A̱filibiyawa 2:3 - A̠lyiat A̠gwaza na di̠n Tyap: A̠li̠ka̠uli A̠fai

³ Nyi yok chat á̱pyia̱ nyi kyiak nang nyi ndan á̱ghyang á̱niet bah. Nyi bu yok nyia̱ mi̱ ta̱m nang nyin ma̱ng á̱ghyang á̱niet na ntam wa a̱ni bah. Da̱ a̱kwonu a̱kya, nyi ni̱ nghyuai á̱pyia̱ nyin, a̱wot konyan a̱ kyiak nang á̱ghyang á̱niet ndan nggu.

A̱filibiyawa 2:3 Iomraidhean Croise

Luka 18:14

N hyia̱ ma̱ng a̱nyin, a̱tyu saai kurum ga̱ndu wuni a̱ yet a̱tyu a̱ka̱tuk nyia̱ wu a̱ni; nggu wa nang A̱gwaza kyiak a̱ yet a̱tsotswat a̱zaghyi nggu, a̱ sii bwuok a̱ nat a̱mali; a̱wot kang ma̱ng a̱tyu A̱fa̱risawa wu. Mat a̱nia, a̱tyu a̱ nwuak a̱pyia̱ nggu shi a̱ni, á̱ na ghyuai shi nggu hu. A̱wot a̱tyu a̱ ghyuai a̱pyia̱ nggu a̱ni, á̱ na nwuak gu shi.”

A̱romawa 12:10

Nyi chat á̱ghyang nyin ma̱ng fwuo nyiung nang á̱na̱nyiuk mi̱ khwi Kristi a̱ni. A̱wot nyi fwuong di̱dang di̱ nwuat á̱ghyang nyin shi swak á̱pyia̱ nyin.

A̱romawa 13:13

Mat nang zi̱ ngyet á̱niet zi̱ swan mi̱ sai hwa ba̱ nwai swan mi̱n dyin a̱ni, ku yet ta hwa zi̱ swan a̱tan swat, da̱nian a̱mgba̱m á̱niet ba ba̱ ka li tangka̱i swat nzi̱t hu. Nyi yok mun á̱pyia̱ ma̱ng á̱niet ba̱ swan mi̱ ndyin a̱ni bah. Ntangka̱i á̱niet nani nia yet; á̱niet tsot wun, á̱niet hyeng a̱kan, ku á̱niet katnaan ma̱ng á̱niet a̱shi̱shi̱k nyia̱ nang a̱ka̱la̱m a̱ni, ku á̱niet fwuon zok ma̱ng kwi swam ma̱ng á̱ghyang.

A̱romawa 2:8

Ma a̱nia wa, á̱niet chat á̱pyia̱, á̱niet lak khwi a̱tsak a̱lyiat, ma̱ng á̱niet ba̱ swan swat a̱ka̱tuk nyia̱ a̱ni; A̱gwaza na fa̱k a̱lyia̱ ya ma̱ng a̱mba ba̱t. A̱wot a̱ tak ba mwai lyen nggu hu kpa̱sai.

1 A̱korontiyawa 15:9

Mat, nung gwa ngyet a̱tsak a̱bada̱dei wu mami a̱mgba̱m a̱yaata̱m Yesu ba. N maai á̱ yei nung a̱ta̱m Yesu bah, mat n ku ya̱shuk á̱niet khwi Yesu ba, n si̱ nyia̱ mba a̱ka̱kpa̱t.

1 A̱korontiyawa 3:3

Mat ba̱ng ba̱ tat a̱fwun, za̱kwa a̱ka̱tuk nyia̱ nyin ji ni̱ nyia̱ tyok da̱ nyin. Ka̱ nyi kwi swam á̱ghyang, nyi si̱ bu ya fwuang ma̱ng á̱ghyang nyin; si̱ huni tak nang za̱kwa a̱ka̱tuk nyia̱ nyin ji nnyia̱ tyok da̱ nyin baa? Nyi si̱ bu swan nang á̱niet swanta bya a̱ni baa?

2 A̱korontiyawa 12:20

Mat n fwuong a̱wun, shimba ki̱ n bu mbai, n na nchat nkyang na nyi nyia̱ a̱ni bah. A̱wot nyin, nyi na fa̱k nyinyang nung di̱ si̱sak ji nang n na nnwuak nyin shim a̱ni bah. N fwuong a̱wun, ki̱ n mbai, n na shya̱ nang nyi fwuon zook ma̱ng á̱ghyang nyin, kwi swam, mwuat ndyen, chat a̱pyia̱, tyam á̱ghyang, a̱chyuang, gba̱p a̱pyia̱, mbeang nwai swat nyinyang.

A̱ga̱la̱tiyawa 5:15

A̱wot ka̱ nyi nywai á̱ghyang bu tsa mbwoi á̱ghyang nyin kun nang a̱ka̱bwu a̱yit a̱ni, nyi ta̱bam! Kalak a̱mgba̱m nyin, nyi na tyak ma̱ng á̱ghyang nyin!

A̱ga̱la̱tiyawa 5:26

Zi̱ yok yet á̱niet gba̱p a̱pyia̱, ku zi̱ tsaai jhya̱ ma̱ng kwi swam da̱ á̱ghyang nzi̱t bah.

A̱fisawa 4:2

Kuzang jen, nyi ni̱ ghyuai á̱pyia̱ nyin. Nyi yet á̱niet nyia̱ shonshyon, nyi bu yet á̱niet nyap nfwuo ma̱ng á̱ghyang. Nyi yok ba̱ng á̱ghyang mi̱ nfwuo mat a̱bun nang nyi bwuo á̱ghyang nyin dyo a̱ni bah, mat nyi chat á̱ghyang nyin bya.

A̱fisawa 5:21

Nyi ni̱ nwuak á̱ghyang pyipyia̱ nyin, mat nang nyi fwuong a̱wun Kristi a̱ni.

A̱filibiyawa 2:14

Kuzang ta̱m hwa nang nyi na nyia̱, nyi ni̱ ngyok kwop a̱dyii̱ng ma̱ng ya fwuang bah.

A̱kolosiyawa 3:12

Mat a̱nia, nang A̱gwaza nkhai nyin nyi yet á̱za̱za̱rak á̱niet nang gu chat a̱ni, ku yet ta hwa nyi ni̱ kup á̱pyia̱ nyin ma̱ng ntangka̱i za̱kwá nani nang nyi ni̱ nkup a̱yaatoot a̱fai a̱ni, ni̱nia yet: Nyi fwuong kunak á̱ghyang, nyi nyia̱ á̱niet shok, nyi yet á̱niet nyia̱ shonshyon, nyi yet á̱niet ghyuai a̱pyia̱, a̱wot nyi bu ni̱ ngyet á̱niet nyap nfwuo.

A̱kolosiyawa 3:8

A̱wot ma̱ninika, ku yet ta hwa nyi ghwon nyia̱ ntangka̱i nkyang nani; nyi ji̱p a̱ka̱tuk mwai lyen ma̱ng á̱ghyang, vwuot lyen, lak li á̱ghyang, tyam á̱ghyang, ma̱ng a̱lyiat sang nsum na̱ ghwut mi̱ nunu nyin hu a̱ni.

1 Timoti 6:4

Tangka̱i a̱tyu tyiet a̱hwa yet a̱tyu a̱dung a̱pyia̱ wa. A̱ lyen kyang bah. A̱ yet a̱tyu la̱u a̱di̱di̱t chat fwuang, ma̱ng zok tazwa swáng a̱lyiat. Tyiet nggu hu chong ma̱ng ya fwuang, si̱ kwi swam, ghai di̱ susot, tyam á̱ghyang, ma̱ng bat á̱niet a̱ka̱tuk nyia̱.

1 Bitut 3:8

Di̱ ngaan hu, yok a̱di̱dam nyin wu a̱ yet a̱nyiung. Nyi fa̱k kunak á̱ghyang. Nyi chat á̱ghyang nyin nang á̱na̱nyiuk a̱ni. Nyi byia̱ fwuo beang á̱ghyang. Nyi yok nyia̱ gba̱p a̱pyia̱ bah.

1 Bitut 5:5

Ma a̱nia wa, nyin nfi̱ng á̱niet na, ku yet ta hwa nyi khwi tyok á̱niet khwop á̱niet hu. A̱wot a̱mgba̱m nyin, nyi beang á̱ghyang kuzang jen. Nyi yok nyia̱ gba̱p a̱pyia̱ bah, ma̱nang á̱ ndyuut ma̱ A̱lyiat A̱gwaza na a̱ni, nyia̱, “A̱gwaza lak gba̱p a̱pyia̱ á̱nietbishyi. A̱wot a̱ si̱ fa̱k shok á̱niet ba̱ ghyuai pyipyia̱ mba da̱ a̱vwuo nggu a̱ni.”