Yoan 12:34 - Maaron Saveeŋ Tooni Patabuyaaŋ Tuam

³⁴ Eval tiina tilooŋ saveeŋ tooni tana, ve tiyol aliiŋa tighe: “Maaron aliiŋa tau tiboode na, saveeŋ ziiri ee isaav tauvene: Mesia pale ileep maata yaryaare le alok. Ighe tauvene, puughu mindai ta yo ughe Tamtamon Naatu aat tiiti izaa? Tamtamon Naatu tau yo usavia na, ene sei?” Mbo 89:36+, 110:4; Is 9:6+; Dan 7:14

Mutu (Oov)

³⁴ Ival tiina tilooŋ saveeŋ toni tonene, ve tipamuul aliŋa tighaze: “Maaron aliŋa to timbooda, saveeŋ waaro eez isaav tovene: Mesia pale ineep mata iyaryaar le alok. Ighaze venen, pughu vena to yom ughaze Tamtoghon Natu pale tiiti iza? Tamtoghon Natu to yom usavia, nene sei?” Mbo 89:36+, 110:4; Is 9:6+; Dan 7:14

Yoan 12:34 Iomraidhean Croise

Matayu 16:13

Yesu tomania mbiwa tooni tilaagh tila le tivot taan sirivu tau igharau nugh Sisarea Pilipai. Ra ighason zi ighe: “Laak, tamtamon tigham ŋgar pa Tamtamon Naatu tighe i sei?”

Matayu 21:10

Yesu iloŋ ila Yerusalem, ve yes Yerusalema tisov tisaŋeeŋ ve tivaghasoni zi tighe: “Saa ŋeer tawe?”

Matayu 8:20

Yesu iyol aliiŋa ighe: “Ŋgavuun sagsagŋa lezi niazi ila taan puura. Ve man tau tirovroov ila taitai saamba, lezi rumazi izala ai. Eemon Tamtamon Naatu, i le niia eta to ghenooŋ mako.” 2Kor 8:9

Yoan 10:34

Yesu isaav pazi muul ighe: “Yam awatagh mako? Saveeŋ ziiri ee tau igheen ila tutuuŋ tsiam na, isaav tauvene: Maaron isaav pa daaba siriv ighe: ‘Yau nasaav payam: Yam zimaronŋa.’ Daaba tawe, yes tamtamon to taan. Eemon Maaron aliiŋa tau iŋarui zi na, iwaat zi ighe yes zimaronŋa. Ve iit tawatagh: Maaron aliiŋa tau tiboode na, irau toraaŋni mako. Igheen tauvene. Mbo 82:6; Mt 5:18

Yoan 12:32

Aazne, yau naleep izi taan. Eemon murei, saawe tau tiit ghau nazaa, ene pale nagherev tamtamon tisov tilam tsiau.” Yo 3:14, 8:28; Ro 5:18

Yoan 15:25

Ŋgar tau tigham payau na, ene itaghon saveeŋ tau muuŋ tiboode ila tutuuŋ toozi. Isaav ighe: ‘Yes tighur koi payau sorok.’ ” Mbo 35:19, 69:4

Yoan 8:28

Tauvene Yesu iseeŋ saveeŋ tooni muul ighe: “Saawe tau yam apayooz Tamtamon Naatu izaa, ene pale ŋgar tsiam ivot, ve aghilaal aghe: Maaron tau eeza YAU NALEPLEEP, ene yau taug tane. Ve awatagh aghe yau nagham gabua eta itaghon taug ŋgar tsiau mako. Saveeŋ tau nalooŋa ila to Tamaŋ, tauta navovotia pa tamtamon. Yo 5:30, 12:32, 14:24

Rau Tau Paulus Iboode Pa Yes Roma Rom--Romans 3:19

Iit tawatagh: Saveeŋ isov tau igheen ila tutuuŋ to Mose na, ene iŋarui yes Yuda tau tileep ila tutuuŋ tawe saamba. Eemon yes titaghon duduŋai tutuuŋ tana mako. Tauvene iit tamtamon tasov tau taleep izi taan ne, tutuuŋ to Maaron igheen to ipoon avoon ve ipaburigin ŋgar toit. Leso taghilaal sosor toit, ve tawatagh taghe Maaron pale ighur atuya pait. Ro 3:9, 23, 4:15

Rau Tau Paulus Iboode Pa Yes Roma Rom--Romans 5:18

Tauvene onoon, Adam, i tamtamon eemon. Ve saawe tau izoor Maaron aliiŋa, ve imalaaŋ pa tutuuŋ tooni, sosor tooni tawe, tauta imin puughu pa Maaron ighur atuya pa tamtamon tisov. Krisi tauvene paam. I ŋeer eemon. Ve itaghon katin ŋgar duduuŋa, tauta igham eval tiina tiduduuŋ ila Maaron maata, ve tigham lepoogh poia ila tooni. Ro 6:23; Pil 2:8; Hib 5:8+; 1Yo 2:2

Hibru 7:24

Eemon uraat to Yesu, ene irau isov mako. Pasaa, i ŋeer to watooŋrau tau ileep irau saawe.