1 Yoona 1:7 - A̠lyiat A̠gwaza na di̠n Tyap: A̠li̠ka̠uli A̠fai

⁷ A̱wot ki̱ zi̱ swan mami sai hu, ma̱nang A̱gwaza ngyet sai hu a̱ni, zi̱ si̱ byia̱ mun á̱pyia̱ ma̱ng á̱ghyang. A̱wot a̱sok Yesu a̱ yet Nggwon nggu ka a̱ni, si̱ kwi na̱ si̱ jaat nzi̱t a̱mgba̱m a̱ka̱tuk nyia̱ nzi̱t wu.

1 Yoona 1:7 Iomraidhean Croise

Matyu 6:12

Chi a̱ka̱tuk nyia̱ wu nang zi̱ nyia̱ ang ndyo a̱ni, ma̱nang zi̱ nchi a̱bun nang á̱ghyang á̱niet bwoi nzi̱t ndyo a̱ni.

Yoona 1:29

Da̱ a̱tsotson tat ka, Yoona si̱ li Yesu gu chobai da̱ a̱vwuo nggu. A̱jawa gu nyia̱, “Di, Fi̱ng A̱nfwuk nang A̱gwaza neap a̱ni! Nggu wa na chi a̱ka̱tuk nyia̱ á̱niet wu mi̱ swanta hu.

Yoona 12:35

Yesu si̱ nyia̱ ma̱ng a̱mba, “Sai hu shya̱ dundung ma̱ng a̱nyin da̱ a̱bada̱dei njen. Nyi chong di̱n jen ji nang sai hu nshya̱ dundung ma̱ nyin a̱ni, kalak lyin ku shya̱ nyin. Mat a̱tyu a̱ chong mi̱ ndyin a̱ni, a̱ lyen a̱vwuo ka nang gu nchong a̱ ntyei a̱ni bah.

A̱romawa 13:12

A̱tyetuk ka shim tyak. A̱tsotson nang zi̱ na nshya̱ san da̱ a̱vwuo A̱gwaza a̱ni si̱ shim tat. Mat a̱nia, si̱ nyi ghwon a̱ka̱tuk nta̱m nyin wu, na̱ li nang a̱yaatoot ba̱ byia̱ a̱lyuk a̱ni. Da̱ a̱kwonu a̱kya, si̱ nyi swan a̱tan swat a̱ na chok nyin nang nyi ni̱ nkup nkyang nzwang na̱ ya á̱ghyi ma̱ mya̱myat a̱myat a̱ta̱mam a̱ni.

1 A̱korontiyawa 6:11

Á̱ghyang á̱niet ma̱ nyin ku nyia̱ a̱nia mi̱ njen nang nyi ku nwai yet á̱niet khwi a̱ni. A̱wot á̱ si̱ kwi nyin. Á̱ si̱ jaat nyin, nyi si̱ tyia̱ za̱za̱rak. A̱gwaza si̱ bu tak kpa̱sai nang gu nkyiak nyin nyi yet á̱tsotswat á̱niet sang a̱bun a̱zaghyi nggu. Mat nyi yei a̱lyoot A̱tyoli Yesu Kristi, ma̱ng chet A̱za̱za̱rak Ntswa hu.

A̱fisawa 1:7

A̱gwaza fa̱k kunak zi̱t, a̱ si̱ nyia̱ nzi̱t shok gba̱mgbam. A̱ si̱ san nzi̱t ma̱ng a̱sok Nggwon nggu na, zi̱ ka yet á̱sa̱t á̱niet, a̱wot a̱ si̱ chi a̱ka̱tuk nyia̱ nzi̱t wu.

A̱fisawa 5:8

Mat di̱n jen ji ji̱ swak a̱ni, nyi ku shya̱ ma̱ a̱gbi̱ri̱ng ndyin. A̱wot ma̱ninika, nyi shya̱ mami a̱kyenkyai sai wa a̱ neet da̱ a̱vwuo A̱gwaza a̱ni. Mat a̱nia, nyi yok swat nyin hu ku tak nang nyi shya̱ mami sai A̱gwaza hu za̱m!

1 Timoti 6:16

Nggu wa ma̱nyin gu na nwai khwu. A̱ swan da̱ a̱vwuo ka̱ sai ma̱ mya̱myat, nang a̱tyubishyi si̱ mi̱n tat a̱ni bah. Á̱ mbyia̱ a̱tyu a̱ ka̱n di nggu a̱ni bah. Da̱ mba á̱ mbyia̱ a̱tyu a̱ si̱ mi̱n di nggu a̱ni bah. Yok shi ma̱ng chet ku nwai tyiai a̱ni, shya̱ dundung ma̱ng a̱nggu, si̱ nat sang sangba̱p, Samba̱rka!

Titut 2:14

Nggu wa yet a̱tyu a̱ neap a̱pyia̱ nggu nang za̱nang a̱ni, da̱nian a̱ ka ti̱n zi̱t mami tyok a̱ka̱tuk nyia̱ hu. A̱ si̱ ja̱u zi̱t da̱nian zi̱ ka yet á̱niet guu nang gu nyia̱ tyok a̱ni; á̱niet ba̱ byia̱ a̱gba̱ndang di̱dang nyia̱ a̱tan nta̱m a̱ni.

Ibriniyawa 9:14

Ka̱ a̱nia wa, nyi dam nyi lii, si̱sak nang a̱sok Kristi na nswak si̱ nzón ma̱ng nyák ma̱ za̱nzan a̱ni. Na̱ na jaat a̱di̱dam mi̱ nfwuo nzi̱t na, zi̱ ka ghwon a̱ka̱tuk nyia̱ nzi̱t wu, da̱nian zi̱ ka kwok ntong a̱zaghyi A̱gwaza a̱ byia̱ swuan a̱ni. Mat chet A̱za̱za̱rak Ntswa sang sangba̱p hwa, Kristi si̱ nwuak a̱pyia̱ nggu da̱ a̱vwuo A̱gwaza, a̱ si̱ yet a̱tsatsak za̱nang, da̱nian a̱ ka chi a̱ka̱tuk nyia̱ nzi̱t wu a̱mgba̱m.

Yakubu 1:17

Kuzang a̱tan ma̱ng a̱tsatsak za̱nang chorop a̱ neet da̱ a̱vwuo A̱gwaza a̱ yet A̱tyia̱ nzi̱t, a̱tyu a̱ mat a̱mgba̱m nkyang na̱ sai mi̱ kyai tswazwa a̱ni. Da̱ nggu, a̱ shai za̱kwa nggu ji nang nghwughwu mam, ku zwat ma̱ng a̱ta̱ngwat ni̱ nshai tityan yong mba ji a̱ni bah.

1 Bitut 1:19

Da̱ a̱kwonu a̱kya, A̱gwaza ku san nyin ma̱ng a̱za̱za̱rak a̱sok Kristi wa. Nggu wa yet kidee Fi̱ng A̱nfwuk A̱gwaza a̱ yet jhyem a̱ bu sang nyan a̱ni.

1 Yoona 1:3

A̱lyiat Nswuan a̱nia, nang zi̱ ka̱n di zi̱ si̱ bu fa̱k a̱ni, ni̱nia nang zi̱ shei nyin, da̱nian nyi ka mun á̱pyia̱ ma̱ng a̱nzi̱t. A̱wot zi̱ mun á̱pyia̱ dundung ma̱ng A̱tyia̱ nzi̱t wu a̱ yet A̱gwaza a̱ni, mbeang Nggwon nggu ka, Yesu Kristi.

1 Yoona 1:5

A̱lyiat na nang zi̱ fa̱k da̱ a̱vwuo Nggwon nggu ka a̱ni, ni̱nia nang zi̱ shei nyin: A̱gwaza yet sai hwa. A̱wot da̱ a̱vwuo nggu lyin nshya̱ bah, ku ma̱ chunchwiit!

1 Yoona 5:6

Yesu Kristi bai mi̱ swanta hu, a̱wot á̱ si̱ nyia̱ nggu ba̱ptisman ma̱ng a̱sa̱khwot. A̱wot a̱ si̱ nwuak a̱sok nggu na da̱ a̱team a̱khwu wu. A̱ ku bai ma̱ng a̱sa̱khwot nia ma̱nyin na bah. A̱ ku bai ma̱ng a̱sa̱khwot nia ma̱ng a̱sok. A̱wot A̱za̱za̱rak Ntswa wu wa tak ma̱ng a̱nzi̱t nang nkyang nani ngyet a̱chuchuk, mat nang nggu wa ntak á̱niet ba a̱chuchuk wu a̱ni.

1 Yoona 5:8

A̱lama wu wa yet, A̱za̱za̱rak Ntswa A̱gwaza wu, a̱sa̱khwot na, ma̱ng a̱sok na, nkyang tat nani tak kyang nyiung hwa.

2 Yoona 1:4

N gwai za̱m nang n shya̱ mman ang na na̱ khwi a̱chuchuk ma̱ cha̱chaat di̱ si̱sak ji nang A̱gwaza a̱ yet A̱tyia̱ nzi̱t wu ntak zi̱t zi̱ nyia̱ a̱ni.

3 Yoona 1:4

Kuzang jen nang n fa̱k mman nung na khwi a̱chuchuk wu, ku ni̱ tyia̱ nung a̱lyia̱ sai a̱ swak kuzang kyang.

Tyai Á̱zanson 1:5

Byat hu si̱ bu neet da̱ a̱vwuo Yesu Kristi. Nggu wa yet a̱tsotswat a̱tyu a̱ nwuak sheda tazwa nkyang nani a̱ni. Nggu wa si̱ bu yet a̱tyu nang A̱gwaza tsa ta̱ngam ma̱ng swuan ma̱ á̱niet ba̱ ka̱n kwi a̱ni. Nggu wa bu nyia̱ tyok tazwa a̱mgba̱m á̱gwam swanta ba. Yok a̱mgba̱m a̱kyenkyai shi a̱ yet si̱ ngguu. Mat a̱ chat zi̱t, a̱ si̱ ti̱n zi̱t ma̱ a̱ka̱tuk nyia̱ nzi̱t wu, di̱ nwuak a̱sok nggu na da̱nian zi̱t.

Tyai Á̱zanson 12:11

A̱wot á̱niet khwi Yesu ba si̱ ya Sha̱tan mi̱ zwang ji, mat chet a̱sok Fi̱ng A̱nfwuk hu ma̱ng sheda mba hu tazwa a̱lyiat A̱gwaza. Mat ba̱ chat swuan mba ji shansham bah; a̱wot da̱ mba ba̱ fwuong a̱wun a̱khwu bah.

Tyai Á̱zanson 7:14

A̱jawa n si̱ nyia̱ ma̱ng a̱nggu, “A̱tyoli, nwan wa lyen.” Huhwa gu nyia̱ ma̱ng a̱nung, “Á̱niet bani bya kwí di̱n jen a̱gba̱ndang swuo a̱bung ji. Ba̱ si̱ kwi a̱junjung a̱yaatoot mba ba ma̱ng a̱sok Fi̱ng A̱nfwuk na. Huhwa tyia̱ a̱yaatoot mba ba nsai.