A̱filibiyawa 4:19 - A̠lyiat A̠gwaza na di̠n Tyap: A̠li̠ka̠uli A̠fai

¹⁹ A̱wot A̱gwaza nung wu na nang nyin a̱mgba̱m kuzang kyang nang nyi chat a̱ni, mami a̱gba̱mgbam zwá nggu wu, mat mun á̱pyia̱ nzi̱t hu ma̱ng Kristi Yesu.

A̱filibiyawa 4:19 Iomraidhean Croise

Matyu 6:32

Da̱nian nkyang nani nia nang nnwap na̱ chyi A̱gwaza a̱ni ni̱ dam mi̱ nfwuo mba na ba̱ na shya̱. A̱wot A̱tyia̱ nyin wu a̱ shya̱ tswazwa ka a̱ni, lyen chi̱k nang nyi nchat nkyang nani a̱mgba̱m na.

Yoona 20:17

Yesu si̱ nyia̱ ma̱ng a̱nggu, “Yok vwuk nung bah, mat n ka̱n bwuok nat tswazwa da̱ a̱vwuo A̱tyia̱ ka bah. Ya mbwuok nat da̱ a̱vwuo á̱na̱nyiuk nung ba, a̱ si̱ hyia̱ ma̱ng a̱mba; n na mbwuok nat tswazwa da̱ a̱vwuo A̱tyia̱ nung ma̱ng A̱tyia̱ nyin, A̱gwaza nung ma̱ng A̱gwaza nyin.”

Yoona 20:27

A̱jawa Yesu si̱ nyia̱ ma̱ng Toma, “Tyia̱ ga̱swuong ang ji, a̱wot a nwuan mbwak nung na. Neap bwak ang hu a tyia̱ mi̱ tsi̱ntsa̱u nung ji. Yok, but mi̱ fwuo bah; nwuak a̱chuchuk!”

A̱romawa 1:8

Di̱ ntsa hu, n gwai ma̱ng A̱gwaza nung wu mami a̱lyoot Yesu Kristi da̱nian nyin a̱mgba̱m. Mat á̱niet khwi ma̱ a̱di̱di̱t mi̱ swanta hu bwoi nkhang di̱ si̱sak ji nang nyi nnwuak fwuo di̱ Yesu Kristi a̱ni.

A̱romawa 11:33

A̱tsak a̱lyiat! A̱kyenkyai shi A̱gwaza wu, mumwang nggu hu, ma̱ng lyen nggu hu swak zop ma̱ng fi̱k! A̱nyan wa si̱ mi̱n fi̱k a̱di̱dam nggu wu? Nvak nggu na swak lyen konyan!

A̱romawa 2:4

Ke a jhyuai si̱sak nang A̱gwaza nfa̱k a̱gba̱ndang shok, a̱ si̱ nyap fwuo, a̱ si̱ nwai vwuot lyen hu da̱ nwan a̱ni a? Si̱ huni yet a̱buk kyang wa da̱ a̱vwuo ang a? Ka̱ doot a li nang A̱gwaza, mat shok nggu ji, a̱ nwuat ang a̱wat a ghwon a̱ka̱tuk nyia̱ ang wu, a shyak a̱chyet kya baa?

A̱romawa 8:18

A̱tsak a̱lyiat, a̱bung ka zi̱ swuo mi̱ jen jini a̱ni, á̱ si̱ mi̱n tyan ka ma̱ng a̱kyenkyai shi wu nang á̱ na tyai nzi̱t ndyo á̱zanson a̱ni bah.

A̱romawa 9:23

A̱nia wa gu si̱ bu chat gu tak á̱niet ba gu khai a̱ni a̱gba̱mgbam a̱kyenkyai shi nggu wu. Á̱niet bani bya nang ku mi̱ nfa̱k kunak ba a̱ si̱ mi̱ nkhai mba a̱ sak ba̱ ka nwuo a̱kyenkyai shi nggu wu.

2 A̱korontiyawa 12:21

A̱tsak a̱lyiat, n bu nfwuong a̱wun, mat ki̱ n bu mbai da̱ a̱vwuo nyin, A̱gwaza nung wu na ghyuai nung a̱zaghyi nyin, n fa̱k nsum di̱ kyang nang nyi nyia̱ a̱ni. A̱wot n na nfa̱k a̱lyia̱ ya ba̱t, mat á̱ghyang á̱niet ma̱ a̱di̱di̱t ma̱ nyin ka̱n ghwon a̱khwukhwop a̱ka̱tuk za̱kwa mba wu bah. Nyi ka̱n ghwon a̱na̱ndyung nyin wu, nyi si̱ nwuo khwi A̱gwaza bah. A̱na̱ndyung nyin wu wa yet; a̱shi̱shi̱k nyia̱ sang nsum nyin wu nang a̱ka̱la̱m a̱ni.

2 A̱korontiyawa 4:17

Mat, a̱bung ka nang zi̱ swuo ma̱nini a̱ni, shii bah. A̱wot ka̱ na labeang bah, ka̱ na̱ tyak. A̱mgba̱m ma̱ng a̱nia, a̱bung kani ka̱ tyei nzi̱t a̱kyenkyai shi wu a̱ni, na swak swuo a̱bung nang zi̱ swuo ma̱nini a̱ni ma̱ za̱nzan. A̱wot a̱kyenkyai shi wu na ba̱ng si̱ nat sang sangba̱p!

A̱fisawa 1:18

N bu naai A̱gwaza gu khwuk nfwuo nyin na ma̱ng sai nggu hu, da̱nian nyi ka fi̱k gbang a̱lyia̱ di̱ tyia̱ fwuo nang gu nyia̱ a̱li̱ka̱uli a̱ na nang nyin, di̱n jen nang gu ku ngyorong nyin a̱ni. A̱ yorong nyin, nyin á̱niet ba nyi yet á̱za̱za̱rak á̱niet nggu ba, nyi si̱ bu yet zwá nggu ji, ma̱ng a̱kyenkyai shi gado nggu wu a̱ni.

A̱fisawa 1:7

A̱gwaza fa̱k kunak zi̱t, a̱ si̱ nyia̱ nzi̱t shok gba̱mgbam. A̱ si̱ san nzi̱t ma̱ng a̱sok Nggwon nggu na, zi̱ ka yet á̱sa̱t á̱niet, a̱wot a̱ si̱ chi a̱ka̱tuk nyia̱ nzi̱t wu.

A̱fisawa 2:7

A̱gwaza nyia̱ a̱nia da̱nian gu ka tak ma̱ng a̱nzi̱t ma̱ng a̱mgba̱m che ji chobai á̱zanson a̱ni, tangka̱i a̱gba̱mgbam shok ma̱ng kunak nang gu fa̱k da̱ nzi̱t, nang á̱ si̱ mi̱n nwai tyan a̱ni. Si̱ huni tak a̱mgba̱m nkyang nang A̱gwaza nyia̱ nzi̱t ndyo, nzi̱t á̱niet zi̱ mun á̱pyia̱ ma̱ng Kristi Yesu a̱ni.

A̱fisawa 3:16

N naai A̱gwaza gu nang nyin a̱li̱ba̱rka mami zwá a̱kyenkyai shi nggu ji, ji̱ nwai tyiai a̱ni; gu shim nyi shya̱ chet mi̱ nfwuo nyin na ku neet da̱ a̱vwuo A̱za̱za̱rak Ntswa a̱ni.

A̱fisawa 3:8

Ku nang n tyak kyang ma̱ á̱niet khwi A̱gwaza ba a̱ni bah, nung gwa A̱gwaza si̱ khai a̱ si̱ nyia̱ nung shok jini, n ka shei A̱sham Nkhang ma̱ng Nnwap na̱ nwai yet A̱yahudawa a̱ni, nang ba̱ na nshya̱ zwá gba̱mgbam ji̱ nwai tyiai da̱ a̱vwuo Kristi a̱ni.

A̱filibiyawa 4:7

A̱jawa nyi na ndyen swat nyinyang ku neet da̱ a̱vwuo A̱gwaza a̱ni, si̱ hu swak a̱mgba̱m kyang nang zi̱ na fi̱k a̱ni. Swat nyinyang nang A̱gwaza nwuat nzi̱t a̱ni, ku na chok nfwuo nyin na ma̱ng a̱di̱dam nyin wu mami Kristi Yesu.

A̱kolosiyawa 1:27

Mat A̱gwaza tyai á̱niet nggu ba si̱sak nang gu mbyia̱ a̱tsatsak la̱p sak da̱nian a̱mgba̱m nnwap mi̱ bibyin swanta hu a̱ni. A̱wot a̱ tyai á̱niet nggu ba ba̱ lyen la̱p sak ku shya̱ di̱ niat a̱ni. Huhwa yet; tangka̱i zwá ma̱ng a̱kyenkyai shi nang Kristi byia̱ a̱ni, mun a̱ yet si̱ a̱mgba̱m nnwap mi̱ bibyin swanta hu hwa. A̱wot la̱p sak hu ku shya̱ di̱ niat a̱ni, huhwa hu; Kristi mun a̱pyia̱ ma̱ng a̱nyin Nnwap na̱ nwai yet A̱yahudawa a̱ni. A̱wot si̱ huni tyia̱ nyin, nyi tyia̱ fwuo nyi shya̱ a̱kwonu nyin ma̱ a̱kyenkyai shi nggu wu.

A̱kolosiyawa 3:16

Nyi ni̱ nyia̱ a̱di̱dam tazwa A̱sham Nkhang Kristi ka mi̱ nfwuo nyin na kuzang jen. Nyi ni̱ ntyiet tsa bu ngba á̱ghyang nyin ma̱ng a̱mgba̱m mumwang nang A̱gwaza ka̱u nyin a̱ni. Nyi ni̱ ngwai A̱gwaza mi̱ nfwuo nyin na. Nyi bwom bubwom Za̱bura, bubwom dyep A̱gwaza, ma̱ng bubwom A̱za̱za̱rak Ntswa ghyang.

1 A̱ta̱solonikawa 2:12

Zi̱ ku gba nyin. Zi̱ si̱ tyia̱ nyin gba̱gbak. Zi̱ si̱ yong nyin si̱sak ji nyi na nswan swat ku myim A̱gwaza a̱ni, a̱tyu a̱ yei nyin mami tyok nggu hu ma̱ng a̱kyenkyai shi nggu wu a̱ni.

1 Timoti 6:17

Kam á̱niet ba̱ yet á̱niet nzwá mi̱ swanta hu a̱ni, ba̱ yok gba̱p a̱pyia̱, ba̱ yok tyia̱ nfwuo mba na di̱ zwá ji̱ tyiai a̱ni bah. Da̱ a̱kwonu a̱kya, ba̱ tyia̱ nfwuo mba na da̱ A̱gwaza wa; a̱tyu a̱ nwuat zi̱t kuzang tangka̱i kyang kuzang jen mi̱ fwuo nyiung nang zi̱ na nfwuong nyinyang a̱ni.

Filimon 1:4

Filimon, kuzang jen, ki̱ n shya̱ di̱ naai A̱gwaza wu da̱nian ang, n ni̱ gwai.

1 Bitut 5:1

Mat a̱nia, n gba nyin, nyin nyi yet á̱niet khwop á̱niet ma̱ á̱niet khwi ba a̱ni. Nung meang n gyet a̱niet khwop a̱niet wa, a̱ ku li swuo a̱bung Kristi hu a̱ni. A̱wot n na mun shya̱ a̱kyenkyai shi nggu wu di̱n jen nang gu na mbai a̱ tyai a̱pyia̱ nggu kpa̱sai mi̱ swanta hu a̱ni.

1 Bitut 5:10

A̱wot A̱gwaza a̱ byia̱ a̱mgba̱m shok a̱ni, nggu wa yorong nyin nyi ya gado mi̱ a̱kyenkyai shi sang sangba̱p nggu wu mami a̱lyoot Kristi. Mat a̱nia, ka̱ nyi swuo a̱bung da̱ a̱banjen ma̱ a̱da̱dei, a̱ na bwuok ma̱ng a̱nyin kuzang kyang, a̱ beang nyin, a̱ byia̱k nyin, a̱ tyia̱ nyin chet. A̱wot a̱ kpaat nyin di̱ kuntyin ku byia̱ chet a̱ni.