1 Yoona 5:4 - A̠lyiat A̠gwaza na di̠n Tyap: A̠li̠ka̠uli A̠fai

⁴ Mat kuzang nggwon A̱gwaza byia̱ chet hu, ku maai nang ka̱ na nswuo chet swanta hu a̱ni. Nwuak fwuo nzi̱t hu di̱ Yesu hwa na tyia̱ zi̱ nswuo chet swanta hu.

1 Yoona 5:4 Iomraidhean Croise

Yoona 1:13

Bibya yet á̱niet ba da̱ á̱ tyei ba̱ yet mman A̱gwaza mat a̱sok nia a̱ni bah; da̱ nyia̱ mat chat vam hwa bah; da̱ mat fa a̱tyubishyi hwa bah. Da̱ a̱kwonu a̱kya, swuan jini, A̱gwaza wa ma̱ a̱pyia̱ nggu nang mba jii.

Yoona 16:33

“N wa ka̱n tak ma̱ng nyin nkyang nani, da̱nian nyi ka shya̱ dundung ma̱ng a̱nung. Nyi na shya̱ swat nyinyang. Mi̱ swanta hu nyi na swuo a̱bung. Ma̱ng a̱nia, nyi gwai, mat n wa ka̱n swuo chet swanta hu!”

Yoona 3:3

Yesu si̱ nyia̱ ma̱ng a̱nggu, “Yok n tak ma̱ng a̱nwan a̱tsatsak a̱lyiat, ka̱ a byin ang a̱ka̱feang bah, a si̱ mi̱n di Tyok A̱gwaza hu lili bah za̱m.”

1 A̱korontiyawa 15:57

A̱wot zi̱ gwai A̱gwaza! A̱ nwuak zi̱t chet zi̱ swuo chet a̱ka̱tuk nyia̱ ma̱ng a̱khwu, mami a̱lyoot A̱tyoli nzi̱t wu Yesu Kristi.

1 Yoona 2:29

Mat nang zi̱ ndyen nang Kristi ngyet a̱tsotswat wa a̱ni, zi̱ bu lyen konyan wa nyia̱ tsotswat, a̱ yet a̱tsatsak nggwon A̱gwaza wa.

1 Yoona 3:9

Á̱niet ba̱ yet á̱tsatsak mman A̱gwaza a̱ni, ba̱ ni̱ ya a̱son ma̱ng nyia̱ a̱ka̱tuk nyia̱ nchi̱ri̱ng bah, mat za̱kwa mba ji tai si̱ A̱gwaza. Mat a̱nia, ba̱ si̱ mi̱n gya a̱son mi̱ nyia̱ a̱ka̱tuk nyia̱ bah. Mat á̱ byin mba neet Ma A̱gwaza tswazwa, ba̱ yet á̱tsatsak mman A̱gwaza nia.

1 Yoona 4:4

A̱wot nyin mman nung na nang n chat a̱ni, nyi yet mman A̱gwaza nia. Nyi wa ka̱n swuo chet a̱yaata̱m á̱niet tyiet a̱ka̱laa a̱bya. Mat A̱za̱za̱rak tswa wu a̱ shya̱ ma̱ nyin a̱ni, a̱ byia̱ chet a̱ lan tswa ji ji̱ shya̱ mi̱ swanta hu a̱ni.

1 Yoona 5:1

Konyan wa nwuak a̱chuchuk nyia̱ Yesu wa yet Kristi, a̱tyu nang A̱gwaza kup gu tyok a̱ni, a̱tyu a̱wa yet nggwon A̱gwaza kya. Konyan wa chat A̱tyia̱ wu, a̱ na chat mman nggu na meang.

1 Yoona 5:18

Zi̱ lyen nang konyan wa yet nggwon A̱gwaza a̱ ya a̱son mi̱ nyia̱ a̱ka̱tuk nyia̱ nchi̱ri̱ng bah, mat Yesu a̱ yet a̱tsak Nggwon A̱gwaza ka a̱ni, chok gu, kalak A̱ta̱nyeang ka ka̱ du tyia̱ nggu swuo a̱bung.

1 Yoona 5:5

Nggu a̱nyan wa maai a̱ swuo chet swanta hu? Si̱ ma̱ a̱tyu a̱ nwuak a̱chuchuk nang Yesu wa ma̱nyin nggu ngyet Nggwon A̱gwaza ka a̱ni.

Tyai Á̱zanson 12:11

A̱wot á̱niet khwi Yesu ba si̱ ya Sha̱tan mi̱ zwang ji, mat chet a̱sok Fi̱ng A̱nfwuk hu ma̱ng sheda mba hu tazwa a̱lyiat A̱gwaza. Mat ba̱ chat swuan mba ji shansham bah; a̱wot da̱ mba ba̱ fwuong a̱wun a̱khwu bah.

Tyai Á̱zanson 15:2

N si̱ bu kin di kyang ghyang a̱zaghyi nung, ku li nang kyai a̱sa̱khwot ma̱dubi á̱ kyiai ma̱ng long a̱ni! N si̱ bu ndi á̱niet ba ba̱ swuo chet a̱ka̱tuk nyam a̱yit a̱wa ma̱ng ghwughwu nggu hu ma̱ng la̱mba a̱lyoot nggu hu a̱ni! N si̱ ndi nang ba̱ yong da̱ kyai a̱sa̱khwot ma̱dubi, ba̱ ba̱ng zunzom nang A̱gwaza nwuak ba a̱ni.

Tyai Á̱zanson 2:11

Konyan wa chat lyen a̱ni, ku yet ta hwa gu myiai a̱fufwuo gu fa̱a̱k, a̱ bu fi̱k a̱lyiat nang A̱za̱za̱rak Ntswa A̱gwaza wu shei susot á̱niet khwi ji a̱ni! A̱tyu a̱ swuo chet swanta hu a̱ni, a̱khwu a̱ka̱feang ma̱ a̱nga̱ngak tswa ndong sang sangba̱p na shya̱ nggu bah; ku ma̱ chunchwiit!

Tyai Á̱zanson 2:17

Konyan wa chat lyen a̱ni, ku yet ta hwa gu myiai a̱fufwuo gu fa̱a̱k, a̱ bu fi̱k a̱lyiat nang A̱za̱za̱rak Ntswa A̱gwaza wu shei susot á̱niet khwi ji a̱ni! Konyan wa swuo chet swanta hu a̱ni, n na nang gu a̱za̱za̱rak ‘mana’ nang á̱ niat Ma A̱gwaza tswazwa a̱ni. N bu na nang gu a̱sai a̱fang nang á̱ ndyuut a̱lyoot a̱fai tazwa a̱ni. Á̱ mbyia̱ a̱tyu a̱ na fi̱k a̱lyoot ka a̱ni bah; si̱ a̱tyu a̱ san a̱fang ka a̱ni.

Tyai Á̱zanson 2:26

A̱mgba̱m á̱niet ba̱ swuo chet swanta hu, ba̱ si̱ bu nyia̱ nta̱m ma̱ng á̱lyiat nung na si̱ nat sangba̱p swuan mba ji a̱ni; bibya n na ntyia̱ mba ba̱ nyia̱ tyok tazwa a̱mgba̱m nnwap mi̱ bibyin swanta hu dundung ma̱ng a̱nung!

Tyai Á̱zanson 2:7

Konyan wa chat lyen a̱ni, ku yet ta hwa gu myiai a̱fufwuo gu fa̱a̱k a̱ bu fi̱k a̱lyiat nang A̱za̱za̱rak Ntswa A̱gwaza wu shei susot á̱niet khwi ji a̱ni! Konyan wa swuo chet swanta hu a̱ni, a̱ na ya sum a̱kwon nswuan ka̱ shya̱ ma̱ a̱byin A̱gwaza ka a̱ni!

Tyai Á̱zanson 3:12

A̱mgba̱m á̱niet ba̱ swuo chet swanta hu a̱ni, A̱gwaza nung wu na tyia̱ ba̱ yet tsutsuung A̱mali Nwuat Za̱nang nggu ka! Da̱ mba, ba̱ na ghwut ba̱ ghwon A̱li Nwuat Za̱nang ka bah. N na ndyuut zwunzwuo a̱lyoot A̱gwaza nung ji da̱ mba; a̱wot ba̱ yet mman ma̱ a̱keang A̱gwaza nung ka! A̱keang kani kya yet Urusha̱lima fai nang A̱gwaza nung wu na ta̱m dyo neet tswazwa a̱ni. A̱wot n bu na ndyuut a̱lyoot a̱fai nung ka da̱ mba!

Tyai Á̱zanson 3:21

A̱mgba̱m á̱niet ba̱ swuo chet swanta hu a̱ni, ba̱ na shya̱ a̱vwuo nswat tyok ma̱ng a̱nung; ma̱nang n ku nswuo chet swanta hu, n si̱ nswan ma̱ng A̱tyia̱ nung wu ma̱ a̱gba̱ndang chuk tyok nggu wu a̱ni!

Tyai Á̱zanson 3:5

A̱mgba̱m á̱niet ba̱ swuo chet swanta hu a̱ni, á̱ na kup ba a̱sai a̱jhya̱jhyat a̱yaatoot! N na mak lyang lyulyoot mba hu mami Ta̱ka̱da Swuan hu bah. A̱wot n na ngyei lyulyoot mba hu a̱zaghyi A̱tyia̱ nung ka ma̱ng a̱yaata̱m tswá nggu ba; n tak nang ba̱ ngyet á̱si̱ nung bya!