A̱filibiyawa 2:1 - A̠lyiat A̠gwaza na di̠n Tyap: A̠li̠ka̠uli A̠fai

¹ Mun á̱pyia̱ nyin hu ma̱ng Kristi tyia̱ nyin gba̱gbak. A̱wot nyi byia̱ shyim fwuo nang Kristi nchat nyin a̱ni. Nyi byia̱ mun á̱pyia̱ ndung mami A̱za̱za̱rak Ntswa. A̱wot nyi chat á̱ghyang bu tsa fwuong kunak á̱ghyang.

A̱filibiyawa 2:1 Iomraidhean Croise

Luka 2:25

A̱ghyang a̱niet ku nshya̱ mi̱ Urusha̱lima di̱n jen a̱ja. Á̱ si̱ ngyei nggu Simiyon. A̱ ku nyia̱ tsotswat. A̱ si̱ bu yet a̱tyu fwuong a̱wun A̱gwaza ba̱t. A̱ si̱ fwuong jen ji nang Kristi na nsan á̱niet Isi̱rela ba a̱ni. A̱wot A̱za̱za̱rak Ntswa wu si̱ shya̱ da̱ nggu.

Yoona 14:18

“N na ghwon nyin ma̱nyin nyin nang á̱kunak a̱ni bah. N na mbwuok mbai da̱ a̱vwuo nyin.

Yoona 14:27

“N nang nyin swat nyinyang; swat nyinyang nung huhwa nang n nwuak nyin. N nwuat nyin huu nang swanta hu nnwuat a̱ni bah. Mat a̱nia, nyi yok byia̱ a̱ka̱tuk a̱fi̱fa, ku nyi bu fa̱k a̱wun bah.

Yoona 17:13

“Ma̱ninika n chobai da̱ a̱vwuo ang. A̱wot n tak ma̱ng a̱mba nkyang nani neet nang n ni̱ shya̱ mi̱ swanta hu. Da̱nian á̱niet khwi nung ba, ba̱ ka shya̱ a̱jhyem a̱gwai nung wu mi̱ nfwuo mba na.

Nta̱m A̱yaata̱m 2:46

Kuzang a̱tuk ba̱ ku tung mi̱ didyaat A̱li Nwuat Za̱nang A̱gwaza hu. Ba̱ si̱ bu tung á̱ ya nkyayak ma̱ a̱ka̱sa á̱ghyang ma̱ng ya kyayak a̱di̱dam a̱khwu Yesu ma̱ng a̱lyia̱ sai, ma̱ng fwuo nyiung,

Nta̱m A̱yaata̱m 4:32

A̱mgba̱m sot á̱niet khwi Yesu ji ku byia̱ a̱nu a̱nyiung ma̱ng fwuo nyiung. Á̱ si̱ mbyia̱ a̱tyo nyiung ma̱ mba a̱ ku kyiak zwá nang gu byia̱ a̱ni; ji̱ yet si̱ nggu ja ma̱nyin nggu bah. Mat a̱nia, ba̱ si̱ ka̱u a̱mgba̱m zwá nang ba̱ byia̱ a̱ni dundung.

A̱romawa 5:5

A̱wot ki̱ zi̱ ntyia̱ fwuo hu a̱ni, zi̱ si̱ mi̱n swuo nsum bah, ku ma̱ chunchwiit. Zi̱ fi̱k si̱sak nang A̱gwaza nchat zi̱t a̱ni ba̱t, mat a̱ ka̱n nang nzi̱t A̱za̱za̱rak Ntswa wu, da̱nian gu ka swan mi̱ nfwuo nzi̱t na gba̱mgbam.

A̱romawa 8:26

A̱wot A̱za̱za̱rak Ntswa wu ni̱ beang nzi̱t mami lat zi̱t hu. Kidee, zi̱ lyen si̱sak ji nang ku mmyim zi̱ naai A̱gwaza a̱ni bah. A̱wot A̱za̱za̱rak Ntswa wu wa ni̱ naai A̱gwaza da̱nian nzi̱t ma̱ng tu a̱nwurung, da̱nang á̱ si̱ mi̱n tyai ma̱ng swáng a̱lyiat a̱ni bah.

1 A̱korontiyawa 12:13

Á̱niet khwi á̱ghyang ma̱ nzi̱t yet A̱yahudawa bya. Á̱ghyang á̱niet si̱ yet Nnwap na̱ nwai yet A̱yahudawa a̱ni. Á̱ghyang si̱ yet á̱khwo bya. Á̱ghyang si̱ yet mman a̱li nia. A̱wot A̱za̱za̱rak Ntswa wu wa nyia̱ a̱mgba̱m nzi̱t ba̱ptisman ji, zi̱ si̱ yet vam nyiung. A̱wot a̱mgba̱m nzi̱t, zi̱ byia̱ A̱za̱za̱rak Ntswa a̱nyiung wa.

1 A̱korontiyawa 15:31

Nyin á̱niet khwi Yesu ba nang n chat a̱ni, ma̱nang n tam di̱ kyang nang Kristi Yesu A̱tyoli nzi̱t wu nyia̱ nyin dyo a̱ni; ma a̱nia wa, a̱tsak a̱lyiat n shyi, n nwuan a̱khwu kuzang a̱tuk.

1 A̱korontiyawa 3:16

Nyi lyen nang nyi ngyet A̱li Nwuat Za̱nang A̱gwaza kyaa? A̱wot A̱za̱za̱rak Ntswa A̱gwaza wu si̱ shya̱ ma̱ nyin a?

2 A̱korontiyawa 13:14

Yok shok A̱tyoli Yesu Kristi ji, ma̱ng chat A̱gwaza hu, ma̱ng mun á̱pyia̱ A̱za̱za̱rak Ntswa hu, ba̱ shya̱ dundung ma̱ng a̱nyin a̱mgba̱m.

2 A̱korontiyawa 2:14

A̱wot zi̱ gwai A̱gwaza! A̱ tyia̱ zi̱ si̱ yet a̱khwo Yesu, a̱wot Yesu wa yet a̱gwam nzwang a̱ kwak nzi̱t a̱son di̱ ta lang swuo chet nggu hu. Ma̱ninika, a̱ tyei nzi̱t zi̱ shei A̱lyiat nggu na kuzang a̱vwuo; ma̱nang á̱ ni̱ nfwui a̱myia̱ na̱ byia̱ swam nyinyang di̱n jen ta lang, konyan a̱ fa̱k swam hu a̱ni.

A̱ga̱la̱tiyawa 4:6

Mat nang nyin ma̱ng a̱nzi̱t ngyet mman nia a̱ni, A̱gwaza si̱ ta̱m ma̱ng A̱za̱za̱rak Ntswa Nggwon nggu wu mi̱ nfwuo nzi̱t na. Nggu wa tyei nang zi̱ ngyei A̱gwaza, “Abba, A̱tyia̱!”

A̱ga̱la̱tiyawa 5:22

A̱wot ntangka̱i za̱kwá nang A̱za̱za̱rak Ntswa wu nnwuat a̱ni, jija yet, chat á̱ghyang, fwuo sai, swat nyinyang, nyap fwuo, fwuong kunak, yet a̱tan, yet a̱tsotswat,

A̱fisawa 4:4

Mat zi̱ yet vam nyiung hwa, zi̱ si̱ byia̱ A̱za̱za̱rak Ntswa a̱nyiung. Ma a̱nia wa, a̱mgba̱m zi̱t, zi̱ byia̱ tyia̱ fwuo nyiung nang A̱gwaza nyia̱ nzi̱t a̱li̱ka̱uli di̱n jen nang gu ku ngyorong nzi̱t a̱ni.

A̱filibiyawa 1:8

A̱gwaza lyen si̱sak nang n chat nyin n si̱ bu nfa̱k da̱ nyin a̱ni ba̱t, ma̱nang Kristi Yesu nchat nyin a̱ni.

A̱filibiyawa 3:3

Mat nzi̱t á̱niet zi̱ dyep A̱gwaza mami A̱za̱za̱rak Ntswa a̱ni, nzi̱t bya yet á̱tsatsak á̱niet A̱gwaza nang á̱ tyei mi̱ chen mami fwuo a̱ni. Zi̱ ta̱yuk di̱ nta̱m nang Kristi Yesu nyia̱ nzi̱t ndyo wa a̱ni. Da̱ nzi̱t, zi̱ tyia̱ fwuo di̱ nta̱m vam a̱tyubishyi bah.

A̱kolosiyawa 2:2

N chat n tyia̱ mba gba̱gbak, da̱nian ba̱ ka mun á̱pyia̱ ma̱ng á̱ghyang mami a̱tsatsak chat á̱ghyang. N chat ba̱ byia̱ a̱jhyem a̱gwai ma̱ng nwuak a̱chuchuk nang á̱ shyat da̱ a̱tsatsak lyen a̱ni. Da̱nian ba̱ ka fi̱k la̱p sak A̱gwaza ku shya̱ di̱ niat a̱ni; huhwa yet Kristi ma̱ a̱pyia̱ nggu.

A̱kolosiyawa 3:12

Mat a̱nia, nang A̱gwaza nkhai nyin nyi yet á̱za̱za̱rak á̱niet nang gu chat a̱ni, ku yet ta hwa nyi ni̱ kup á̱pyia̱ nyin ma̱ng ntangka̱i za̱kwá nani nang nyi ni̱ nkup a̱yaatoot a̱fai a̱ni, ni̱nia yet: Nyi fwuong kunak á̱ghyang, nyi nyia̱ á̱niet shok, nyi yet á̱niet nyia̱ shonshyon, nyi yet á̱niet ghyuai a̱pyia̱, a̱wot nyi bu ni̱ ngyet á̱niet nyap nfwuo.

Ibriniyawa 6:18

A̱gwaza ka̱n dyiat tazwa nkyang nfeang nani; ni̱nia yet a̱li̱ka̱uli ma̱ng shyishyi nggu ji. Na̱ si̱ mi̱n shyak bah, mat ku si̱ mi̱n tyia̱ A̱gwaza a̱ bwuo la bah. A̱ nyia̱ a̱li̱ka̱uli ma̱ng shyishyi, da̱nian a̱ ka tyia̱ nzi̱t gba̱gbak zi̱ ntyia̱ fwuo ba̱t ma̱ng gbang a̱lyia̱ di̱ san ku shya̱ á̱zanson nzi̱t a̱ni, nzi̱t á̱niet zi̱ tyong naat da̱ a̱vwuo A̱gwaza di̱ chat a̱vwuo ta̱kup a̱ni.

1 Bitut 1:2

Neet gbangbang, A̱gwaza a̱ yet A̱tyia̱ a̱ni, lyen nyin a̱ si̱ khai nyin. A̱wot A̱za̱za̱rak Ntswa wu si̱ jaat nyin, nyi si̱ tyia̱ za̱za̱rak. Mat a̱nia, nyi si̱ khwi Yesu. A̱wot á̱ si̱ shum nyin ma̱ng a̱sok Yesu Kristi na, á̱ ka jaat nyin. Yok A̱gwaza a̱ fa̱k shok nyin, a̱ nang nyin swat nyinyang gba̱mgbam.

1 Yoona 3:24

A̱mgba̱m á̱niet ba ba̱ khwi doka nggu ji a̱ni, ba̱ ni̱ byia̱ a̱meang di̱ mun á̱pyia̱ ma̱ng Yesu. Nggu meang, a̱ si̱ byia̱ a̱meang di̱ mun á̱pyia̱ ma̱ng a̱mba. A̱wot si̱sak ji nang zi̱ ndyen nang gu nswan swat mun a̱pyia̱ ma̱ng a̱nzi̱t a̱ni, huhwa yet: A̱za̱za̱rak Ntswa nggu wu nang gu ka̱n nang nzi̱t a̱ni, swan mi̱ nfwuo nzi̱t na.

1 Yoona 4:12

Á̱ mbyia̱ a̱tyu a̱ ka̱n mak li A̱gwaza wu a̱ni bah. A̱wot ki̱ zi̱ chat á̱ghyang, A̱gwaza shya̱ di̱ mun á̱pyia̱ ma̱ng a̱nzi̱t, a̱wot chat nggu hu nyia̱ a̱tsatsak nta̱m da̱ a̱vwuo nzi̱t.

1 Yoona 4:16

Nzi̱t, zi̱ lyen si̱sak ji nang A̱gwaza nchat zi̱t ba̱t a̱ni. A̱wot zi̱ si̱ nwuak fwuo da̱ nggu ma̱ng si̱sak ji nang gu nchat nzi̱t a̱ni. A̱gwaza yet chat hwa. A̱wot a̱tyu a̱ chat á̱niet a̱ni, a̱ swan di̱ mun á̱pyia̱ ma̱ng A̱gwaza. A̱gwaza si̱ ma mun a̱pyia̱ ma̱ng a̱nggu.