A̱filibiyawa 2:14 - A̠lyiat A̠gwaza na di̠n Tyap: A̠li̠ka̠uli A̠fai

¹⁴ Kuzang ta̱m hwa nang nyi na nyia̱, nyi ni̱ ngyok kwop a̱dyii̱ng ma̱ng ya fwuang bah.

A̱filibiyawa 2:14 Iomraidhean Croise

Matyu 20:11

“Nang ba̱ nsan kurum mba hu a̱ni, ba̱ si̱ nwuo kwop a̱dyii̱ng ma̱ng a̱tyu byia̱ a̱byin wu.

Ma̱rkut 14:5

Ku myim da̱ á̱ lyap na di̱ kurum ta̱m a̱yin ku bai a̱lyia̱ nyiung a̱ni! A̱wot á̱ ka̱u á̱kunak kurum hu!” Ba̱ si̱ ngai ma̱ng a̱byii̱k a̱wa ba̱t.

Ma̱rkut 9:14

Nang Yesu ma̱ng mman ta̱m a̱tat nggu na mbai da̱ a̱vwuo á̱kum mman ta̱m ka a̱ni; ba̱ si̱ li á̱kpa á̱niet ma̱ a̱di̱di̱t tyong mba á̱ keang nang a̱cha̱chet á̱niet tyiet doka ba shya̱ di̱ ya fwuang ma̱ng a̱mba.

Luka 5:30

A̱wot A̱fa̱risawa ba ma̱ng a̱yaagwak tyiet doka A̱gwaza ba si̱ kwop a̱dyii̱ng ma̱ng byian fwuo da̱ a̱vwuo mman ta̱m Yesu na nyia̱, “Yihwa mbyia̱ nyi ngya tsa nswuo ma̱ng á̱niet saai kurum ga̱ndu, mbeang á̱niet a̱ka̱tuk nyia̱ á̱ghyang?”

Nta̱m A̱yaata̱m 15:2

Bulut ma̱ng Ba̱nabat si̱ shim mba ndyo bah. Ba̱ si̱ ya fwuang ba̱t ma̱ng á̱ghyang! Di̱ ngaan hu, sot á̱niet khwi ji si̱ shim ba̱ ta̱m Bulut ma̱ng Ba̱nabat mbeang á̱niet khwi á̱ghyang, ba̱ nat Urusha̱lima da̱nian ba̱ ka lyiat ma̱ng a̱yaata̱m ba ma̱ng á̱khwukhwop a̱yaakwak a̱son á̱ghyang ba tazwa a̱lyiat tyei Nnwap na̱ nwai yet A̱yahudawa a̱ni mi̱ chen.

Nta̱m A̱yaata̱m 15:39

Si̱ a̱hwa si̱ tyia̱ Bulut ma̱ng Ba̱nabat fwuang ji̱ byia̱ chet a̱ni. Ba̱ si̱ ghai a̱chyet ka. Ba̱nabat si̱ kyiak Yoona Ma̱rkut, ba̱ si̱ nwuo kukwon a̱wak. Ba̱ si̱ wak, ba̱ si̱ byia̱k á̱ nat Kuburut.

Nta̱m A̱yaata̱m 15:7

Nang á̱ nkyiak a̱junjung jen nang á̱ lyiat a̱jojoot á̱lyiat ma̱ a̱tung ka a̱ni, Bitut si̱ doot a̱ yong. A̱ si̱ nyia̱ ma̱ng a̱mba, “Nyin á̱na̱nyiuk nung mba, neet gbangbang nyi lyen nang A̱gwaza ku nkhai nung mami nyin, mat n ka shei A̱sham Nkhang Yesu ka da̱ a̱vwuo Nnwap na̱ nwai yet A̱yahudawa a̱ni; ba̱ ka fa̱k, ba̱ bu nwuak fwuo di̱ Yesu.

Nta̱m A̱yaata̱m 6:1

A̱wot nang sot á̱niet khwi ji mban á̱kpa ka ma a̱nggang mat nang á̱niet a̱fai nnwuai khwi A̱tyoli Yesu a̱ni; a̱jawa nang A̱yahudawa ba ba̱ ku fwuong a̱lyem A̱helenawa ka a̱ni, si̱ nwuo kwop a̱dyii̱ng di̱ si̱sak nang A̱yahudawa ba ba̱ fwuong a̱lyem A̱ra̱mik ka, ndak ka̱u á̱nyiuk mba ba nang á̱tyok ba ka̱n kwi a̱ni nkyayak kuzang a̱tuk.

A̱romawa 12:18

Nyi kwan nyi nyia̱ a̱mgba̱m kuzang kyang ku na tyia̱ nyin swat nyinyang ma̱ng konyan a̱ni.

A̱romawa 14:1

Á̱niet khwi ba̱ but mi̱ fwuo ku Kristi shim mba ndyo ba̱ nyia̱ nkyang njhyang a̱ni, nyi san mbaa. A̱wot nyi yok ya fwuang ma̱ng a̱mba di̱ kyang nang ba̱ dam ku yet a̱tan ku hu yet a̱ka̱tuk a̱ni bah.

A̱romawa 16:17

A̱wot ma̱ninika, á̱niet khwi Yesu ba nang n chat a̱ni, kyang nyiung hwa nang n chat n bu naai nyin. Nyi cham, nyi bu ta̱bam ma̱ng á̱niet ba̱ tyei nang nyi nghai pyipyia̱ nyin di̱ susot a̱ni. A̱wot ba̱ si̱ bu chat ba̱ tyia̱ nyin á̱ga̱u di̱ nwuak fwuo nyin hu di̱ Yesu. Mat tyiet mba hu ku vwuon ma̱ng si̱ nang á̱ ka̱n tyiet nyin a̱ni. Nyi yok khwi mba bah.

1 A̱korontiyawa 10:10

A̱wot zi̱ yok kwop a̱dyii̱ng, ma̱nang á̱ghyang á̱niet ma̱ a̱mba ku nnyia̱ a̱ni bah. A̱wot a̱ta̱m tswa hyaai á̱niet, si̱ hyaai mbaa.

2 A̱korontiyawa 12:20

Mat n fwuong a̱wun, shimba ki̱ n bu mbai, n na nchat nkyang na nyi nyia̱ a̱ni bah. A̱wot nyin, nyi na fa̱k nyinyang nung di̱ si̱sak ji nang n na nnwuak nyin shim a̱ni bah. N fwuong a̱wun, ki̱ n mbai, n na shya̱ nang nyi fwuon zook ma̱ng á̱ghyang nyin, kwi swam, mwuat ndyen, chat a̱pyia̱, tyam á̱ghyang, a̱chyuang, gba̱p a̱pyia̱, mbeang nwai swat nyinyang.

A̱ga̱la̱tiyawa 5:15

A̱wot ka̱ nyi nywai á̱ghyang bu tsa mbwoi á̱ghyang nyin kun nang a̱ka̱bwu a̱yit a̱ni, nyi ta̱bam! Kalak a̱mgba̱m nyin, nyi na tyak ma̱ng á̱ghyang nyin!

A̱ga̱la̱tiyawa 5:26

Zi̱ yok yet á̱niet gba̱p a̱pyia̱, ku zi̱ tsaai jhya̱ ma̱ng kwi swam da̱ á̱ghyang nzi̱t bah.

A̱filibiyawa 2:3

Nyi yok chat á̱pyia̱ nyi kyiak nang nyi ndan á̱ghyang á̱niet bah. Nyi bu yok nyia̱ mi̱ ta̱m nang nyin ma̱ng á̱ghyang á̱niet na ntam wa a̱ni bah. Da̱ a̱kwonu a̱kya, nyi ni̱ nghyuai á̱pyia̱ nyin, a̱wot konyan a̱ kyiak nang á̱ghyang á̱niet ndan nggu.

1 A̱ta̱solonikawa 5:13

Nyi nwuak ba a̱tsatsak shi, nyi bu chat ba, mat ta̱m hu nang ba̱ nyia̱ da̱nian nyin a̱ni. A̱wot nyi swan swat nyinyang ma̱ng á̱ghyang nyin.

1 A̱ta̱solonikawa 5:15

Nyi kwan nyi li nang a̱yin ma̱ nyin tan a̱ka̱tuk ma̱ng a̱ka̱tuk bah. Da̱ a̱kwonu a̱kya, nyi kwan nyi nyia̱ á̱ghyang nyin ma̱ng kuzang a̱yin a̱tan nta̱m.

Ibriniyawa 12:14

Nyi kwan ba̱t, nyi li nang nyi swan swat nyinyang ma̱ng konyan. A̱wot nyi bu kwan nyi swan a̱za̱za̱rak nswat. Mat á̱ mbyia̱ a̱tyu a̱ na li A̱gwaza a̱ni bah, si̱ nang gu yet a̱za̱za̱rak.

Yakubu 1:20

Mat, mwai lyen a̱tyubishyi tyei tsotswat A̱gwaza hu ya a̱son bah.

Yakubu 3:14

A̱wot ka̱ nyi nyia̱ na̱nvan ma̱ng á̱ghyang, nyi si̱ kwi swam á̱ghyang, nyi si̱ byia̱ chat a̱pyia̱ di̱ kyiak nang nyi ndan á̱ghyang á̱niet a̱ni. Ka̱ a̱nia wa, nyi yok fwuo a̱chuchuk wu di̱ tam nyia̱ nyi byia̱ mumwang bah.

Yakubu 5:9

Nyin á̱niet khwi Yesu ba, nyi yok kwop a̱dyii̱ng tazwa á̱ghyang nyin bah, kalak á̱ na nyia̱ nyin shi̱ri̱ya. Mat, di a̱tyu shi̱ri̱ya wu wa yong a̱zanunyuo!

1 Bitut 3:11

Yok a̱ka̱kpa̱t, a̱wot a nyia̱ a̱tan nta̱m. Chat swat nyinyang ma̱ng á̱ghyang ang. A̱wot a bu kwan a ba̱ng a̱nia.

1 Bitut 4:9

Nyi ni̱ nsan á̱nietchen mbwak feang ma̱ a̱ka̱sa nyin na di̱ mi̱ kwop a̱dyii̱ng. Nyi nang ba kyayak ma̱ng a̱vwuo kwai.

Yahuda 1:16

Tangka̱i á̱niet tyiet a̱ka̱laa bani yet á̱niet kwop a̱dyii̱ng bya ma̱ng tyei á̱ghyang á̱niet a̱bun. Ba̱ ni̱ swan swat khwi di̱dang shyuo vam nang nfwuo mba na chat wa a̱ni. Ba̱ ni̱ tam tazwa á̱pyia̱ mba. Ba̱ ni̱ laai á̱ghyang á̱niet ma̱ng lyen a̱nu, da̱nian ba̱ ka shya̱ kyang ba̱ chat a̱ni.