1 Yoona 4:7 - A̠lyiat A̠gwaza na di̠n Tyap: A̠li̠ka̠uli A̠fai

⁷ Nyin á̱kpa̱ndang nung ba nang n chat a̱ni, yok zi̱ ya a̱son ma̱ng chat á̱ghyang, mat A̱gwaza wa nang zi̱t chet zi̱ chat á̱ghyang. Konyan wa chat á̱ghyang á̱niet, a̱tyu a̱wa tak nang gu ngyet a̱tsak nggwon A̱gwaza kya, a̱ si̱ bu lyen A̱gwaza.

1 Yoona 4:7 Iomraidhean Croise

Yoona 13:34

Doka swai ja nang n nwuat nyin: Nyi chat á̱ghyang nyin! Ma̱nang n chat nyin a̱ni; ma a̱nia wa nyin mameang, nyi na nchat á̱ghyang.

Yoona 17:3

“Swuan sang sangba̱p jini ja yet; á̱niet ba ba̱ lyen ang, nang nwan wa ma̱nyin ang ngyet a̱tsatsak A̱gwaza wu, ma̱ng Yesu Kristi, a̱tyo nang a ku nta̱m ndyo mi̱ swanta hu a̱ni.

1 A̱korontiyawa 8:3

A̱wot a̱tyu a̱ chat A̱gwaza a̱ni, nggu wa nang A̱gwaza wu lyen.

2 A̱korontiyawa 4:6

Mat A̱gwaza wa ku hyia̱ nyia̱, “Yok sai hu, ku sai mi̱ ndyin hu!” Nggu wa bu tyia̱ sai huni ku sai mi̱ nfwuo nzi̱t na, mat zi̱ ka lyen a̱kyenkyai shi A̱gwaza wu ma̱ a̱ghyi Yesu Kristi ba, a̱ ya á̱ghyi ma̱ mya̱myat a̱myat nang á̱ nwuan a̱ni.

A̱ga̱la̱tiyawa 4:9

A̱wot ma̱ninika, nang nyi ndyen A̱gwaza a̱ni, (n fa nang A̱gwaza wa ndyen nyin a̱ni); yihwa mbyia̱ nang nyi nchat bwuok lilyim nyi khwi a̱buk taada ma̱ng doká swanta da̱ ji̱ byia̱ nyin kpangti̱n a̱ni bah?

A̱ga̱la̱tiyawa 5:22

A̱wot ntangka̱i za̱kwá nang A̱za̱za̱rak Ntswa wu nnwuat a̱ni, jija yet, chat á̱ghyang, fwuo sai, swat nyinyang, nyap fwuo, fwuong kunak, yet a̱tan, yet a̱tsotswat,

2 Timoti 1:7

Mat A̱za̱za̱rak Ntswa nang A̱gwaza nang zi̱t a̱ni, a̱ yet a̱si̱ tyei nzi̱t a̱wun nia bah. Da̱ a̱kwonu a̱kya, a̱ tyei nzi̱t zi̱ yong mi̱ chet hwa, zi̱ chat á̱ghyang nzi̱t, zi̱ bu chat A̱gwaza, a̱wot zi̱ ta̱bat á̱pyia̱ nzi̱t shansham.

1 Bitut 1:22

Á̱ ku jaat nyin a̱ka̱tuk nyia̱ nyin wu di̱n jen nang nyi ku nwuo khwi a̱chuchuk wu a̱ni. Ma̱ninika, ku yet ta hwa, nyi tak nang nyi nchat á̱ghyang nyin a̱tsatsak chat nang á̱na̱nyiuk a̱ni. Nyi chat á̱ghyang nyin ma̱ng a̱mgba̱m nfwuo nyin na.

1 Yoona 2:10

A̱tyu a̱ chat á̱na̱nyiuk nggu ba ba̱ yet á̱niet khwi Yesu a̱ni, a̱ swan mami sai hu hwa. Da̱ nggu, a̱ na yet jat a̱kwa a̱yin bah.

1 Yoona 2:29

Mat nang zi̱ ndyen nang Kristi ngyet a̱tsotswat wa a̱ni, zi̱ bu lyen konyan wa nyia̱ tsotswat, a̱ yet a̱tsatsak nggwon A̱gwaza wa.

1 Yoona 2:3

Ki̱ zi̱ khwi doka A̱gwaza ji, a̱ni wa zi̱ na nnwuak a̱chuchuk nang zi̱ ndyen nggu.

1 Yoona 2:4

Ka̱ a̱yin tak nyia̱, “N dyen A̱gwaza,” a̱wot a̱ si̱ lak khwi doka A̱gwaza ji, a̱tyu a̱wa yet a̱tyu bwoi a̱ka̱laa wa. A̱wot a̱ swan swat lyen a̱chuchuk A̱gwaza wu bah.

1 Yoona 2:7

Á̱niet khwi Yesu ba nang n chat a̱ni, n dyuut nyin doka swai ja bah. Da̱ a̱kwonu a̱kya, a̱khwukhwop doka wu nang nyi ku mi̱ nfa̱k neet gbangbang a̱ni, nggu wa yet, “Nyi chat á̱ghyang.” A̱lyiat nang nyi ku fa̱k gbangbang a̱ni, ni̱nia na.

1 Yoona 3:9

Á̱niet ba̱ yet á̱tsatsak mman A̱gwaza a̱ni, ba̱ ni̱ ya a̱son ma̱ng nyia̱ a̱ka̱tuk nyia̱ nchi̱ri̱ng bah, mat za̱kwa mba ji tai si̱ A̱gwaza. Mat a̱nia, ba̱ si̱ mi̱n gya a̱son mi̱ nyia̱ a̱ka̱tuk nyia̱ bah. Mat á̱ byin mba neet Ma A̱gwaza tswazwa, ba̱ yet á̱tsatsak mman A̱gwaza nia.

1 Yoona 4:11

Nyin á̱kpa̱ndang nung ba nang n chat a̱ni, mat nang A̱gwaza nchat zi̱t ba̱t a̱ni, ma a̱nia wa ku yet ta hwa nzi̱t meang zi̱ ma nchat á̱ghyang nzi̱t.

1 Yoona 4:12

Á̱ mbyia̱ a̱tyu a̱ ka̱n mak li A̱gwaza wu a̱ni bah. A̱wot ki̱ zi̱ chat á̱ghyang, A̱gwaza shya̱ di̱ mun á̱pyia̱ ma̱ng a̱nzi̱t, a̱wot chat nggu hu nyia̱ a̱tsatsak nta̱m da̱ a̱vwuo nzi̱t.

1 Yoona 4:16

Nzi̱t, zi̱ lyen si̱sak ji nang A̱gwaza nchat zi̱t ba̱t a̱ni. A̱wot zi̱ si̱ nwuak fwuo da̱ nggu ma̱ng si̱sak ji nang gu nchat nzi̱t a̱ni. A̱gwaza yet chat hwa. A̱wot a̱tyu a̱ chat á̱niet a̱ni, a̱ swan di̱ mun á̱pyia̱ ma̱ng A̱gwaza. A̱gwaza si̱ ma mun a̱pyia̱ ma̱ng a̱nggu.

1 Yoona 4:20

Konyan wa tak nyia̱, “N chat A̱gwaza,” a̱wot a̱ si̱ lak li á̱niet khwi á̱ghyang, a̱tyu a̱wa bwoi a̱ka̱laa nia. Mat ka̱ zi̱ lak chat á̱niet nang zi̱ nwuan a̱ni, zi̱ na nyia̱ ni zi̱ nchat A̱gwaza da̱nang zi̱ ka̱n di a̱ni bah?

1 Yoona 4:8

Ma a̱nia wa, a̱tyu da̱ a chat á̱ghyang á̱niet a̱ni bah, a̱ lyen A̱gwaza bah. Mat A̱gwaza wu yet a̱tyu chat á̱niet wa.

1 Yoona 5:1

Konyan wa nwuak a̱chuchuk nyia̱ Yesu wa yet Kristi, a̱tyu nang A̱gwaza kup gu tyok a̱ni, a̱tyu a̱wa yet nggwon A̱gwaza kya. Konyan wa chat A̱tyia̱ wu, a̱ na chat mman nggu na meang.

2 Yoona 1:5

Ma̱ninika, n naai ang a̱yang a̱li, ku yet ta hwa zi̱ chat á̱ghyang. Doka jini nang n dyuut ang ndyo a̱ni, ji̱ yet swai ja bah. Doka jini ja nang zi̱ za byia̱ neet di̱ tsa nwuo khwi Kristi hu.