Иеремия 17:4 - Ыдыктыг Библия

⁴ Мээң сеңээ бергеним хувааглыг чериңни бодуңнуң бурууң-биле ышкынар сен. Мен сени билбезиң чуртче дайзыннарыңга кул кылдыр хүлээдир мен, чүге дээрге Мээң килеңим одун өөскүттүң, ол от мөңге кывар!»

Иеремия 17:4 Iomraidhean Croise

3 Хааннар 9:7

Мен израиль чонну силерге берген Мээң черимге турбас кылдыр узуткап каар мен, Бодумнуң алдар-адымга дээш ыдыктап кааным бо өргээден ойталаар мен. Израиль ынчан бүгү чоннарга бужар үлегер-чижек, кочу-шоот апаар.

4 Хааннар 25:21

Вавилоннуң хааны ол бүгү улусту хамат черде Ривла хоорайга шаажылап өлүрүп каан, а Иудеяның чонун бодунуң черинден көжүрүп үндүрген.

Неемия 9:28

Ынчалза-даа дыштанып алгаш-ла, олар катап база Сээң мурнуңга бузут үүлгедир болду. Ынчангаш Сен оларны дайзыннарының холунга хүлээдип бээриңге, дайзыннары оларны чагырып турду. А кажан олар катап база Сенден дуза дилеп, кыйгырарга, Сен дээрден дыңнап, Бодуңнуң өндүр улуг кээргелиң-биле оларны хөй катап камгалап турдуң.

Исайя 14:3

Ол хүн, кажан Дээрги-Чаяакчы сени качыгдал, хөлзээзин болгаш каржы-дошкун кулданыгдан адырып каарга,

Исайя 30:33

Мөчү-сөөктер өрттедир оңгар шагда-ла манай берген, Ассирияның хаанын хүлээп аарынга белен. Ханы болгаш калбак оңгарда улуг одагны салып каан, ында от өөскээн, хөй ыяш чыгдынган. Дээрги-Чаяакчының тыныжы ыяшты, чалбыышталган күгүр дег, кыпсыптар.

Исайя 5:25

Ол дээш, Дээрги-Чаяакчының килеңи Ооң чонунче кыптыгар; Ол Бодунуң холун оларже көдүрүп, эттеп-согар. Даглар сирилей бээр, улустуң мөчү-сөөктери кудумчуларда өдек-бок дег чыдып бээр. Ынчан безин Ооң килеңи чайлаттынмас, Ооң холу ам-даа улусту кезедип, көдүрлүр!

Исайя 50:11

А от кыпсып, чалбыыштыг согуннар белеткеп турар улус – силер шупту кыпсып алган согуннарыңар тудуп алгаш, одуңарның чырыынче чоруңар! Бурганның холунуң силер-биле кылыр чүвези бо-дур: хилинчек көрүп өлүр силер!

Исайя 66:24

А өргээмден үнүп тура, улус Меңээ удур үймээн үндүргеннерниң мөчү-сөөгүн көрүп каар; оларны курттар-даа, өшпес от-даа кезээ шагда чиир, олар бүгү кижи төрелгетенге ческинчиг болур».

Иеремия 12:7

Мен Бодумнуң оран-савамны, Бодумнуң ээлээн черимни каапкан мен, сеткилимден ынак чонумну дайзыннар холунга хүлээдип берген мен.

Иеремия 15:14

Бодуңнуң билбес чораан чериңче, дайзыннарыңче чоруур кылдыр сени албадаар мен, чүге дээрге Мээң килеңим от ышкаш кыптыгып, сени өрттедир деп тур!»

Иеремия 16:13

Ынчангаш Мен силерни бо черден силерниң-даа, ада-өгбеңерниң-даа билбес чорааны чуртче үндүр сывырар мен; силер аңаа өске бурганнарга хүндүс-даа, дүне-даа бараан болур силер, чүге дээрге силерже ээ көрүнмес мен.

Иеремия 18:23

А Сен, Дээрги-Чаяакчы, оларның меңээ удур кара сагыштыын, мени өлүрер деп турарын билир сен. Оларның кемниг херектерин өршээвейн көрем, оларның бачыттарын эскербээн бооп эрттирбейн көрем! Олар Сээң мурнуңга кээп ушсун – Бодуңнуң килеңнээн үеңде оларны ынчаар аажылап көрем!

Иеремия 2:14

Израиль чон – кул бе? Кулданыышкынга төрүттүнген чалча бе? Ол чүге олча апарды,

Иеремия 22:28

Таанда-ла ол кижи, Иехония, ажыы чок бузук дой доңга бе, херээ чок сава бе? Чүге ону ажы-төлү-биле кады оларның билбези чуртче сүрүп аппарганыл?

Иеремия 5:19

Улус: „Дээрги-Чаяакчы Бурганывыс бо бүгүнү бис-биле чүү дээш кылганы ол?“ – деп айтырарга, „Силер Оон ойталааш, бодуңарның чериңерге өске бурганнарга бараан болуп турдуңар, ынчангаш өске черге хары улуска бараан болур силер“ – деп харыылаар сен, Иеремия.

Иеремия 5:29

Таанда-ла ол бүгү дээш оларны кезетпес мен бе? – деп, Дээрги-Чаяакчы медеглээн. – Таанда-ла ындыг чондан өжээн негевес мен бе?

Иеремия 7:20

Ынчангаш Дээрги-Бурган-Чаяакчы: «Мээң хорадаан килеңим бо черни, кижилер болгаш мал-маганны, шөлде ыяштарны, черниң үнүш-дүжүдүн хөме аптар. Килеңим өшпейн кыптыгар!» – дээн.

Ыы-сыы 1:12

Эрткен-дүшкен чорумал чон, дилеп тур мен, эргилип кээп, көрүңер даан: өндүр килең хүнүнде Дээргимден кээр кеземчем дег, шак ол кончуг човалаң дег човалаң-даа турар деп бе?! מ (мем)

Ыы-сыы 5:2

Черивисти хары улус ээлеп алган, бажыңнарны өске улус чаза баскан.

Иезекиил 21:31

Мээң хорадаан сагыжым сенче кыптыгар, килеңимниң чалбыыжын сенче хадыдар мен, араатанзыг, өлүрүүшкүн кылып мергежээн улустуң холунга сени хүлээдип бээр мен.

Иезекиил 7:24

Мен эң каржы-бак чоннарны эккээр мен, олар израильчилерниң бажыңнарын эжелеп аар. Мен күштүг израильчилерниң турамык чоруунуң төнчүзүн салыр мен, оларның ыдыктыг черлери бужартаттырар.

Ы. х. к. 28:25

Дээрги-Чаяакчы сени дайзыннарыңга аштырып аар кылдыр хүлээдип бээр: оларга удур чаңгыс орук-биле тулчуп үнгеш, олардан чеди аңгы орук-биле дезип ыңай боор сен, бүгү чер-делегейниң күрүнелери сээң айыыл-халавыңны көргеш, „Дадайым!“ дээр.