Saveeŋ Yoŋgaaŋ 13:1 - Maaron Saveeŋ Tooni Patabuyaaŋ Tuam

¹ Ra matag ila le naghita gabua saghati ee izaa bokia ila te paavo. Gabua tawe, daaba liim ve ru ve zooŋa saŋavul. Zooŋa tawe, moghar ndamoonda saŋavul imin to yes kinik tigheen ila. Ve tibood saveeŋ naol ila daaba liim ve ru tawe timin gabua tawe eeza. Eeza tawe, isaav ighe ŋeer eta to taan igham zi, ene ivelegh Maaron ve ipait tauu eeza sorok imin i Maaron. Dan 7:2+; Syg 11:7

Mutu (Oov)

¹ Ghoro matag ila le naghita mbeb samia eez ineep te lolo ve bokia iza. Mbeb tonowen, daba liim ve ru, ve ndooŋa saaŋgul. Ndooŋ toni saaŋgul tonowen, moghar saaŋgul tinimale moghar to yes kinik tineep ila. Ve timbood saveeŋ naol ila daba liim ve ru tinim mbeb tonenen iza. Iza naol tonowen, ighaze ŋgeu eta to taan igham di, nene iveleg Maaron ve ipait tau sorok inimale ye Maaron. Dan 7:2+; Syg 11:7

Saveeŋ Yoŋgaaŋ 13:1 Iomraidhean Croise

Saveeŋ Yoŋgaaŋ 11:7

Tauvene yesuru pale tipariaaŋ tamtamon to tighur ila Maaron aliiŋa. Ve saawe tau tipasov uraat toozi tawe, ene pale gabua saghati ipul puura tau le puughu mako na, ve izaa gha iparav tomani zi. Mako iliiv zi ve irav zi timaat. Dan 7:21; Syg 13:1-7

Saveeŋ Yoŋgaaŋ 12:3

Malau mako ve gabua ite ivot izi sambam imin ilaal. Naghita moot tiina ee. Tiini siŋsiŋai imin yav ŋgilaaŋi. Ve daaba liim ve ru, ve zooŋa saŋavul. Ve moghar ndamoonda liim ve ru imin to yes kinik tigheen irau daaba liim ve ru tawe. Dan 7:7

Saveeŋ Yoŋgaaŋ 13:11

Ra matag ila le naghita gabua saghati ite ileep taan loolo ve izaa. Zooŋa ru imin sipsip. Eemon saveeŋ tooni, ene raraate imin moot.

Saveeŋ Yoŋgaaŋ 13:15

Ve Maaron ipul gabua saghati tau imin ru na igham gabua ŋgereeta ite. Iitete anunu tau tigharaata na, i ighamu le anunu tawe imin gabua tau ileep maata yaryaare ve isavsaav. Ve yes tau tiput aghezi pa anunu tawe mako na, anunu tawe pale isaav, ve tirav zi timaat. Dan 3:4+

Saveeŋ Yoŋgaaŋ 15:2

Ve naghita gabua ite. Tigharaata pa galas tomania yav. Gabua tawe, ghitooŋa imin te, ve Maaron tamtamon tooni tiyooz ila ziige. Ene yes tau tiyooz ariaaŋ, ve tiliiv gabua saghati tomania anunu, ve ilaal to eeza. Yes tiput aghezi pani mako, ve tigham ilaal to eeza mako. Yes tikis gita tau Maaron igham pazi na, ve tipait Maaron eeza. Syg 4:6, 12:11, 13:15+

Saveeŋ Yoŋgaaŋ 16:13

Ve naghita avuvu sasaghati tol. Ghitoŋazi imin gob. Ee ivot ila moot aavo, ite ivot ila gabua saghati aavo, ve ite imin tol pani, ene ivot ila propet karom tau igham gabua saghati naagho na aavo. 1Yo 4:1+; Syg 12:3+, 13:1,11

Saveeŋ Yoŋgaaŋ 17:16

Gabua saghati zooŋa saŋavul tau ughit zi na, ene izaa to kinik saŋavul. Murei pale yesŋa gabua tawe titoor ŋgar toozi, ve tighur koi pa livaa to eez tawe, ve tivaghamunia kat. Pale tiraŋgat nonoghiiŋa tooni le kambaŋmbaŋi, ve tighan miiza, mako tisiki izala yav ighani gha ilale. Ezek 16:37+; Syg 18:8

Saveeŋ Yoŋgaaŋ 17:3

Ra Avuvu Patabuyaaŋ tapiri izaa tsiau, ve aŋela tawe igham ghau nala navot nugh ŋginaaŋa. Navot ta sewe, le naghita livaa ee ilepleep. Mboole izala gabua saghati ee paavo. Gabua tawe, tiini siŋsiŋai kat ve bodeeŋ naol irau tiini isov. Bodeeŋ tawe, ene imin eeza. Eeza naol tawe, pughuzi eemon. Pughuzi tauvene: I ivelegh Maaron ve ipait tauu eeza ighe i Maaron. Gabua tana, daaba liim ve ru, ve zooŋa saŋavul. Syg 13:1-8

Saveeŋ Yoŋgaaŋ 17:5

Ve tibood livaa tana eeza ila ndaamo. Eeza tawe, saveeŋ palelaaŋ. Isaav tauvene: “Ene nugh tiina Babilon. Zilivaa to eez, tomania tamtamon tisov tau tighamgham ŋgar sasaghati kat izi taan, i ta imin tinazi. Pasaa, i ta ipapazaagh zi pa ghamuuŋ ŋgar tauvene.” Syg 14:8

Saveeŋ Yoŋgaaŋ 19:19

Ra naghita gabua saghati ve yes kinik to taan tomania zaaba toozi tilam tilup zi tighe tigham malmal pa ŋeer tau ileep izala hos pisosooŋa paavo na, tomania zaaba tooni. Mbo 2:2; Syg 16:14+, 17:12+