Matyu 4:3 - A̠lyiat A̠gwaza na di̠n Tyap: A̠li̠ka̠uli A̠fai

³ Di̱n jen a̱ja, A̱ta̱nyeang ka si̱ bai da̱ a̱vwuo Yesu, ka̱ si̱ nyia̱, “Ka̱nang a yet Nggwon A̱gwaza kya chi̱k, tyia̱ nfang nani na̱ bwuak á̱ tyia̱ burodi, a yaa.”

Matyu 4:3 Iomraidhean Croise

Matyu 14:33

A̱wot mman nta̱m na si̱ kyuak Yesu ntong. Ba̱ si̱ nyia̱, “A̱tsak a̱lyiat, a yet Nggwon A̱gwaza kya za̱m!”

Matyu 16:16

Siman Bitut si̱ nwuak gu shim nyia̱, “Nwan wa yet Kristi a̱tyu nang A̱gwaza kup gu tyok a̱ni. A bu yet Nggwon A̱gwaza a̱ shya̱ mi̱ swuan a̱ni.”

Matyu 26:63

A̱wot Yesu si̱ ya a̱son mi̱ swan nyonywang. A̱gba̱ndang pris wu si̱ nyia̱ ma̱ng a̱nggu, “N chat a shyi da̱ a̱lyoot A̱gwaza, a̱ byia̱ swuan a̱ni, tak ma̱ng a̱nzi̱t a̱tsak a̱lyiat. Nwan wa yet Kristi wu, A̱gwam nang A̱gwaza kup gu tyok a̱ni a? Nwan wa bu yet Nggwon A̱gwaza kaa?”

Matyu 3:17

A̱nwuat si̱ kin ghwut a̱ neet Ma A̱gwaza tswazwa ka nyia̱, “Nggwon nung kya ka nang n chat a̱ni. N fwuong nyinyang ka ba̱t!”

Ma̱rkut 1:1

A̱tyin A̱sham Nkhang kikya ka, tazwa Yesu Kristi [[Nggwon A̱gwaza.]]

Ma̱rkut 3:11

A̱wot kuzang jen nang á̱niet ba̱ byia̱ á̱ka̱tuk ntswá ba ndi Yesu a̱ni, ba̱ ni̱ kwa a̱byin a̱zaghyi nggu, ba̱ koot nkun nyia̱, “Nwan wa yet Nggwon A̱gwaza ka!”

Ma̱rkut 5:7

A̱ si̱ kin tyia̱ kun mi̱ chet nyia̱, “Yesu, Nggwon A̱gwaza Tswazwa, a̱ swak mi̱ a̱kyenkyai shi a̱ni, yihwa nang a nda̱u nung a̱nia? Shyi da̱ a̱lyoot A̱gwaza, a na tyia̱ nung swuo a̱bung bah!”

Luka 1:35

A̱ta̱m tswa wu si̱ nwuak gu shim nyia̱, “A̱za̱za̱rak Ntswa wa na chyok da̱ nwan. A̱wot chet A̱gwaza a̱ Swak ma̱ng A̱kyenkyai Shi a̱ni, na kup ang. Mat a̱nia, nggwon ka a na byin a̱ni, ka̱ na yet a̱za̱za̱rak wa. A̱wot á̱ na ngyei nka Nggwon A̱gwaza.

Luka 22:70

Huhwa a̱mgba̱m ba, ba̱ si̱ lyip gu nyia̱, “Kwot! Ka̱ a̱nia wa, a kyiak a̱pyia̱ ang nang Nggwon A̱gwaza a̱ni a?” Yesu si̱ nyia̱ ma̱ng a̱mba, “Nyi hyia̱ a̱nia. Nung gwa.”

Luka 4:3

Huhwa A̱ta̱nyeang ka si̱ nyia̱ ma̱ng Yesu, “Ki̱ nwan wa yet nggwon A̱gwaza ka za̱m, kam a̱fang kani ka̱ bwuak a̱ tyia̱ burodi!”

Luka 4:41

Á̱niet ma̱ a̱di̱di̱t ku byia̱ á̱ka̱tuk ntswá. A̱wot nang Yesu nkam á̱ka̱tuk ntswá mba a̱ni, ba̱ si̱ ghwut á̱ khwot a̱gugong mi̱ chet nyia̱, “Nwan wa yet Nggwon A̱gwaza ka!” A̱wot Yesu si̱ kam mbaa. A̱ si̱ vwuong ba kaat a̱lyiat, mat nang ba̱ ndyen nang gu ngyet Kristi wa a̱ni.

Luka 4:9

A̱jawa A̱ta̱nyeang ka si̱ bu kyiak Yesu a̱ nat ndyo Urusha̱lima. Ka̱ si̱si̱ sak gu da̱ a̱ga̱nga̱ng a̱ta̱n A̱li Nwuat Za̱nang A̱gwaza ka. Ka̱ si̱ nyia̱ ma̱ng a̱nggu, “Ka̱ nwan wa yet Nggwon A̱gwaza ka chi̱k, fi̱p kwa a̱byin!

Yoona 1:34

N di a̱nia, n tak nyin kpa̱sai nang nggu wa ngyet Nggwon A̱gwaza ka.”

Yoona 1:49

A̱jawa Nataniyel si̱ nyia̱, “A̱tyu tyiet, nwan wa yet Nggwon A̱gwaza ka! Nwan wa yet A̱gwam Isi̱rela wu!”

Yoona 20:31

A̱mgba̱m ma̱ng a̱nia, á̱ lyuut nkyang nani da̱nian nyi ka nwuak a̱chuchuk nang Yesu wa ngyet Kristi, A̱tyu nang A̱gwaza kup gu tyok a̱ni, ma̱ng Nggwon A̱gwaza; a̱wot mami nwuak fwuo nyin hu da̱ nggu, nyi ka shya̱ swuan mami a̱lyoot gu.

Yoona 9:35

Nang Yesu ku nfa̱k nkhang nyia̱ á̱ ka̱n vwuong a̱tyu a̱ ku byia̱ a̱fi̱fan ba, á̱ ghwut ndyo mi̱ tutu a̱tung A̱yahudawa hu a̱ni; a̱ si̱ chat gu a̱ shya̱. Huhwa gu nyia̱ ma̱ng a̱nggu a̱ni, “A nwuak fwuo di̱ Nggwon A̱gwaza kaa?”

Nta̱m A̱yaata̱m 9:20

A̱wot mi̱ di̱ yong a̱hwa, Sha̱wulu si̱ kin nwuo shei A̱sham Nkhang Yesu ka ma̱ á̱tutu a̱tung A̱yahudawa ba. A̱ si̱ nyia̱, “Yesu wa yet Nggwon A̱gwaza ka za̱m!”

2 A̱korontiyawa 1:19

Mat Yesu Kristi, a̱ yet Nggwon A̱gwaza ka a̱ni, a̱ ni̱ shai a̱ nyia̱, “Ii,” a̱wot da̱ a̱cha̱chaat njen a̱wa a̱ bu nyia̱, “Kaai,” bah. Nggu wa yet a̱tyu nang nzi̱t a̱tat, Sila, Timoti, mbeang nung nang zi̱ ku shei nyin a̱lyiat nggu na a̱ni. A̱wot nang nggu wa ngyet “Ii” A̱gwaza wu a̱ni, kuzang jen a̱ ni̱ nyia̱ kyang hu nang gu hyia̱ a̱ni.

A̱ga̱la̱tiyawa 2:20

Á̱ ka̱n kpang za̱kwa a̱ka̱tuk nyia̱ nung ji da̱ a̱team a̱khwu ndung ma̱ng Kristi. Ma̱ninika, n swan swat a̱pyia̱ nung hwa bah. A̱wot n swan swat Kristi hwa. A̱wot n swan mi̱ vam mi̱ swanta huni di̱ nwuak fwuo di̱ khwi Nggwon A̱gwaza. Kikya chat nung, ka̱ si̱ nwuak a̱pyia̱ nka da̱nian nung.

1 A̱ta̱solonikawa 3:5

Mat nang gbang a̱lyia̱ hu ku nkaat nung a̱ni, n si̱ ta̱m Timoti da̱ a̱vwuo nyin n ka ndyen nwuak fwuo nyin hu di̱ Yesu. N ku nfa̱k a̱wun kee A̱ta̱nyeang ka, ka̱ yet a̱tyu mai á̱niet a̱ni, ka̱ mak nyin, nyi si̱ kwa, a̱wot a̱mgba̱m ta̱m zi̱ ka̱n nyia̱ da̱ nyin a̱ni, ku tyia̱ a̱buk kyang.

Ibriniyawa 12:16

Nyi ta̱bam, kalak á̱ ba̱ shya̱ a̱yin ma̱ nyin nang gu yet a̱tyu a̱shi̱shi̱k nyia̱, ma̱ng a̱tyu nwai fwuong a̱wun A̱gwaza nang Isuwa a̱ni. Nggu wa ku lyap gado yet a̱niet khwop nggwon nggu hu, mat kham kyayak jhyung ma̱nyin ji!

Ibriniyawa 4:14

Mat a̱nia, nang zi̱ mbyia̱ a̱gba̱ndang pris a̱ swak ma̱ng shi a̱ni, nggu wa ka̱n nwuo Ma A̱gwaza tswazwa, nggu wa yet Yesu, Nggwon A̱gwaza ka; yok zi̱ yong mi̱ chet di̱ nwuak fwuo nzi̱t hu da̱ nggu.

Ibriniyawa 7:3

Á̱ mbyia̱ a̱vwuo nang á̱ ndyuut tazwa a̱tyia̱, ku a̱yang Ma̱lkiza̱dek a̱ni bah. Da̱ mba, á̱ lyen kwai nggu ji bah. Á̱ mbyia̱ a̱vwuo nang á̱ ndyuut mam byin, ku mam a̱khwu nggu a̱ni bah. Mat a̱nia, Ma̱lkiza̱dek yet tangka̱i pris hwa si̱ nat sang sangba̱p. A̱wot a̱ si̱ tai Nggwon A̱gwaza kya.

1 Yoona 3:8

Ma a̱nia wa, konyan wa ya a̱son ma̱ng nyia̱ a̱ka̱tuk nyia̱ a̱ nchi̱ri̱ng, ku tak nang gu ngyet a̱si̱ A̱ta̱nyeang wa. Mat A̱ta̱nyeang ka mi̱ nnyia̱ a̱ka̱tuk nyia̱ neet gbangbang. Kyang ku mbyia̱ bai Yesu hu a̱ni huhwa hu; da̱nian gu ka bi̱ri̱m nta̱m A̱ta̱nyeang na.

Tyai Á̱zanson 2:10

Nyi yok fa̱k a̱wun a̱bung nyi na swuo a̱ni bah. A̱ta̱nyeang ka na tyia̱ á̱ghyang nyin mi̱ jaru, da̱nian á̱ ka mak nyin. Nyi na bwuo mam swak nang nyi swuo a̱bung. A̱wot ka̱ nyi yong chi̱k di̱ nwuak a̱chuchuk nyin hu, ku nang á̱ hyaai nyin wa; n na nkup nyin bung tyok ji̱ yet zang nswuan a̱ni.