Saveeŋ Yoŋgaaŋ 5:8 - Maaron Saveeŋ Tooni Patabuyaaŋ Tuam

⁸ I igham rau tawe, ve gabua matazi yaryaare paaŋ tomania ŋginiiŋa tamoot ee ve paaŋ (24) tila titap tizi ila i naagho, ve tipakuru. Yes eŋaeŋa tikis gabua imin gita ve oon geegeu tau tigharaat zi pa gol na le irau zi. Oon tawe tivon pa naunauŋ popoia. Naunauŋ tawe, ene suŋuuŋ to Maaron tamtamon tooni patabuyaaŋa. Mbo 141:2; Hib 13:15; Syg 4:8+, 8:3+, 15:2

Mutu (Oov)

⁸ Ye igham rau tonowen, ve mbeb matadi yaryaara paaŋ toman ŋginiiŋa tamoot ee ve paaŋ (24) tila titap tizi ila mata, ve tipakuri. Yes eŋaeŋa tikis mbeb inimale gita, ve oon geegeu to tigharaat di pa gol le irau di. Oon tonowen tivon pa naunauŋ popoia. Naunauŋ tonowen, nene suŋuuŋ to Maaron tamtoghon toni patabuaŋa. Mbo 141:2; Hib 13:15; Syg 4:8+, 8:3+, 15:2

Saveeŋ Yoŋgaaŋ 5:8 Iomraidhean Croise

Yoan 1:29

Mboŋ le nughizau muul, ve Yoan ighita Yesu ilaagh ŋaruini ilam. Tauvene isaav ighe: “Aghita. Ewe sipsip to Maaron. I ilam pa rewaaŋ sosor to tamtamon to taan. Igham 12:3+; 1Kor 5:7; 1Pe 1:19; Syg 5:6

Yoan 5:23

Leso tamtamon tisov tighita Naatu tighe i le eeza, ve titandagh pani raraate imin titandagh pa Taama Maaron. Ve isaav ighe tamtamon eta itandagh pa Maaron Naatu mako, ene itandagh pa Maaron mako paam. Pasaa, i ta imbaaŋ Naatu izilam taan. Lu 10:16; Pil 2:10+; 1Yo 2:23

Hibru 1:6

Ve saawe tau Maaron ighe imbaaŋ Naatu aidaaba izilam taan, i isaav tauvene: “Aŋela tisov to Maaron aat tiput aghezi pani, ve tipakuru.” Mbo 97:7

Saveeŋ Yoŋgaaŋ 13:8

Ve eval tiina to taan tiput aghezi pa gabua tawe ve tipakuru. Ene yes tau ezazi igheen ila rau to lepoogh maata yaryaare mako. Rau tawe, Sipsip to Maaron tau tiravu imaat na, ta iŋgini. Muuŋ geeg, saawe tau Maaron ighur sambam ve taan soone, i ibood tamtamon tooni ezazi ila rau tawe pataghaaŋ wa. Lu 10:20; Ep 1:4; Syg 17:8, 20:12+

Saveeŋ Yoŋgaaŋ 15:2

Ve naghita gabua ite. Tigharaata pa galas tomania yav. Gabua tawe, ghitooŋa imin te, ve Maaron tamtamon tooni tiyooz ila ziige. Ene yes tau tiyooz ariaaŋ, ve tiliiv gabua saghati tomania anunu, ve ilaal to eeza. Yes tiput aghezi pani mako, ve tigham ilaal to eeza mako. Yes tikis gita tau Maaron igham pazi na, ve tipait Maaron eeza. Syg 4:6, 12:11, 13:15+

Saveeŋ Yoŋgaaŋ 15:7

Ra gabua matazi yaryaare paaŋ, toozi ee irei oon geegeu liim ve ru le irau zi. Oon liim ve ru tawe, tigharaat zi pa gol, ve tivon kat pa aatyavyav to Maaron tau ileep irau saawe.

Saveeŋ Yoŋgaaŋ 19:4

Ra ŋginiiŋa tamoot ee ve paaŋ (24), tomania gabua matazi yaryaare paaŋ, titap tizi, ve tipait Maaron tau ileep ila niia to ghamuuŋ pooz na eeza tighe: “Aleluia! Onoon kat. Iit tapait Maaron eeza!”

Saveeŋ Yoŋgaaŋ 4:10

Ve saawe tau tigham tauvene, yes ŋginiiŋa tamoot ee ve paaŋ tila titap tizi ila i naagho, ve tipakuru paam. Ve tizugh moghar toozi tau igheen izala dabazi na tizi, ve tighur zi ila ŋeer tawe niia to ghamuuŋ pooz naagho, ve tipait eeza tighe:

Saveeŋ Yoŋgaaŋ 4:4

Ve naghita ŋginiiŋa tamoot ee ve paaŋ (24) tileep ila niazi to ghamuuŋ pooz ve tilivut Maaron niia to ghamuuŋ pooz. Yes tinonogh zi pa nonoghiiŋa pisosooŋa, ve moghar ndamoonda to kinik tigheen izala dabazi. Moghar toozi tawe, tigharaat zi pa gol.

Saveeŋ Yoŋgaaŋ 4:6

Ve gabua ite igheen ta sewe paam. Ghitooŋa imin te. Tigharaata pa galas tau ŋgalaaŋa kat. Ve gabua matazi yaryaare paaŋ tiyooz livutin Maaron niia to ghamuuŋ pooz. Gabua paaŋ tawe, matazi katini, irau anoŋazi dodoli. Matazi igheen pa naghozi ve murizi paam. Ezek 1:5+; Is 6:1-3

Saveeŋ Yoŋgaaŋ 4:8

Gabua paaŋ tawe lezi bagezi liim ve ee le irau zi. Ve matazi katini kat. Irau anoŋazi ve bagezi paam. Ve yes timariau mako. Mboŋ ve mataaz, tipapait Maaron eeza tighe: “Tiina toit Maaron, i saksaki ve iŋgin gabua naol isov. I patabuyaaŋ, le patabuyaaŋ, le patabuyaaŋ kat! I ileep muuŋ geeg, ileep aazne, ve murei i pale ilam.” Is 6:2+; Syg 1:4

Saveeŋ Yoŋgaaŋ 5:11

Ra matag ila muul le naghita aŋela katini kat ve nalooŋ aliŋazi. Yes ndiŋndiŋ, ve ndiŋndiŋ, ve ndiŋndiŋ. Irau tanin zi mako. Tilivut Maaron niia to ghamuuŋ pooz, tomania gabua matazi yaryaare paaŋ ve yes ŋginiiŋa tamoot ee ve paaŋ (24) tawe.

Saveeŋ Yoŋgaaŋ 5:12

Yes timbou toman aliŋazi tiina tighe: “Sipsip to Maaron tau tiravu imaat na, i irau kat pa tapiri, kuaz, ve ŋgar ta naol ne. I saksaki ve eeza tiina. Ve i mbonari tiina ve poia puughu. Tauvene tapait eeza, o iduduuŋ.”

Saveeŋ Yoŋgaaŋ 5:14

Ve gabua matazi yaryaare paaŋ tiyolyol saveeŋ tighe: ‘Onoon! Onoon!’ Ve yes ŋginiiŋa tamoot ee ve paaŋ paam, titap tizi ve tipait Maaron tomania Sipsip tooni.

Saveeŋ Yoŋgaaŋ 5:6

Ra matag ila le naghita Sipsip ee iyozyooz igharau Maaron niia to ghamuuŋ pooz. Ve gabua matazi yaryaare paaŋ tomania yes ŋginiiŋa tamoot ee ve paaŋ (24) tilivuti. Sipsip tawe ghitooŋa imin muuŋ tiravu imaat. I le zooŋa liim ve ru. Ve maata paam, liim ve ru. Maata tawe, ene Maaron Avuvu liim ve ru tau i imbaaŋ zi tila tirau taan. Is 53:7; Yo 1:29; 1Kor 5:7

Saveeŋ Yoŋgaaŋ 6:1

Ra yau naghita Sipsip to Maaron igham rau tau bagil liim ve ru tigheen ila na, ve iwalaav bagil ee imin maata. Ve nalooŋ gabua matazi yaryaare paaŋ, toozi ee iboob aliiŋa tiina kat imin lalaav luutu ighe: “Ulam!”