Rau Tau Paulus Iboode Pa Yes Roma Rom--Romans 3:25 - Maaron Saveeŋ Tooni Patabuyaaŋ Tuam

²⁵ Maaron ighur Krisi to imaat imin watooŋrau, leso siŋ tooni ireu sosor to tamtamon ve itatan aatyavyav to Maaron. Tauvene yes tau tighur ila tooni na, i aat ireu sosor toozi isov ilale. Yes tau muuŋ tigham sosor na paam, Maaron loolo isaghatin zi, tauta ivaghamun zi mako ve ipul zi tileep. Ŋgar tooni tawe, ene iduduuŋ. Pasaa, i iwatagh ighe murei Naatu pale ibaad sosor toozi atuya. Mbaŋ 13:38+; 2Kor 5:19; Kol 1:20

Mutu (Oov)

²⁵ Maaron ighur Krisi ighaze imaat inim watooŋrau, leso siŋ toni ireu sosor to tamtoghon, ve itatan mbalmbali to Maaron. Tovenen yes to tighur ila toni, ye pale ireu sosor todi isob ilale. Yes to muuŋ tigham sosor ne paam, Maaron lolo isamin di, tauto iwaghamun di maau ve ipul di tineep. Ŋgar toni tonowen, nene deŋia. Pasa, ye iwatag ighaze muri, Natu pale imbaad sosor todi atia. Mbaŋ 13:38+; 2Kor 5:19; Kol 1:20

Rau Tau Paulus Iboode Pa Yes Roma Rom--Romans 3:25 Iomraidhean Croise

Yoan 6:47

“Onoon kat, yau nasaav payam: Isaav ighe tamtamon eta ighur ilam tsiau, ene i igham lepoogh poia ila to Maaron wa. Ve i pale ileep tauvene taghon taghon gha ila. Yo 3:36; 1Yo 5:13

Uraat To Yes Mbaŋooŋa 14:16

Muuŋ, saawe to timbuunŋa ve ilam, i ipul nugh nugh titaghon tauzi ŋgar toozi. Mbaŋ 17:30

Uraat To Yes Mbaŋooŋa 15:18

Saveeŋ tane, ene Maaron aliiŋa. I tauu ivotia alok wa.’ ” Is 45:21

Uraat To Yes Mbaŋooŋa 17:30

“Muuŋ, tamtamon matazi dodoli, ve tikankaan pa Maaron. Tauta loolo kuruŋia pazi, ve maata ila pa sosor toozi geeg mako. Eemon aazne, i isaav ariaaŋ pa nughmariŋ ighe tipul ŋgar toozi sasaghati ileple, ve titoor ŋgar toozi ila pani. Lu 24:47; Mbaŋ 14:16; Ro 3:25; Tit 2:11+

Uraat To Yes Mbaŋooŋa 2:23

Ŋgar tau ivot pa Yesu na, Maaron igham ŋgar pani alok wa. I ighur Yesu ila nimamim itaghon tauu ŋgar tooni. Tauta akisi ve aghuru ila yes Roma tau tikankaan pa tutuuŋ tooni na nimazi, ve anazi tiravu izala ai pambarooŋ gha imaat. Is 53:10; Mbaŋ 4:28

Uraat To Yes Mbaŋooŋa 3:18

Ve alooŋ. Muuŋ, Maaron ivotia aliiŋa ila propet tooni tisov avozi ighe Mesia tooni aat ibaad pataŋani ve iyamaan yavyavuuŋ tiina. Ŋgar tau yam agham pa Yesu, ene eez tau Maaron aliiŋa tawe anooŋa ivot. Mbo 22; Is 53:5+; Lu 24:44; 1Pe 1:10+

Uraat To Yes Mbaŋooŋa 4:28

Eemon ŋgar tau tigham pani, ene itaghon taum ŋgar tsio. Muuŋ ughe: ila taum tapirim, yo pale ugham gabua tane ivot. Mbaŋ 2:23

Rau Tau Paulus Iboode Pa Yes Roma Rom--Romans 2:4

Ughita. Maaron itotoi poia tooni tiina kat payo. Pasaa, i itatan aate, ve ighur atuya payo rekia mako. Mindai, matam veleghin poia tooni tawe? Ughilaal, ma mako? I igham tauvene, leso igham gherev payo, ve utoor ŋgar tsio. Igham 34:6+; Ep 2:4+; 2Pe 3:9,15

Rau Tau Paulus Iboode Pa Yes Roma Rom--Romans 3:26

Ve aazne tauvene paam. Isaav ighe Maaron loolo isaghatin yes tau tighur ila to Krisi na, ve ireu sosor toozi, ve igham zi tiduduuŋ ila i maata, ene iduduuŋ. Pasaa, Krisi ibaad sosor toozi atuya wa.

Rau Tau Paulus Iboode Pa Yes Roma Rom--Romans 5:1

Tauvene, iit tau taghur ila to Krisi, taduduuŋ ila Maaron maata wa. Ve Tiina toit Yesu Krisi irav motin koi tau muuŋ isap itiŋa Maaron sosoon na. I imin eez pait, tauta aazne itiŋa Maaron tavalupu ghiit tamin eemon wa. Mbaŋ 10:36; Ro 3:28; 2Kor 5:19; Ep 2:13+; Kol 1:20

Rau Tau Paulus Iboode Pa Yes Roma Rom--Romans 5:11

Ve tane mon mako. Iit tintiniin pa Maaron, ve tapaiti ila Tiina toit Yesu Krisi eeza. Pasaa, Krisi imin eez pait, tauta aazne, itiŋa Maaron tavalupu ghiit tamin eemon wa.

Rau Tau Paulus Iboode Pa Yes Roma Rom--Romans 5:18

Tauvene onoon, Adam, i tamtamon eemon. Ve saawe tau izoor Maaron aliiŋa, ve imalaaŋ pa tutuuŋ tooni, sosor tooni tawe, tauta imin puughu pa Maaron ighur atuya pa tamtamon tisov. Krisi tauvene paam. I ŋeer eemon. Ve itaghon katin ŋgar duduuŋa, tauta igham eval tiina tiduduuŋ ila Maaron maata, ve tigham lepoogh poia ila tooni. Ro 6:23; Pil 2:8; Hib 5:8+; 1Yo 2:2

Rau Tau Paulus Iboode Pa Yes Roma Rom--Romans 5:9

Ve ighe tauvene, iit tawatagh kat taghe: Krisi pale igham mulin ghiit pa aatyavyav to Maaron tau pale ivot pa Mboŋ Murei na paam. Pa aazne, siŋ tooni igham ghiit taduduuŋ ila Maaron maata wa. 1Tes 1:10

1 Korin 5:7

Tauvene asik yis tsiam muŋgaana isov ilale. Leso lupuuŋ tsiam imin mberet paaghu tau le yis mako. Yau nawatagh: Yam amin mberet paaghu tau le yis mako na wa. Pasaa, Krisi, i imin sipsip toit to Pasova tau tiravu imaat imin watooŋrau, leso ireu sosor toit. Igham 12:3+; Yo 1:29; 1Pe 1:19

2 Korin 5:21

Aghita. Krisi, i le sosor eta mako. Eemon Maaron ighur sosor toit izaa tooni ve imaat imin watooŋrau to ireua. Leso iit tau tapaak Krisi ne, tamin tamtamon duduŋazi ila Maaron maata. Is 53:6+; Ro 5:19; Ga 3:13; Pil 3:9; 1Yo 3:5

Epesus 1:7

Poia to Maaron, ene tiina le tiina kat. Iit tamtamon tau tapaak Krisi ve taleep ila tooni na, siŋ tooni ipas ghiit tavot pa saghati tapiri, ve ireu sosor toit isov ilale. Ro 3:24; Kol 1:14; Hib 9:12; 1Pe 1:18+

Epesus 2:13

Eemon aazne, yam amin Krisi le ve apaak ila tooni. Tauvene yam zeran tau muuŋ aleep soghan pa Maaron na, Krisi siŋ tooni imin eez payam gha alam agharau Maaron wa. Ro 5:2; Kol 1:20; Hib 12:23

1 Timoti 1:15

Yesu Krisi, i izilam taan to igham mulin iit tamtamon sasaghatiin pa pataŋani to sosor toit. Saveeŋ tane, onoon kat. Irau taghur ila, ve takisi igheen ariaaŋ ila loloon. Ve yau ta naliiv tamtamon tisov pa ghamuuŋ sosor. Mt 1:21; Mk 2:17; Lu 19:10

Hibru 10:4

Pasaa, siŋ to makau ma mekmek, ene irau ireu sosor to tamtamon mako.

Hibru 11:14

Tamtamon tau tisaav tauvene, ene tipaghazoŋai tauzi tighe nugh toozi duduuŋ eta aat ighengheen. Tauta tiliilo soone.

Hibru 11:17

Abaram ighur ila to Maaron. Tauta saawe tau Maaron itoova ve isaav pani ighe irav naatu eemon Isak imaat imin watooŋrau, i ighe igham tauvene itaghon Maaron aliiŋa. Onoon, muuŋ Maaron imbu saveeŋ pani ighe: “Paaghu tsio duduuŋ pale tivot ila to natum Isak.” Eemon Abaram iŋguruut naatu tawe mako. Gnp 21:12, 22:1+; Yems 2:21+

Hibru 11:7

Noa ighur ila to Maaron ve iroron pani. Tauvene saawe tau Maaron isaav taraini pa pataŋani tau ighe ivot na, i itaghon Maaron aliiŋa ve igharaat waaŋ. Onoon, pataŋani tauvene ivot aaz eta gha tamtamon tighita soone. Eemon Noa ighur ila Maaron aliiŋa. Tauta iuul tauu tomania azaawa, ve natŋa tomania azuwazŋa ve tileep poi. Tilalez mako. Ŋgar tau i ighamu, ene ipaghazoŋai ŋgar saghati to tamtamon tau tileep izi taan pa saawe tana gha ivot ighazooŋ. Ghuruuŋ ila tooni tawe, tauta Maaron ighita ighe i ŋeer duduuŋa. Gnp 6:13+; Ro 3:22

Hibru 9:28

Krisi tauvene paam. I iyoki tauu gha imaat imin watooŋrau pai eemon, ve isov. I ibaad pataŋani tiina, leso ireu sosor to tamtamon katini. Ve murei, i pale imuul izilam. Saawe tana, i irau igham uraat muul pa rewaaŋ sosor to tamtamon mako. I ilam to igham mulin yes tau tighurghur matazi pani ve tisasaŋani. Mt 26:28; Ro 6:10; Pil 3:20; Tit 2:13

Hibru 9:5

Ve tighur aŋela anunuzi ru izala bokis tana paavo ve bagezi ipoon aavo. Gabua ru tawe timin ilaal pa Maaron mbonari ve tapiri. Bokis tana aavo, ene tiwaato tighe ‘nugh to rewaaŋ sosor.’ Eemon aazne, irau nila saveeŋ tane loolo mako.

1 Yoan 1:10

Tauvene isaav ighe tasaav taghe iit tagham sosor eta mako, ene itotoi ghiit ighe saveeŋ to Maaron igheen ila loloon mako. Ve ene imin tasaav pani taghe i ŋeer to karom.

1 Yoan 2:2

I imaat imin watooŋrau, leso ireu sosor toit, ve itatan aatyavyav to Maaron. Uraat tooni tawe, i igham pa iit mon mako. Igham pa tamtamon tisov to taan. Yo 1:29; Ro 3:25; Kol 1:20; Hib 2:17

1 Yoan 4:10

Ŋgar to loloon pa Maaron ve tamtamon, iit tataghoni irao mako. Eemon Maaron, i loolo pait kat. Aghita. I imbaaŋ Naatu anooŋa eemon izilam taan, ve imaat imin watooŋrau to ireu sosor toit ve itatan aatyavyav to Maaron. 1Yo 2:2

Saveeŋ Yoŋgaaŋ 1:5

Yesu Krisi, i loolo eemon, ve ipariaaŋ saveeŋ onoon. Leso tamtamon tighur ila. I ta iburig pa mateegh imin maata. Ve i ta imuuŋ pa gabua naol isov, ve iŋginiir kinik tisov to taan. I loolo igheen toit kat. Tauta siŋ tooni imaliŋ pa sosor toit, ve ipas ghiit tavot pa saghati tapiri. Mbo 89:27; Yo 18:37; 1Kor 15:20; Syg 19:16

Saveeŋ Yoŋgaaŋ 13:8

Ve eval tiina to taan tiput aghezi pa gabua tawe ve tipakuru. Ene yes tau ezazi igheen ila rau to lepoogh maata yaryaare mako. Rau tawe, Sipsip to Maaron tau tiravu imaat na, ta iŋgini. Muuŋ geeg, saawe tau Maaron ighur sambam ve taan soone, i ibood tamtamon tooni ezazi ila rau tawe pataghaaŋ wa. Lu 10:20; Ep 1:4; Syg 17:8, 20:12+

Saveeŋ Yoŋgaaŋ 20:15

Tauvene sei tau ighe eeza igheen ila rau to lepoogh maata yaryaare mako, ene pale tisiki izila puura tiina tau yav ighanghan ila na. Mt 13:40+, 25:41

Saveeŋ Yoŋgaaŋ 5:9

Yes tipait Sipsip to Maaron pa mbouŋ paaghu ee tighe: “Yo poiam kat irau to ugham rau tana, ve uwalaav bagil pani, ve uraraava. Pasaa, tirav ghom umaat, ve siŋ tsio igham mulin eval tiina gha timin Maaron le wa. Tinizi, tomania aliŋazi ve gabuazi, ene ite ite. Ve yes to nugh mariŋ. Mbo 96:1, 98:1+; 1Pe 1:18+