Михей 1:16 - Ыдыктыг Библия

¹⁶ Эргим ынак оолдарыңар дээш качыгдап, бажыңар дүгүн чулуп, дас куш ышкаш тас апарыңар, чүге дээрге оларны силерден чарып, тудуп аппаар-дыр.

Михей 1:16 Iomraidhean Croise

4 Хааннар 17:6

Осияның чагыргазының тоску чылында Салманассар Самарияны эжелеп ап, израильчилерни Ассирияже тудуп аппаргаш, оларны Халахка, Хавор хем чанында Гозанга болгаш Мидияның хоорайларынга чурттадып каан.

Иов 1:20

Иов ынчан туруп келгеш, качыгдалдан хевин ора тыртып, бажын чүлүп каапкаш, черже кээп дүжүп, Бурганга мөгейген.

Исайя 15:2

Ооң чурттакчылары бурганнарының өргээзинче чедип келген, Дивоннуң чурттакчылары ыдыктыг черже ыы-сыылыг чедип келген. Моав чон Нево болгаш Медева хоорайлар дээш ыглап-сыктаар – кажыыдал демдээ кылдыр бүгү улустуң бажын таарып, салын чүлүп каан.

Исайя 22:12

Аг-шериглиг Дээрги-Бурган-Чаяакчы силерге ол хүн ыглап-сыктаарын, качыгдалдан бажыңарны дөңгүрертир чүлүп, самдар хепти кедерин сүмелээн.

Иеремия 16:6

Бо черге ат-сураглыг-даа, карачал-даа улус өлүп каар, оларны орнукшутпас, олар дээш кажыыдавас, кым-даа олар дээш качыгдал демдээ кылдыр мага-бодун балыглавас, бажын чүлүвес.

Иеремия 4:8

Ынчангаш качыгдал хевинден кеткеш, ишкирнигип ыглажыңар, Дээрги-Чаяакчының килеңи бисти оюп эртер эвес.

Иеремия 47:5

Муңгаралдан Газа хоорайның чону бажын дөңгүрертир чүлүүр, Аскалон хоорайның чону үн чок апаар. Шынааның дириг арткан чурттакчылары, кажанга чедир боттарыңарны, качыгдалыңар демдээ кылдыр, балыглаар силер?»

Иеремия 6:26

Мээң күжүр чонум! Качыгдалдың самдар хевин кедип ал, хүлге боражып ал, эр чаңгыс оглуңнуң өлүмү дээш кажыыдаан дег, ыглап-сыкта, ондап-оста, чүге дээрге узуткакчы биске хенертен чедип кээр.

Иеремия 7:29

Сион-кыс, чажың үзе кескеш, ыңай октавыт, тейлерге ыыткыр кажыыдап ыгла, чүге дээрге Дээрги-Чаяакчы бо салгалга килеңнээш, ону хүлээп көрбейн, каапкаш барган-дыр.

Ыы-сыы 2:19

Дүннү өттүр, өйлеп-өйлеп, алгыр-кышкыр! Дээрги-Чаяакчы мурнун орта, суг-даа ышкаш, хөңнүң төп бер, кудумчулар белдиринде аштап өлүр чеде берген чаштарыңның амызы дээш, Аңаа тейлеп, холдарың сун! ר (реш)

Амос 7:11

Чүге дээрге Амос: „Иеровоам хылышка шаштырып өлүр, а израиль чонну бодунуң черинден тудуп аппаар“ – деп турду» – дээн медээ дамчытты.

Амос 7:17

Ол дээш Дээрги-Чаяакчы: „Сээң кадайың хоорайга самыын-садар херээжен апаар, оглу-кызың хылышка шаштырып өлүр, сээң чериңни хендир-биле хемчээп, үлеп-хуваап кааптар, а сен бодуң арыг эвес черге өлүр сен; израиль чонну бодунуң черинден тудуп аппаар!“ – деп чугаалаан».

Амос 8:10

байырлалдарыңарны – ажыг-шүжүг кылдыр, хамык ырларыңарны – ыы-сыы кылдыр хуулдурар мен, шуптуңарга качыгдалдың самдар хевин кедирип, шуптуңарның баштарын тазартыр таарып каар мен; чуртка ол хүннү кижиниң эр чаңгыс оглунуң өлүмү дээш кажыыдалы дег кылып каар мен, ол хүн төнчүзүнге чедир кажыыдал хүнү дег болур».

Ы. х. к. 28:41

Оглу-кызың төрүттүнер, ынчалза-даа чаныңга арттырып ап шыдавас сен, чүге дээрге оларны тудуп аппаар.