A̱filibiyawa 2:16 - A̠lyiat A̠gwaza na di̠n Tyap: A̠li̠ka̠uli A̠fai

¹⁶ Nyi ba̱ng a̱lyiat na̱ nwuat swuan a̱ni gi̱ngi̱ng, da̱nian a̱tuk ka nang Kristi na mbwuok a̱ bai a̱ni, n ka ntam n bu ndyen nang n tyong a̱buk chung da̱ a̱vwuo nyin bah. A̱wot n ka ntam nang ta̱m nung hu ngyet á̱buk nta̱m wa mami nyin bah.

A̱filibiyawa 2:16 Iomraidhean Croise

Matyu 10:27

Tyiet hu nang n tyiet nyin ma̱nini ma̱nyin nyin a̱ni, nyi tyiet á̱ghyang á̱niet hu kpa̱sai. A̱wot a̱lyiat nang n chyuang nyin ndyo ma̱ a̱fufwuo nyin ba a̱ni, nyi nyeak yong tazwa nyuo, nyi shei na kpa̱sai mat konyan a̱ fa̱a̱k!

Luka 12:8

“Mat a̱nia, n tak nyin a̱tsak a̱lyiat, konyan wa shim, a̱ si̱ tak ma̱ng á̱ghyang á̱niet kpa̱sai mi̱ swanta huni nang gu ngyet a̱tyu khwi nung wa; nung Nggwon A̱tyubishyi meang, n na ntak gu kpa̱sai a̱zaghyi a̱yaata̱m tswá A̱gwaza ba.

Yoona 6:63

A̱za̱za̱rak Ntswa wa nwuat swuan ji. Chet vam a̱tyubishyi yet kyang bah. Swáng A̱lyiat nang n dyiat ma̱ng a̱nyin a̱ni, ji ja neet da̱ a̱vwuo A̱za̱za̱rak Ntswa ka. A̱wot ji̱ si̱ nwuat swuan.

Yoona 6:68

Bitut si̱ nwuak gu shim nyia̱, “A̱tyoli, da̱ a̱vwuo a̱nyan kya zi̱ na nnat? Nwan wa byia̱ á̱lyiat na̱ nwuat swuan sang sangba̱p a̱ni.

Nta̱m A̱yaata̱m 13:26

“Á̱na̱nyiuk nung ba, nyin nyi yet á̱ka̱mbwon Ibrahim na a̱ni, ma̱ng a̱nyin Nwap na̱ nwai yet A̱yahudawa nyi fwuong a̱wun A̱gwaza a̱ni; nzi̱t bya nang á̱ ta̱m ma̱ng a̱nzi̱t á̱lyiat nswuan sang sangba̱p nani!

1 A̱korontiyawa 1:8

A̱ na tyia̱ nyin nyi yong mi̱ chet nang á̱niet khwi a̱ni si̱ nat sangba̱p. Da̱nian nyi ka yet á̱niet sang a̱bun a̱tuk nang Yesu Kristi A̱tyoli nzi̱t wu na mbwuok a̱ bai a̱ni.

1 A̱korontiyawa 9:26

Mat a̱nia, a̱tai chung wa nang n tyong bah. A̱wot a̱yaat ka nang n kwan a̱ni, ka̱ yet a̱si̱ tuu wun kya ma̱ tai bah.

2 A̱korontiyawa 1:14

ku nang nyi nwai fi̱k zi̱t ma̱nini a̱ni. A̱wot a̱tuk ka nang A̱tyoli Yesu na mbwuok a̱ bai a̱ni, nyi na tam da̱ nzi̱t ma̱nang nzi̱t meang ntam da̱ nyin a̱ni.

A̱ga̱la̱tiyawa 2:2

N ku nat Urusha̱lima hu, mat A̱gwaza wa ma̱ a̱pyia̱ nggu ku tyai nyia̱, n nat. Jen nang n shya̱ a̱ja a̱ni, á̱ si̱ yorong a̱yaakwak a̱son sot á̱niet khwi Urusha̱lima ba, da̱ a̱gbang a̱nyiung, n si̱ nyia̱ a̱tung ma̱ng a̱mba. A̱wot n si̱ tat mba á̱ghyi tazwa A̱sham Nkhang nang n shei Nnwap na̱ nwai yet A̱yahudawa a̱ni. N ku nchat n di nang á̱ shim a̱lyiat nung na. Kalak ta̱m shei A̱sham Nkhang hu nang n ka̱n nyia̱ di̱n jen ji swak a̱ni, ma̱ng si̱ hu nang n nyia̱ ma̱nini a̱ni, ku yet a̱buk kyang.

A̱ga̱la̱tiyawa 4:11

Si̱ a̱hwa tyia̱ n byia̱ a̱fi̱fa tazwa nyin! Ku li á ngyei n byian a̱pyia̱ nung kya jen nang n tang a̱lahyia̱ di̱ nyia̱ nta̱m ma̱ng a̱nyin a̱ni!

A̱filibiyawa 1:10

Mat a̱nia, n chat nyi fi̱k kyang hu ku swak mi̱ yet a̱tan a̱ni, da̱nian nyi ka swan a̱za̱za̱rak nswat ma̱ng sang a̱bun si̱ nat a̱tuk bwuok bai Kristi Yesu ka.

A̱filibiyawa 1:6

A̱wot n nwuak a̱chuchuk, A̱gwaza a̱ tsa a̱ta̱n ta̱m mami nfwuo nyin na a̱ni, a̱ na ya a̱son ma̱ng ta̱m nggu hu, si̱ nang gu tyak hu a̱tuk nang Kristi Yesu na mbwuok a̱ bai a̱ni.

1 A̱ta̱solonikawa 2:19

Yihwa yet kyang tyia̱ fwuo nzi̱t hu, ku a̱gwai, ku zang nzi̱t ji, nang zi̱ bye ntam a̱zaghyi A̱tyoli Yesu a̱tuk bwuok nggu ka? Mee nyin byaa?

1 A̱ta̱solonikawa 3:5

Mat nang gbang a̱lyia̱ hu ku nkaat nung a̱ni, n si̱ ta̱m Timoti da̱ a̱vwuo nyin n ka ndyen nwuak fwuo nyin hu di̱ Yesu. N ku nfa̱k a̱wun kee A̱ta̱nyeang ka, ka̱ yet a̱tyu mai á̱niet a̱ni, ka̱ mak nyin, nyi si̱ kwa, a̱wot a̱mgba̱m ta̱m zi̱ ka̱n nyia̱ da̱ nyin a̱ni, ku tyia̱ a̱buk kyang.

Ibriniyawa 4:12

Mat A̱lyiat A̱gwaza na yet a̱chet. A̱wot na̱ si̱ byia̱ chet ba̱t. Na̱ ya á̱ lan tswat ji̱ byia̱ nunu feang ji̱ si̱ ya ba̱t a̱ni, na̱ ni̱ kai á̱ nwuo a̱ka̱wa̱tyia̱ swuan ma̱ng tswa, ma̱ng nkap vam, ma̱ng fwu hu. Na̱ zop a̱di̱dam mi̱ fwuo nzi̱t wu, ma̱ng kyang hu zi̱ chat a̱ni, na̱ ghwut ndyo kpa̱sai.

1 Bitut 1:23

Mat á̱ byin nyin a̱ka̱feang neet Ma A̱gwaza tswazwa. Á̱ si̱ nang nyin swuan swai, ji̱ na nwai tyak a̱ni. Swuan swai jini byia̱ sangba̱p bah, mat ji̱ neet mami a̱lyiat A̱gwaza na̱ yet a̱chet na̱ sang sangba̱p a̱ni.

1 Yoona 1:1

Zi̱ shei nyin nkhang tazwa A̱tyu a̱ yet A̱lyiat Nswuan a̱ nshya̱ neet gbangbang a̱ni. Nggu wa nang zi̱ fa̱k, zi̱ si̱ bu li nggu ma̱ng a̱ghyi nzi̱t ba. Zi̱ si̱ bu byiam nggu ma̱ng mbwak nzi̱t na a̱ni.

Tyai Á̱zanson 22:17

A̱za̱za̱rak Ntswa wu ma̱ng Nggwon neam naat nyeang ka si̱ nyia̱, “Yesu bai!” Konyan wa fa̱k a̱ni, yok gu nyia̱, “Yesu bai!” Yok a̱mgba̱m á̱niet ba̱ fwuong mashyi a̱sa̱khwot a̱ni, ba̱ bai! Yok á̱niet ba̱ chat swuo a̱sa̱khwot nswuan a̱ni, ba̱ bai ba̱ swuo di̱ mi̱n tan zang!