet nta̱m a̱tyu khap ba nshya̱ mi̱ nda a̱ni, a̱tyu lak li a̱tyu khap wu si̱ nat, a̱ si̱si̱ chyui ja̱m ma̱ a̱byin a̱lka̱ma ka, a̱ si̱si̱ nkat a̱ngga nggu.

Yoona 17:3

“Swuan sang sangba̱p jini ja yet; á̱niet ba ba̱ lyen ang, nang nwan wa ma̱nyin ang ngyet a̱tsatsak A̱gwaza wu, ma̱ng Yesu Kristi, a̱tyo nang a ku nta̱m ndyo mi̱ swanta hu a̱ni.

Nta̱m A̱yaata̱m 11:23

Jen nang Ba̱nabat si̱ nnwuo, a̱ si̱ li si̱sak nang A̱gwaza nnyia̱ mba shok a̱ni. A̱ si̱ fa̱k fwuo sai ba̱t! A̱wot a̱ si̱ tyia̱ mba gba̱gbak, ba̱ ka yong da̱ a̱chuchuk ba̱ khwi A̱tyoli Yesu ma̱ng fwuo nyiung.

Nta̱m A̱yaata̱m 15:24

Zi̱ fa̱k nkhang nang á̱ghyang á̱niet nghwut mami nzi̱t, ba̱ si̱ bai tyei nyin ndyem. Ba̱ chat ba̱ su nyin nfwuo na mat tyiet mba hu. A̱wot zi̱ ta̱m ba bah.

A̱ga̱la̱tiyawa 2:4

Á̱ ku doot a̱lyiat tyia̱ mi̱ chen nani, mat á̱niet tyiet bwoi a̱ka̱laa ku nshya̱ dundung ma̱ng a̱nzi̱t. Ba̱ si̱ kyiak á̱pyia̱ mba nang á̱tsatsak á̱niet khwi a̱ni, ba̱ si̱ chat ba̱ ka tyia̱ Titut mi̱ chen. Á̱niet a̱bya ku bang á̱ nwuo ma̱ nzi̱t, da̱nian ba̱ ka chat ba̱ khap zi̱t ma̱ng swat sa̱t hu nang zi̱ byia̱ di̱ khwi Kristi Yesu hu a̱ni. Ba̱ si̱ chat ba̱ bwuak zi̱t, ba̱ nyia̱ nzi̱t khwo zi̱ khwi taada tyei mi̱ chen A̱yahudawa ji.

A̱ga̱la̱tiyawa 5:13

Nyin á̱niet khwi Yesu ba nang n chat a̱ni, á̱ yorong nyin nyi swan swat sa̱t. A̱mgba̱m ma̱ng a̱nia, nyi yok shim swat sa̱t nyin hu ma̱ng khwi doká ji, ku yet nyin jat fa̱k nyinyang za̱kwa nyia̱ a̱ka̱tuk nyia̱ bah. Da̱ a̱kwonu a̱kya, nyi yok sa̱t nyin hu ku tyia̱ nyi chat á̱ghyang, nyi nyia̱ á̱ghyang nyin nta̱m.

A̱fisawa 4:14

Ka̱ a̱nia wa, zi̱ bu yok nyia̱ nang a̱bachyuang mman na̱ nwai tat á̱ghyi a̱ni bah. Da̱ á̱niet tyiet bwoi a̱ka̱laa ba̱ na bwan nzi̱t ma̱ng kuzang tangka̱i tyiet fai bwoi a̱ka̱laa mba hu, nang wun ni̱ nhyap ja̱fi̱k a̱sa̱khwot ji a̱kibwan ndyo a̱ni bah. A̱wot di̱ tyiet á̱niet bwoi a̱ka̱laa hu si̱ mi̱n daai nzi̱t; zi̱ ghwon a̱tsatsak a̱lyiat wu, mat a̱ka̱laa ma̱ng mumwang mba hu, ku tai a̱tsatsak a̱lyiat a̱ni bah.

1 Timoti 5:8

A̱wot ka̱ a̱yin lak nyia̱ á̱na̱nyiuk nggu ba shok, a̱wot a̱ si̱ nyia̱ kyang mbwak nggu hu ndyo a̱ swak baa, a̱ fwuo nwuak a̱chuchuk nggu hu. A̱wot a̱ swak a̱tyu nwai khwi A̱gwaza ma̱ng yet a̱ka̱tuk.

2 Timoti 2:12

Ki̱ zi̱ gbang a̱lyia̱, zi̱ ma na ya tyok hu ndung ma̱ng a̱nggu. Ki̱ zi̱ ma fwuo lyen nggu hu, nggu meang a̱ ma na fwuo lyen nzi̱t hu.

2 Timoti 3:6

Á̱ghyang ma̱ mba yet á̱niet tyiet ba̱ ni̱ tsuam á̱ nwuai a̱ka̱sa á̱niet. Ba̱ laai á̱nyiuk ba̱ sang mumwang nang nfwuo mba na kpaat baa di̱ nyia̱ a̱ka̱tuk, a̱ si̱ yet mba ntangka̱i a̱kpi̱di̱dyi̱k nkpa̱t mi̱ nfwuo mba na. A̱wot a̱ka̱tuk nshyuo ma̱ a̱di̱di̱t si̱ jhyam ma̱ng a̱di̱dam mba wu.

1 Bitut 2:16

Nyi yet á̱sa̱t á̱niet bya. A̱mgba̱m ma̱ng a̱nia, nyi yet á̱khwo A̱gwaza bya. Mat a̱nia, nyi yok ghwon sa̱t nyin hu, ku yet ta̱fwat nang nyi na nyia̱ a̱ka̱kpa̱t a̱ni bah.

1 Bitut 2:8

A̱wot á̱ bu lyuut nyia̱, “A̱fang kani kya na tyia̱ á̱niet ba̱ ga̱u. Kikya bu na tyia̱ mba ba̱ shot a̱kwa.” Ba̱ ga̱u mat ba̱ lak khwi a̱lyiat A̱gwaza na. Huhwa mbyia̱ ku ngyet mba a̱daat nang á̱ sak mba ndyo a̱ni.

1 Bitut 4:18

Ma̱nang á̱ ndyuut ma̱ A̱lyiat A̱gwaza na a̱ni nyia̱, “Ka̱ ku na vwuo a̱khwu á̱ san á̱tsotswat á̱niet ba, yihwa na shya̱ á̱niet lak khwi A̱gwaza, ba̱ yet á̱niet a̱ka̱tuk nyia̱ a̱ni?”

2 Bitut 2:10

Shi̱ri̱ya nang A̱gwaza na nyia̱ á̱niet ba̱ khwi a̱ka̱tuk shyuo nvam ji̱ tyei mba a̱na̱ndyung a̱ni, ma̱ng á̱si̱ ba̱ jhyuai tyok nggu hu a̱ni, ji̱ na swak ma̱ng byia̱ chet. Á̱niet tyiet bwoi a̱ka̱laa bani yet á̱niet lak fwuong bya ma̱ng gba̱p a̱pyia̱. A̱wot da̱ mba, ba̱ fwuong a̱wun kyang bah. Ba̱ lyiat tswá ji̱ byia̱ shi Ma A̱gwaza tswazwa a̱ni lihyat.

2 Bitut 2:7

A̱wot A̱gwaza si̱ bu ti̱n Lutu a̱ ghwut ndyo mi̱ Sodom, mat Lot ku yet a̱tsotswat a̱yin wa. Á̱niet lak khwi kuzang tangka̱i doka ma̱ng á̱niet nyia̱ a̱shi̱shi̱k nyia̱ nang a̱ka̱la̱m ba̱ swan dundung ma̱ng a̱nggu a̱ni, si̱ ghwut gu a̱pyia̱.

2 Bitut 3:7

A̱wot ma a̱nia wa, ma̱ng swang a̱lyiat a̱bwonu nggu ja nang á̱ sak kyai tswazwa ma̱ng a̱byin ma̱ninika, ba̱ swan á̱ fwuong long A̱gwaza hu. Á̱ sak ba á̱ fwuong a̱tuk mam shi̱ri̱ya ka, nang á̱ na ntyak ma̱ng á̱niet ba ba̱ nwai khwi A̱gwaza wu a̱ni.

1 Yoona 2:22

A̱nyan wa yet a̱tyu bwoi a̱ka̱laa wu? Nggu wa yet a̱tyu a̱ nyia̱ di̱ Yesu yet a̱tsatsak Kristi a̱tyu nang A̱gwaza kup gu tyok a̱ni bah. A̱tyu a̱ fwuo A̱tyia̱ wu ma̱ng Nggwon ka a̱ni, nggu wa yet a̱tyu lak li Kristi wu.

Yahuda 1:15

Da̱nian gu ka nyia̱ shi̱ri̱ya nggu ji tazwa a̱mgba̱m á̱niet mi̱ swanta ba. A̱ na tak a̱bun a̱mgba̱m á̱niet ba̱ lak khwi nggu a̱ni, mat a̱mgba̱m a̱ka̱tuk nyia̱ nang ba̱ nyia̱ ba̱ njhyuai tyok nggu hu a̱ni; a̱wot mat a̱mgba̱m lihyat nang á̱niet nwai khwi nggu ba, ba̱ yet á̱niet a̱ka̱tuk nyia̱, ka̱n dyiat tazwa nggu a̱ni.”

Yahuda 1:18

Ba̱ ku tak ma̱ng a̱nyin nyia̱, “Di̱ ngaan jen wu, á̱ na byia̱ á̱niet ba̱ na jhyuai Tyok A̱gwaza hu ma̱ng a̱nyin a̱ni. Ba̱ fa ba̱ khwi shyuo vam á̱pyia̱ mba ji, ji̱ nwai yet si̱ khwi A̱gwaza a̱ni.”

Tyai Á̱zanson 15:4

Ka̱a̱t A̱gwaza! A̱nyan wa na nwai fa̱k a̱wun ang, a̱wot a̱ bu nwuak a̱lyoot ang ka shi?! Mat nwan wa ma̱nyin ang yet A̱za̱za̱rak wu! A̱mgba̱m nnwap mi̱ bibyin swanta na na bai na̱ kwok ang ntong, mat á̱ tyai a̱tsotswat nta̱m ang wu kpa̱sai!”