Rau Tau Paulus Iboode Pa Yes Roma Rom--Romans 3:22 - Maaron Saveeŋ Tooni Patabuyaaŋ Tuam

^22-23 Eez tane, ene eez to ghuruuŋ ila. Tamtamon tisov tau tighur ila to Yesu Krisi na, Maaron pale ighit zi ighe tiduduuŋ ila i maata. Yes Yuda, ve yes tau Yuda mako na paam. Pasaa, tamtamon eta iliiv iitete mako. Iit tasov rarateen mon. Tasov tasosor wa. Pasaa, tataghon Maaron gabua ve ŋgar tooni irao mako. Ŋgar ve lepoogh toit, ene itotoia ighe i eeza tiina ne mako. Ro 1:17, 11:32; Ga 3:22

Mutu (Oov)

^22-23 Ataam tonene, nene ataam to ghurla. Tamtoghon tisob to tighur ila to Yesu Krisi, Maaron pale ighita di ighaze tineep deŋiadi ila mata. Yes Yuda, ve yes to Yuda maau ne paam. Pasa, tamtoghon eta ilib pa ita ite maau. Iit tasob rarateed moghon. Tasob tasosor wa. Pasa, tataghon Maaron gabua ve ŋgar toni iraua maau. Ŋgar ve nepooŋ toit, nene ipatooŋa ighaze ye iza tiina ne maau. Ro 1:17, 11:32; Ga 3:22

Rau Tau Paulus Iboode Pa Yes Roma Rom--Romans 3:22 Iomraidhean Croise

Lukas 15:22

“Eemon taama irav motin saveeŋ tooni, ve isaav pa yes besooŋa tooni ighe: ‘Ai, yam rekia ala agham nonoghiiŋa malaua tau paghuuna kat na ilam, ve anonogh natug tane pani. Ve agham ring, ve aghuru ila niima ŋguruuŋa, ve azeev zuzuuŋa ila aaghe.

Uraat To Yes Mbaŋooŋa 11:12

Avuvu Patabuyaaŋ isaav payau ighe nagham ŋgar naol sov, ve nala tomani zi gha yeŋa nila. Tauvene yeŋa toŋvetaz liim ve ee tane, niburig gha nila. Nilaagh nila nivot nugh Sisarea, ve malmalimai niloŋ nila Konili ruum tooni.

Uraat To Yes Mbaŋooŋa 15:9

I igham ŋgar ite ite mako. Itaghon ŋgar raraate mon pa iit, ve yes paam. Pasaa, i igham lolozi iŋgalaaŋ itaghon ghuruuŋ ila toozi. Mbaŋ 10:43+; Ro 10:9+

Uraat To Yes Mbaŋooŋa 3:16

Etaan tane, yam awatagh pataŋani tooni. Yesu eeza ve tapiri mon, tauta igham ŋeer tane tapiri ivot ve tiini poia. Gabua ite paam mako. Yesu ipaburigin ghei gha nighur ila tooni ariaaŋ. Ve ghuruuŋ ila tsiei tau iŋarui Yesu, tauta iuul ŋeer tane gha tiini poia, ve aazne iyooz ila naghomim. Lu 17:19; Mbaŋ 4:10

Rau Tau Paulus Iboode Pa Yes Roma Rom--Romans 1:17

Vaaru poia ipaghazoŋai ghiit pa eez tau Maaron igham mulin ghiit itaghon saveeŋ mbuaaŋ tooni, ve igham ghiit taduduuŋ ila i maata. Ene eez to ghuruuŋ ila. Eez ite paam mako. Tamtamon tau ighe ighur ila to Krisi, ene aat Maaron ighita ighe iduduuŋ ila i maata. Ene imin Maaron aliiŋa tau tiboode na isaav: “Tamtamon tau ighe ighur ila, ene aat iduduuŋ ila Maaron maata ve igham lepoogh poia ila tooni.” Hab 2:4; Ro 3:21+; Ga 3:11; Pil 3:9

Rau Tau Paulus Iboode Pa Yes Roma Rom--Romans 10:12

Saveeŋ tane iŋarui tamtamon tisov. Yes Yuda, ve yes tau Yuda mako na paam. Pasaa, Maaron eemon ilepleep. I Tiina to iit tasov. Ve i ighurghur poia tooni tiina izazaa to tamtamon tisov tau tighasoni pa uleeŋ. Mbaŋ 10:34+; Ro 3:22, 29; Ga 3:28

Rau Tau Paulus Iboode Pa Yes Roma Rom--Romans 10:4

Eemon Krisi igham tutuuŋ to Mose anooŋa ivot wa. Tauvene eez to taghoniiŋ tutuuŋ ilam imuul izi tooni. Pasaa, tamtamon tisov tau tighur ila tooni na, timin tamtamon duduŋazi ila Maaron maata. Mt 5:17; 2Kor 3:6; Ga 3:24+; Hib 8:13

Rau Tau Paulus Iboode Pa Yes Roma Rom--Romans 2:1

Aiyo, yo sei ta ugagabiiz tamtamon ve ughe yes sasaghatizi na, yau leg saveeŋ payo paam. Pasaa, ŋgar tau yes tighamghamu na, yo ughamghamu paam. Tauvene saveeŋ tau usiki pazi na, ene imuul pa taum. Ve yo irau upasakaal taum mako. Pasaa, yo ughamgham sosor raraate imin yes. Mt 7:1+; Yo 8:7+

Rau Tau Paulus Iboode Pa Yes Roma Rom--Romans 3:30

Pasaa, Maaron eemon ta ilepleep. Ve i ighur eez eemon pa tamtamon tisov to tiduduuŋ ila i maata. Yes tau tirav warozi na, ve yes tau tirav warozi mako na paam. Eez eemon to tiduduuŋ ila Maaron maata, ene ghuruuŋ ila toozi. Mbaŋ 15:9+; Ro 4:11+; Ga 3:8

Rau Tau Paulus Iboode Pa Yes Roma Rom--Romans 4:16

Tauta Maaron igham poghani ghiit, ve ighur leen eez ite to taghita saveeŋ mbuaaŋ tooni anooŋa. Ene ghuruuŋ ila toit. Pasaa, ŋgar tooni iyaryaaŋ ighe le saveeŋ mbuaaŋ tooni ighur anooŋa pa Abaram paaghu tooni tisov. Yes Yuda tau titaghon tutuuŋ to Mose na, ve yes tau Yuda mako tau titaghon Abaram pa ghuruuŋ ila tooni na paam. Pasaa, iit tasov tau taghur ila to Krisi na, Abaram imin tamaan. Ro 3:24, 15:8; Ga 3:7,22

Rau Tau Paulus Iboode Pa Yes Roma Rom--Romans 8:1

Saveeŋ naol tau nasavia ila wa, ene puughu tauvene: Iit tau tapaak Yesu Krisi ne, aazne leen puughu eta to Maaron ighur atuya pait mako. Pasaa, Maaron Avuvu tau taghamgham lepoogh poia ila tooni na, tapiri ipas ghiit pa ŋgar saghati ve mateegh tapiri wa. Yo 8:36; Ro 6:18, 8:33+

Rau Tau Paulus Iboode Pa Yes Roma Rom--Romans 9:30

Tauvene pale tasaav mindai? Nugh nugh tau muuŋ tizuari zi to tiduduuŋ ila Maaron maata mako, tauta aazne tighur ila to Krisi, ve i igham zi tiduduuŋ ila Maaron maata wa. Ro 1:16+, 3:22, 4:5; Ga 2:16; Pil 3:9

1 Korin 12:13

Pasaa, iit tamtamon maata maata. Siriv, yes Yuda, siriv Grika. Siriv, besooŋa. Ve siriv, besooŋa mako, tiŋgin tauzi. Eemon saawe tau tagham yaa, ila uraat to Maaron Avuvu eemon, iit tamin Krisi le. Ve Avuvu tawe ta ilup ghiit tamin Krisi anooŋa eemon. Ve Maaron igham Avuvu eemon pa iit tasov. Avuvu tawe imin yaa maata yaryaare pait ve ipapalot ghiit. Yo 7:37+; Ga 3:28; Kol 3:11

1 Korin 4:7

Laak, yo tau upakur taum na, sei igham ghom uliiv zetamŋa? Ve saa gabua ta yo ughamu ivot ila taum tapirim? Mako. Gabua tsio tisov tomania saa ŋgar poia tau igheen tsio, ena yo ughamu ila to Maaron. Ighe tauvene, puughu mindai ta ugham tinim ve upakur taum imin ŋgar tomania gabua tsio ivot ila to yo taum? Yo 3:27; Yems 1:17; 1Pe 4:10

Galesia 2:16

Eemon iit tawatagh: Ŋgar to taghoniiŋ tutuuŋ, ene irau igham tamtamon eta iduduuŋ ila Maaron maata ne mako. Ghuruuŋ ila toit tau iŋarui Yesu Krisi, tauta imin eez pait gha taduduuŋ ila Maaron maata. Puughu tane ta iit taghur ila to Yesu Krisi, leso igham ghiit taduduuŋ ila Maaron maata. Ve eez to taghoniiŋ tutuuŋ, ene tanumeera muul mako. Pasaa, tamtamon eta irau itaghon duduŋai tutuuŋ to Maaron, ve ighamu iduduuŋ ila Maaron maata ne mako. Mbaŋ 13:38+; Ro 3:20,28; Ga 3:11

Galesia 2:20

Tauvene lepoogh tsiau tau aazne naghamu izi taan, ene taug naŋgini muul mako. Krisi tau ilepleep ila lolog ne, tauta iŋgin lepoogh tsiau. Tauvene yau naghur ila to Maaron Naatu tau ighur loolo payau kat, ve ipul tauu gha imaat payau. Ghuruuŋ ila tsiau tane, tauta aazne ighamgham pooz payau pa lepoghag to taan. Ro 6:6,11, 7:6; 2Kor 5:15

Galesia 3:22

Eemon mako. Pasaa, Maaron aliiŋa tau tiboode na, isaav ghazooŋa tauvene: Ŋgar saghati ikau iit tasov, le tamin yes tau tileep ila ruum to yavyavuuŋ loolo. Saveeŋ tane ipaghazoŋai ghiit pa sosor toit. Leso taghur ila to Yesu Krisi, ve ghuruuŋ ila toit imin eez pait to taghita saveeŋ mbuaaŋ to Maaron anooŋa. Mbo 14:3; Ro 3:9+

Galesia 3:28

Ve yam asov raratemim ila Maaron maata. Isaav ighe yam Yuda, ma Yuda mako, ma yam besooŋa sorok, ma yam besooŋa mako ve aŋgin taumim, ma yam zilivaa, ma zitamoot, gabua naol tauvene, iit tagham ŋgar pani sov. Pasaa, yam aleep ila to Yesu Krisi, ve i ilup gham asov amin eemon wa. Yo 10:16; Ro 10:12+; 1Kor 12:13; Kol 3:11

Epesus 3:12

Tauvene iit tau taghur ila to Krisi ve tapaak ila tooni ne, irau tala tagharau Maaron ve tasavsaav tomania. Taroi sov. Pa iit tawatagh: Gabua eta ipoon ghiit pani muul mako. Yo 14:6; Ro 5:2; Ep 2:18; Hib 10:19

Pilipai 3:9

Leso saawe to Mboŋ Murei, mako Maaron ighit ghau ighe yau tamtamon to Krisi. Tauvene ŋgar popoia naol tau nagham zi itaghon tutuuŋ ne, yau nanumeer eta to igham ghau naduduuŋ ila Maaron maata ne mako. Yau nanumeer Krisi mon. Isaav ighe naghur ila tooni, i pale igham ghau naduduuŋ ila Maaron maata. Ro 1:17, 3:21+, 10:3+

Kolosi 3:11

Iit tau Krisi igham ghiit tamin paaghu na, tasov rarateen mon. Eta poia iliiv iitete ne mako. Tauvene isaav ighe iit Grika, ma iit Yuda, ma tataghon ŋgar to ravuuŋ tamtamon warozi, ma tataghoni mako, ma mataan dodoli ve takankaan pa saveeŋ Grik, ma talam pa taan sirivu to Sikitia, ma iit besooŋa tau taleep ila daaba toit sambazi, ma iit mbesooŋa mako ve taŋgin tauun, gabua isov tane, ene gabua sorok. Ve Krisi tau ileep ila tamtamon tooni tisov lolozi ne, i mon ta gabua tauu. Ro 10:12; 1Kor 7:19; Ga 3:28

Yakobus 2:23

Tauta Maaron aliiŋa ziiri ee tau tiboode na, ighur anooŋa. Saveeŋ tauvene: “Abaram ighur ila to Maaron. Tauta Maaron ighita ighe i ŋeer duduuŋa.” Gnp 15:6; Ro 4:3 Puughu tane ta tiwaat Abaram tighe i Maaron eeta. Is 41:8