A̱filibiyawa 4:3 - A̠lyiat A̠gwaza na di̠n Tyap: A̠li̠ka̠uli A̠fai

³ Nwan a̱tsotswat a̱kpa̱ndang ta̱m nung, beang á̱nyiuk bani, mat ba̱ ka̱n nyia̱ ta̱m za̱m ma̱ng a̱nung di̱ beang ya a̱son shei A̱sham Nkhang Yesu ka. Ba̱ ku nyia̱ ta̱m hu dundung ma̱ng Ka̱la̱men mbeang á̱kum á̱kpa̱ndang ta̱m nung ba, nang á̱ lyuut lyulyoot mba hu mi̱ Ta̱ka̱da Nswuan hu a̱ni.

A̱filibiyawa 4:3 Iomraidhean Croise

Luka 10:20

A̱mgba̱m ma̱ng a̱nia, nyi yok gwai mat á̱ka̱tuk ntswá ba khwi a̱lyiat nyin na ma̱nyin na bah. A̱wot nyi bu mbeang a̱gwai nyin na swaak; mat á̱ lyuut lyulyoot nyin hu mi̱ ta̱ka̱da mman a̱byin Ma A̱gwaza tswazwa!”

A̱romawa 12:1

Mat a̱nia, nyin á̱na̱nyiuk nung ba, nyi yet á̱niet khwi Yesu nang n chat a̱ni, n naai nyin, mat nang A̱gwaza ka̱n fa̱k kunak nyin ba̱t a̱ni, nyi neap nvam nyin na nang a̱chet ma̱ng a̱za̱za̱rak za̱nang ji̱ myim A̱gwaza a̱ni. Tangka̱i neap za̱nang huni hwa yet a̱tsatsak nvak wu nang nyi na nkyuak A̱gwaza ntong a̱ni.

A̱romawa 16:12

Nyi mun byiat nung Ta̱ra̱finat, ma̱ng Ta̱ra̱fusat, ba̱ yet á̱niet nta̱m A̱tyoli Yesu bya; a̱wot ma̱ng Ba̱risa nang n fa̱k da̱ nggu a̱ni, a̱ ka̱n nyia̱ ta̱m ba̱t da̱nian A̱tyoli Yesu.

A̱romawa 16:9

Nyi mun byiat A̱banut, a̱ yet a̱kpa̱ndang nzi̱t mi̱ nta̱m Kristi, ma̱ng Istaki, a̱gi̱ngi̱ng a̱kpa̱ndang nung a̱ghyang.

A̱filibiyawa 1:12

Nyin á̱niet khwi Yesu ba nang n chat a̱ni, n chat nyi lyen swuo a̱bung ku shya̱ nung a̱ji a̱ni. A̱tsak a̱lyiat, ku tyia̱ á̱niet ma̱ a̱di̱di̱t si̱ fa̱k A̱sham Nkhang ka.

A̱filibiyawa 1:16

Á̱niet ba ba̱ shei a̱lyiat A̱gwaza na ma̱ng a̱tan a̱di̱dam a̱ni, ba̱ shei na wa mat ba̱ chat nung. Ba̱ lyen nang A̱gwaza wa nshim á̱ nyim nung mi̱ jaru ji, da̱nian n ka shya̱ a̱wat n tyiet á̱niet a̱chuchuk tazwa A̱sham Nkhang Kristi ka.

A̱filibiyawa 1:27

Kyang ku yet a̱ swak a̱ni, ku yet ta hwa nyi swan nang á̱tsatsak mman a̱byin Ma A̱gwaza tswazwa a̱ni. Nyi swan swat ku myim A̱sham Nkhang Kristi ka a̱ni. A̱wot ka̱ nyi nyia̱ a̱nia, ki̱ n ba̱ mbai n di nyin, ku n ma nfa̱k nkhang nyin nia, n na ndyen nang nyi ngyong mi̱ chet dundung ma̱ng á̱ghyang, di̱ mun á̱pyia̱ ma̱ng la̱p sak nyiung. Nyi bu kwan, nyi ya a̱son ma̱ng tyiet a̱chuchuk tazwa A̱sham Nkhang ka.

A̱filibiyawa 1:5

Mat nyi yet á̱kpa̱ndang ta̱m ndung ma̱ng a̱nung di̱ shei A̱sham Nkhang tazwa Kristi, neet di̱n jen nang nyi ku ntsa fa̱k A̱sham Nkhang ka a̱ni, ba̱ng ba̱ tat a̱fwun.

A̱filibiyawa 1:7

Mat a̱nia, da̱ a̱vwuo nung, ku myim ba̱t nang n nyia̱ a̱di̱dam a̱nia tazwa nyin a̱ni, mat a̱mgba̱m nyin nyi shya̱ nung mi̱ fwuo. Nyi yet á̱kpa̱ndang nung bya di̱ shya̱ shok A̱gwaza, di̱n jen nang á̱ nda̱p nung ma̱ng a̱nyanyang á̱ si̱ tyia̱ nung mi̱ jaru; a̱wot di̱n jen nang n tyiet á̱niet ba a̱chuchuk tazwa A̱sham Nkhang Yesu ka, n bu ntak nang ka̱ ngyet a̱tsatsak wa a̱ni.

A̱filibiyawa 4:2

Yodiya ma̱ng Sintiki, ma̱ninika, n naai nyin, ma̱sa̱kut nyi jhyi swat nyin hu. Nyi swan swat nyinyang ma̱ng á̱ghyang nyin, mat a̱mgba̱m nyin nyi yet á̱niet khwi A̱tyoli Yesu bya.

A̱kolosiyawa 1:7

Nyi wa ka̱n myiam A̱sham Nkhang ka da̱ a̱vwuo A̱bafa̱rat, a̱ yet a̱tsatsak a̱kpa̱ndang ta̱m nzi̱t nang zi̱ chat a̱ni. Nggu wa yet a̱tsotswat a̱khwo Kristi wu. A̱wot a̱ shei nyin A̱sham Nkhang ka da̱ a̱kwonu nzi̱t.

Tyai Á̱zanson 13:8

A̱wot a̱mgba̱m á̱niet ba̱ shya̱ mi̱ swanta hu a̱ni, si̱ kwok ntong a̱zaghyi a̱ka̱tuk nyam a̱yit wu. Bibya yet á̱niet ba nang á̱ nwai lyuut lyulyoot mba hu mi̱ Ta̱ka̱da Nswuan hu neet nang á̱ ka̱n mmat swanta hu bah. Ta̱ka̱da hu ku yet si̱ Fi̱ng A̱nfwuk hu nang á̱ ku faat a̱ni.

Tyai Á̱zanson 17:8

“A̱ka̱tuk nyam a̱yit a̱wa nang a li a̱ni; nggu wa ku yet a̱chet gbangbang, a̱wot ma̱nini a̱ bu shya̱ ma̱ng swuan bah. A̱mgba̱m ma̱ng a̱nia, a̱ na ghwut ma̱ a̱tsuung bwong sang sangba̱p wu. A̱wot di̱ ngaan hu, á̱ na tyia̱ nggu gu khwu a̱khwu sang sangba̱p. A̱wot á̱niet mi̱ swanta bani, nang á̱ nwai lyuut lyulyoot mba hu mi̱ Ta̱ka̱da Nswuan hu, neet nang á̱ ka̱n mat swanta hu a̱ni bah; ba̱ na fa̱k a̱ga̱de di̱n jen nang a̱ka̱tuk nyam a̱yit wu bu na nghwut kpa̱sai a̱ni. Mat a̱ka̱tuk nyam a̱yit wu ku nshya̱ gbangbang, ma̱ninika a̱ bu nshya̱ bah, a̱wot a̱ bu na bwuok a̱ bai.

Tyai Á̱zanson 20:12

N si̱ ndi á̱niet ba̱ ka̱n kwi a̱ni; a̱cha̱chet ma̱ng a̱chyuang nang ba̱ yong a̱zaghyi a̱gba̱ndang chuk Tyok A̱gwaza! Á̱ si̱ khwuk nta̱ka̱da na, mbeang Ta̱ka̱da Nswuan hu. A̱wot á̱ si̱ faat á̱niet ba̱ ka̱n kwi a̱ni shi̱ri̱ya ma̱ cha̱chaat ma̱ng nta̱m ba̱ nyia̱ a̱ni, ma̱nang á̱ ndyuut mami ta̱ka̱da na a̱ni.

Tyai Á̱zanson 20:15

Konyan wa da̱nang á̱ lyuut a̱lyoot nggu ka mami Ta̱ka̱da Nswuan hu a̱ni bah; á̱ na ta gu mami a̱gba̱ndang tswa a̱nga̱ngak ndong sang sangba̱p.

Tyai Á̱zanson 21:27

Á̱ na shim á̱niet a̱na̱ndyung ba̱ nwuo ma̱ a̱keang ka bah; ku á̱niet ba̱ nyia̱ nkyang nsum ba̱ khwi nghwughwu a̱yaagwaza sang swuan, ku á̱niet bwoi a̱ka̱laa; a̱wot si̱ ma̱ á̱niet ba nang á̱ lyuut lyulyoot mba hu mi̱ Ta̱ka̱da Nswuan Fi̱ng A̱nfwuk hu a̱ni ma̱nyin mba.

Tyai Á̱zanson 3:5

A̱mgba̱m á̱niet ba̱ swuo chet swanta hu a̱ni, á̱ na kup ba a̱sai a̱jhya̱jhyat a̱yaatoot! N na mak lyang lyulyoot mba hu mami Ta̱ka̱da Swuan hu bah. A̱wot n na ngyei lyulyoot mba hu a̱zaghyi A̱tyia̱ nung ka ma̱ng a̱yaata̱m tswá nggu ba; n tak nang ba̱ ngyet á̱si̱ nung bya!