1 Yoona 4:1 - A̠lyiat A̠gwaza na di̠n Tyap: A̠li̠ka̠uli A̠fai

¹ Nyin á̱kpa̱ndang nung ba nang n chat a̱ni, nyi yok nwuak a̱chuchuk di̱ kuzang a̱yin a̱ tyiet nyia̱ A̱za̱za̱rak Ntswa lyiat ma̱ng a̱nggu a̱ni bah. Ku yet ta hwa nyi mak a̱tyu tyiet wu, nyi ka li ke A̱za̱za̱rak Ntswa wa tyia̱ nggu chet gu ka lyiat da̱ a̱kwonu A̱gwaza ka. Mat a̱yaata̱m ba̱ kyiak pyipyia̱ mba, ba̱ yet á̱tsak a̱yaata̱m a̱kwonu A̱gwaza ma̱ a̱di̱di̱t a̱ni, ka̱n bai mi̱ swanta hu.

1 Yoona 4:1 Iomraidhean Croise

Ma̱rkut 13:21

“Di̱n jen a̱ja, ka̱ a̱yin nyia̱ ma̱ng a̱nyin, ‘Nyi li, di A̱gwam Kristi wa wu!’ Ke a̱ bu nyia̱, ‘Nyi li, di nggu wa waau!’ Nyi yok nwuak a̱chuchuk bah.

Luka 12:57

“Yihwa mbyia̱ nang nyi si̱ mi̱n fi̱k a̱tsatsak kyang a̱ myim nyi nyia̱ a̱ni bah?

Luka 21:8

Yesu si̱ nwuak ba shim nyia̱, “Nyi ta̱bam kalak a̱yin a̱ du laai nyin. Mat á̱niet ma̱ a̱di̱di̱t na bai ba̱ hyia̱ nyia̱ ba̱ byia̱ tyok da̱ a̱lyoot tyok nung; ba̱ bu nyia̱ bibya yet Kristi wu; a̱wot ba̱ bu hyia̱ nang jen ji nnyia̱ nang swanta hu na ntyak a̱ni! A̱wot nyi yok nwuak a̱chuchuk da̱ mba bah.

Nta̱m A̱yaata̱m 17:11

Á̱niet Bi̱riya ba ku lan á̱niet Ta̱solonika ba ma̱ng yet a̱tan á̱niet. A̱wot ba̱ si̱ myiai a̱fufwuo ma̱ng di̱dang á̱ fwuong á̱lyiat A̱gwaza nang Bulut shei mba a̱ni. A̱wot ba̱ si̱ zop A̱lyiat A̱gwaza na kuzang a̱tuk, ba̱ ka li kee a̱lyiat nang Bulut ma̱ng Sila tyiet a̱ni, yet a̱tsak a̱lyiat wa.

Nta̱m A̱yaata̱m 20:29

“N dyen ka̱ n doot á̱niet tyiet a̱ka̱laa ba̱ nyia̱ nang a̱ka̱bwu a̱yit a̱ni, ba̱ na nwuo mami nyin. Ba̱ na tyia̱ á̱niet khwi ba swuo a̱bung.

1 A̱korontiyawa 12:10

A̱ghyang a̱niet, A̱za̱za̱rak Ntswa wu si̱ nang nggu chet kuzang jen gu ni̱ nnyia̱ nta̱m a̱ga̱de njhyang ma̱ a̱di̱di̱t. A̱wot a̱ghyang a̱niet meang, á̱ si̱ nang nggu chet shei a̱lyiat A̱gwaza nang A̱za̱za̱rak Ntswa wu ni̱ tyai gu kpa̱sai gu shei susot á̱niet khwi ji a̱ni. A̱ghyang a̱niet byia̱ chet khap A̱za̱za̱rak Ntswa ma̱ng a̱ka̱tuk ntswa a̱ni. Ma a̱nia wa, a̱ghyang a̱niet á̱ nang nggu chet a̱ lyiat di̱ lilyem A̱za̱za̱rak Ntswa ma̱ a̱di̱di̱t nang á̱ghyang á̱niet chyi a̱ni. A̱wot a̱ghyang a̱niet, á̱ si̱ nang nggu chet bwan a̱lyiat neet di̱ lilyem A̱za̱za̱rak Ntswa nat ndyo di̱ swáng a̱lyiat lilyem susot á̱niet khwi.

1 A̱korontiyawa 14:29

Á̱niet shei a̱lyiat A̱gwaza nang A̱za̱za̱rak Ntswa tyai mba ndyo a̱ni meang, ba̱ yok swak á̱niet a̱feang ku á̱niet a̱tat bah. A̱wot ba̱ ghwon á̱ghyang á̱niet bya ba̱ mak a̱lyiat mba na.

1 A̱ta̱solonikawa 5:20

Nyi yok jhyuai a̱lyiat na nang a̱yaata̱m a̱kwonu A̱gwaza mami nyin ba̱ tak ba̱ si̱ tyai nyin dyo a̱ni bah.

1 A̱ta̱solonikawa 5:21

Nyi ni̱ mmak kuzang kyang á̱ tak nyin a̱ni. Nyi ba̱ng si̱ ku yet a̱tan a̱ni.

2 A̱ta̱solonikawa 2:2

nyi yok shim a̱yin a̱ kyiai nfwuo nyin na nyi tyia̱ ma̱ tai ma a̱nggang, nyia̱ a̱tuk ka nang A̱tyoli Yesu na mbwuok a̱ bai a̱ni, nyia̱ ku wa ka̱n bai ku si̱ swak. Nyi yok nwuak a̱chuchuk da̱ a̱lyiat a̱nia bah, ku nang a̱nyuu nyia̱ a̱ shei a̱lyiat A̱gwaza á̱zanson nang A̱za̱za̱rak Ntswa A̱gwaza wa tyia̱ gu ndyo a̱ni; ku a̱nyuu a̱ nyia̱ á̱ tyai gu ta̱m ji kpa̱sai; ku a̱nyuu a̱ ma nyia̱ á̱ lyuut mi̱ wusika ja neet da̱ a̱vwuo nzi̱t.

1 Timoti 4:1

A̱za̱za̱rak Ntswa A̱gwaza shei ma̱ng a̱nzi̱t kpa̱sai nyia̱, di̱ ngaan njen wuni, á̱ghyang á̱niet na bwuok lilyim di̱ nwuak fwuo di̱ Kristi. Ba̱ na myiai a̱fufwuo á̱ fwuong tswá bwoi a̱ka̱laa, ji̱ laai mba. Ba̱ bu khwi a̱ka̱tuk tyiet wu a̱ neet da̱ a̱vwuo á̱ka̱tuk ntswá a̱ni.

2 Timoti 3:13

A̱wot á̱ka̱tuk á̱niet tyiet ma̱ng a̱yaabang a̱byin, na mbeang a̱ka̱tuk mi̱ nfwuo mba na, ba̱ laai á̱niet, nang á̱ ma ndaai mbaa.

2 Bitut 2:1

A̱wot gbangbang, á̱ ku byia̱ á̱niet ba̱ ku kyiak pyipyia̱ mba nyia̱ ba̱ yet á̱tsak a̱yaata̱m a̱kwonu A̱gwaza ba ma̱ á̱niet Isi̱rela, ma̱nang á̱ na mbyia̱ á̱niet tyiet a̱ka̱laa ma̱ nyin a̱ni. Ba̱ na bai ma̱ng tyiet ghyang da̱ bang ku na tyia̱ á̱niet ba ba̱ teap a̱ni. A̱wot si̱ a̱hwa hwa ma̱nyin hu bah. Ba̱ na fwuo lyen Yesu A̱tyoli nzi̱t wu a̱ san mba a̱ni. Si̱ a̱hwa na tyia̱ ba̱ khwat á̱pyia̱ mba a̱khwu ma a̱nggang.

1 Yoona 2:18

Nyin mman nung nyi yet á̱niet khwi Yesu nang n chat a̱ni, ngaan jen wu nyia̱. Nyi wa ka̱n fa̱k nang A̱tyu lak li Kristi wu nchobai. A̱wot á̱niet lak li Kristi ma̱ a̱di̱di̱t wa ka̱n bai za̱m. Huhwa mbyia̱ nang zi̱ ndyen nang nngaan jen wu wa nang zi̱ nshya̱.

1 Yoona 2:7

Á̱niet khwi Yesu ba nang n chat a̱ni, n dyuut nyin doka swai ja bah. Da̱ a̱kwonu a̱kya, a̱khwukhwop doka wu nang nyi ku mi̱ nfa̱k neet gbangbang a̱ni, nggu wa yet, “Nyi chat á̱ghyang.” A̱lyiat nang nyi ku fa̱k gbangbang a̱ni, ni̱nia na.

2 Yoona 1:7

A̱tsak a̱lyiat, á̱niet laai á̱niet ma̱ a̱di̱di̱t chong á̱ kat mi̱ swanta hu. Á̱niet tyiet a̱ka̱laa bani tyiet nyia̱ di̱ Yesu Kristi bai mi̱ swanta huni mi̱ vam nang a̱tyubishyi a̱ni bah. Tangka̱i a̱tyu tyiet a̱hwa yet a̱tyu laai á̱niet wa ma̱ng a̱tyu lak li Kristi.

3 Yoona 1:11

Nwan Gayut, a̱kpa̱ndang nung nang n chat a̱ni, yok khwi a̱ka̱tuk za̱kwa wuni bah. Da̱ a̱kwonu a̱kya, khwi a̱tan za̱kwa wu wa. Mat a̱tyu a̱ nyia̱ a̱tan nkyang a̱ni, ku tak nang gu ngyet a̱si̱ A̱gwaza wa. Ma a̱nia wa, a̱tyu a̱ ma nyia̱ á̱ka̱tuk nkyang a̱ni, ku tak nang gu ndyen A̱gwaza bah, ku ma̱ chunchwiit.

Tyai Á̱zanson 2:2

N dyen a̱mgba̱m nta̱m nang nyi nyia̱ a̱ni. N di kwan ma̱ á̱pyia̱ nyin hu, ma̱ng si̱sak nang nyi ngbang a̱lyia̱ ma̱ng nyap fwuo a̱ni. N dyen nang nyi nnyap fwuo ma̱ng á̱ka̱tuk á̱niet bah. Nyi si̱ mak á̱niet ba̱ kyiak á̱pyia̱ mba nang a̱yaata̱m Yesu a̱ni; a̱wot da̱ mba ba̱ yet a̱nia wa bah. Nyi si̱ shya̱ nang ba̱ yet á̱niet bwoi a̱ka̱laa bya.