3 Yoona 1:6 - A̠lyiat A̠gwaza na di̠n Tyap: A̠li̠ka̠uli A̠fai

⁶ Á̱niet a̱bya nang a beang a̱ni, ba̱ ka̱n tak ma̱ng á̱niet khwi ba ba̱ shya̱ a̱ji a̱ni, si̱sak nang a nchat á̱niet khwi ba ba̱t a̱ni. Ma̱sa̱kut, ya a̱son ma̱ng beang ntangka̱i á̱niet tyiet a̱nia ma̱ a̱chyet mba ka mi̱ fwuo nyiung, ma̱nang ku myim A̱gwaza a̱ni.

3 Yoona 1:6 Iomraidhean Croise

Nta̱m A̱yaata̱m 15:29

Ni̱nia yet: Nyi yok ya kyayak nang á̱ neap nghwughwu a̱yaagwaza sang swuan a̱ni bah. Nyi yok ya a̱sok bah. Nyi yok ya nam nyam nang á̱ chyip fwuo hu á̱ sii hyat a̱ni bah. A̱wot nyi yok katnaan ma̱ng a̱shi̱shi̱k nyia̱. Ka̱ nyi ghwon nkyang nani, nyi nyia̱ shansham. Si̱ a̱ghyang a̱tuk!

Nta̱m A̱yaata̱m 15:3

Á̱niet khwi Antakiya ba si̱ ta̱m a̱yaata̱m bani mi̱ Urusha̱lima. Nang a̱yaata̱m ba ni̱ nshya̱ di̱ naat hu a̱ni, ba̱ si̱ yong mi̱ nfam bibyin Fi̱ni̱siya ma̱ng Sa̱mariya, ba̱ ka byiat á̱niet khwi ba̱ shya̱ a̱ja a̱ni. A̱wot ba̱ si̱ tak ma̱ng a̱mba si̱sak nang Nnwap na̱ nwai yet A̱yahudawa a̱ni na meang nghwon a̱ka̱tuk nyia̱ mba wu, ba̱ si̱ nwuo khwi Yesu a̱ni. A̱mgba̱m á̱niet khwi ba si̱ fa̱k a̱lyia̱ sai ba̱t!

Nta̱m A̱yaata̱m 21:5

Jen nang mam a̱natat na nswak a̱ni, zi̱ si̱ bwuok nat mi̱ kukwon a̱wak hu. A̱mgba̱m sot á̱niet khwi ji, á̱nyiuk ma̱ng mman, si̱ ghwut ma̱ a̱keang ka. Ba̱ si̱ bai da̱ a̱vwuo yong a̱kukwon a̱wak ba dundung ma̱ng a̱nzi̱t. A̱ja wa a̱mgba̱m nzi̱t, zi̱ si̱ kpaat a̱khwukhwut, zi̱ si̱ naai A̱gwaza.

A̱romawa 15:24

N da̱p sak n nat a̱byin A̱si̱paniya, a̱wot jen nang n shya̱ di̱ naat hu a̱ni, n na ngyong ma̱ a̱keang Rom ka, n teap n byiat nyin. A̱wot ki̱ zi̱ labeang nang zi̱ swan dundung, n bu shya̱ beang da̱ a̱vwuo nyin, da̱nian a̱chyet ka̱ shya̱ nung á̱zanson a̱ni.

2 A̱korontiyawa 1:16

Di̱ ntsa hu, n ku nchat n byiat nyin di̱n jen nang n naat fam a̱byin Ma̱kidoniya a̱ni. A̱wot n bu nchat n byiat nyin di̱n jen nang n na mbwuok neet a̱ja a̱ni. Di̱n jen a̱ja ja, n kyiak nyia̱ nyi na ntyia̱ nung a̱ta̱lyen ki̱ ndoot naat fam a̱byin Yahudiya hu.

A̱filibiyawa 4:14

A̱mgba̱m ma̱ng a̱nia, ku yet a̱sham ba̱t nang nyi mbeang nung mami swuo a̱bung nung hu a̱ni.

A̱kolosiyawa 1:10

A̱nia wa, nyi na nswan swat ku na nwuak A̱gwaza shi, a̱wot ku myim nggu kuzang jen a̱ni. Nyi bu nyia̱ kuzang tangka̱i a̱tan nta̱m. Nyi bu mban lyen A̱gwaza hu shansham ba̱t, kuzang jen.

1 A̱ta̱solonikawa 2:12

Zi̱ ku gba nyin. Zi̱ si̱ tyia̱ nyin gba̱gbak. Zi̱ si̱ yong nyin si̱sak ji nyi na nswan swat ku myim A̱gwaza a̱ni, a̱tyu a̱ yei nyin mami tyok nggu hu ma̱ng a̱kyenkyai shi nggu wu a̱ni.

Titut 3:13

Kwan ba̱t a beang Zi̱nat a̱gwak lyen doká a̱byin a̱wa ma̱ng A̱folot ba̱ ta̱bat vak. A kwan a li nang ba̱ shya̱ kuzang kyang ba̱ chat di̱ a̱chyet ka a̱ni.

1 Bitut 2:20

A̱tsak a̱lyiat, ka̱ á̱ tsot nyin mat a̱ka̱tuk nyia̱, nyi si̱ gbang a̱lyia̱, yihwa na yet zang nyin ji? A̱wot ka̱ nyi ma swuo a̱bung mat nyia̱ a̱tan nta̱m, si̱ nyi gbang a̱lyia̱, A̱gwaza na fa̱k nyinyang nyin.

3 Yoona 1:12

A̱wot tazwa Di̱mi̱ti̱ri̱yut, konyan lyiat a̱tan a̱lyiat da̱ nggu, a̱wot a̱ ni̱ khwi a̱chuchuk wu, ku tak nang gu ngyet a̱tan a̱yin a̱ni. Nzi̱t meang, zi̱ nwuak sheda nang gu ngyet a̱tan a̱yin wa. A̱wot a lyen nang sheda nzi̱t hu ngyet a̱tsak a̱lyiat wa.