HOSEA 4:16 - Susula Malalaok Hehelu Palak Ma Hehelu Beuk

¹⁶ Hai hataholi Israel-la lemin, emi langa batu manseli! Tao leo bee fo Au bisa foo emi, sama leo bi'ilopo-a nai moo mana'uk-ka?”

HOSEA 4:16 Iomraidhean Croise

MAZMUR 78:8

fo ela sila boso sama leo sila bei-ba'i kain-nala fo ala hii lalena langa-lasa'ba soo, ma manamalelesik; bobongik fo namahehelen-na, ta matea-mahelek, ma ta lilineka leu Manetualain fa.

YESAYA 30:23

Metema, emi sele-nggali bini-ngges soona, neukose Manetualain fe u'dan, fo ela bini-ngges sila-la, ala moli, fo ala fe buna-boak fo, ana sasi kao-kao. Neukose Ana sadia fe emi bana-manum, moo mana'uk maloaina.

YESAYA 5:17

Neukose bi'ihiiana ma bi'ilopoana, la'a na'u nai kota manandefan-na, fo ala ta to'a-taa nana'ak fa.

YEREMIA 14:7

Au anang-ngala lalo bebou lae, ‘Manetualain, leomae ami sala-singom-mala tuni-ndeni ami tehu tulu-fali ami sama leo O hala-hehelum-ma. Ami la'o ela O do'e-do'e; Tete'ek-ka, ami masala-masingo neu O.

YEREMIA 3:11

Basa boema, Manetualain nafa'da au, nae leomae Israel nasadea Au so, tehu se'kona, Israel malole lena neme Yehuda fo ta manalilinekak ndia mai fa.

YEREMIA 3:6

Nai tepo lelek Mane Yosia paleta, Manetualain nafa'da au nae leo ia, “O mita basa hata fo Israel, inak fo ta manalilinekak ndia, tao-no'ik-ka so do beik? An la'oela Au, de ana sosoa-piao nai pupuku mademaina-la esa-esak lain, ma nai ai huu matuaina-la, esa-esak huun-na.

YEREMIA 31:18

Au amanene hataholi Israel-la lafa'da lae, henuk no dale he'dik-ka, ‘Ou Manetualain, ami sama leo bana-manu-a fo beita nakalilik na fan, tehu O manoli ami de ami mateme so, de besak ia ami mahele aon soaneu fali ma'im-ma lo O-a neu. Da'di mo falik ami ma'im-ma lo O-a neu, Ou Manetualain, fo ami Manetualaim-ma.

YEREMIA 5:6

Hu ndia de, neukose singa neme nula dale mai, fo taonisas, ma busa fuik-ka neme moo solokaek-ka mai, fo sii-sii lulu'is. Neukose meoasu-la lapanggela, fo ala sanga nana'an-na, nai deka no sila kotan-nala, fo ba'eneu hataholi see, fo ana kalua soona, neukose ala kaa-nan. Basa sila-la ala da'di, nanahu ala tao sala-singok makadotok so, ma lasadea Manetualain la'inono'ik.

YEREMIA 7:24

Tehu ala ta nau lamanene, ma ta nau taoafik fa. Nakalenak, ala tunga ka'da sila hihii-nanau mesan fo matea ma mangalauk ndia. Ala ta da'di malole fa, te mangalaun-nala, boetai nakadelek-ka.

YEREMIA 8:5

Tehu tao le'e de emi, fo Au anang-ngala, la'ok sala makandondoo henin, ma la'oela Au? Emi ho'u mahehele neu emi sosongo-tatangom, de emi ta nau fali ma'im-ma leo Au mai fa!

HOSEA 10:11

Makahulun-na, Israel sama leo sapi fa'di esa malelak-ka, fo ana nau heheta-aa'i gandum. Au ta paluu tao lange neu kandoo mana'a hiin ndia fa. Tehu besak ia, Au aketu basa soaneu Au lakan fo naue-nale'di belak. Au adenu Yehuda, fo nakau'uk, ma Au adenu Israel, fo nalelenu.

HOSEA 11:6

Natee-nata'tik-ka, neukose lua da'pa-da'pa losa leo sila kotan dale neu, neukose tao lalutu lelesuina-la, ma Au anang-ngala nanatao namopo-namatek. Dede'ak ndia ana da'di, nanahu ala tunga sila hihii-nanau mesan-nala,

HOSEA 11:7

ma latea-lahele soaneu la'oela Au. Hu ndia de, neukose nanatuni-ndenik-kala, fo leomae ala nggasi loke tutulu-fafalik boeo, ta hapu hataholi tulu-fali fas.”

IMAMAT 26:33

Neukose, Au fe natee-natatik-ka, da'di nai emi nusam-ma, fo ana tao tapasasala emi, nai nusa dea-la. Neukose, emi tinam-mala, ma emi kotam-mala nanapo'ilotak, fo ala da'di ai-batu madodouk.

ZAKHARIA 7:11

Tehu, Au anang-ngala langa batu, de ta nau lamanene makandondook fa, ma ala suleketu di'idoon-nala, fo ela boso lamanene.

SEMUEL SUSULAK-KA ESAN-NA 15:11

“Au asasale dale, so'u Saul da'di manek, nana ana lepos nasadea Au so, ma ana ta nakalala'ok Au paletang-nga fa.” Semuel dalen-na he'dis-sa, de le'odae katemak esa, ana haladoi neu Manetualain.