A̱filibiyawa 3:20 - A̠lyiat A̠gwaza na di̠n Tyap: A̠li̠ka̠uli A̠fai

²⁰ A̱wot nzi̱t, da̱ a̱kwonu a̱kya, zi̱ yet mman a̱byin Ma A̱gwaza tswazwa nia; a̱vwuo ka nang A̱tyoli nzi̱t wu Yesu Kristi nshya̱ a̱ni. A̱wot zi̱ fwuong di̱dang bwuok bai nggu hu; nggu a̱ yet A̱tyusan nzi̱t wu a̱ni.

A̱filibiyawa 3:20 Iomraidhean Croise

Matyu 19:21

Yesu si̱ nyia̱ ma̱ng a̱nggu, “Ka̱ a chat a yet a̱tyu sang a̱bun, nat a si̱ lyap a̱mgba̱m nkyang nang a byia̱ a̱ni, a ka̱u á̱kunak kurum nhu. A̱wot a na shya̱ zwá jhyáng tswazwa kya, a sii bai a khwi nung.”

Luka 12:21

“A̱tsak a̱lyiat, a̱nia wa ku na ndi ma̱ng a̱tyu a̱ tung a̱pyia̱ nggu zwá mi̱ swanta hu a̱ni, a̱wot da̱ nggu, a̱ byia̱ zwá da̱ a̱vwuo A̱gwaza bah.”

Luka 14:14

Mat ntangka̱i á̱niet a̱nia byia̱ kyang ba̱ na ntan ang a̱ni bah. “Ka̱ a nyia̱ a̱nia, a yet a̱tyu a̱li̱ba̱rka wa, mat A̱gwaza na nang ang zang ba̱t, di̱n jen nang á̱tsotswat á̱niet ba bye ndoot ma̱ng swuan ma̱ á̱niet ba̱ ka̱n kwi a̱ni.”

Nta̱m A̱yaata̱m 1:11

Á̱niet a̱feang a̱bya si̱ nyia̱ ma̱ng a̱mba, “Nyin á̱tyok Ga̱lili, yihwa mbyia̱ nang nyi ngyong jwaat á̱ghyi nwuan kyai tswazwa hu? Yesu wuni nang á̱ kyiak da̱ a̱vwuo nyin á̱ nkat ndyo Ma A̱gwaza tswazwa ka a̱ni; ma a̱nia wa, nang gu na mbwuok a̱ bai ma̱ cha̱chaat, nang nyi ndi gu nnaat mi̱ kyai tswazwa hu a̱ni!”

1 A̱korontiyawa 1:7

Ma̱ninika, nyi byia̱ a̱mgba̱m kuzang tangka̱i za̱nang chet a̱za̱za̱rak Ntswa nang nyi chat a̱ni, nang nyi nswan ma̱ng di̱dang fwuong bwuok bai Yesu Kristi A̱tyoli nzi̱t wu a̱ni.

1 A̱korontiyawa 15:48

Ma̱nang á̱ nyia̱ a̱tyubishyi ma̱ng nkyuo mbyin a̱ni; ma a̱nia wa, á̱si̱ ba ba̱ yet mbyin a̱ni na ndi. Ma̱nang a̱tyu a̱ neet Ma A̱gwaza tswazwa ka ndi a̱ni; ma a̱nia wa, á̱si̱ ba ba̱ yet á̱si̱ Ma A̱gwaza tswazwa ba a̱ni, na ndi.

2 A̱korontiyawa 4:18

Mat a̱nia, zi̱ yok dam ma̱ng a̱bung ka nang zi̱ swuo ma̱nini a̱ni bah. Da̱ a̱kwonu a̱kya, zi̱ tyia̱ fwuo di̱ nkyang Ma A̱gwaza tswazwa nang zi̱ nwai nwuan a̱ni. Mat nkyang swanta na nang zi̱ nwuan ma̱nini a̱ni, na̱ na tyak ma a̱nggang. A̱wot nkyang Ma A̱gwaza tswazwa nang á̱ nwai nwuan a̱ni, na swan si̱ nat sang sangba̱p.

2 A̱korontiyawa 5:8

A̱tsak a̱lyiat, zi̱ byia̱ gbang a̱lyia̱ ba̱t. A̱wot zi̱ bu na chat zi̱ shya̱ zan ma̱ng nvam swanta nani, da̱nian zi̱ ka swan a̱mali dundung ma̱ng A̱tyoli nzi̱t wu Yesu.

A̱ga̱la̱tiyawa 4:26

A̱wot Sa̱raya, a̱ yet a̱yang a̱li wu a̱ni, yet kidee Urusha̱lima, a̱si̱ Ma A̱gwaza tswazwa hwa. Nggu wa yet a̱yang a̱li a̱ byia̱ sa̱t hu a̱ni. A̱wot nggu wa yet a̱yang byin nzi̱t, zi̱ yet á̱niet khwi ba a̱ni.

A̱fisawa 2:19

Mat a̱nia, ma̱ninika nyin Nnwap na̱ nwai yet A̱yahudawa a̱ni, nyi bu yet á̱nietchen ku á̱kang á̱niet bah. Nyi mun yet mman a̱byin nia dundung ma̱ng á̱za̱za̱rak á̱niet khwi A̱gwaza ba, ba̱ yet kyang mbwak A̱gwaza a̱ni.

A̱fisawa 2:6

A̱wot A̱gwaza si̱ ta̱ngam nzi̱t ma̱ng swuan ma̱ á̱niet ba̱ ka̱n kwi a̱ni dundung ma̱ng Kristi. A̱wot a̱ si̱ nwuak nzi̱t a̱vwuo nswat dundung ma̱ng a̱nggu mi̱ tyok ma̱ a̱ka̱vwuo Ma A̱gwaza tswazwa, mat zi̱ mun á̱pyia̱ ma̱ng Kristi Yesu.

A̱filibiyawa 1:10

Mat a̱nia, n chat nyi fi̱k kyang hu ku swak mi̱ yet a̱tan a̱ni, da̱nian nyi ka swan a̱za̱za̱rak nswat ma̱ng sang a̱bun si̱ nat a̱tuk bwuok bai Kristi Yesu ka.

A̱filibiyawa 1:27

Kyang ku yet a̱ swak a̱ni, ku yet ta hwa nyi swan nang á̱tsatsak mman a̱byin Ma A̱gwaza tswazwa a̱ni. Nyi swan swat ku myim A̱sham Nkhang Kristi ka a̱ni. A̱wot ka̱ nyi nyia̱ a̱nia, ki̱ n ba̱ mbai n di nyin, ku n ma nfa̱k nkhang nyin nia, n na ndyen nang nyi ngyong mi̱ chet dundung ma̱ng á̱ghyang, di̱ mun á̱pyia̱ ma̱ng la̱p sak nyiung. Nyi bu kwan, nyi ya a̱son ma̱ng tyiet a̱chuchuk tazwa A̱sham Nkhang ka.

A̱kolosiyawa 1:5

Nwuak fwuo nyin hu ma̱ng chat á̱ghyang nyin hu tak nang nyi ntyia̱ fwuo di̱n zwá nang A̱gwaza sak nyin dyo a̱mali nggu ka tswazwa a̱ni. Nyi ku mi̱ ntyia̱ fwuo di̱ si̱ huni neet di̱n jen nang nyi ku ntsa fa̱k a̱chuchuk a̱lyiat wu, a̱ yet A̱sham Nkhang ka a̱ni.

1 A̱ta̱solonikawa 1:10

A̱wot ba̱ bu hyia̱ ma̱ng a̱nzi̱t si̱sak ji nyi bu nfwuong bwuok bai Yesu hu, a̱ yet Nggwon A̱gwaza ka, ka̱ neet Ma A̱gwaza tswazwa ka a̱ni. Nggu wa yet Yesu, a̱tyu nang A̱gwaza ku ta̱ngam ma̱ng swuan ma̱ á̱niet ba̱ ka̱n kwi a̱ni. Nggu wa na san nzi̱t mi̱ mwai lyen A̱gwaza hu ku chobai a̱ni.

1 A̱ta̱solonikawa 4:16

Mat A̱tyoli Yesu ma̱ a̱pyia̱ nggu si̱ ba̱ bwuok a̱ neet Ma A̱gwaza tswazwa, a̱ kam mi̱ chet. A̱gba̱ndang a̱ta̱m tswa A̱gwaza na yorong ma̱ng a̱gba̱ndang a̱nwuat, a̱ bu na tyiap a̱gwa A̱gwaza. A̱wot á̱niet khwi Yesu ba̱ ka̱n kwi a̱ni, bibya na yet a̱son doot ma̱ng swuan ma̱ á̱niet ba̱ ka̱n kwi a̱ni.

2 Timoti 4:8

A̱wot ma̱ninika, á̱ sak zang á̱ nfwuong nung. Ji̱ yet a̱tsotswat nbung tyok nang A̱tyoli Yesu a̱ yet a̱tsotswat ma̱ng a̱tan a̱tyu nyia̱ shi̱ri̱ya wu a̱ni, bye nwuak nung a̱tuk nyia̱ shi̱ri̱ya ka a̱ni. A̱wot zang jini ji yet si̱ nung ja ma̱nyin nung bah. Ji̱ bu yet si̱ a̱mgba̱m á̱niet ba̱ swan mi̱ di̱dang á̱ fwuong bwuok nggu hu, da̱nian ba̱ ka li bai nggu hu a̱ni.

Titut 2:13

Zi̱ ya nswan fwuong a̱tsatsak mam a̱gwai a̱hwa nang zi̱ ntyia̱ fwuo a̱ni, nang Yesu Kristi a̱ yet a̱gba̱ndang A̱gwaza ma̱ng A̱tyusan nzi̱t wu na mbwuok a̱ bai ma̱ng a̱kyenkyai shi nggu wu kpa̱sai a̱ni.

Ibriniyawa 12:22

A̱wot nyin, nyi vwuon ma̱ng á̱niet Isi̱rela a̱bya, mat nyi bai kpa̱mkpaan ma̱ng A̱fan Si̱hiyona kya, ka̱ shya̱ Ma A̱gwaza tswazwa a̱ni. Ka̱ yet a̱keang A̱gwaza a̱ byia̱ swuan a̱ni. Kikya yet Urusha̱lima. A̱wot a̱ja wa a̱yaata̱m tswá A̱gwaza ba̱ yet chyikwop ma̱ a̱di̱di̱t a̱ni ntung, á̱ nyia̱ a̱gwai.

Ibriniyawa 9:28

Ma a̱nia wa, Kristi ku neap a̱pyia̱ nggu nang za̱nang a̱ni, a̱ si̱ khwu a̱ka̱nyiung, da̱nian gu ka chi a̱ka̱tuk nyia̱ á̱niet ma̱ a̱di̱di̱t. A̱wot a̱ bu na bwuok a̱ bai a̱ka̱feang ka, da̱nian a̱ ka chi a̱ka̱tuk nyia̱ nzi̱t wu wa bah. Da̱ a̱kwonu a̱kya, a̱ na bai wa a̱ san a̱mgba̱m á̱niet ba, ba̱ swan á̱ fwuong chobai nggu hu a̱ni.

Tyai Á̱zanson 1:7

Nyi li! A̱ chorop ma̱ng á̱ni̱nian shi neet mi̱ kyai tswazwa a̱ chobai! A̱wot konyan na li nggu ma̱ng á̱ghyi, bi̱ri̱ng ma̱ng á̱niet ba̱ ku chyui ngguu ma̱ng zwang a̱ni. A̱wot a̱mgba̱m á̱niet swanta ba, ba̱ na twei ma̱ng byian fwuo da̱nian shi̱ri̱ya nggu ji. A̱tsak a̱lyiat, a̱nia wa ku na ndi! Samba̱rka!