A̱filibiyawa 3:10 - A̠lyiat A̠gwaza na di̠n Tyap: A̠li̠ka̠uli A̠fai

¹⁰ Kyang nang n chat n dyen swak a̱ni, huhwa yet; n dyen Kristi ma̱ a̱pyia̱ nggu ma̱ng chet nang gu ndoot ma̱ng swuan ma̱ á̱niet ba̱ ka̱n kwi a̱ni. N chat n dyen nggu; n bu mun a̱pyia̱ ma̱ng a̱nggu mami swuo a̱bung nggu hu; n bu ntai nggu di̱ si̱sak ji nang gu nkhwu a̱ni.

A̱filibiyawa 3:10 Iomraidhean Croise

Matyu 20:23

Yesu si̱ tak ma̱ng a̱mba nyia̱, “Nyi maai nyi swuo ma̱ a̱kashyi swuo a̱bung nung wu za̱m. A̱mgba̱m ma̱ng a̱nia, nung gwa mbyia̱ a̱wat khai a̱tyu a̱ na swan a̱za yak ku a̱za myian nung ka a̱ni bah! Chuchuk tyok á̱ja, yet si̱ á̱niet nang A̱tyia̱ nung wu ka̱n jhyi a̱ sak mba ndyo wa a̱ni.”

Yoona 10:18

Á̱ mbyia̱ a̱tyu a̱ na san swuan nung ji a̱ ghwon nung a̱ni bah. Nung gwa shim, n na neap swuan nung ji, a̱wot n doot n bu mbwuok ma̱ng a̱nji. Si̱ huni hwa yet kyang hu nang A̱tyia̱ nung wu ta̱m nung n nyia̱ a̱ni.”

Yoona 17:3

“Swuan sang sangba̱p jini ja yet; á̱niet ba ba̱ lyen ang, nang nwan wa ma̱nyin ang ngyet a̱tsatsak A̱gwaza wu, ma̱ng Yesu Kristi, a̱tyo nang a ku nta̱m ndyo mi̱ swanta hu a̱ni.

A̱romawa 8:17

Nang zi̱ ngyet mman A̱gwaza nia a̱ni, zi̱ yet á̱niet ya gado nggu bya. A̱tsak a̱lyiat, zi̱ yet á̱niet ba̱ na ya gado a̱kyenkyai shi A̱gwaza wu dundung ma̱ng Kristi a̱ni. A̱wot ka̱ zi̱ chat zi̱ shya̱ a̱kwonu nzi̱t ma̱ng a̱kyenkyai shi Kristi wu, ku myim zi̱ swuo a̱bung ka ndung ma̱ng a̱nggu.

A̱romawa 8:29

A̱tsak a̱lyiat, A̱gwaza ku mi̱ ndyen tangka̱i á̱niet nang á̱niet nggu ba na yet á̱zanson a̱ni. A̱wot a̱ si̱ mi̱ nkhai mba neet gbangbang ba̱ li nang Nggwon nggu ka a̱ni. Da̱nian Nggwon nggu kikya ka̱ ka yet a̱niet khwop wu mami á̱na̱nyiuk ma̱ a̱di̱di̱t, á̱sam ma̱ng á̱nap.

A̱romawa 8:36

(Ma̱nang A̱lyiat A̱gwaza na nhyia̱ a̱ni, “Da̱nian ang kya, á̱ ni̱ hyaai nzi̱t kuzang jen. Á̱ ni̱ fak zi̱t nang zón seap ja a̱ni.”)

2 A̱korontiyawa 1:10

A̱gwaza wu a̱ ku ti̱n zi̱t ma̱ a̱ka̱tuk a̱khwu wu mi̱ jen ji swak a̱ni, nggu wa bu na ti̱n nzi̱t mi̱ jen jhyang. Nggu wa zi̱ mba̱ng fwuo hu, a̱ na ya a̱son ma̱ng turung nzi̱t hu.

2 A̱korontiyawa 1:5

Mat nang zi̱ nswuo a̱bung ba̱t da̱nian Kristi a̱ni, ma a̱nia wa A̱gwaza ma na nnwuak nzi̱t shyim fwuo gba̱mgbam di̱ mun á̱pyia̱ nzi̱t hu ma̱ng Kristi.

2 A̱korontiyawa 13:4

Ku nang á̱ ku nkpang gu da̱ a̱team a̱khwu di̱ sang chet a̱tyubishyi a̱ni. A̱mgba̱m ma̱ng a̱nia, a̱ shya̱ ma̱ng swuan mat chet A̱gwaza hwa. Nzi̱t meang, zi̱ yet á̱niet sang chet bya, ma̱nang Kristi wu ku nsang chet a̱ni. A̱wot jen nang zi̱ na mbai da̱ a̱vwuo nyin a̱ni, nyi na li nang zi̱ nswuan di̱ mun á̱pyia̱ ma̱ng a̱nggu. A̱wot zi̱ na byia̱ chet A̱gwaza hu.

A̱ga̱la̱tiyawa 2:20

Á̱ ka̱n kpang za̱kwa a̱ka̱tuk nyia̱ nung ji da̱ a̱team a̱khwu ndung ma̱ng Kristi. Ma̱ninika, n swan swat a̱pyia̱ nung hwa bah. A̱wot n swan swat Kristi hwa. A̱wot n swan mi̱ vam mi̱ swanta huni di̱ nwuak fwuo di̱ khwi Nggwon A̱gwaza. Kikya chat nung, ka̱ si̱ nwuak a̱pyia̱ nka da̱nian nung.

A̱ga̱la̱tiyawa 6:17

Doot ma̱nini si̱ nat á̱zanson, a̱yin gu yok tyia̱ nung swuo a̱bung da̱ a̱lyiat nani bah. Mat nung gwa byia̱ nyinyan a̱fi̱fa̱t swuo a̱bung mi̱ vam nung hu. Jija tak kpa̱sai nang n gyet a̱tsak a̱khwo Yesu wa.

A̱fisawa 4:13

Da̱nian a̱mgba̱m nzi̱t, zi̱ ya a̱son zi̱ shya̱ mun á̱pyia̱ di̱ nwuak a̱chuchuk nzi̱t hu. Zi̱ mbeang lyen Yesu a̱ yet Nggwon A̱gwaza ka a̱ni. A̱jawa zi̱ na ngyet a̱yaatat á̱ghyi á̱niet khwi di̱ mun á̱pyia̱ ma̱ng Kristi. A̱wot zi̱ na tai za̱kwa Kristi a̱ yet a̱jhyem ma̱ng a̱tsatsak a̱ni.

A̱filibiyawa 3:8

A̱tsak a̱lyiat, n kyiak kuzang kyang nang n dyin a̱ni, ku yet a̱buk kyang wa; ka̱ n tyan nhu ma̱ng a̱gba̱ndang kpangti̱n nang n shya̱ di̱ lyen Yesu Kristi, A̱tyoli nung wu a̱ni. Da̱nian khwi Kristi hwa, nang n ji̱p kuzang kyang. N si̱ kyiak kuzang kyang nang a̱tong a̱ni, da̱nian n ka nkhwi Kristi mi̱ swat nung hu,

A̱kolosiyawa 1:24

A̱wot ma̱ninika, n gwai n swuo a̱bung da̱ a̱mgba̱m nkyang nang Kristi chat n swuo a̱bung da̱nian nggu a̱ni. A̱wot n gya a̱son ma̱ng swuo a̱bung huni mi̱ vam nung hu, da̱nian n ka beang vam nggu hu; huhwa yet á̱niet khwi nggu ba.

A̱kolosiyawa 2:13

Di̱n jen ji ji̱ swak a̱ni, nyin Nnwap na̱ nwai yet A̱yahudawa a̱ni, nyi ku li nang nkwom a̱ni ma̱ a̱ka̱tuk za̱kwa nyin wu, ma̱ng a̱ka̱tuk nyia̱ nyin wu, neet nang á̱ ka̱n faat á̱ si̱ tyat za̱kwa a̱ka̱tuk nyia̱ nyin ji á̱ ji̱p bah. A̱wot ma̱ninika, A̱gwaza si̱ ta̱ngam nyin ma̱ng swuan dundung ma̱ng Kristi, mat A̱gwaza chi a̱mgba̱m a̱ka̱tuk nyia̱ nzi̱t wu.

A̱kolosiyawa 3:1

A̱wot nyin, nang á̱ ta̱ngam nyin ma̱ng swuan swai dundung ma̱ng Kristi a̱ni, si̱ nyi tyia̱ á̱ghyi nyin ba di̱ nkyang na̱ yet á̱za̱za̱rak na̱ shya̱ Ma A̱gwaza tswazwa, da̱ a̱vwuo nang Kristi nswan a̱zayak Tyok A̱gwaza a̱ni.

1 Bitut 1:3

Yok á̱ dyep A̱gwaza, a̱ yet A̱tyia̱ A̱tyoli nzi̱t wu, Yesu Kristi a̱ni. Mat si̱sak nang gu nfa̱k kunak nzi̱t ba̱t, a̱ si̱ tyia̱ á̱ si̱ bu byin zi̱t a̱ka̱feang, zi̱ si̱ shya̱ swuan swai; mat nang A̱gwaza nta̱ngam Yesu Kristi ma̱ng swuan ma̱ á̱niet ba̱ ka̱n kwi a̱ni. Si̱ huni nwuak zi̱t chet tyia̱ fwuo ku yet a̱chet a̱ni.

2 Bitut 1:13

A̱wot ku yet a̱sham, ki̱ n ni̱ shya̱ ma̱ng swuan, n gya a̱son ma̱ng jhyung nyin.

1 Yoona 2:3

Ki̱ zi̱ khwi doka A̱gwaza ji, a̱ni wa zi̱ na nnwuak a̱chuchuk nang zi̱ ndyen nggu.

1 Yoona 2:5

A̱wot á̱niet ba ba̱ khwi a̱lyiat A̱gwaza na a̱ni, chat A̱gwaza mba hu tak kpa̱sai si̱sak nang ba̱ nchat gu a̱tsatsak chat a̱ni. Si̱sak ji nang zi̱ na ndyen nang zi̱ nshya̱ ndung ma̱ng A̱gwaza a̱ni, jija yet:

Tyai Á̱zanson 1:18

Nung gwa ngyet a̱tyu a̱ swuan a̱ni. N ka̱n khwu, a̱wot ma̱ninika, n shya̱ ma̱ng swuan, si̱ nat sang sangba̱p! N byia̱ tyok tazwa A̱khwu ma̱ng A̱bi, ka̱ yet a̱vwuo nswat á̱niet ba̱ ka̱n kwi a̱ni.