ZAKHARIA 7:11 - Susula Malalaok Hehelu Palak Ma Hehelu Beuk

¹¹ Tehu, Au anang-ngala langa batu, de ta nau lamanene makandondook fa, ma ala suleketu di'idoon-nala, fo ela boso lamanene.

ZAKHARIA 7:11 Iomraidhean Croise

2TAWARIKH 33:10

Manetualain ka'i Manasye no laun-nala, tehu ala ta nau lamanene fa.

NEHEMIA 9:17

Ala ta tunga fa, lafandele heni O dale malolem lala'en-na, ma lafandele heni basa O tatao-nono'i manada'di beum-mala. No koao-ndaeaok, ala hele mauli-malangan esa, fo nos leo Masir leu fo da'di ata seluk. Tehu O Manetualain fo nau fe do'o do ampon, hahae naluk, dale malole ma manasue laik. O susue-lalaim, tete'ek-ka ba'un-na seli; O ta la'o ela fas.

NEHEMIA 9:26

Tehu O anam-mala lalenalanga-lasa'basoo, ma ala ta tunga O fa, ala ta taoafik neu O hoholo-lalanem ma O nakanenetem-ma fa, ala taolisa nabi-nabi fo manafes nasanene'dak-ka, ma manamadenu fo ala fali ma'is leo O mai, fo sila Manetualain-na. Ou Manetualain, nai lelek lakamumulu-lakamamaek O,

NEHEMIA 9:29

O fes nasanene'dak, fo ela ala tunga O nanolim-ma, Tehu no koao-ndaeaok, ala ta sipok O hoholo-lalanem fa. Te se'kona, metema ala tao tunga O hoholo-lalanem soona, tao leo bee-o, neukose so'dan-nala da'di malole. Sila langa batuk ma dale matea, ta nau lamanene, ta nau tunga fa.

KELUARAN 10:3

Boema, Musa no Harun leu leo manek-ka leu, de lafa'dan lae, “Leoina Ibrani-la Manetualain fo nde Manetualain-na, nafa'da nae, ‘O ta nau makatele neu Au fa, losa faihi'da? Po'i Au anang-ngala la'o, fo ela ala sene-do'ok neu Au.

YESAYA 28:12

Manetualain fe emi basa-basam-mala, mamana hahaeaok, tehu emi ta nau mamanene fan.

YESAYA 46:12

Hai hataholi manakoao-ndaeaok-kala lemin, emi fo manadodoo mae sesengik-ka, bei nai dook-ka.

YESAYA 6:10

Boema, nafa'da au nae, “Tao mapa'a hataholi sila-la dudu'a-aafin-nala, tao mapake di'idoon-nala, ma tao mapoke matan-nala, fo ela ala boso lita, lamanene do lalelak, soona ala fali ma'is leo Au mai, fo ala lea-hai.”

YESAYA 65:12

Neukose emi basa-basam-mala mate, da'di leo tutunu-hohotu laka-nakasetik. Nana lelek Au aloo, emi ta mataa fa, ma lelek Au kokolak, emi ta mamanene fa. Emi nau ka'da lena-la'ban Au, ma tao hata fo mangalauk.

YEREMIA 11:10

Sila tao sala-singok fo nanatao basak neme sila bei ba'i-kain-nala fo ala ta nau lamahele neu Au fa, de sila lamahele neu lamatua daebafak fe'ek, ma ala ta nau tunga Au paletang-nga fa. Leomae Israel ma Yehuda la'olena hehelu-balatak, o Au tao basan neu sila bei ba'i-kain-nala.

YEREMIA 13:10

Leoina fo mangalauk ia-la langabatu lanseli ma ala ta nau lamahele neu au fa. Ala hule-haladoi, ma sene-do'ok neu kada lamatua daebafak fe'ek. Hu ndia de neukose silasama leo lafa keke'uk fo sosoa-ndandaan tak ndia.

YEREMIA 17:23

Tehu emi bei ba'i-kaim ta nau lamanene do tao afik neu hata fo Au afa'dak fa. Sila lalanga batu, ma ta nau tunga paleta do nafa'da fas.

YEREMIA 17:27

Basa sila neukose ala da'di metema emi mamahele neu Au, ma tao fao sabat-ta da'di fai hehelik soaneu Au. Boso lu'a-lepa hata beek ndia boe tunga Yerusalem lelesu inan-nala nai faik ndia dalen-na. Metema emi la'o lena Au paletang sila-la soona, Yerusalem lelesu inan-nala ma uma manen-nala neukose Au hotu heni la'i esak-kasa ma ha'i ndia ta hapu nakamate fa.’ ”

YEREMIA 19:15

ae, Manetualain Fo Manakoasa, Fo Israel Manetualain-na nafa'da nae leo ia, “Hu ka nde emi malanga batu ma ta au mamanene fa, de neukose Au uni fe kota ia ma basa nggolo ta'duk manai boboa kaisun-nala, ma susa-soe lala'en-na fo Au dudu'a basas.”

YEREMIA 35:15

Au adenu laiesak Au atang-ngala ma basa nabi-la neu emi tatas es, fo ala nasiat emi soaneu tao mahii emi ha'da-tataom-mala, ma bosobai tao mangalauk ba'in. Ala fe emi nasanene'dak fo boso sene-do'ok neu lamatua daebafak fe'ek ma boso makaluku-makatele neu sila, fo ela emi leo mahele nai nusak ia, fo Au fe basan neu emi bei ba'ikai manamatem-mala. Tehu emi ta nau tao afik ma ta nau mamanene neu Au fa.

YEREMIA 36:31

O, ma o tititi-nonosim, ma basa o mauli-malangam-mala neukose Au huku-doki nanahu sala-singok fo emi tao-no'ik-kala. Neukose Au uni fe emi basa usa-soe fo Au tuni-ndenin neu emi, nanahu leomae o mo Yerusalem ma Yehuda laun-nala ta tao afik neu Au tutuni-ndendening ndia fa.”

YEREMIA 42:21

Hundia de, besak ia au anduku-alosak ita Aman Manetualain hala-haituan-na neu emi so. Tehu em ta nau tunga hala-haituak ndia fa.

YEREMIA 44:16

“Ami ta nau mamanene hata fo o mafa'dan neu ami pake Manetualain na'den-na fa.

YEREMIA 5:21

“Mamanene leon, hai emi fo, hataholi nggoa-panganak-kala lemin! Emi mamatak, tehu emi ta mita fa, madi'idook, tehu ta mamanene fa!

YEREMIA 5:3

Te'e-te'e, Manetualain nokek-ka nde, lilinekak-ka. Manetualain fepa emi, tehu emi ta mafaduli fa. Ana tao nakalulutuk emi, tehu emi ta nau nanoli emi fa. Emi langa batu, ma ta nau tuka tei-sale dale meme emi sala-singom mai fa.

YEREMIA 7:24

Tehu ala ta nau lamanene, ma ta nau taoafik fa. Nakalenak, ala tunga ka'da sila hihii-nanau mesan fo matea ma mangalauk ndia. Ala ta da'di malole fa, te mangalaun-nala, boetai nakadelek-ka.

YEREMIA 7:26

Tehu ta hapu hataholi namanene, do taoafik neu fas. Nakalenak, emi boetai malanga batu, ma mangalauk lena heni emi bei-ba'i kaim-mala.”

YEREMIA 8:5

Tehu tao le'e de emi, fo Au anang-ngala, la'ok sala makandondoo henin, ma la'oela Au? Emi ho'u mahehele neu emi sosongo-tatangom, de emi ta nau fali ma'im-ma leo Au mai fa!

YESKIAL 14:5

Basa sosongo-tatangok sila-la, ala tao-la Au anang-ngala, dook-ka leme Au mai, tehu sa'di leo been-na, no Au natataang ndia de, Au anang-ngala fali ma'is leo Au mai.’

YESKIAL 3:7

Tehu, leoina Israel-la, ta nau lamanene o fa, lena-lenak Au bai, ala ta taoafik neu Au makandondook fa. Sila basa-basas, lalangabatu, ma ala hii ka'da lena-la'ban Au.

YESKIAL 5:6

Tehu, Yerusalem ta sipok Au paletang-nga fa, te se'kona ndia mangalaun-na lenaheni leoina fe'ek-kala, lena-lenak langabatun-na lenaheni basa nusaina manai boboa-kaisun-na. Yerusalem la'olena Au paletang-ngala, ma ana ta nau tunga Au hoholo-lalaneng fa.”

DANIAL 9:5

Ami masala-masingo basa so, ami tao tatao-nono'i mangalauk ma tao salak so. Ami la'ban ma la'olena O paletam-ma so, boema ami la'ok sala neme O nakanenetem-mala.

HOSEA 4:16

Hai hataholi Israel-la lemin, emi langa batu manseli! Tao leo bee fo Au bisa foo emi, sama leo bi'ilopo-a nai moo mana'uk-ka?”

ZEFANYA 3:2

Soe ba'eneu kota, fo ana ta nau sipo Manetualain hala nasanene'dan-na fa, ma boeo ana ta taoafik neu Manetualain hala nabengan-na, ma ana ta nau fe so'dan-na neu Manetualain, ma ta noke tutulu-fafalik neu fan!

ZAKHARIA 1:4

Boso sama leo emi bei-ba'i kaim. Makahulun eli, basa nabi-la landuku-lalosak Au hala hehelung-nga neus, fo ela ala boso boe tao seluk tatao-nono'i mangalauk, ma tao sala-singok bai. Tehu ala ta lafaduli ma ala ta nau tunga Au fa.

MATEOS 13:15

Nanahu hataholi ia la, dudu'a-aafin nala pa'an so, di'idoo nala pakes so, ma mata nala lasusungu kana so. Dede'ak ia ana da'di, fo ela mata nala boso lita, ma di'idoo nala, boso lamanene, dudu'a aafin nala, boso lamatane, fo ela, ala boso fali leo Au mai, fo Au boso tao ahais.’ ”

HATAHOLI 7:51

Tolanoo kala langa batu manseli, ma tea na seli soaneu emi tunga Manetualain! Emi di'idoo mala pake nanseli neu Manetualain dede'a-kokolan! Emi mo emi bei ba'ikai mala matak esa! Emi la'ban Manetualain Dula Dale na tataas esa!

HATAHOLI 7:57

Mana maketu-mala'di matua sila la ko'oketu di'idoo nala ma ala eki, boema basa-basas leu sapu la Stefanus.

IBRANI 12:25

Hu ndia de, masanene'dak fo boso nalosak emi ta nau mamanene Ndia fo mana kokolak neu emi a. Sila fo ta nau lamanene Ndia fo mana maik leo daebafa ka mai, ma nanduku-nalosak halak maneme Manetualai na mai, ana ta bisa nalai fa. Mu'da hata no ita ia fo mana mamanene Ndia fo mana kokolak neme nusa so'da ka mai a. Metema ita ta nau tamanene fan soona, hapu nai bee ita bisa taladeak!