1 Yoona 4:12 - A̠lyiat A̠gwaza na di̠n Tyap: A̠li̠ka̠uli A̠fai

¹² Á̱ mbyia̱ a̱tyu a̱ ka̱n mak li A̱gwaza wu a̱ni bah. A̱wot ki̱ zi̱ chat á̱ghyang, A̱gwaza shya̱ di̱ mun á̱pyia̱ ma̱ng a̱nzi̱t, a̱wot chat nggu hu nyia̱ a̱tsatsak nta̱m da̱ a̱vwuo nzi̱t.

1 Yoona 4:12 Iomraidhean Croise

Yoona 1:18

Á̱ mbyia̱ a̱tyu a̱ ka̱n di A̱gwaza a̱ni bah. Nggwon kikya ma̱nyin ka, ka̱ yet A̱gwaza, a̱wot ka̱ si̱ shya̱ da̱ a̱vwuo a̱nyiung ma̱ng A̱tyia̱ wu; kikya tak za̱kwa A̱gwaza ji kpa̱sai.

1 A̱korontiyawa 13:13

Mat a̱nia, nkyang ntat nia na nshya̱ si̱ nat sang sangba̱p hu, ni̱nia yet; nwuak fwuo, tyia̱ fwuo, ma̱ng chat á̱ghyang nzi̱t. A̱wot a̱gba̱ndang za̱nang chet wu a̱ swak mi̱ nkyang ntat nani a̱ni, nggu wa yet chat á̱ghyang hu.

1 Timoti 1:17

Yok a̱kyenkyai shi ma̱ng Tyok ku yong chi̱k da̱ A̱gwaza, a̱ yet A̱gwam sang sangba̱p; A̱gwaza a̱ na nwai khwu a̱ni, A̱gwaza nang a̱ nwai nwuan a̱ni, nggu wa yet A̱gwaza ma̱nyin nggu, si̱ nat sang sangba̱p. Samba̱rka!

1 Timoti 6:16

Nggu wa ma̱nyin gu na nwai khwu. A̱ swan da̱ a̱vwuo ka̱ sai ma̱ mya̱myat, nang a̱tyubishyi si̱ mi̱n tat a̱ni bah. Á̱ mbyia̱ a̱tyu a̱ ka̱n di nggu a̱ni bah. Da̱ mba á̱ mbyia̱ a̱tyu a̱ si̱ mi̱n di nggu a̱ni bah. Yok shi ma̱ng chet ku nwai tyiai a̱ni, shya̱ dundung ma̱ng a̱nggu, si̱ nat sang sangba̱p, Samba̱rka!

Ibriniyawa 11:27

Mat nang Musa ku nnwuak fwuo da̱ A̱gwaza a̱ni, a̱ si̱ ghwon a̱byin Ma̱sa̱r ka. Da̱ nggu, a̱ ku fa̱k a̱wun mwai lyen nang a̱gwam Ma̱sa̱r wu na fa̱k a̱ni bah. A̱ si̱ gbang a̱lyia̱, a̱ si̱ lak bwuok lilyim hu. Mat a̱ ku tyia̱ á̱ghyi da̱ a̱tyu nang á̱ghyi a̱tyubishyi si̱ mi̱n di a̱ni bah.

1 Yoona 2:5

A̱wot á̱niet ba ba̱ khwi a̱lyiat A̱gwaza na a̱ni, chat A̱gwaza mba hu tak kpa̱sai si̱sak nang ba̱ nchat gu a̱tsatsak chat a̱ni. Si̱sak ji nang zi̱ na ndyen nang zi̱ nshya̱ ndung ma̱ng A̱gwaza a̱ni, jija yet:

1 Yoona 3:24

A̱mgba̱m á̱niet ba ba̱ khwi doka nggu ji a̱ni, ba̱ ni̱ byia̱ a̱meang di̱ mun á̱pyia̱ ma̱ng Yesu. Nggu meang, a̱ si̱ byia̱ a̱meang di̱ mun á̱pyia̱ ma̱ng a̱mba. A̱wot si̱sak ji nang zi̱ ndyen nang gu nswan swat mun a̱pyia̱ ma̱ng a̱nzi̱t a̱ni, huhwa yet: A̱za̱za̱rak Ntswa nggu wu nang gu ka̱n nang nzi̱t a̱ni, swan mi̱ nfwuo nzi̱t na.

1 Yoona 4:16

Nzi̱t, zi̱ lyen si̱sak ji nang A̱gwaza nchat zi̱t ba̱t a̱ni. A̱wot zi̱ si̱ nwuak fwuo da̱ nggu ma̱ng si̱sak ji nang gu nchat nzi̱t a̱ni. A̱gwaza yet chat hwa. A̱wot a̱tyu a̱ chat á̱niet a̱ni, a̱ swan di̱ mun á̱pyia̱ ma̱ng A̱gwaza. A̱gwaza si̱ ma mun a̱pyia̱ ma̱ng a̱nggu.

1 Yoona 4:20

Konyan wa tak nyia̱, “N chat A̱gwaza,” a̱wot a̱ si̱ lak li á̱niet khwi á̱ghyang, a̱tyu a̱wa bwoi a̱ka̱laa nia. Mat ka̱ zi̱ lak chat á̱niet nang zi̱ nwuan a̱ni, zi̱ na nyia̱ ni zi̱ nchat A̱gwaza da̱nang zi̱ ka̱n di a̱ni bah?

1 Yoona 4:6

A̱wot nzi̱t, zi̱ yet á̱niet A̱gwaza bya. Á̱niet ba̱ lyen A̱gwaza a̱ni, ni̱ myiai a̱fufwuo ba̱ fa̱k kyang nang zi̱ lyiat a̱ni. Ma a̱nia wa, á̱niet da̱ ba̱ lyen A̱gwaza a̱ni bah, ba̱ ni̱ fa̱k kyang nang zi̱ lyiat a̱ni bah. A̱nia wa nang zi̱ na ndyen ka̱ a̱yin ni̱ lyiat a̱ si̱ tyiet cha̱chaat da̱ a̱kwonu A̱za̱za̱rak Ntswa a̱ tyai a̱chuchuk a̱ni, ma̱ng si̱ ji ji̱ yet si̱ laai á̱niet a̱ni.